मत्ती 28
28
येशू मुवलमसे फेदोस्र जिलक
मर्कूस १६:१-११; लूका २४:१-१२; यूहन्ना २०:१-१८
1बिसैना दिनिक द्वासर दिन, अट्वारक बिहान अजरार हुइल् त, मगदाला सहरक मरियम ओ और मरियम येशूह ढरल गर्या ह्यार गैल।
2उह समयम एकचोट्टे भारी भुइँचाल गैल, स्वर्गसे परमप्रभुक पठाइल एकठो स्वर्गदूत अइल ओ गर्यक मोह्टमसे पत्थ्रा उस्टाक ओइहेँम बैठ्ल। 3हुँकहार रूप बिज्लीअस चह्कार ओ लुगाजुन हिउँअस उज्जर रलहन। 4गर्या कुरुइयनजुन डरकमार लग्लगैटी भूइँयम गिर्ल ओ मुवलअस होगैल।
5स्वर्गदूत जन्नीमनैन कल, “जिन डराओ, महीह थाहाँ बा, टुह्र क्रूसम मुवापाइल येशूह ख्वाजटो। 6येशू यिहाँ नैहुइट। आपन कहलअस उहाँ त मुवलमसे जिरल। आक उहाँक लाश ढरल ठाउँ हेरो ना! 7आब झट्ट जाओ ओ उहाँक चेलन ‘प्रभु त मुवलमसे फेदोस्र जिरल। उहाँ टुँहनसे आघ गालीलम जैटीबाट, टुह्र उहाँह उहँ देख्बो’ कैक खबर देओ! मै टुँहन यिह कह अइनहुँ।”
8उ जन्नीमनैन डर-डर फे लग्लन, ओ एकदम खुशी फे लग्लन। हुँक्र गर्यमसे निक्रल ओ उहाँक चेलन स्वर्गदूतक कहल बात जनाइक लाग दगुर्टी गैल।
9येशू हुँकन एकचोट्टे भेँटैल ओ अभिवादन कर्ल। तब हुँक्र उहाँक पाउ पकर्क उहाँह दण्डवत कर्ल। 10येशू हुँकन कल, “जिन डराओ, जाओ ओ म्वार चेलन गालीलम जाइक लाग कैदेओ। हुँक्र महीह उहँ देखहीँ।”
गर्या कुरुइयन्हक खबर
11उ जन्नीमनै येशूक चेलन खबर देह गैल् ब्याला, गर्या कुर बैठल कुछ सिपाहीहुँक्र सहरम जाक उहाँ हुइल् सब घट्ना मुख्य पूजारीन्हकठे बट्वादेल। 12मुख्य पूजारीहुँक्र और अगुवन्हकसँग जम्मा होक सरसल्लाह कर्ल। हुँक्र आपन बनाइल योजना अनुसार सिपाहीहुँकन धेर घूस देटी कल, 13“टुह्र ‘रात्क हम्र निन्दाइल ब्याला येशूक चेलावँ आक वाकर लाश चोर्क लैगिल’ कहहो हाँ। 14यदि शासक यी बात सुन्डरहीँ कलसे, हुँकहीन मनुइया हम्र बाटी, टुँहन याकर बारेम कुछु चिन्ता कर नैपरी।” 15उ सिपाहीहुँक्र पैँसा लेल ओ मुख्य पूजारीन्हक सिखाइल अनुसार कर्ल। यहूदीन्हक बीचम आझुक दिनसम फे यी बात फैलल् बा।
महान आज्ञा
16एघार जन चेलावँ येशू हुँकन कहल अनुसार गालीलम रहल पर्वत्वम गैल।#मत्ती २६:३२; मर्क १४:२८ 17येशूह देख्ल त हुँक्र उहाँह दण्डवत कर्ल, तर कत्रा जहनजुन येशू हुइट कि नाहीँ कैक शङ्का लग्लन। 18तब येशू हुँकन्हकठे जाक कल, “हेरो, स्वर्ग ओ पृथ्वीम सारा अधिकार महीह देगैल् बा। 19आब सब जातिक मनैन्हकठे जाक हुँकन चेला बनाओ, ओ बाबा, छावा ओ पवित्र आत्मक नाउँम हुँकन बप्तिस्मा देओ।#प्रे १:८ 20ओ मै टुँहन देहल सारा आज्ञा हुँकन पालन कर सिखाओ। मै संसारक अन्त्य हुइना दिनसम फे टुन्हकसँग पलरहुइयाबाटुँ।”
Zvasarudzwa nguva ino
मत्ती 28: thl
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2020, Wycliffe Bible Translators, Inc. All rights reserved.