रोमी 8
8
पबित्र आत्मां करै ज़िन्दगी
1ऐबै ज़ुंण ईशू मसीहा दी विश्वास करा तिन्नां लै निं सज़ा हणीं। तिंयां निं देहीए साबै ज़िन्दगी काटदै पर तिंयां ज़िऊआ पबित्र आत्में साबै ज़िन्दगी। 2पबित्र आत्मां दैणीं तम्हां लै ज़िन्दगी ज़ुंण मसीहा ईशू करै भेटा अर तेता करनै तम्हैं पाप अर मौता का आज़ाद।
3किल्हैकि ज़ुंण काम मोसा गूरो बधान म्हारै पापी सभाबा करै नांईं करी सकअ, सह काम किअ परमेशरै, मतलब तेऊ छ़ाडअ आपणअ पूत एऊ संसारै ताकि सह म्हारै पाप दूर करी सके। तेऊ धरी एही देही ज़ेही देही हाम्हां पापी मणछा का आसा। सह आअ म्हारै पापा लै बल़ीदान हणें तैणीं। ज़ांऊं तेऊ इहअ किअ, तेऊ रहैऊअ कि म्हारै पाप आसा असली दी हाम्हां बरैबाद करनै आल़ै अर ज़ुंण बी पाप करा तेऊ लै भेटणीं सज़ा। 4परमेशरै किअ अह एते तैणीं कि हाम्हैं बधाने बिधी देहीए पापी सभाबे साबै नां करे पर हाम्हैं पबित्र आत्में साबै पूरी करे।
5किल्हैकि ज़ुंण मणछ देहीए पापी सभाबे बशै आसा सह सोठा पाप करनै आल़ी गल्ला, पर ज़ुंण पबित्र आत्में बशै रहा, सह सोठा तिन्नां गल्ला ज़ेता करै पबित्र आत्मां खुश हआ। 6देहीए पापी सभाबा दी मन्न लाणअ ता आसा मौत, पर आत्मां दी मन्न लाणअ आसा सदा लै ज़िन्दगी अर शांती।
7किल्हैकि देहीए पापी सभाबा दी मन्न लाणअ आसा परमेशरा संघै ज़ीद डाहणीं किल्हैकि देहीओ पापी सभाब नां परमेशरे बधाने डरा हेठै आथी अर नां सह तेऊए बधाना मनी सकदअ। 8ज़ुंण देहीए पापी सभाबे बशै आसा, तिंयां निं परमेशरा खुश करी सकदै।
9पर ज़ै तम्हां दी परमेशरो आत्मां बस्सा, तै निं तम्हैं देहीए पापी सभाबे बशै आथी पर तम्हैं आसा पबित्र आत्में बशै। ज़ै कहा दी मसीहे आत्मां नांईं आथी, तै निं सह मसीहो आथी। 10च़ाऐ थारी देही पापा करै मरे बी, ज़ै मसीहा तम्हां दी बस्से तै दैणीं पबित्र आत्मां तम्हां लै ज़िन्दगी किल्हैकि तम्हैं आसा परमेशरा संघै धर्मीं बणाऐं दै।
11परमेशरे आत्मां ज़ुंणी ईशू मसीहा मरी करै ज़िऊंदअ किअ, ज़ै सह तम्हां दी बी बस्सी दी होए, थारी मरणहार देही बी करनी परमेशरा आपणीं आत्मां करै ज़िऊंदी ज़ुंण तम्हां दी बस्सी दी आसा।
12तै ए मेरै भाईओ, हाम्हैं निं ऐहा खतम हणैं आल़ी देहीए ऋणी आथी, कि हाम्हां लागा ऐहा ई देहीए पापी सभाबे साबै ज़िन्दगी काटणी।
13शूणां, ज़ै तम्हैं ऐहा आपणीं देहीए पापी सभाबे साबै ज़िन्दगी काटे, तम्हैं हणैं परमेशरा का दूर, पर ज़ै तम्हैं पबित्र आत्में शगती करै आपणीं देहीए पापी सभाबा मारी पाए, तै रहणैं तम्हैं ज़िऊंदै। 14तैही ज़ेतरै बी लोग परमेशरे आत्में साबै ज़िन्दगी काटा, तिंयां ई आसा परमेशरे लुआद।
15किल्हैकि तम्हां निं एही आत्मां आथी भेटी दी ज़ुंण तम्हां गलाम बणांए ज़हा डअर हआ लागी दी। पर तम्हां आसा पबित्र आत्मां भेटी ज़ुंणी तम्हैं आपणीं लुआद हणां लै भोसल़ै ढाकै। ज़हा लै हाम्हैं बाबा, बाबा बोली हाक्का लाआ। 16पबित्र आत्मां परखा ऐहा गल्ला आप्पै कि म्हारी आत्मां किज़ै बोला, कि हाम्हैं आसा परमेशरे लुआद। 17ज़ै हाम्हैं तेऊए लुआद आसा, तै हणैं हाम्हैं बरासते हकदार बी। इधी तैणीं कि परमेशरे बरासते हकदार अर मसीहे संघै बरासते हकदार। ज़ै हाम्हैं तिहै दुख ज़िरे ज़िहै ईशू दुख ज़िरै, तै हणैं हाम्हैं ईशू मसीहे प्रतप्पा दी बी साझ़ू।
आजू प्रगट हणैं आल़अ प्रतप्प
18हुंह, समझ़ा इहअ कि ज़ुंण ईंयां दुख अर सांगट हाम्हैं एभै ज़िरा, ईंयां निं तेऊ प्रतप्पा सम्हनै किछ़ बी आथी ज़ुंण हाम्हां लै आजू आसा प्रगट हणैं आल़अ। 19किल्हैकि सारअ संसारा आसा आशा अर संसार आसा तैहा धैल़ी न्हैल़ी-भाल़ी लागी दी ज़ेभै परमेशरा अह गल्ल प्रगट करनी कि तेऊए असली लुआद कुंण आसा।
20किल्हैकि संसार निं तैहा गल्ला पूरी करी सकअ ज़ुंण परमेशर च़ाहा त। इहअ करै लागअ सोभी लै परमेशरो फिटक, इहअ निं कि तिंयां च़ाहा तै इहअ, पर परमेशरै दैनअ इहअ हणैं, तज़ी बी आसा तेथ आशा। 21परमेशरै बणाअं द संसार आसा तैहा धैल़ी न्हैल़अ लागअ द ज़ेभै तिंयां मौत अर बनाशे गलामी का छ़ुटी प्रतप्पा आल़ी आज़ादी दी परमेशरे लुआदा संघै साझ़ू होए।
22हाम्हां का आसा थोघ कि ज़धा ओर्ही पाप शुरू हुअ तधा ओर्ही आझ़ तैणीं आसा परमेशरै बणाईं दी सोभै गल्ला आसा एही दुख दाह दी धकदै लागै दै ज़ेही बेटल़ी सूंणें दाह लागा। 23हाम्हैं विश्वासी बी ज़हा का परमेशरो पैहलअ दान पबित्र आत्मां आसा हाम्हैं बी आसा दाह दी चाछल़दै लागै दै। हाम्हैं बी आसा न्हैल़ै लागै दै कि परमेशर हाम्हां आपणीं लुआद बणांए अर हाम्हां लै पराणीं देही का छ़ुटकारअ दैई नऊंईं देही दैए।
24ज़ेभै हाम्हैं परमेशरै बच़ाऊऐ तेभै दैनी तेऊ हाम्हां लै आशा। ज़ै तम्हैं तिन्नां गल्ले आशा करे ज़ुंण तम्हां का पैहलै ई आसा, तेता लै निं आशा डाहणीं बोल्दै अर तै निं कोही आजू आशा डाहणीं। 25पर अज़ी निं हाम्हां तिंयां सोभै गल्ला भेटी ज़ुंण हाम्हां लै परमेशरै आसा दैणीं किई दी, तैही आसा हाम्हां अज़ी बी तिन्नां गल्ला भेटणें आशा। हाम्हैं करा सबर अर हाम्हैं रहा तिन्नां गल्ला तेभै तैणीं न्हैल़ै लागी ज़ेभै तैणीं हाम्हां तिंयां भेटी निं जाए।
26ठीक इहअ ई करा पबित्र आत्मां म्हारी मज़त ज़ेभै म्हारअ परमेशरा दी विश्वास कमज़ोर हआ। हाम्हां का निं थोघै कि प्राथणां केऊ साबै करनी। पर पबित्र आत्मां का आसा थोघ अर सह करा आप्पै हाम्हां एही हिक्की-सल़िक्की प्राथणां कि तिंयां गल्ला खोज़णीं आसा मेरै बशा का बागै। 27परमेशर ज़हा का सोभिए दिलो थोघ आसा तेऊ का हआ इहअ बी थोघ कि पबित्र आत्मां किज़ै बोला? किल्हैकि सह करा पबित्र मणछा लै परमेशरे मरज़ी दी हाम्हां लै अरज़।
28हाम्हां का आसा ऐहा गल्लो थोघ कि ज़ुंण लोग परमेशरा संघै झ़ूरी करा, तिन्नां लै करा परमेशर सोभी गल्ला भलाई पैईदा, मतलब तिंयां ई ज़ुंण परमेशरै आप्पू लै आसा छ़ांटै दै। 29किल्हैकि ज़सरै बारै परमेशरा का पैहलै ई का थोघ आसा, तेऊ छ़ांटै तिंयां आपणैं पूता ज़िहै हणां लै, ताकि सह तेऊओ शोहरू सोभी भाई-बैहणी मांझ़ै ज़ेठअ होए। 30तेखअ ज़ुंण तेऊ तिंयां पैहलै ई का आसा छ़ांटै दै, तिंयां आसा तेऊ आप्पू सेटा लै शादै दै बी, अर ज़ुंण तेऊ शादै दै आसा तिंयां बणाऐं तेऊ आप्पू संघै धर्मीं बी, अर ज़ुंण तेऊ धर्मीं आसा बणाऐं दै तिन्नां लै आसा प्रतप्प बी दैनअ द।
परमेशरे झ़ूरी का निं हाम्हां कोहै ज़ुदै करी सकदअ
31इना सोभी गल्लो नचोल़ निखल़ा इहअ कि, ज़ै परमेशर हाम्हां बाखा होए, तै निं हाम्हां का कोहै ज़िती सकदअ।#भज. 118:6
32परमेशरे किई हाम्हां लै एही झींण कि ज़हा पूता संघै परमेशर सोभी का खास्सी झ़ूरी बी करा थिअ, सह बी दैनअ तेऊ हाम्हां सोभी बच़ाऊंणा लै, ज़ै परमेशर इहअ सका करी, तै सह होर सोभै गल्ला कै हाम्हां लै दैई निं सकदअ?
33परमेशरा सेटा निं हाम्हां लै कोहै दोश लाई सकदअ किल्हैकि तेऊ परमेशरै आसा हाम्हैं आप्पू संघै धर्मीं बणाऐं दै। 34हाम्हां लै निं ऐबै कोहै सज़ा दैई सकदअ किल्हैकि प्रभू ईशू ई आसा ज़ुंण म्हारी तैणीं मूंअ अर म्हारी तैणीं मरी करै भिई हुअ ज़िऊंदअ अर सह ई आसा परमेशरे दैहणीं बाखा सोभी का बडी पदबी दी बेशी हाम्हां बाखा परमेशरा सेटा अरज़ करनै आल़अ।
35मसीहे झ़ूरी का निं हाम्हां कोहै ज़ुदै करी सकदअ। नां खरी, नां सांगट, नां उपद्रभ करनै आल़ै, च़ाऐ देशै नकाल़ होए, च़ाऐ हाम्हां का बान्हणां लै झिकल़ै निं होए, च़ाऐ हाम्हां लै खातरअ होए, च़ाऐ हाम्हां कुंण तलबारा करै काटे! 36ज़िहअ पबित्र शास्त्रा दी बी आसा लिखअ द,#भज. 44:22
“ताह पिछ़ू पाआ लोग हाम्हां कबल्लै मारी,
हाम्हां संघै हआ तिन्नां भेडा ज़िहअ बर्ताअ ज़ुंण काटणा लै हेल़्ही का ज़ुदी हआ डाही दी।”
37पर इना सोभी डरैऊंणी गल्ला दी गऐ हाम्हैं तेऊ करै ज़िती ज़ुंण हाम्हां संघै झ़ूरी करा।
38किल्हैकि मुखा आसा थोघ कि नां मौत, नां ज़िन्दगी, नां स्वर्ग दूत, नां जमदूत, नां एभै, नां आगली ज़िन्दगीए फिकर, नां शगती, नां उछ़टी ज़ैगा, 39नां डुघी ज़ैगा, नां कोई होर संसार हाम्हां परमेशरे झ़ूरी का ज़ुदै करी सकदै, ज़ुंण म्हारै प्रभू ईशू मसीहा दी आसा।
Zvasarudzwa nguva ino
रोमी 8: OSJ
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.