मत्ती 15
15
पुर्वजगोळ्द शिक्षा
(मरकुस ७:१-१३)
1आग यरूशलेम टु थ्वाळासा फरीसी अदिक शास्त्री यीशु उन हात्ती बंदकु अनली कुरतुर, 2“नीन चेलागोळ पुर्वजगोळ्द परंपरागोळी येती टाल्सतार, कि बिना कय तोळुकु रोट्टी तिनतार?”
3यीशु आंदरी उत्तर कोट्टुन, “नीव भी तान परंपरागोळ कारण येती परमेश्वर उन आग्या टाल्सतीर? 4यतिकी परमेश्वर अंदान, ‘तान आप्प अदिक तान मोय इन आदर माळेत,’ अदिक ‘जो यावारा आप्प या मोय इक बुरा भला अंदान, आऊक कोंदकु आदीत.’ 5लेकीन नीव अनतीर कि अगर यावारा तान आप्प या मोय से अनुल, ‘जो येनारा नीनी नान से लाभ पोहचुस सकोद, अद परमेश्वर उक भेंट येर्सकु आगेग्याद,’ 6रा आव तान आप्प उन आदर माळालुन, ईद प्रकार नीव तान परंपरा अन्द कारण परमेश्वर उन वचन टाल्स बुट्टीर. 7हे कपटीगोळा, यशायाह नीम बारा दा ईद भविष्यवाणी खरा अच माळ्यान.”
8“ई लॉकुर टुटगोळ देल रा नान आदर माळतार,
लेकीन इंदुर मन नान से दुर ईरतद.
9अदिक आंदुर बेकार नान उपासना माळतार,
यतिकी मंळसागोळ विधीगोळी नियम शास्त्र बन्सकु कल्सतार.”
अशुध्द माळावाळा मातगोळ
(मरकुस ७:१४-२३)
10आग यीशु लॉकुरी तान हात्ती कारूकु आंदुर से अंदुन, “केळी, अदिक समसी: 11जो बाय दा होगतद, अद मंळसा अक अशुध्द माळाल, पर जो बाय टु होळतद, अदा मंळसा अक अशुध्द माळतद.”
12आग चेलागोळ बंदकु आऊन से अंदुर, “येन नी जान्सत्या कि ईद वचन केळकु फरीसीगोळ्द भावनागोळी ठेस पोहचुस्त?”
13यीशु उत्तर कोट्टुन, “हर मार्र जो नान स्वर्गीय आप्प हचीदिल, कितकु आदीत. 14#लूका ६:३९आंदरी होगगोळी; आंदुर कुढ्ढ मार्गदर्शक आर अदिक कुढ्ढ अगर कुढ्ढ मंळसा अक हादी तोरसुल, रा येढ्ढु मुंदुर खॉदरा दा बिदोदार.”
15ईद केळकु पतरस आऊन से अंदुन, “ईद उदाहरण नामी समजुस बुळ.”
16यीशु अंदुन, “येन नीव भी ईगासताका ना समझ आईर? 17येन नीव जान्सालीर कि जो येनारा बाय दा होगतद अद व्हाट्टा दा होगतद, अदिक शरीर टु होट्ट बुळतद? 18#मत्ती १२:३४पर जो येनारा बाय दा टु होळतद, अद मन देल होळतद, अदिक अदा मंळसा अक अशुध्द माळतद. 19यतिकी बुरा विचार, कोन्नोद, परस्त्रीगमन, व्यभिचार, काळ्लपनी, ख्वाटा गवाही अदिक अपमान मन देल अच होळतद. 20ईवा हुव जो मंळसा अक अशुध्द माळताव, लेकीन बिना कय तोळ्द ऊमली कुरोद मंळसा अक अशुध्द माळाल.”
आर्त इन विश्वास
(मरकुस ७:२४-३०)
21यीशु अल टु होटकु, सूर अदिक सैदा अन्द प्रदेश दी होटोदुन. 22आ प्रदेश टु ऊंद कनानी आर्त होट्टुर, अदिक चिळ्लासकु अनली कुरतुर, “हे प्रभु! दाऊद उन पारा, नान मा दया माळ! नान पोर इक दुष्टआत्मा हापाळ सतुसीत्याद.”
23पर यीशु आकी येनु उत्तर कोटीदील. आग आऊन चेलागोळ बंदकु आऊन से विनती माळदुर, “ईकी सार माळ, यतिकी आक नाम हिंद चिल्ळासतेला बरेत्यार.”
24आव उत्तर कोट्टुन, “इस्त्राएल इन घराना अन्द काळ्द म्यांडागोळी बिटकु ना यारदु हात्ती कळुकु आगीदील.”
25लेकीन आक बंदुर, अदिक यीशु उक प्रणाम माळकु अनली कुरतुर, “हे प्रभु, नान मदत माळ.”
26आव उत्तर कोट्टुन, “चिकोरगोळ्द रोट्टी हुळकु नायगोळ्द मुंद हाक्कोद उचित हैलेच.”
27आक अंदुर, “खरा आद प्रभु, पर नायगोळ भी अद चुराचारा तिनताव, जो अऊर्द स्वामीगोळ मेज मा टु बिळतद.”
28ईदुर मा यीशु आकी उत्तर कोट्टुन, “हे आर्त, नीन विश्वास धोळ्द आद. ह्यांग नी चाहसत्या, नीन साठी हांगा आगुल.” अदिक आकिन पोर अदा घळी चंगा आगेदुर.
अनेक रोगीगोळी चंगा माळोद
29यीशु अल टु गलील इन समुद्र अन्द हात्ती बंदुन अदिक पहाळी मा येरकु कुर्तोदुन. 30आग भीळ इन भीळ आऊंद हात्ती बत्त. आंदुर तान सांगुळ लंगळागोळी, कुढ्ढगोळी, मुक्कागोळी, डुण्डागोळी अदिक मात्त हापाळ सा मुंदरी आऊन हात्ती तंदुर, अदिक आंदरी आऊन कालगोळ मा हाक्क बुटुर, अदिक आव आंदरी चंगा माळदुन. 31याग लॉकुर नोळदुर कि मुक्कागोळ माताळतार, अदिक डुण्डागोळ चंगा आगतार, अदिक लंगळागोळ नळुतार, अदिक कुढ्ढ नोळतार रा लॉकुर अचम्भा माळदुर अदिक इस्त्राएल इन परमेश्वर उन बळाई माळदुर.
नाक हजार लॉकुरी तिनसोद
(मरकुस ८:१-१०)
32यीशु तान चेलागोळी हात्ती कारूकु आंदुर से अंदुन, “नानी ई भीळ मा हापाळ दया बरेत्याद, यतिकी आंदुर मुर दिन टु नान सांगुळ आर अदिक आंदुर हात्ती येनु तिनली हैलेच. ना आंदरी उपासा सार माळोद चाहसालीन, ईलारा हिंग आगबाळुल कि आंदुर हादी मा थक्सकु ईतोगुल.”
33चेलागोळ आऊन से अंदुर, “नामी ई आळी दा यल टु ईस रोट्टीगोळ सिक्याव कि नाव ईट धोळ्द भीळ इक संतुष्ट माळेव?”
34यीशु आंदुर से केळदुन, “नीम हात्ती यास रोट्टीगोळ आव?” आंदुर अंदुर,
“येळ, अदिक थ्वाळासा स्याणेव मेनगोळ.”
35आग यीशु लॉकुरी ल्याल्मा कुरोद आग्या कोट्टुन. 36अदिक आ येळ रोट्टीगोळी अदिक मेनगोळी हुळदुन, धन्यवाद माळकु मुरदुन, अदिक तान चेलागोळी कोळतोदुन, अदिक चेलागोळ लॉकुरी. 37ईद प्रकार देल सप्पा तिनकु संतुष्ट आगेदुर अदिक चेलागोळ मिग्द तुकळागोळ दा टु येळ फुट्टी नेगदुर. 38तिनावाळेर आर्तेर अदिक चिकोरी बिटकु नाक हजार मंळसा ईरोर.
39याग आव भीळ इक सार माळकु ड्वांगा मा येरेदुन, अदिक मगदन प्रदेश दा बंदुन.
Zvasarudzwa nguva ino
मत्ती 15: Haa25
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025