प्रेरितां 28
28
माल्टा टापुये च पौलुस
1ताहली जे अहें सारे समुद्रा रे कण्डे ठीक-ठाक पुज्जीगे, तां पता लगया भई इस टापुये रा नौं माल्टा था। 2कने तित्थी रे रैहणे औल़यां अहां पर महान दया करीने अहांजो ग्रहण कित्या; काँह्भई बरखा बरसणे ते ठण्ड हुया राँ थी, इस खातर तिन्हें आग्ग बाल़ीने अहां सब्बीं जो सकाया।
3ताहली जे पौलुसे लकड़ियां रा अंगड़ु कट्ठा करीने अग्गी पर रखया, तां इक सप्प सेक्का ते निकल़या कने तिसरे हत्था च लपेठि गया। 4तां जे तिन्हें निवासियें सप्पा जो तिसरे हत्था ने लटकोई रा देख्या, तां अप्पूँ चियें गलाया, “सचमुच ये माहणु हत्यारा हुँगा भई समुद्रा ते तां बची गया, तां बी अहांरी देबिये पौलुसा जो ज्यूंदा रैहणे नीं दित्या।”
5तां तिने सप्पा जो अग्गी च ठुटकित्या, कने तिस्सो किछ नुक्शान नीं हुया। 6पर सै लोक इन्तजार करदे रै भई तिसजो सोजिश औणी या इकदम पईने मरी जाणा, पर तां जे सै मतिया देरा तका देखदे रै कने देख्या भई तिसरा किछ नुक्शान नीं हुया, तां अपणा बचार बदली ने गलाया, “ये तां कोई देबता।”
7तिसा जगह रे नेड़े तेड़े तिस टापुये रे प्रधान पुबलियुस री जमीन थी। तिने अहौं अपणे घरा नेईने तिन्हां दिनां तका दोस्तां साई आओ-बैठ किति। 8पुबलियुस रा पिता बुखार कने खून बगणे रा रोगी था। इस खातर पौलुसे तिसरे कमरे च जाईने प्राथना कित्ती कने तिस परा हाथ रखीने तिस्सो ठीक करित्या। 9ताहली जे येढ़ा हुआ तां तिस टापुये रे बाकी बमार लोक पौलुस ले आये कने ठीक हुईने गै। 10तिन्हें अहांरा बौहत आदर कित्या, कने ताहली जे अहें तिन्नां महीनयां ते बाद चलने लगे तां जो किछ अहां खातर जरूरी था, जहाजा पर रखीत्या।
मालटा दवीपा ते रोमा रिया तरफा
11तिन्नां महीनयां ते बाद अहें सिकन्दरिया नगरा जो जाणे औल़े इक्की जहाजा पर बैठीने चले सै जे तिस टापुये पर सारियां ठन्ठी रैईरा था, कने तिसरा नशाण दियुसकुरी था। 12सुरकुसा शहरा च लंगर सट्टीने अहें तिन्नां दिनां तका रुकीरे रै।
13तित्थी ते अहें अग्गे बधीने रेगियुमा नगरा च पुज्जे; कने इक्की दिना ते बाद दखणा री हवा चली, तां अहें दुज्जे रोज पुतियुली शहरा च आये। 14तित्थी अहांजो विश्वासी मिले, कने तिन्हांरे कैहणे ते अहें तिन्हांले सत्तां रोजां तक रै; कने इस तरिके ने अहें रोम नगरा तक यात्रा शुरु कित्ती। 15तित्थी ते किछ विश्वासी अहांरे औणे री खबर सुणीने सै अपियुस नगरा रे चौका कने तिन्न सराये तक अहांने भेंट करने जो आये, तिन्हांजो देखीने पौलुसे बौहत हौंसला पाईने परमेशरा रा धन्यवाद कित्या।
16ताहली जे अहें रोमा नगरा च पुज्जे तां पौलुसा जो इक्की सपाईये सौगी सै जे तिसरी रखवाली कराँ था, कल्हे रैहणे रा हुक्म मिल़या।
रोमा च पौलुस
17तिन्नां दिनां ते बाद तिने यहूदियां रे प्रमुख लोकां जो सदया, कने तां जे सै कट्ठे हुये तां तिन्हांने गलाया, “हे भाईयो मैं अपणे लोकां रे या पूर्वजां रियां प्रथां रे बरोधा च किछ बी नीं कित्या, फेरी बी कैदी बणीने यरूशलेम ते रोमी सरकारा रे हत्था सौंपया गया। 18तिन्हें मिन्जो परखीने छड्डी देणा चाया काँह्भई मेरे च मौती रिया सजा रे लायक कोई इल्जाम नीं था। 19पर तां जे यहूदी अगुवे इसरे बरोधा च बोलणे लगे, तां मिन्जो बादशाह कैसरा री दुहाई देणी पैई; इस खातर नीं भई मांह अपणे लोकां पर कोई दोष लाणा था। 20इस खातर मैं तुहांजो सदया भई तुहांजो मिलूँ कने गल-बात करूँ; काँह्भई इस्राएल री आशा यनि मसीह रे खातर हऊँ इस जंजीरा च जकड़ी रा।” 21तिन्हें तिसने गलाया, “नां अहें तेरे बारे च यहूदा प्रदेशा रे लोकां ते चिट्ठियां पाईयां। कने नां विश्वासियां चते किन्हिये आईने तेरे बारे च किछ दस्या या बुरा गलाया। 22पर तेरा विचार क्या? तिस्सो इ अहें तेरते सुणना चांये, काँह्भई अहें जाणाँ यें भई हर जगह इस मता रे बरोधा च लोक गल्लां कराँ ये।”
23तां यहूदियें तिस खातर इक दिन तैह कित्या, कने मते लोक तिसले कट्ठे हुये, कने सै परमेशरा रे राज्जा री गवाही देन्दा हुआ। कने मूसा री व्यवस्था कने भविष्यवक्तयां री कताबां चते यीशुये रे बारे च समझाई-समझाई ने सवेरे ते संझा तका दसदा रैया। 24तां किछ लोकें तिन्हां गल्लां पर विश्वास कित्या, कने कईयें लोकें विश्वास नीं कित्या। 25तां जे सै अप्पूँ चियें इक मत नीं हुये, तां पौलुसा रिया इसा गल्ला रे बोलणे पर चलीगे : “पवित्र आत्मे यशायाह भविष्यवक्ता ते तुहांरे पूर्वजां ने ठीक इ गलाया,
26‘जाईने इन्हां लोकां ने बोल,
भई तुहां सुणदयां त रैहणा, पर नीं समझणा,
कने तुहां देखदे त रैंहणा, पर बुझणा नींआ;
27काँह्भई इन्हां लोकां रा मन कठोर ये
कने इन्हांरे कान्न सुणी नीं सकदे,
कने इन्हें अपणियां आक्खीं बन्द कित्ती रियां,
इस खातर इन्हां रियां आक्खीं देखी नीं सकदियां,
कने कान्न सुणी नीं सकदे, कने ये मना ते समझी नीं सकदे, जे ये नीं हुन्दा तां
सै फिरी जान्दे, कने हऊँ तिन्हांजो चंगा करी देन्दा।’
28इस खातर तुहें जाणो भई परमेशरा रे इस छुटकारे री कथा अन्यजातियां ले भेज्जी गईरी, कने तिन्हां ग्रहण करनी।”
29तां जे तिने येढ़ा गलाया तां यहूदी अप्पूँ चियें बौहत बैहस करने लगे कने तित्थी ते चलीगे। 30सै पूरे दुईं साल्लां तका किराये रे घरा च रैया, 31कने सै जे तिसला औवां थे, तिन्हां सब्बीं ने मिलदा रैया कने बिणा रोक टोक बौहत निडर हुईने परमेशरा रे राज्जा रा प्रचार करदा कने प्रभु यीशु मसीह री गल्लां सखांदा रैया।
Zvasarudzwa nguva ino
प्रेरितां 28: KFSNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.