मत्ती 13
13
बेज़ै बऊंणैं आल़े कथ्या
(मरकुस 4:1-9; लुका 8:4-8)
1तेसा ई धैल़ी बेठअ ईशू घरा का निखल़ी करै समुंदरे बाढै। 2ईशू सेटा हुअ एतरअ खास्सअ झाल़अ कठा कि सह बेठअ किश्ती दी और तिंयां सोभै लोग रहै समुंदरे बाढै खल़्हुई। 3ईशू बोली कथ्या खोज़ी खास्सी गल्ला,
“शूणां, एकी बारी निखल़अ एक बेज़ै बऊंणैं आल़अ बेज़ै बऊंदअ। 4बेज़ै बऊंदी थोल़अ बेज़अ पल़अ बाते बाढै और सह च़ुंघअ च़ेल्लू पखीरू।
5 “धख बेज़अ पल़अ शकरीली ज़िम्मीं दी, तेथ निं तेता खास्सअ माटअ भेटअ, सह बेज़अ निं डुघै माटै दी पल़अ और इहअ करै टिप्पअ सह जाऊअ। 6ज़ांऊं सुरज़ो धुपअ टिपरू दी पल़अ ता तिंयां टिपरू शुक्कै किल्हैकि तेते ज़लैल़ै निं डुघै माटै दी आथी तै।
7 “इहअ ई धख बेज़अ पल़अ झ़ाकल़ै, ता ज़ांऊं सह बेज़अ टिप्पअ ता सह दाभूअ कांडे झ़ाकल़ा जैंदरी। 8पर धख बेज़अ पल़अ रज़दी-पज़दी ज़िम्मीं दी, ता तिन्नां दी लागी खास्सी फसल। कोई दी शौ गुणा, कोई दी शाठ गुणा और कोई तिह गुणा पज़ैआ।”
9तेखअ बोलअ ईशू तिन्नां लै, “ज़ै तम्हैं एता समझ़णअ च़ाहा, तै दै एसा गल्ला दी धैन कि मंऐं एभै तम्हां का किज़ै बोलअ।”
कथ्या का शिक्षा
(मरकुस 4:10-12; लुका 8:9,10)
10ता च़ेल्लै पुछ़अ ईशू सेटा एछी करै, “तूह इना संघै कथ्या खोज़ी किल्है करा गल्ला?”
11ईशू दैनअ तिन्नां लै ज़बाब, “तम्हैं सका स्वर्ग राज़ो भेद समझ़ी पर होरी लै ज़ुंण परमेशरे राज़ा दी नांईं आथी तिंयां निं समझ़दै? 12ज़ुंण मेरी शिक्षा शूणां, तिन्नां लै दैणीं होर बी खास्सी समझ़ और तिन्नां का हणअ होर बी खास्सअ ज्ञैन। पर ज़ुंण मेरी शिक्षा नांईं शूणां, तिन्नां का निंणअ सह बी पोर्ही ज़ुंण तिन्नां का धख समझ़ होए बी। 13हुंह करा तिन्नां संघै कथ्या खोज़ी एते तैणीं गल्ला कि
तिंयां निं मेरै मुंह भाल़ी करै शिखल़दै
और मेरी गल्ला शूणीं करै निं समझ़दै।
14 “तिन्नें बारै आसा परमेशरे गूर याशायाह इहअ बोलअ द कि
‘मेरी गल्ला ता हेरनी तम्हां शूणीं
पर तम्हां समझ़ निं पल़णीं।
आछी का ता तम्हां भाल़णअ
पर तम्हां का निं शुझणअ आथी।
15 किल्हैकि इना लोगो मन आसा गअ द पात्थरा ज़िहअ काठअ हई
ईंयां निं मेरी गल्ला शुणदै,
तिन्नैं आसा डाही दी आपणीं आछी मुंदरी
इहअ निं हआ कि तिंयां आछी करै भाल़े,
और काना करै शुणें
और मना का समझ़े,
और तिंयां बापस फिरे
और हुंह तिन्नां राम्बल़ै करूं।’
16 “पर परमेशरै दैनअ तम्हां लै इना गल्ला आपणीं आछी भाल़णेंओ मोक्कअ कि तम्हां का शुझिए और थारै कान बणांऐं परमेशरै इहै कि तेता का शुंणिए।
17 “किल्हैकि हुंह खोज़ा तम्हां का सत्त कि परमेशरे कई गूरै और धर्मीं मणछै बी च़ाहअ कि ज़ुंण गल्ला तम्हैं आझ़ भाल़ा, तिंयां बी भाल़े, पर तिंयां निं भाल़ी सकै, और ज़ुंण गल्ला तम्हैं शूणां, तिंयां बी शुणें पर तिंयां निं शूणीं सकै।”
बेज़ै बऊंणैं आल़े कथ्या समझ़ाऊंणी
(मरकुस 4:13-20; लुका 8:11-15)
18 “बेज़ै बऊंणैं आल़अ ज़िम्मींदार आसा परमेशरे बैण खोज़णैं आल़ै ज़िहअ। 19ज़ुंण बी स्वर्ग राज़ो बैण शूणीं करै नांईं समझ़ा, तेऊए मनैं ज़ुंण बी बऊअ द त, तेऊ निंयां सह कदुष्ट राख्स छ़ड़ैऊई। अह आसा सह ई बेज़अ ज़ुंण बाते बाढै त बऊअ द।
20 “तिहअ ई शकरीली ज़िम्मीं दी पल़अ द बेज़अ आसा तिन्नां लोगे बारै ज़ुंण परमेशरो बैण शूणां और तेभी खुशी-खुशी संघै मना। 21पर आप्पू पाक्कअ विश्वास नांईं हणें बज़्हा रहा तिंयां थोल़ै ई धैल़ै लै। बैण मनणें बज़्हा ज़ांऊं तिन्नां लै मसीबता एछा ता तिंयां छ़ाडा तेभै परमेशरा दी विश्वास करनअ।
22 “ज़ुंण बेज़अ झ़ाकल़ै पल़अ सह आसा तिन्नां मणछे बारै ज़ुंण बैण ता शूणां, पर एऊ संसारे फिकर और धन-माये धोखै करै पाआ तेऊ बैणा बिसरी। तिंयां निं तिहअ करदै ज़िहअ परमेशर च़ाहा कि तिंयां करे।
23 “ज़ुंण बेज़अ रज़दी-पज़दी ज़िम्मीं दी पल़अ, अह आसा तिन्नां लोगे बारै ज़ुंणी परमेशरो बैण शूणअ, मनअ और विश्वास किअ। तिन्नैं किअ तिहअ ई ज़िहअ परमेशर च़ाहा कि तिंयां करे। तिंयां आसा एही बधिया फसला ज़ेथ तिह गुणा, शाठ गुणा ता कोई दी शौ गुणा फसल हुई।”
ज़ंगली बेज़े कथ्या
24तेखअ खोज़ी ईशू तिन्नां का एक होर कथ्या, “स्वर्गो राज़ आसा तेऊ ज़िम्मींदारा ज़िहअ ज़ुंणी आपणैं खेचै बधिया बेज़अ बऊअ। 25पर ज़ांऊं लोग सुत्तै दै तै, तिन्नैं दुशमणै डाहै नाज़ा जैंदरी ज़ंगली घाह लबहरै बऊई। 26ज़ांऊं टिपरू लागै और सील निखल़ै तेखअ लागै तिंयां ज़ंगली घाह लबहरे दाणैं बी शुझदै।
27 “एता भाल़ी बोलअ तेऊए घरे सोभी टैहलू तेऊ सेटा लै एछी करै, ‘हे मालक, तंऐं कै आपणैं खेचै बधिया बेज़अ निं बऊअ त? तै ईंयां ज़ंगली लबहरै किधा का आऐ?’
28 “तेऊ बोलअ तिन्नां लै इहअ, ‘अह आसा कसा दुशमणो काम।’
“तिन्नैं टैहलू बोलअ तेऊ लै, ‘ऐबै तूह किज़ै बोला, हाम्हैं लबहरै गिंहूं मांझ़ा का पेच़ी करै कठा करूंमैं?’
29 “तेऊ बोलअ तिन्नां लै, ‘इहअ निं करी, इहअ निं हआ कि ज़ंगली लबहरै कठा करदी बारी राम्बल़ै गिंहूंए दैणैंओ डाल़ बी झोठिआ। 30तम्हैं करा इहअ लऊंणै तैणीं दैआ इना दुही संघा-संघा बझ़णै। लऊंणे बगती बोल़णअ मुंह लऊंणै आल़ै लै कि इना ज़ंगली लबहरैओ लाऐ एकी ज़ैगा दहणा लै रूल़ और नाज़ करै मेरै भढारै कठा।’”
शाऊईए बेज़े कथ्या
(मरकुस 4:30-32; लुका 13:18,19)
31तेखअ खोज़ी ईशू तिन्नां का एक होर कथ्या, तेऊ बोलअ इहअ, “स्वर्गो राज़ आसा एक शाऊईए दाणैं ज़िहअ, सह बऊअ एकी मणछ आपणैं खेचै। 32आसा ता शाऊईओ दाणअ सोभी बेज़ै का होछ़अ पर ज़ांऊं सह बझ़ा, सह हआ सोभी शाग-पाचा का बडअ। सह बणां इहअ बूट कि सरगे च़ेल्लू-पखीरू बी करा तेते शाण्हटी दी बसेरअ।”
स्वर्गो राज़ सज़ेल़ै ज़िहअ
(लुका 13:20,21)
33ईशू खोज़ी तिन्नां का एक होर कथ्या, “स्वर्गो राज़ आसा सज़ेल़ै ज़िहअ कि एकी बेटल़ी निंयं सह सज़ेल़अ और तेसा मुछ़अ सह खास्सै पिठै दी। थोल़ी घल़ी बाद बणअ सह सारअ मुछ़अ द पिठअ सज़ेल़अ।”
कथ्या खोज़णेंओ मकसद
(मरकुस 4:33-34)
34ईंयां सोभ गल्ला खोज़ी ईशू कथ्या दी, इना एही गल्ला समझ़ाऊंणा लै करा त सह कथ्या ई दी गल्ला। 35ज़ुंण बैण याशायाह परमेशरे गूरै बोलअ त सह लोल़ी पूरअ हुअ कि
“मुंह करनी कथ्या खोज़ी गल्ला,
और तिंयां गल्ला करनी मुंह प्रगट ज़ुंण संसारे मूल़ ओर्ही गुप्त आसा रही दी।”
ज़ंगली बेज़े कथ्या समझ़ाऊंणी
36तेखअ आअ ईशू तिन्नां लोगा मांझ़ा का घरा लै और तेऊए च़ेल्लै बोलअ तेऊ सेटा एछी करै, “खेचा दी ज़ंगली लबहरे कथ्या समझ़ाऊ हाम्हां का।”
37ईशू समझ़ाऊऐ तिंयां इहअ बोली, “बधिया बेज़ै बऊंणैं आल़अ आसा हुंह मणछो शोहरू। 38खेच आसा एऊ संसारे लोग। बधिया बेज़अ आसा स्वर्ग राज़े लोग ज़हा प्रैंदै परमेशर राज़ करा। ज़ंगली बेज़अ आसा तेऊ राख्से लोग ज़हा प्रैंदै सह राख्स करा राज़। 39गिंहूं मांझ़ै लबहरै बऊंणैं आल़अ दुशमण आसा सह राख्स। लऊंणे बेल आसा एऊ संसारो अंत और काटणै आल़ै आसा स्वर्ग दूत।
40 “ज़िहै ज़ंगली लबहरै कठा करी करै दहई पाआ, तिहअ ई हणअ तेभै बी ज़ेभै परमेशरा सोभी लोगो न्याय करी करै एऊ संसारो अंत हणअ। 41मुंह मणछे शोहरू छ़ाडणैं आपणैं स्वर्ग दूत। तिन्नां करनै तेऊए राज़ा का सोभ पाप और बूरै काम करनै आल़ै कठा। 42स्वर्ग दूता पाणै तिंयां नरकै आगीए घैनै जैंदरी। तिधी हणैं तिंयां लोग लेरा पकारा पांदै और घोर दाह करै झोशा उझ़ुई दी। 43तेभै च़मकणै धर्मीं आपणैं बाप्पू परमेशरे राज़ा दी सुरज़ा ज़िहै।
“ज़ै तम्हैं एता समझ़णअ च़ाहा, तै दै एसा गल्ला दी धैन कि मंऐं एभै तम्हां का किज़ै बोलअ।
गुप्त भढार
44 “स्वर्गो राज़ आसा खेचै दाबी दी धन-माया ज़िहअ ज़ुंण माया एकी मणछा भेटी और सह डाही तिधी दाबी और खुशीए मारै लअ तेऊ आपणीं सोभ गल्ला बेच़ी करै सह खेच मोलै।
किम्मती मोती
45 “स्वर्गो राज़ आसा एक बपारी ज़िहअ ज़ुंण सोभी का बधिया मोती लोल़अ त लागअ द। 46ज़ांऊं तेऊ एक किम्मती मोती भेटअ, ता तेऊ पाअ मोती मोल लणें तैणीं आपणअ सोभ किछ़ बेच़ी।
माह्छ़ली ढाकणें कथ्या
47 “स्वर्गो राज़ आसा माह्छ़ली ढाकणें एकी बडै ज़ाल़ा ज़िहअ, ज़ुंण समुंदरै पाअ और तेथ शाची सोभी रंगे माह्छ़ली। 48ज़ांऊं सह ज़ाल़ माह्छ़ली करै भर्हुअ, ता सह आणअ समुंदरे बाढा लै खिंच़ी। तेखअ भरी तेता मांझ़ै बधिया-बधिया माह्छ़ली छ़ांटी करै च़ठै दी और बाकी शोटी पोर्ही।
49 “ज़ेभै संसार खतम हणअ तेभै हणीं एही गल्ला। स्वर्ग दूता करनै स्वर्गा का एछी करै कदुष्ट लोग धर्मीं लोगा का ज़ुदै और तिंयां पाणै नरके कूंडा दी आगीए घैनै जैंदरी। 50तिधी हणैं तिंयां लोग लेरा पकारा पांदै और घोर दाह करै हणीं तिन्नां झोशा उझ़ुई दी।
पराणीं और नऊंईं शिक्षा
51“तम्हैं ईंयां गल्ला समझ़ी बी कि नांईं?”
52तिन्नैं बोलअ ईशू लै, “हाँ”। ईशू बोलअ तिन्नां लै, “तैहीता हर शास्त्री ज़ुंण स्वर्ग राज़ो च़ेल्लअ आसा बणअ द, सह आसा तेऊ भढारी ज़िहअ ज़ुंण आपणैं भढारा का नऊंईं पराणीं च़िज़ा काढा।”
नासरत नगरी ईशूओ अदर नांईं करनअ
(मरकुस 6:1-6; लुका 4:16-30)
53ज़ांऊं ईशू इना सोभी कथ्या खोज़ी मुक्कअ ता तिधा का नाठअ ईशू आपणैं घर नासरत नगरी लै। 54तिधी पुजी करै लागअ तिन्नें आराधना सभा दी एही शिक्षा दैंदअ कि तिंयां हुऐ रहैन संघा लागै तिंयां इहअ बोलदै,
“एऊ ईंयां ज्ञैन और शगतीए काम किधा का भेटै?” 55अह कै मिस्त्री युसुफो शोहरू निं आथी? एऊए आम्मां नांअ मरिअम निं आथी? एऊए भाई नांअ याकूब और युसुफ, शमौन और यहूदा निं आथी? 56एऊए सारी बैहणी कै हाम्हां मांझ़ै निं आथी? तै एऊ ईंयां सोभै गल्ला किधा का भेटी? 57तिन्नैं च़ेती एसा गल्ले माल़ी और तिन्नैं निं तेऊ दी विश्वास किअ।
पर ईशू बोलअ तिन्नां लै, “परमेशरे गूरो हआ होरी सोभी ज़ैगा अदर पर आपणैं देशै, रिश्तैदारा और टबरा मांझ़ै निं तेऊओ अदर हंदअ।” 58तिंयां निस्सै विश्वास करी और ईशू निं तिधी किछ़ै बडै च़मत्कारे काम किऐ।
Zvasarudzwa nguva ino
मत्ती 13: OSJNT
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.