रोमी 12
12
परमेशरे च़ाकरी करने ज़िन्दगी
1भाईओ, हुंह करा तम्हां का परमेशरै झींण आद फरेऊई करै अरज़ कि परमेशरा सम्हनै करा आपणीं ज़िन्दगी ज़िऊंदै बल़ीदाना ज़िहअ पबित्र बल़ीदान अर ज़ुंण परमेशरा बधिया लागा। अह ई आसा तेऊए च़ाकरी करने असली बात।
2एऊ संसारे मणछा ज़िहै निं हआ, थारै मन्नां बदल़णैं संघै लोल़ी थारअ च़ाल-च़लण इहअ ठीक हुअ ज़िहअ परमेशर च़ाहा। ताकि तम्हैं इहै काम करे ज़ुंण ज़ेता करै परमेशर खुश हअ अर ज़ुंण काम भलै अर सिध्द आसा।
आत्मिक बरदाना करै परमेशरे च़ाकरी
3किल्हैकि मुंह परमेशरा का ज़ुंण जश आसा भेटअ द, हुंह बोला तेता पिछ़ू तम्हां सोभी लै इहअ कि ज़िहअ समझ़अ लोल़ी तेता का ज़ादै निं तम्हैं आप्पू समझ़ी। पर ज़िहअ परमेशर थारै विश्वासे साबै बांडी आसा दैनअ द तम्हैं समझ़ा आप्पू तेते साबै।
4किल्हैकि ज़ेही म्हारी ऐहा एकी देही दी कई आंग आसा, ईंयां निं सोभै एकी रंगो काम करदै। 5तिहअ ई हाम्हैं बी ज़ुंण मसीहा दी विश्वासी आसा, हाम्हैं बी हआ तेऊए देही ज़िहै, अर हाम्हैं आसा तेते आंग अर हाम्हैं आसा एकी-दुजै संघै साझ़ू।
6परमेशरै ज़ेही झींण हाम्हां लै किई तेता करै आसा हाम्हां होरी-होरी रंगे बरदान भेटै दै। तेऊ लागा तिंयां गल्ला बोल़णीं ज़ुंण सह विश्वास करा कि परमेशरै खोज़ी तेऊ का। 7ज़ै होरीए मज़त करनैओ बरदान आसा भेटअ द, तै रहै मज़त करदअ लागी। ज़ै कुंण सखाऊंणै आल़अ आसा, सह रहै सखाऊंदअ लागी। 8ज़ुंण गूरू आसा, सह रहै शिक्षा दैंदअ लागी। दान दैणैं आल़अ दैऐ दिल खोल्ही करै दान। ज़ुंण परमेशरै सोभिओ सैणअ आसा बणाअं द सह रहै तन-मन्न लाई करै इंतज़ाम करदअ लागी, ज़ुंण झींण करी होरीए मज़त करा सह रहै खुशी-खुशी तेथ लागी।
विश्वासीओ बभार
9लोगा लै झ़ूरी करना लै निं लोल़ी मन्नैं कपट हुअ, बूराई का करै नफरत अर भलाई दी रहा लागी।#आम. 5:15
10एकी-दुजै संघै डाहा एही झ़ूरी कि तम्हैं आसा आप्पू मांझ़ै एक टबर, आप्पू मांझ़ै अदर करना लै रहा एकी-दुजै लै आजू।
11नज़ाहणै निं हणअ काम-काज़ रहणअ करदै लागी, तत्त-दिला का रहा प्रभूए च़ाकरी करदै लागी। 12ज़ुंण तम्हां आशा आसा तेता लै रहा खुश अर खरी दी कर सबर अर प्राथणां दी रहा हर बगत लागी। 13पबित्र लोगा ज़ेही ज़रुरत होए तेता लै करनी तिन्नें मज़त, अर प्राहुंणच़ारी रहा करदै लागी।
14ज़ुंण तम्हां लै दुख दैआ तिन्नां लै बी दैआ बर्गत, फिटक निं दैणअ बर्गत दैणीं। 15नंद करनै आल़ै संघै करा नंद अर लेरनै आल़ै संघै लाआ लेरा।#भज. 35:13
16ज़िहअ भलअ तम्हैं आप्पू लै सोठा तिहअ सोठणअ दुजै लै बी, घमंडी निं हणअ पर गरीब आम लोगे संगती दी रहणअ अर आप्पू लै निं इहअ समझ़णअ कि हुंह आसा होरी का खास्सअ समझ़कार।#सैणीं. 3:7; ईशा. 5:21
17बूराईए बदल़ै निं कोही संघै बूराई करा, तिन्नां गल्ले फिकर करा ज़ुंण गल्ला सोभी लोगा लै भली आसा। 18ज़िधी तैणीं हई सका तम्हैं करै सोभी लोगा संघै मेल़-ज़ोल़ डाहणें कोशिश।
19मेरै पैरै भाईओ, आपणअ बदल़अ निं लई, परमेशरा दैआ थारअ बदल़अ आप्पै लणैं। किल्हैकि पबित्र शास्त्रा दी बोला प्रभू इहअ,#बधा. 32:35
“बदल़अ लणअ आसा मेरअ काम,
परमेशर बोला इहअ,
‘मुंह लणअ बदल़अ आप्पै।’”
20पर पबित्र शास्त्र बोला इहअ,#सैणीं. 25:21-22
“ज़ै तेरअ दुशमण भुखअ होए, तेऊ का लऐ रोटी खैऊई,
ज़ै सह नचिशअ होए, तेऊ लै दै झुटणा लै पाणीं।
किल्हैकि तेरै एऊ कामां करनै करै हणअ सह आप्पै इहअ शर्मिंदअ
ज़िहअ कि तेऊए मुंडै लाअ ज़ल़दै कोयलेओ रूल़।”
21बूराई करी निं ज़िती, पर भलाई करी पाआ बूराई दी ज़ीत।
Zvasarudzwa nguva ino
रोमी 12: OSJ
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.