मूल़ 39
39
पोतीपोरे घअरै युसुफ
1इशमाईली बपारी पजैल़अ युसुफ मिसर देशै, संघा पाअ सह पोतीपोर नाओंए मणछा का बेच़ी, सह थिअ मिसर देशे माहा राज़ैओ दरोगअ।
2-3युसुफ लागअ मिसर देशे रहणैं आल़ै पोतीपोरे घअरै रहंदअ। ऐबै त सह तेऊओ मालक। पोतीपोरै बी हेरी अह गल्ल फैल़ी कि युसुफा संघै आसा बिधाता आप्पै, किल्हैकि ज़ुंण बी काम अह करा तेता दी हआ अह सफल।#शधा. 7:9
4पोतीपोरा गम्मअ युसुफ अर तेऊ बणाअं आपणैं सारै घअरो सह ई सैणअ, अर तेऊ सभाल़ी सोभै गल्ला तेऊ का।
5ज़धा ओर्ही मिसरी पोतीपोरै युसुफ का आपणैं घअरे सोभै गल्ला सभाल़ी, तधा पोर्ही दैनी बिधाता तेऊए घअरै अर खेचै-खहल़ै खास्सी बर्गत।
6पोतीपोरै सभाल़ी आपणैं घअरे सोभै गल्ला युसुफा का इधी तैणीं कि रोटी खाणैं का लाऊआ निं पोतीपोरा का होर किछ़ै थोघ हंदअ त।
युसुफ त हेरनअ शुणनअ बेघै बित्तअ, 7अर पोतीपोरे लाल़ी लोभणूंई तेऊ लै। सह लागी युसुफा लै बोल्दी कि मुंह संघै कर रही-बस्सी।
8पर युसुफै किअ तैहा लै नांईं संघा लागअ इहअ बोली तैहा समझ़ाऊंदअ, “मेरअ मालक निं भाल़ घअरे किछ़ू गल्ले फिकर करदअ, तेऊ बणाअं आपणैं घअरे सोभी गल्लो सैणअ हुंह।
9“मेरै मालके घअरै आसा सोभी का बडी पदबी दी बी हुंह? ताह छ़ाडी आसा होर सोभै गल्ला तेऊ मुखा सभाल़ी दी, किल्हैकि तूह आसा भाल़ तेऊए आपणीं लाल़ी। आपणैं मालका लै धोखअ अर इहअ घोर पाप निं हुंह करी सकदअ ज़ेता करै बिधाता मुखा दूर होए।”
10सह रही हर धैल़ै युसुफा लै बोल्दी ई लागी कि सह तैहा संघै सुत्ते। पर युसुफै निं तेसे सह गल्ल मनी अर सह निं तैहा नेल़ बी डेऊअ।
11एकी धैल़ै हुअ इहअ कि युसुफ डेऊअ किज़ू कामैं पोतीपोरे घअरा लै अर होर नोकर-च़ाकर बी नांई तै घअरै कोहै आथी।
12पोतीपोरे लाल़ी भाल़अ सह ई मोक्कअ अर तैहा घिशअ सह झिकल़ै का ढाकी संघा लागी बोल्दी, “मुंह संघै सुत्त!”
युसुफै छ़ाडअ च़ोल़अ तेसे हाथै संघा ठुर्हअ सह घअरा का बागा लै।
13ज़ांऊं तैहा ज़ाणअ कि सह ठुर्हअ च़ोल़अ तेसे हाथै छ़ाडी बागा लै, 14तैहा पाई होरी नोकर-च़ाकरा लै ज़ोरै-ज़ोरै हाक्का संघा बोलअ, “भाल़ा, एऊ इब्रानी मणछै किई आझ़ म्हारी बेइज़ती। अह लागअ ज़ोरा-ज़ोरी मुंह ढाकदअ कि अह मुंह संघै सुत्ते। तै पाई मंऐं लैल़ा-पकारा।
15“ज़ांऊं मंऐं लैल़ा-पकारा पाई, तेते डरै ठुर्हअ अह बागा लै अर एऊओ अह च़ोल़अ छ़ुटअ तिधी।”
16तैहा डाहअ तेखअ सह च़ोल़अ आप्पू का ज़ेभै तैणीं तेसो लाल़अ पोतीपोर घअरा लै निं आअ।
17ज़ांऊं तेसो लाल़अ घअरै आअ, तेखअ लागी सह तेऊ का खोज़दी, “ज़ुंण इब्रानी गलाम मणछ तंऐं आसा आणअ द, सह च़ाहा त ज़ोरा-ज़ोरी मुंह संघै सुत्तणअ!
18“शूकर हुअ इहअ कि मंऐं पाई ज़ोरै-ज़ोरै लैल़ा, तै ठुर्हअ डरै सह बागा लै अर अह च़ोल़अ छ़ुटअ तेऊ का इधी।”
युसुफ पाअ कैदखाने दी
19इना गल्ला शूणीं हुअ पोतीपोर रोश्शै लाल पिंऊंल़अ, 20तेऊ पाअ युसुफ कैदखाने दी ज़िधी राज़े होर कैदी बी हआ तै कैद किऐ दै।
ऐबै त युसुफ कैदखाने दी, 21पर बिधातो जश हुअ युसुफा लै इहअ अर कैदखाने दरोगै बी गम्मअ युसुफ,#शधा. 7:9 22तेऊ सभाल़अ कैदखानैओ सारअ काम काज़ अर सोभ कैद किऐ दै लोग युसुफा का।
23दरोगै बणाअं युसुफ सोभी गल्लो सैणअ, अर सह निं किछ़ू कामें फिकर करदअ त किल्हैकि युसुफ ज़ुंण बी काम करा त, तेथ करा त बिधाता तेऊ सफल।
Zvasarudzwa nguva ino
मूल़ 39: OSJ
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.