YAASINƆ 22
22
1Tↄ́ nnaa dɛ auzikila,
nna kↄ̃n gbɛ̃nↄo dɛ vura kↄ̃n kondogiola.
2Auzikidee kↄ̃n takaasideeo kãsãa dↄ̃nkↄ̃mɛ,
Dii bé à ń kɛ́ ń píngi.
3Làakaridee è gĩakɛ à à zaaa e à utɛnɛ,
ↄ̃ndↄ̃saidee ègↄ̃ gaa ai à wɛ́ɛtãmma e.
4Zĩndabusana kↄ̃n vĩakɛna Diinɛo gbɛ̀n
auziki kↄ̃n bɛ̀ɛo kↄ̃n wɛ̃̀ndio ũ.
5Lɛ̀ kↄ̃n takutɛɛo kú gbɛ̃ dↄ̀rↄsaide zɛ́n,
gbɛ̃ kɛ̀ ye aafiazi è kɛ̃ḿma.
6Ǹ nɛ́ féte da zɛ́ kɛ̀ dɛ à sɛ́a,
tó à ìsi kũ̀, eé kɛ̃aro.
7Auzikidee è gbãaa mↄ takaasideenɛ,
pↄ́sɛ̃kãri è zↄ̀ ble pↄ́deenɛ.
8Gbɛ̃ kɛ̀ à à zaaa tↄ̃̀, adee é yã e à kɛ̃gurↄ,
à pãsĩkɛgo é à gbɛ̃.
9Luda é aubarika da gbɛ̃ kɛ̀ gbɛ̃kɛɛ vĩin
kɛ̀ è pↄ́blee kpaatɛ takaasideenↄnɛ yãnzi.
10Ǹ pɛ́ faboria, swèe é mì dɛ,
yãkete kↄ̃n wío é yãa.
11Nↄ̀sɛpuradee kɛ̀ à lɛ́gbɛ nna
bé eégↄ̃ dɛ kína gbɛ̃nna ũ.
12Dii wɛ́ɛ ègↄ̃ tɛ́ dↄ̃nazi,
è mìkpɛɛ zu náanɛsaide yãnɛ.
13Mɛadee è be músu kú bàazi,
tó ma bↄ, eé ma dɛ gãalɛ.
14Kaarua lɛ́ nɛ́ wɛ̀ɛ zòotomɛ,
gbɛ̃ kɛ̀ Dii pↄↄ fɛ̃̀o è lɛ́ɛ à sin.
15Faasaiyã ègↄ̃ kú nɛ́nↄ swɛ̃̀n,
totona kↄ̃n flã̀o é tó aↄ̃ kɛ̃a.
16Gbɛ̃ kɛ̀ è wɛ́ɛ tã takaasideea lɛ à a auziki kaara
kↄ̃n gbɛ̃ kɛ̀ è gba da ↄↄdeenɛo, aↄ̃ píngi é kɛ̃sã.
Ɔ̃ndↄ̃deenↄ lɛ́damma
17Ǹ swã kpá ǹ ↄ̃ndↄ̃rinↄ yã'onnɛna ma,
ǹ n nↄ̀sɛ wɛ̃ ma yãdannɛnanɛ,
18zaakɛ à nna ǹgↄ̃ kũna n swɛ̃̀ guu,
àgↄ̃ kú n lɛ́mmɛ.
19Baa mpi, mɛ́ɛ yã daannɛ gbã̀a,
lɛ ǹgↄ̃ Dii náanɛ vĩ yãnzimɛ.
20Ma yã'onnɛna kɛ̃̀nnɛ mɛ̀n baaakuri,
yã pìnↄ lɛ́damma kↄ̃n dↄ̃nao vĩ.
21Mɛ́ɛ yãpuraa kɛ̀ náanɛ vĩi daannɛ,
lɛ ǹ e ǹ yã weńla a zɛ́amɛ.
22Ǹton gbãasaidee ble à gbãasaikɛ yãnziro,
ǹton gbãaa mↄ wɛ̃ndadeenɛ yãkpaɛkɛkiiaro,
23zaakɛ Dii é yã síńyo,
eé wɛ́ɛ tã gbɛ̃ kɛ̀ aↄ̃ↄe wɛ́ɛ tãaḿmanↄa.
24Ǹton gbɛ̃nna kpá kↄ̃n pↄfɛ̃rioro,
ǹtongↄ̃ tɛ́ kↄ̃n pɛ̃tɛ̃deeoro,
25lɛ ǹton à dà sɛ́ɛ
ǹ n zĩnda kpá yãziro yãnzi.
26Ǹton gbɛ̃ke fĩa di n musuro,
ǹton kpɛ́gaau sɛ́nɛro.
27Tó ń pↄ́ke vĩ ǹ fĩa booro,
weé n daɛbↄ sɛ́ n gĩzĩ.
28Ǹton tↄↄtɛ lɛ́ sèeda zii wurɛro,
n dezinↄ bé aↄ̃ pɛ̀ɛ.
29N gbɛ̃ kɛ̀ à a zĩi dↄ̃ maamaaa èↄ́?
Adee é zĩi kɛ kínanↄnɛ,
èe kɛ talakanↄn eé kɛńnɛro.
Zvasarudzwa nguva ino
YAASINƆ 22: BBB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Bokobaru Bible with New Testament and OT Portions © Sim International, 2005.