शधाणूं 15
15
एरुशलेम नगरीए सभा
1पल़सी अर बरनबास थिऐ सिरीया मुल्खै अन्ताकिया नगरी अर कई लोग आऐ यहूदा मुल्खा का तिधा लै। संघा लागै तिंयां विश्वासी भाई का इहअ सखाऊंदै, “ज़ै मोसा गूरे रिती-रबाज़े साबै थारअ खतैर नांईं होए तै निं तम्हां उद्धार हई सकदअ।”#लेब. 12:3
2पल़सी अर बरनबास निं तिन्नें ऐहा गल्ला लै राज्ज़ी हुऐ अर तिन्नैं किई हठ कि अह गल्ल आसा गलत। खिरी हुऐ सोभ ऐहा गल्ला लै राज्ज़ी कि पल़सी, बरनबासा संघै डेओआ हाम्हां मांझ़ै कई होर भाई ऐहा गल्ले बारै फैंसलै लै एरुशलेम नगरी लै शधाणूं अर विश्वासी टोलीए सैणैं सेटा लै।
3तेखअ छ़ाडै तिंयां विश्वासी टोली एरुशलेम नगरी लै अर तिंयां दैनै बाता खास्सै दूर तैणीं पजैल़ी। तेखअ डेऊऐ तिंयां फिनाका नगरी अर सामरी मुल्खै बाती विश्वासी भाई सेटा। तिन्नैं खोज़अ तिन्नां का इहअ कि खास्सी खुशीए गल्ल आसा कि होरी ज़ातीए लोग बी सका परमेशरा सेटा एछी।
4ज़ांऊं तिंयां एरुशलेम नगरी पुजै, विश्वासीए टोली, शधाणूं अर विश्वासी टोलीए सैणैं मिलै तिन्नां संघै बेघै खुश हई। तिन्नैं बी खोज़अ कि परमेशरै तिन्नां संघै रही किहै-किहै काम किऐ। 5पर फरीसी मणछे पंथा का ज़ुंण विश्वासा दी आऐ तै, तिन्नां मांझ़ै बोलअ कई इहअ, “ज़ुंणी होरी ज़ाती मांझ़ै विश्वास किअ तिन्नां लै दैणअ खतैर करनै अर मोसा गूरे बधान मनणैओ हुकम ज़रूरी।”
6तेखअ हुऐ शधाणूं अर विश्वासी टोलीए सैणैं ऐहा गल्ले बारै बच़ारा करदै कठा। 7खास्सै हठल़णैं का बाद बोलअ पतरासै खल़ै उझ़ुई करै तिन्नां सोभी लै,
“भाईओ, तम्हां का आसा थोघ कि खास्सै धैल़ै गऐ तैहा गल्ला बिति कि परमेशरै छ़ांटअ तम्हां मांझ़ै हुंह कि मुखा होर ज़ाती बी खुशीओ समाद शूणीं विश्वास करे। 8मन्नें गल्ला परखणैं आल़ै परमेशरै दैनी तिन्नां लै बी हाम्हां ई ज़ेही पबित्र आत्मां दैई तिन्नें शाजत।
9“विश्वासा करै तिन्नें मन्न शुचै करी निं परमेशरै हाम्हां अर तिन्नां दी किछ़ै फरक डाहअ। 10ऐबै किल्है आसा तम्हैं लागै दै परमेशरा परखदै? तम्हैं किल्है लाअ होरी ज़ाती का आऐ दै इना विश्वासी भाईए कैल़ै इहअ जूँ पाई ज़हा नां म्हारै दाद-बाब च़की सकै अर नां हाम्हैं च़की सकदै?
11“पर हाँ, म्हारअ आसा इहअ विश्वास कि ज़ेऊ साबै तिन्नां प्रभूए जशा दी उद्धार भेटणअ, तेऊ ई साबै भेटणअ हाम्हां बी मसीहा ईशू दी विश्वास करी! म्हारअ उद्धार निं बधाना करै हणअ।”
12सभा दी बेठै दै सोभ लोग लागै शांत हई बरनबास अर पल़सीए गल्ला शूणैं कि परमेशरै तिन्नां करै होरी ज़ाती दी किहै-किहै नछ़ैण अर नुआहरै काम किऐ। 13पल़सी अर बरनबास ज़ांऊं बोली मुक्कै, याकब लागअ इहअ बोल्दअ,
“भाईओ, 14मेरी गल्ला शूणां, शमौन पतरासै आसा हेरअ द तम्हां का खोज़ी कि ज़धू सह पैहली बारी होरी ज़ाती सेटा डेऊअ तधू परमेशरै तिन्नां लै केही बर्गत दैनी कि तिन्नां मांझ़ै बी छ़ांटै आप्पू लै लोग। 15एता संघै ज़ुल़ा परमेशरे गूरै बोली दी ईंयां गल्ला, ज़िहअ शास्त्रा दी आसा लिखअ द,#जेर. 12:15; ईशा. 45:21; आम. 9:9-12
16‘आजू करनअ मुंह राज़ै दाबेदो राज़ भिई खल़अ,
ज़ुंण ढूल़ै दै घअरा ज़िहअ आसा।
मुंह करनी तेते भित्ती लेस्सी-टुशी राम्बल़ी
संघा च़िणनअ मुंह सह भिई तिहअ ई ज़िहअ पैहलै थिअ।
17मुंह करनअ इहअ एते तैणीं कि,
होरी ज़ातीए मणछ बी मुंह सेटा लै एछे ज़हा दी मेरै नाओंए छ़ाप आसा लागी दी।
18ऐहा गल्ला बोला सह ई प्रभू
ज़ुंण संसार शुरू हणैं ओर्ही इना गल्लो समादा खोज़दअ आसा लागअ द।’
19“तै आसा मेरअ इहअ बच़ार कि होरी ज़ाती का बी ज़ुंण लोग परमेशरा बाखा लै फिरा, तिन्नां लै निं दुख दैआ। 20पर तिन्नां लै दैआ इहअ समाद लिखी कि तिंयां रहै छ़ोत लाणैं आल़ी च़िज़ा, मुहुर्ती लै बल़ी किऐ दै मास्स, लोहू, गअल़ मरोक्की करै मारै दै ज़ीबे शिखा अर कंज़रैई का दूर।#मूल. 9:4; लेब. 3:17; 17:10-14
21“किल्हैकि पराणैं ज़मानैं ओर्ही आऐ नगरी-नगरी मोसा गूरे बधाने बारै खोज़दी अर हर बशैघे धैल़ै पहल़ा इना सभागृहा।”
होरी ज़ातीए विश्वासी लै च़िठी
22तेखअ हुऐ ऐहा गल्ला लै सारी विश्वासीए टोली, शधाणूं, विश्वासी टोलीए सैणैं बी राज्ज़ी अर तिन्नैं छ़ांटै आप्पू मांझ़ा का कई मणछ, मतलब यहूदा ज़हा लै बरसबा बोला अर सिलास, ज़ुंण होरी भाई मांझ़ै सैणैं तै, तिंयां छ़ाडै पल़सी अर बरनबासा संघै अन्ताकिया लै। 23तिन्नें हाथै दैनअ इहअ लिखी कि अन्ताकिया, सिरीया अर किलकिआ मुल्खै रहणैं आल़ै विश्वासी भाई ज़ुंण होरी ज़ाती का आसा, एरुशलेम नगरी का शधाणूं अर विश्वासी टोलीए सैणैं बाखा तम्हां सोभी लै राज्ज़ी-खुशी!
24“हाम्हैं शूणीं एही गल्ला कि म्हारै कई मणछ आऐ तम्हां सेटा लै अर तिन्नैं किऐ थारै मन्न गलत शिक्षा दैई उंबल़ै पर तिंयां निं हाम्हैं तम्हां सेटा लै छ़ाडै आथी। 25हाम्हैं सोभी किअ कठा हई आप्पू मांझ़ै जोग, संघा समझ़अ हाम्हैं सोभी इहअ ठीक कि हाम्हां छ़ाडणैं छ़ांटी करै धख मणछ तम्हां सेटा लै। संघा छ़ाडै हाम्हैं आपणैं पैरै भाई बरनबास अर पल़सी तम्हां सेटा लै। 26ईंयां दूई मणछ आसा इहै ज़ुंणी आपणैं प्राण बी म्हारै प्रभू ईशू मसीहे नाओंआं लै खातरै दी पाऐ।
27“यहूदा अर सिलास बी छ़ाडै हाम्हैं तिन्नां संघै अर तिन्नां हेरनी सारी गल्ला आपणैं मुंहां का बी तम्हां का खोज़ी। 28पबित्र आत्मां, अर हाम्हां लागी एही ठीक कि किछ़ खास गल्ला छ़ाडी निं तम्हां लै होर किछ़ै बोझ़ पाणअ। 29तिंयां गल्ला आसा एही कि तम्हैं रहै मुहुर्ती लै बल़ी किऐ दै मास्सा अर लोहू का अर गल़ा का मरोक्कै दै मास्सा का अर कंज़रैई का दूर। इना सोभी गल्ला का ज़ै तम्हैं दूर रहे, तै हणअ थारअ भलअ। खिरी हाम्हां सोभी बाखा तम्हां लै राज्ज़ी-खुशी।”#मूल. 9:4; लेब. 3:17; 17:10-14
30तेखअ पुजै तिंयां तिधा का बिदा हई अन्ताकिया नगरी। तेखअ पहल़ी सभा कठा करी च़िठी। 31तेखअ हुऐ तिंयां च़िठी पहल़ी करै शिक्षे गल्ला शूणीं खास्सै खुश। 32यहूदा अर सिलास ज़ुंण आप्पू बी परमेशरे गूर तै, तिन्नैं बी किऐ कई गल्ला करै विश्वासी भाई-बैहणी शिक्षा दैई मज़बूत।
33तेखअ रहै तिंयां थोल़ै धैल़ै तिधी संघा छ़ाडै तिंयां विश्वासी भाई एरुशलेम टोली बर्गत अर शांती दी बापस। 34पर सिलासे मन्नैं बेठी एही कि तेऊ रहणअ तिधी अर यहूदा डेऊअ एरुशलेम नगरी लै। 35पल़सी अर बरनबास रहै अन्ताकिया दी अर होर बी कई लोगा रहै प्रभूए बैणा सखाऊंदै अर खुशीए समादा खोज़दै लागी।
बरनबास अर पल़सीओ ज़ुदअ हणअ
36थोल़ै धैल़ै बाद बोलअ पल़सी बरनबासा लै, “ज़हा-ज़हा नगरी हाम्हैं परमेशरो बैण लोगा का खोज़अ द आसा, च़ाल्ला, हाम्हां एछणी तिन्नां विश्वासी भाईए हेर-सभाल़ करी कि तिंयां किहै आसा?”
37तेखअ किअ बरनबासै जोहन्ना ज़हा लै मार्कुस बोला, संघा निंणैओ बच़ार 38पर पल़सी किअ मार्कुस संघा निंणां लै नांईं किल्हैकि सह हुअ त पिछ़ली बारी पंफूलिआ मुल्खै पुजी ज़ुदअ अर कामां लै निं तिन्नां संघै डेऊअ त। 39तिन्नां मांझ़ै हुई एही दूई रंगे गल्ला कि तिंयां हुऐ आप्पू ई मांझ़ै ज़ुदै। तेखअ डेऊअ बरनबास मार्कुसा संघा निंईं करै ज़हाज़ा दी कुप्रास टापू लै।
खुशीए समादा खोज़णा लै पल़सीए दुजी हांढ
40पर पल़सी छ़ांटअ सिलास अर होर विश्वासी भाई का परमेशरे झींण सभाल़ी करै लागअ तिधा का आजू हांढदअ। 41तेखअ डेऊअ पल़सी विश्वासीए टोली पाक्कै करदी, सिरीया मुल्खै अर किलकिआ मुल्खै बाती हांढ दैई।
Zvasarudzwa nguva ino
शधाणूं 15: OSJ
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.