मत्ती 22
22
धामा खाणां लै छ़ांदअ
(लुका 14:15-24)
1एसा गल्ला समझ़ी लागअ ईशू तिन्नां का होर बी कथ्या खोज़ी गल्ला करदअ। 2ईशू बोलअ, “स्वर्गो राज़ आसा तेऊ राज़ै ज़िहअ ज़ुंणी आपणैं शोहरूए बैहा लै बडअ भोज़ दैनअ। 3ज़ांऊं धाम खाणां लै तैर गई हई ता तेऊ दैनअ आपणैं टैहलू का सोभी लै छ़ांदअ कि ‘एछा, धाम गई बणीं।’ पर तिंयां निं आऐ।
4 “तेखअ छ़ाडै राज़ै भी आपणैं टैहलू लोगा लै शधाणूं कि ज़हा लै छ़ांदअ आसा किअ द तिन्नां लै बोला इहअ कि हेरे, मंऐं हेरी धाम खाणां लै तैर करी और खुढै धाचै दै गाभू-छ़ेल्हू हेरै मंऐं काटी और सोभ गल्ला गई बणीं, तम्हैं एछा ऐबै धामा खांदै एभी। 5पर तिन्नैं निं तेसा गल्ले परबाह की तिंयां लागै हांढदै, कोई नाठै आपणैं खेचा लै और कोई नाठै आपणैं होरी काम-काज़ करदै। 6ता ज़ुंण एता का बच़ै, तिन्नैं की तिन्नां छ़ांदै करनै आल़ै टैहलूए ज़िदै मारै बेइज़ती और तिंयां पाऐ मारी।
7 “एता लै आई राज़ै रोशै और आपणीं फौज़ छ़ाडी करै तिंयां हत्या करनै आल़ै पाऐ मारी और तिन्नें नगरी घर बण और टबर किऐ बरैबाद। 8तेखअ बोलअ तेऊ आपणैं टैहलू लै, ‘बैहे धाम ता गई तैर हई और ज़हा लै छ़ांदअ किअ त तिंयां निं धामा खाणैं जोगी रहै। 9तम्हैं करा इहअ, बाता च़फै ज़ेतरै लोग तम्हां भेटे, तिन्नां आणा सोभी धामा खांदै शादी।’ 10तिन्नैं टैहलू बी किअ तिहअ ई। तिंयां सल़के बाढै और च़फै नाठै और कै भलै, कै बूरै, ज़ेतरै बी तिन्नां भेटै तिन्नैं किऐ तिंयां सोभ कठा और बैहे पांड हुई पाहुंणैं करै भरी।
11 “ज़ांऊं राज़अ पाहुंणैं भाल़अ भितरा लै आअ ता तेऊ भाल़अ एक मणछ तिधी इहअ कि तेऊ निं बैहे झिकल़ै आथी तै बान्हैं दै। 12राज़ै तेऊ का पुछ़अ, ‘हे साथी, तूह बैहे झिकल़ै बान्हैं बाझ़ी इधा लै किल्है आअ?’ सह हुअ च़ुप्पी। 13तेखअ राज़ै आपणैं टैहलू लै बोलअ, ‘एऊए हाथ खूर बान्हां और तेखअ पाआ एऊ न्हैरी खुडी दी, तिधी हणअ लेरनअ और दांद पिशणअ।’ 14किल्हैकि शादै दै ता आसा खास्सै पर छ़ांटै दै आसा थोल़ै।”
माहा राज़ै लै कारअ दैणअ
(मरकुस 12:13-17; लुका 20:20-26)
15फरीसी पंथे लोग लागै तिधा का डेऊई करै आप्पू मांझ़ै इहै जोग करदै कि हाम्हां करनअ किज़ै इहअ ज़ेता करै एऊ ईशू दी किज़ै दोश निखल़े? 16यहूदी छ़ाडै आपणैं च़ेल्लै हेरोदेस राज़े पक्ष लणै आल़ै लोगा संघै ईशू लै इहअ बोलदै, “हे गूरू, हाम्हां का आसा एसा गल्लो थोघ कि तूह आसा शुचअ। तूह सखाऊआ परमेशरे सत्त। तूह निं कोहिए परबाह करदअ और नां तूह कसा मणछे मुंहां भाल़ी गल्ला करदअ। 17तूह खोज़ हाम्हां का एसा गल्ला बारै, तूह हाम्हां लै कै राऐ दैआ, माहा राज़ै लै कारअ दैणअ ठीक आसा कि नांईं?”
18ईशू हेरी तिन्नें दिलो कपट समझ़ी और तिन्नां लै बोलअ, “हे कपटी मणछो, तम्हैं मुंह परखदै किल्है आसा लागै दै? 19तेऊ सिक्कै रहैऊआ मुखा ज़ेता लोग राज़ै लै कारअ दैआ।” तिन्नैं आणअ तेऊ सेटा एक च़ंदीओ सिक्कअ। 20ईशू बोलअ तिन्नां लै, “एऊ सिक्कै दी अह मुर्ति और नांअ कसरअ आसा?”
21तिन्नैं बोलअ, “एथ आसा माहा राज़ैओ नांअ और मुर्ति।”
तेखअ बोलअ ईशू तिन्नां लै, “ज़ुंण माहा राज़ैओ आसा, तेऊ दैआ माहा राज़ै लै। ज़ुंण आसा परमेशरो तेऊ दैआ परमेशरा लै।”
22एसा गल्ला शूणीं हुऐ तिंयां रहैन और तिंयां लागै ईशू छ़ाडी हांढदै।
मणछो भी ज़िऊंदै हणअ और बैह
(मरकुस 12:18-27; लुका 20:27-40)
23तेसा ई धैल़ी सदुकी ज़ुंण इहअ बोला कि मूंऐं दै मणछो भी ज़िऊंणअ निं आथी, तिंयां ईशू सेटा लै आऐ और तिन्नैं पुछ़अ, 24“हे गूरू, परमेशरे गूर मुसा आसा इहअ बोलअ द कि, ज़ै कुंण बाझ़ी आदी लुआदी हुऐ मरे, ता तेऊए बेटल़ी संघै सका तेऊओ भाई बैह करी और तेऊ लै सका लुआद पैईदा करी? 25ऐबै म्हारै तै एकी ज़ैगा सात भाई, पैहलअ भाई मूंअ बैह करी करै और तेऊए निं लुआद हुई ता तेऊए बेटल़ी लागी दुजै संघै रहंदी। 26पर दुजै और चिऐ संघै बी हुअ इहअ ई, इहअ करै तिन्नां साता भाई तैणीं रह इहअ ई हंदअ लागी। 27तिन्नां सोभी मरनै का बाद खिरी सह बेटल़ी बी मूंईं। 28ता, ऐबै ज़ेभै सह भी ज़िऊंदी हणीं ता सह तिन्नां साता भाई मांझ़ै कसरी बेटल़ी हणीं? किल्हैकि सह ता पैहलै साता ज़ण्हे बेटल़ी ती।”
29ईशू बोलअ तिन्नां लै, “तम्हां का नांईं ता पबित्र शास्त्रो थोघ आथी, और नां परमेशरे शगतीओ थोघ आथी। इहअ करै आसा तम्हैं भूला दी पल़ै दै। 30ज़ेभै तिंयां मूंऐं दै मांझ़ै ज़िऊई उझ़णै; तेभै नां ता तिन्नां बैह करनअ। नां तिंयां बैहा लै दैणैं। पर स्वर्गै हणैं तिंयां स्वर्ग दूता ज़िहै।
31 “पर मरी करै ज़िऊंदै हणें बारै तम्हैं शास्त्र निं पहल़अ आथी! ज़ुंण तम्हां का परमेशरै बोलअ द आसा 32‘हुंह आसा तेरै पित्तर आबराम, इसहाक और याकूबो परमेशर?’ सह निं मूंऐं दै मणछो परमेशर आथी पर सह आसा ज़िऊंदैओ।”
33ईशूए एसा शिक्षा शूणीं हुऐ लोग रहैन।
सोभी का बडअ हुकम
(मरकुस 12:28-34; लुका 10:25-28)
34ज़ांऊं फरीसी पंथे लोगै शूणअ कि ईशू दैनअ तिन्नां सदुकी पंथे लोगा लै इहअ ज़बाब कि नां ता तिंयां तेते बारै सोठी सकदै तै और नां तेते बारै किज़ै बोली सकदै तै। ता फरीसी किअ कठा हई करै आप्पू मांझ़ै जोग कि हाम्हां तेऊ लै किज़ै बोल़णअ, संघा नाठै तिंयां ईशू सेटा लै। 35ता तिन्नां मांझ़ै त एक शास्त्रो ज़ाणकार मणछ, सह लागअ इहअ बोली ईशू परखदअ, 36“हे गूरू, बधाना दी सोभी का खास हुकम किज़ै आसा?”
37ईशू बोलअ तेऊ लै, “तूह करै आपणैं प्रभू परमेशरा लै आपणैं सारै मना, सारै प्राणा और सारी बुधि संघै झ़ूरी। 38बडअ और पैहलअ हुकम आसा अह ई। 39एता ई बराबर दुजअ हुकम बी आसा इहअ कि तूह कर आपणैं संघी साथी संघै आप्पू बराबर झ़ूरी। 40ईंयां ई दूई हुकम आसा सारै बधाने और परमेशरे गूरे आथरी।”
मसीहा दाबेदे लुआद या तेऊओ प्रभू आसा?
(मरकुस 12:35-37; लुका 20:41-44)
41ज़ांऊं फरीसी एकी ज़ैगा कठा तै हूऐ दै, ता ईशू पुछ़अ तिन्नां का सुआल, 42“मसीहे बारै तम्हैं कै समझ़ा?” “सह कसरअ शोहरू आसा?” तिन्नैं दैनअ ज़बाब “दाबेद राज़ैओ शोहरू।” 43तेखअ पुछ़अ ईशू तिन्नां का, “तै राज़अ दाबेद आत्मां दी हई करै तेऊ लै प्रभू किल्है बोला?” 44“सह बोला इहअ,
‘प्रभू बोलअ मेरै प्रभू लै,
मेरै दैहणै बेश
ज़ेभै तैणीं हुंह तेरै दुशमणा हारी निं लऊं।’
45 “तै, ज़ै राज़अ दाबेद तेऊ लै प्रभू बोला, तै सह तेऊओ शोहरू किल्है हुअ?” 46एऊ सुआलो ज़बाब निं कोहै दैई सकअ। तेखअ निं कोही बी तेऊ का पुछ़णें हिम्मत हुई।
Zvasarudzwa nguva ino
मत्ती 22: OSJNT
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.