HOSEA 11
11
Dihaholongi Tuhan bangsoNia na jahat i
1Didok Tuhan ma,
“Huhaholongi do Israel mamungka sian hamenehannia,
Hupio anakKi ruar sian Mesir.
2Tapi mur Hupioi anakKi
mur mandao do ia sian Au.
Dioban ia haul jana ditutung ia dupa
di Baal dohot di angka debata na asing.
3Hape Au do mangajar si Jakob mardalan,
jana Huhaol ia mardongan holong ni roha.
Au do na pature-ture ia
hape nada ra ia mangokuisa.
4Mardongan ihot-ihot holong ni roha,
Hutarik halahi tu Au.
Songon na mangangkat
auga do Au di halahi.
Hupaunduk do tu halahi
laho marmamasa.
5Nada ra mulak angka halak Israel i tu Au, jadi hara ni i, angkon mulak tu Mesir halahi jana parentaon ni bangso Asur halahi. 6Mangararati ma parporangan lopus tu angka kota ni halahi, bungkaron ma angka pintu horbangan jana abiskononna ma bangsongKi. Patunda ni na paihut-ihut giotna sandiri ma umbaen na tarjadi sudena i; 7dohot hara ni jogal ni rohana laho manadingkon Au. Jadi gabe tarpisat ma halahi, tapi nada adong na paluahon haru pe marsurak halahi mangido tolong.”
8Didok Tuhan ma, “Ale Israel nada padiaronKu ho sanga tadingkononKu. Tarbaen Au ma he tu ho songon parabis ni Adma? Sanga Hubaen ho songon Zeboim?#11:8 ADMA DOHOT ZEBOIM: Domu tu Sodom dohot Gomora do kota na dua i dibaen. (Ligi Pmk. 14:2 dohot 14:8) Nada torus rohangKu mambaen songon i, hara ni godang ni holong ni rohangKu tu ho! 9Nada uhumanKu ho di bagasan rimas ni rohangKu; nada ropukkononKu be Israel. Dibaen Debata do Au, nada jolma. Au Na Badia mandongani ho, jana nada muruhanKu be ho.”
10Didok Tuhan ma, “Ihutkonon ni bangsongKu ma Au muda marngaur Au songon singa jana mambaen mabiar musu ni halahi. Manigor tibu do bangsongKi ro mandapotkon Au sian Hasundutan. 11Songon hipas ni unggas ro halahi sian Mesir, jana sian Asur songon hulanan ni darapati. Jadi obanonKu ma halahi mulak tu bagas ni halahi. Au, Tuhan do na mandok i.”
Zvasarudzwa nguva ino
HOSEA 11: LAIAKB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Indonesian Bible Society