प्रेरितां 17
17
थिस्सलुनीके नगरा च
1फेरी पौलुस कने सीलास अम्फिपुलिस कने अपुल्लोनिया नगराँ चियें हुईने थिस्सलुनीके शहरा च आये, तित्थी जे यहूदियां रा इक सभा घर था। 2पौलुस अपणी रितिया रे मुतावक तिन्हां ला गया, कने तिन्न हफ्ते तका पवित्रशास्त्रा ते तिन्हांने वाद-विवाद करदा रैया;
3कने तिन्हांरा मतलब खोल्ली-खोल्ली ने समझां था भई मसीह रा दुख सैहणा, कने मूईरेयां चते ज्यूंदा हूणा, जरूरी था; कने, “सै यीशु तिसरी जे हऊँ तुहांजो कथा सुणाई राँ, मसीह आ।” 4तिन्हां चते किछ यहूदियें, कने परमेशरा ते डरने औल़े यूनानियां चते बौहत लोकें कने कई कुलीन जनानें यीशु मसीह पर विश्वास करीने तिसरी अराधना कित्ती, कने सै बी पौलुस कने सीलासा ने मिलणे जो त्यार हुई गियां।
5पर यहूदियें डाह ने भरी ने बजारू लोकां चते किछ बुरयां माहणुआं जो अप्पूँ सौगी लया, कने भीड़ कट्ठी करीने नगरा च दंगा करने लगे, कने यासोन रे घरा पर हमला करीने तिन्हांजो लोकां रे सामणे लौणा चाया। 6तित्थी तिन्हांजो सै नीं मिले तां यासोन कने किछ विश्वासियां जो नगरा रे हाक्मा रे सामणे खिंजी ने ली आये कने रड़ाये, “ये लोक तिन्हें जे संसारा रे हरेक कोणे च हंगामा करी तरा, कने हुण येत्थी बी आईगरे।
7“यासोने तिन्हांजो अपणे घरा रखीरा। ये सब येढ़ा बोलां यें भई यीशु इ राजा, कने बादशाह कैसरा रे हुक्मा रा बरोध कराँ यें।” 8तिन्हें लोकां जो कने नगरा रे हाक्मां जो येढ़ा बोलीने घबराई त्या। 9इस खातर तिन्हें यासोना कने बाकी लोकां ते मुचलका लईने तिन्हांजो छड्डीत्या।
बिरिया नगरा च पौलुस कने सीलास
10विश्वासियें रातो-रात पौलुस कने सीलास जो थिस्सलोनिया नगरा ते बिरिया नगरा च भेजित्या; कने सै तित्थी पुज्जी ने यहूदियां रे यहूदी सभा घर च गये। 11ये लोक त थिस्सलुनीके नगरा रे यहूदियां ते खरे थे, कने तिन्हें दिल लाईने वचन ग्रहण कित्या, कने हर रोज पवित्रशास्त्रा च टोलदे रै भई ये गल्लां येढ़ियां इ हईयां की नीं। 12इस खातर यूनानी जनाना चते बौहतीं, कने कुलीन जनानां चते कने माहणुआं चते बौहतीं विश्वास कित्या।
13पर तां जे थिस्सलुनीके नगरा रे यहूदी जाणीगे भई पौलुस बिरिया नगरा च बी परमेशरा रा वचन सुणाये राँ, तां तित्थी आईने बी लोकां जो भड़काणे कने हलचल मचाणे लगे। 14फेरी विश्वासियें झट इ पौलुसा जो विदा कित्या भई समुद्रा रे कनारे चली जावा; पर सीलास कने तिमुथियुस बिरिया नगरा च रईगे। 15पौलुसा जो ल्यौणे औल़े तिस्सो एथेंस नगरा तक लईगे; कने पौलुसा रे इस हुक्मा सौगी सै बिरिया नगरा च वापस हुईगे भई सीलास कने तिमुथियुसा जो छोड़े इ तिन्हांले भेजी दित्या जाओ।
एथेंस नगरा च पौलुस
16ताहली जे पौलुस एथेंस नगरा च सीलास कने तिमुथी रा इन्तजार करयां राँ था, तां नगरा जो मूर्तियां ने भरीरा देखीने तिसरा मन बड़ा उदास हुया। 17इस खातर सै यहूदी सभा घर च यहूदी लोकां कने परमेशरा ते डरने औल़े यूनानी, कने बजारा रे चौराहे च सै लोक जे तिस्सो मिले थे तिन्हांने हर रोज वाद-विवाद कराँ था।
18फेरी इपिकूरी कने स्तोईकी दार्शनिकां चते किछ तिसने तर्क करने लगे, कने कईयें गलाया, “ये बकवादी क्या बोलणा चाँह?” पर दुज्जेयां गलाया, “ये होरसी रा प्रचारक लगया राँ” काँह्भई सै यीशुये रा कने भीं ते जिऊंदा हुणे री खुशखबरी सुणावां था।
19फेरी सै तिस्सो अप्पूँ सौगी अरियुपगुस सभा च लईगे कने पुच्छया, “क्या अहें जाणी सक्कां यें भई ये नई शिक्षा तिस्सो जे तू सणवां, क्या? 20काँह्भई तू अहांजो नोखियां गल्लां सुणावां, इस खातर अहें जाणना चाँये भई इन्हांरा क्या मतलब आ।” 21(इस खातर भई कई एथेंस वासी कने सै जे प्रदेशी तित्थी रैयां थे, नौंईयां-नौंईयां गल्लां बोलणे कने सुणने ते इलावा होर किसी कम्मां च बगत नीं बितांदे थे।)
अरियुपगुस रिया सभा च पौलुसा रा भाषण
22तां पौलुसे अरियुपगुस सभा रे बिच खड़े हुईने गलाया, “हे एथेंस रे लोको, हऊँ देख्यारा भई तुहें हर गल्ला च देबतयां रे बड़े मनणे औल़े। 23काँह्भई हऊँ फिरदे-फिरदे तांजे तुहांरियां पुजणे रियां चिज़ां जो देख्यारा था, तां इक येढ़ि वेदी मिली, तिस पर लिखिरा था, ‘अनजाणे ईश्वरा खातर।’ इस खातर तिस्सो जे तुहें बिणा जाणे पुज्जां ये हऊँ तुहांजो तिसरी खबर सुणावां।
24“तिने परमेशरे जे संसार कने संसारा रियां सब चिज़ां जो बणाया, सै स्वर्ग कने धरतिया रा मालक हुईने, हत्था रे बणाईरे मन्दरा च नीं रैंहदा; 25तिस्सो किसी चिज़ां री कमी नीं इस खातर तिस्सो माहणुआं रिया सहायता री जरूरत नीं, काँह्भई सैई सब्बीं जो जीवन कने सांस कने सब किछ देणे औल़ा।
26“इक्की माहणुये ते तिने माहणुआं रियां सारियां जातियां बणाईयां ताकि सै सारिया धरतिया पर बसी जाओ; कने तिने इ लोकां रा बगत तैह करित्या कने तिसा जगह री, तित्थी जे सै रौ, सीमायें बन्ही तियां, 27परमेशरे ये सब किछ इस खातर कित्या भई लोक परमेशरा री खोज करी सक्को। हुई सक्कां भई सै तिस तक पहुँची ने तिस्सो पाईलो। इतणा हुणे पर बी सै अहां चते किसी ते बी दूर निआं। 28काँह्भई अहें तिसच इ ज्यूंदे रैयां ये, कने चलां-फिराँ ये, कने टिकिरे रैयां ये; ठीक तियां इ जियां जे तुहांरे कितणेयां कवियें बी बोलीरा, ‘अहें तिसरे इ वंशा रे।’
29“कने काँह्भई अहें परमेशरा रा वंश ये इस खातर अहांजो ये कदीं नीं सोचणा चाहिन्दा भई सै दिव्य अस्तित्व सोना या चान्दी या पत्थरा री बणीरी माहणुये री कल्पना या कारीगरिया ने बणी किसी मूरता साई आ। 30इस खातर परमेशरे तिस बगता पर ताहली जे सब अंजाण थे ध्यान नीं दित्या, पर हुण हर जगह सब्बीं माहणुआं जो मन फिराणे रा हुक्म देआं। 31काँह्भई तिने इक दिन रखीरा, तिसच जे तिस माहणुये रे जरिये संसारा रा न्याय करना, तिस्सो जे तिने रखीरा, कने तिस्सो मूईरेयां चते ज्यूंदा करीने इसा गल्लां रा सबूत सारयां लोकां जो देईतरा।”
32मूईरयां चते जिऊंदा हुणे री गल्ल सुणीने किछ लोक मजाक उड़ाणे लगे, कने कईयें गलाया, “ये गल्ल अहें तेरते फेरी कदीं सुणगे।” 33तां पौलुस तिन्हां चते निकल़ी गया। 34पर किछ माहणु तिसने सौगी मिले, कने प्रभु यीशुये पर विश्वास कित्या; तिन्हां च जे दियुनुसियुस सै जे अरियुपगुस सभा रा सदस्य था, कने दमरीस नौआं री इक जनाना थी, तिन्हां सौगी होर बी किछ लोक थे।
Zvasarudzwa nguva ino
प्रेरितां 17: KFSNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This work is licensed under Creative Commons Attribution-ShareAlike 4.0 License.