Olóma 7
7
Kɛlɛ́tɛna a á dúgúgé naá magálá má gicele
1Bolimóní bámɛ, bɛɛnyɔ́ɔ báaba no íyimenemú Gicele ndɛ́ caá: Gicele gɛ nonamɔ́ mɔtɔ gɛcamɛna gɛ́ɛgɛ a gá lɔ́mɔ́ ogɔ́sɔ; no íyimene bese na bese nɔ́ɔnɔ. 2Gieninye gɛ́gɛ́ɛ: Gicele gá nɛbáná gɛ́ nona okɔ́dɔ gɔ́ɔgɔ onɔ́mɛ a gɔ́ ɔyɔmɔ́. Kanɛ́ onɔ́mɛ a amɔ́ a gúe, okɔ́dɔ a bɛ́ɛmba filíi go Gicele gá nɛbáná gɛ́ɛgɛ gɛ́ á lɔmɔ́ gɛ́ mo lada na onɔ́mɛ. 3Nɔ́ɔnɔ gó lɛ́ aá, okɔ́dɔ mɔ́ɔnyɔ amɔ́ ɛ ɛ́da go nɛbáná naá mɔtɔ untió, onɔ́mɛ ba busío a gá lɛ́ ogɔ́sɔ, bá mo dɔ́ŋɔnɔ odáŋadaŋa ba okɔ́dɔ; onɔ́mɛ kanɛ amɔ́ a gúe, Gicele gá nɛbáná gɛ́ dɛ mo nonáa, a ná lɛ́ ba ŋaá a gɔ́lɔ mɔtɔ untió, kanɛ go bɛ́ɛmba odáŋadaŋa. 4Bolimóní bámɛ, bó lɛ́ nɔ́ɔnɔ gɛ́nyɔ́ caŋa táŋɛ́ mmue; Gicele gɛ́ dɛ gɔnɔ́ nyó nona, no ná lɛ́ aŋa begúe, goakɛ́ aŋa Kilítusu a mbaá gúe, bɛɛnyɔ́ɔ tɔ́nɔ no báá gúé. Gɔ́ɔ no ná lɔ́mɔ́ go ɔ́bɛnɔnɔ nɛhɛ́, mɔ́ɔ mɔ́ɔnyɔ Asaŋa a mbaá mo fúfúné naá begúe, go goŋaá dɛ báá ŋanánáa bisi bá moóma go busío bá Asaŋa. 5Cóá aŋa dɛ mbaá lɔmɔ́ dɛ gɔ́ ɔyɔ go gɛ́cɔ́ moatɛ́, bɔ́ɔbɔ Gicele gɛ́ mbaá lɔmɔ́ gɛ́ có loodonyo goŋaá bó lɛ́ gɛlɔgɔ, bɔ́ bɛɛcɔ́ɔ dɛ mbaá lɛ dɛ ŋanana. Bɛgáda bá mbééníŋínyí bɛ́ɛbɔ bɛ́ lɛ go ɛ́da go yɔgɔnɔ bɛ́ có indenye go go ɛ́da húme naá nigúe. 6Kanɛ́ godɔ́ɔdɔ, dɛ dɛ báá gɔnɔ́ naá magálá má Gicele. Ɛɛ́ɛŋ, dɛ ná lɛ́ aŋa begúe naá busío bá bɔ́ɔbɔ bó mbaá lɛ bó có nona naá ncíbo ya gɛaŋɔ́. Dɛ ná lɛ́ bá go yɔgɔnɛnɔ Asaŋa naá mbɔ́dɔ ya gɛpáa gá pɛ́ gɛ́ɛgɛ gɛ́ có dúfenyemú Gimmúmpúu gá Giliíli, caá akɛ́ naá mbɔ́dɔ ya gɛcóa gá pɛ́ gɛ́ɛgɛ gɛ́ mbaá lɛ ɔ́ŋɔ́ɔlú naá Gicele.
Buelí bá Gicele
7Dɛ lɔ́mɔ́ ba go oyɛda kanɛ́ dɛ amɔ́ nɛɛ́nɛ o? Gicele gɛ́ lɛ́ gɛlɔgɔ lí? Akɛ́ manɛ́! Goana, aáŋa Gicele gɛ́ lɛ́ kanɛ go bɛ́ɛmba, gásɛ́ ndɛ́ kanɛ go íyime gɛlɔgɔ, gásɛ́ ndɛ́ kanɛ go íyime boóma bɔ́ɔbɔ gɛdɛ́mádɛ́má aáŋa Gicele gɛ́ lɛ́ kanɛ go oyɛda gɛ́ amɔ́: o do ágá gɛdɛ́mádɛ́má go boóma bá sɔ́gɔ́ɔ#7.7 Gihúmie 20.17; Bicele 5.21.. 8Gɔ́ɔ kanɛ́ aŋa gɛlɔgɔ gɛ́ lɔmɔ́ bɛáalú ŋgásɛ́ go busío bá Gicele, gɛ́ báa lɛ gó foyona bɛgáda bá mbééníŋínyí biimée naá yɔmɔ́ɔ. Mammana, kanɛ Gicele gásɛ́ gɛlɔgɔ gɛ́ dɛ bɛanánáa bogaaga. 9Cóá, ká lɛ́ cɛ íyímé Gicele, mba lɛ́ ŋgɔyɔ, kanɛ́ aŋa mbaá ncó gɛ́ ɔ́bɔ, gɛlɔgɔ gɛ́ báá gó dúmine go ɔyɔ, 10nigúe námɛ kanɛ́ nɛ́nɔ́ɔ. Nɔ́ɔnɔ gɔ́ɔ, bɔ́ɔbɔ bó mbaá bádómbánáa namɛ bó lɔ́mɔ́ goŋaá, Gicele gɛ́ɛgɛ gɛ́ mbaá lɛ ba go ídie mɔtɔ naá gɛɔyɔ#7.10 O bana, go eninye na bɔ́ɔbɔ naá Léfi 18.5; Bicele 4.1; 5.33; Esekíele 20.11., gɛ́ báá mo ídíe naá nigúe, naá bámɛ boayá. 11Mammana, gɛlɔgɔ gɛ́ mba bɛáa ŋgásɛ́ go busío bá Gicele; gɛ́ báá mbelé, gɛ́ báá ŋgóná. 12Gicele gɛ́ lɔ́mɔ́ gá Asaŋa gɔ́ɔ bɛlɔsɛnɔ bɛ́ɛbɛ kɔ́ɔ bɛ́ lɔ́mɔ́ bimmúmpúu, bɛtɛ́nɛ́nɛ́ɛ gɔnɔ́ bisi.
Mɔtɔ naá magálá má gɛlɔgɔ
13Kanɛ́ gisi gá boóma gɛ́ lɛ́ ba go óna mɔtɔ o? Akɛ́ɛ, bó do báá nɔ́ɔnɔ! Gɛlɔgɔ gɛ́ gɛ́ mbaá labá go boóma busi, gɛ́ báá gó ŋgóna. Hɔ́ɔlɔ́ gɔ́ɔ gɛlɔsɛnɔ gɛ́ lɔ́mɔ́ dúfíelú bobɛ́ na bogaaga bá gɛlɔgɔ daŋɛ́daŋɛ. 14Dɛ íyimene goŋaá Gicele gɛ́ lɔ́mɔ́ gá Asaŋa, kanɛ́ yɔmɔ́ɔ ndɛ́ mɔtɔ ba nnyɔ́dɔ, bédúelú go boɔlɛ́ naá gɛlɔgɔ. 15Mammana cɛ ɔ́bɔ́nɔ́ɔ boóma bɔ́ɔbɔ ŋŋananamɔ́, cɛ ŋanánáa bɔ́ɔbɔ ndɛ́galɛgamɔ́, bó gunde bɔ́ɔbɔ mbɛlabɛlamɔ́ bɔ́ ŋŋananamɔ́. 16Kanɛ́ aáŋa ŋŋanana bɔ́ɔbɔ ndɔ́mɔ́ cɛ lɛ́gálɛ́gáa, nɔ́ɔnɔ gó lɛ́ aá ndɛncana go goŋaá Gicele gɛ́ lɛ́ gisi. 17Mammana, a dɛ bósó yɔmɔ́ɔ mɔ́ɔ ŋŋananamɔ́ boóma moánɛ, kanɛ́ bó lɔ́mɔ́ gɛlɔgɔ gɛ́ɛgɛ gɛ́ lɔ́mɔ́ namɛ. 18Ɛɛ́ɛŋ, ŋgíyimene caá naá yɔmɔ́ɔ mɔtɔ bá nnyɔ́dɔ, besé ɛ dɛ báá. Ndɛ́galɛga go ŋanana besé kanɛ́ cɛ báá na bogaaga. 19Cɛ ŋanánáa besé yɛ́ɛyɛ ndɛ́galɛgamɔ́, kanɛ́ bobɛ́ bɔ́ɔbɔ ndɔ́mɔ́ cɛ lɛ́gálɛ́gáa bɔ́ ŋŋananamɔ́. 20Kanɛ́ aáŋa ŋŋanana bɔ́ɔbɔ ndɔ́mɔ́ cɛ lɛ́gálɛ́gáa, a dɛ báá gɔnɔ́ yɔmɔ́ɔ mɔ́ɔ ŋŋananamɔ́, kanɛ́ bó lɔ́mɔ́ gɛlɔgɔ gɛ́ɛgɛ gɛ́ lɔ́mɔ́ namɛ.
21Gɔ́ɔ ŋgɛ́nanamɔ́ naá gicele moánɛ goŋaá: gɔ́ɔgɔ mmaamanamɔ́ go ŋa besé, bobɛ́ bɔ́ bó lɔ́mɔ́ namɛ fɛaŋɔ go ŋa. 22Hálá, naá odɛ́má yámɛ gúunú, ŋgɔ́bɔnɔ bese na Gicele gá Asaŋa. 23Ŋgɛ́nana hɔ́ɔlɔ́ caá, gicele gíncodío gɛ́ lɛ́ hɔ́ɔ gɛ́ɛgɛ gɛ́ yɔgɔnɔmɔ́ naá yɔmɔ́ɔ nnyɔ́dɔ iŋkimée, gɛ́ nuigenye bɛnɔ́gɔ́ bámɛ bá mbééníŋínyí. Gɛ́ ŋgíyienye gɛɔlɛ́ go gɛlɔgɔ gɛ́ɛgɛ naá nnyɔ́dɔ yamɛ. 24Mahana namɛ makɔ́nɔ́! Nnyɔ́dɔ yamɛ yɛ́ ɛ kɔ́gɔnɔmɔ́ nigúe, ánɛ́ɛ kanɛ́ a ná códiomú o? 25Nigúmi na Asaŋa gá Yésu Kilítu Daadáa bɛcɔ́! Odɛ́nɛ́ yámɛ yɔ́yɔ́ɔ: naá nciŋí yamɛ, yɔmɔ́ɔ gɛɔlɛ́ gá Gicele gá Asaŋa, yɔmɔ́ɔ ummue eé ummue, gɛɔlɛ́ gá gɛlɔgɔ naá nnyɔ́dɔ yámɛ.
Zvasarudzwa nguva ino
Olóma 7: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda