Olóma 13
13
Ɔ́bɛ́nɔ́nɔ́ɔ nɔnɔ baŋgɔ́mɔnɔ
1Mɔtɔ uŋkimée a háanana go ɔ́bɛnɔ baŋgɔ́mɔnɔ báaba bí indenyemú cí, goakɛ́ nɛgaŋa nábɔ́ nɛ́ ɛ́damɔ́ go úlene naá Asaŋa, mɔ́ɔ a bó dílimenyemú. 2Nɔ́ɔ gɔ́ɔ, mɔ́ɔnyɔ a báaŋɛgamɔ́ baŋgɔ́mɔnɔ, i í inyé go ɛnda aŋa Asaŋa a lɛ́galɛgamɔ́. Báaba bá báaŋɛganamɔ́, bá báá ágana bɔ́ɔ moatɛ́ naá ncíbo ya gɛaŋɔ́. 3Báaba bá ŋananamɔ́ besé, bá dɛ háánánáa go bɛa bofoá na batɔ báaba bí indenyemú cí; goana batɔ báaba bá ŋananamɔ́ gɛbɛ́, bɔ́ɔ bá háananamɔ́ go díine baŋgɔ́mɔnɔ. Gɔ́ɔ, ŋanánáa besé goŋaá bá go ségisegi. 4Ŋgɔ́mɔnɔ a lɔ́mɔ́ naá buelí bá Asaŋa go go fáanana mɔtɔ magɛ́nda má go ŋanana bese. Kanɛ́, go amɔ́ o ŋa gɛbɛ́, bɛáa bofoá nɛhɛ́, goakɛ́ bó do báá go dugúnú gɔ́ɔ, a bɛananamɔ́ bogaaga bá go go séesenye. A lɛ́ naá buelí go go dúfie mpímí ya Asaŋa go mɔ́ɔnyɔ a ŋananamɔ́ gɛbɛ́. 5Boóma moánɛ bɔ́ dɛ háananamɔ́ go ɔ́bɛnɔ baŋgɔ́mɔnɔ, caá akɛ́ goana go go díine mpímí ya Asaŋa, kanɛ́ goŋaá, odɛ́má yɛ́cɔ́ yó có dúfenye nɔ́ɔnɔ.
6Boóma moánɛ tɔ́nɔ bɔ́ no soananamɔ́ tásɛ, Asaŋa mɔ́ɔ a mbaá bó dílímínyée go go gɔ́lɔnɔ tásɛ yɛ́ɛyɔ, bá yɔgɔnɔ buelí bese. 7Soɛ́na nɔnɔ onyɔ moánɛ, bɔ́ɔbɔ bó háananamɔ́ nɛhɛ́; no soa tásɛ naá mɔ́ɔnyɔ a háananamɔ́ na tásɛ, tíkédi ya nyonyí naá mɔ́ɔnyɔ a háananamɔ́ na tíkédi, no bɛa ŋgɔ́bɛnɔ naá mɔ́ɔnyɔ a háananamɔ́ na ŋgɔ́bɛnɔ, no hálamana mɔ́ɔnyɔ a háananamɔ́ na kálamana#13.7 Go big. 6-7 o bana, go eninye na Mot 22.21; Mél 12.17; Lók 20.25..
Ŋgáa dɛ no maamanɛna
8Mɔtɔ a dɛ háánánáa go bɛɛnanɛna sɔ́gɔ́ɔ ufínó, aáŋa caá goana yá gɛnɔ́ɔ́nɛ́nɔ́ gɛ́ɛgɛ gɛ́ háananamɔ́ go bɛ́ɛmba naá kadɛ́gadɛ́ɛ yɛnyɔ́. Mɔ́ɔnyɔ a maamanamɔ́ basɔ́gɔ́ɔ, a báa go hóogio gicele giimée. 9Naá bɛlɔsɛnɔ bá Asaŋa bɛ́ɛbɛ bɛ́ lɔ́mɔ́: «O do ŋaáa gɛdáŋa, o do óná mɔtɔ, o do íbé boóma, o do bɛáa gɛdɛ́mádɛ́má go boóma bá sɔ́gɔ́ɔ», na bɛlɔsɛnɔ bɛ́ɛbɛ bíntió, bɛ́ lumenene naá nogálɔ táŋɛ́ númmue nɔ́ɔnɔ nó lɔ́mɔ́: «O maamana sɔ́gɔ́ɔ bahɔ aŋa maamɔ́ɔ moatɛ́#13.9 Go ɛ́na Gihúmie 20.13-17; Bicele 5.17-21; Léfi 19.18..» 10Mɔ́ɔnyɔ a maamanɛnamɔ́, a dɛ ŋanánáa sɔ́gɔ́ɔ boóma bobɛ́. Kɔ́ɔ mɔ́ɔnyɔ a maamanamɔ́ sɔ́gɔ́ɔ, a á hóógío gicele giimée.
11Bégíndíemú nɔnɔ, goakɛ́ no íyimene gɛcamɛna gɛ́ɛgɛ dɛ ná lɔ́mɔ́ kɔ́ɔ; gɛcamɛna gɛ́ á háá gá goŋaá no foyoga naá dɔnɔ́ɔ dɛ́nyɔ́#13.11 gá goŋaá no foyoga naá dɔnɔ́ɔ dɛ́nyɔ́: ŋgɔ́ŋɛ́ síncodío sɛ́ amɔ́gá goŋaá dɛ foyoga go dɔnɔ́ɔ dɛ́cɔ́. . Godɔ́ɔdɔ, gisódio gɛ́ ná lɛ́ mekúígíi nɛcɔ́, gó dómba gɛcamɛna gɛ́ɛgɛ dɛ mboó olímínyóo. 12Budúgú bó ná lɛ́ páábɔ́, buisí bó gaá gá lɛ́ go bála; ŋgáa dɛ búumbene moóma má mbíno, dɛ gɔ́lɔ bɛlɛŋɔ bá go noanana na bɛ́ naá gise. 13Ŋgáa dɛ no ɔyɔ naá botɛ́nɛ́ɛ aŋa batɔ báaba bɛ́ ɛndamɔ́ naá gise; dɛ dɛ nyáányáa ɛ́na lí dɛ dɛ nyóánánáa na ginití; dɛ ásɛgɛna gɛbɛ́ gá gɛɔyɔ na gɛɔyɔ gá hanyɔ́, cáŋɔ́ na hɛagá. 14Ŋgáa dɛ bɛ́ɛmba aŋa Daadáa Yésu Kilítu; dɛ dɔmbɔ go ŋanana bɛbɛ́ bá moóma bɛ́ɛbɛ nnyɔ́dɔ yɛcɔ́ ɛ lɛ́galɛgamɔ́.
Zvasarudzwa nguva ino
Olóma 13: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda