Eksotus Nuarin-tas alupas 35.
Nuarin-tas alupas 35.
1 Nadiat atumop. 4 Niji itai tup ahtai va neom atga. 20 Era auroauro natimi par ahtai itai. 30 Et aniv Besaliil im Aholiab a Atua va nauritai iyehki.
1IS asjapicnaig nup Isreel asega a Moses, um ika ehele ra, Et mun tas alep a Ihova, um ika, Akumu imiaiji intas iji igki aijaua.
2Akumu ago nauritai aijaua ira adiat et siks, ja etpu itap nadiat sevend vai caua, nadiat atumop u Ihova nigki: aien et ago nauritai iran aien, uhmu atgei yin.
3Akumu jim adgan cap iraili eom unyimia aijaua an nadiat atumop.
4Is tas a Moses ehele nup Isreel asega, um ika, Intas alep u Ihova nigki, nikavaig,
5Akumu lucsei niji itai tup ahtai vai Ihova aijaua: aien et eti imiaaij itai aien, etmu imiapan nitai tup ahtai vai Ihova aien; nikavaig, colt, im silver, im bras,
6im napelumai emilmat, um umjigumjig, um cap, im napelumai yilyil, im numri anin,
7im narasi siip atamaig eris ago cap, im narasi kuri et amen an jap, im incai sitim,
8im narakei urin cap alahala, im nide cai auanipin upene uri narakei aspi, im lep nitai auanipin upene er atnamud,
9im inhat oniks, im niji hat eri ikni irai efot im lep irai itai adahpoi inriti Eron.
10Erumu ahtag pam a ilpu atimi arapakau asega iramia, um ago nitai iji igki asega is asaig a Ihova;
11neom atga, im napelumai urin, im nitai adahpoi, im niji itai ahtehgaig, im inuari cai, im nakaukau, im nauicai aduwi, im nededuon,
12im nelcau, im inceen inyi ero, im nitai atapnes, im napelumai adahpoi,
13im nefata, im inceen inyi ero, im nipjiitai asega urin, im nareto er ehvaig,
14im nitai atijai incap alahala iran im niji itai urin, im lamp urin, im narakei urin cap alahala,
15im natau er atni nitai auanipin upene iran, im inceen inyi ero, im narakei aspi, im nitai auanipin upene, im napelumai atapin neucse neom atga,
16im natau uri iji itai ahlap er atnamud, im nilidiye bras urin, im inceen inyi ero, im niji itai asega urin, im nipjinitai ereuc iran im intapnes,
17im napelumai atapin urin nokoro, im nauicai aduwi, im nededuon, im napelumai atapin neucse nah,
18im neel cai urin neom atga, im neel cai urin tapin, im niji jaula urin,
19im napelumai ago itai iran, par ago nauritai iran an nuarin itap, im napelumai itap imi Eron natimi ahlap, im napelumai imi ilpu halav atamaig o un par ago nauriitai u ilpu atimi ahlap iran.
20Eris ahes ehele Moses a nup Isreel asega um atga ura.
21Eris apan ara asega is emda inliinmopora ara, im lep ra asega is merit, inliinmopora ara, um lucsei niji itai tup ahtai ura imi Ihova, va nauritai an neom er asjapicnaig o un, im nauritai asega iran, im napelumai itap.
22Eris apan a ilpu atamaig asega iji ig, im ilpu takata asega iji ig, is merit inliinmopora ara, um lucsei nethado ura, im inteijeg ura, im nethado imi ikmara, im niji itai yecrei ura, im niji itai colt asega ura: eris alupai Ihova nitai tup ahtai irai colt ara sji igki asega, eris alupai niji itai tup ahtai ara.
23Ara asega is ura napelumai emilmat, um umjigumjig, um cap, um yilyil, im numri anin, im narasi siip atamaig eris ago cap, im narasi kuri et amen an jap, eris imiapan ara.
24Ara asega eris alupai itai tup ahtai ara irai silver im bras, eris imiapan itai tup ahtai imi Ihova ara: ara asega is ura incai sitim is upene par ago itai iran, eris imiapan ara.
25Eris ilohol irai ya irai ikmara a ilpu takata asega eris arapakau ara, um imiapan inuarin inig eris atpelaig ara, inya emilmat, um umjigumjig, um cap, um yilyil.
26Eris lep ilohol ira alau ira anin a ilpu takata asega is arapakau inliinmopora ara.
27Eris imiapan inhat oniks a ilpu atimi alupas, im inhat eri ikni irai efot, im lep nitai atapin inriti Eron;
28im nide cai auanipin upene, im narakei urin cap ahahala, im narakei aspi, im nitai auanipin upene.
29Eris imiapan niji itai tup ahtai imi Ihova a nup Isreel an liinmopora upene, ilpu atamaig asega im ilpu takata asega, is merit inliinmopora ara par imiapan itai va niji auritai asega, is asaig a Ihova ehele Moses mika eri ago.
30Is ika a Moses ehele nup Isreel, Is idim ahlaig vai Besaliil a Ihova um anvi nidan, et hal u Urai aien, inhal u Hur, im mapoi Juta;
31is ati alupas ehelen Nesgai Atua aien, mika yi arapakau aien, um amarero, um ato par ago niji auritai asega;
32um aktaktai niji auritai ehka, um auritai irai colt, im silver, im bras,
33um ahumiai hat par ikni irai itai, um ucsei nalmuitai irai cai, um ago niji auritai ehka asega.
34Is alupai yin inliinmopon esege aien, im lep Aholiab, inhal u Ahisamak, im mapoi Tan.
35Is alupai rau inliinmoporau arapakau aien, mika eru ago niji auritai asega arau u ilpu atimi ucsei nalmuitai, im ilpu atimi arapakau, im ilpu atimi ijei nalmuitai ira apelumai emilmat, um umjigumjig, um cap, um yilyil, im ilpu atimi ahod apelumai, im lep ra era ago tah nauritai ara, im lep ra era aktaktai nauritai ehka ara.
Zvasarudzwa nguva ino
Eksotus Nuarin-tas alupas 35.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)