Olóma 10
10
Daadáa a lɛ́ táŋɛ́ ummue go mɔtɔ uŋkimée
1Bolimóní, boóma bɔ́ɔbɔ ŋgɔŋɔnɔmɔ́ Asaŋa kɔnɔ bó lɛ́galɛga naá odɛ́má yámɛ uŋkimée bó lɔ́mɔ́ goŋaá a sódio Beyúdene. 2Kálagala daŋɛ́daŋɛ go busío bábɔ́ caá: bá húmenye odɛ́má makɔ́nɔ́ go busío bá Asaŋa kanɛ́ bá dɛ bósó go íyimene mammana ya pɛ́ yɛhɛ́. 3Bá lɛ́ kanɛ go lɛnca mbɔ́dɔ yɛ́ɛyɛ Asaŋa i íyenyemú batɔ bɛtɛ́nɛ́ɛ, bɔ́ɔ bá fúmbe botɛ́nɛ́ɛ goana go nciŋí yabɔ́ ya moatɛ́. Bá báá lɔbɛ́nɔ́ bá dɛ olímínyóo mbɔ́dɔ yɛ́ɛyɛ mɔ́ɔ i íyenyemú batɔ biimée bɛtɛ́nɛ́ɛ. 4Goúle gá Kilítusu gó mba meníe bogaaga bá gicele goŋaá biimée báaba bó olimonyomú bɛ́ ɛ́ya bɛtɛ́nɛ́ɛ naá oŋgíso yá Asaŋa.
5Náana gɔ́ɔ Mɔ́sɛsɛ a mbɔɔ́ ɔ́ŋɔ́ go botɛ́nɛ́ɛ bɔ́ɔbɔ bú úlenemú naá gicele a amɔ́: Mɔtɔ mɔ́ɔnyɔ a ŋgaá ŋaáa aŋa gɛ́ oyamɔ́, a ŋgɔ ɔyɔ́ɔ go gɛ́#10.5 Go ɛ́na naá Léfi 18.5.. 6Kanɛ́ náana gɔ́ɔ botɛ́nɛ́ɛ bɔ́ɔbɔ bó úlenemú naá gioliminyo bó oyamɔ́: O do bágálɛ́dɛ́ná naá odɛ́má go amɔ́: Ánɛ́ɛ a ŋgaá bólɛ́gá naá mmoɛná o? Nɔ́ɔnɔ gó lɛ́ go siisie gá Kilítusu. 7Ɛ́na lí: Ánɛ́ɛ a ŋgaá siisé naá cí gúunú o? Nɔ́ɔnɔ gó lɛ́ go gundie gá Kilítusu naá kadɛ́gadɛ́ɛ ya begúe. 8Kanɛ́ Ŋgɔ́ŋɛ́ yɛ oyamɔ́ yɛ amɔ́ ŋkádɛ́ o? Nogálɔ ná Asaŋa nó lɛ́ mekúígíi nahɔ, nó lɛ́ naá mamɔ́ nyuudé, nó lɛ́ tɔ́nɔ naá mamɔ́ odɛ́má#10.8 go gig. 6-8: go ɛ́na naá kálata ya Bicele 9.4; 30.12-14.. Nogálɔ ná gioliminyo nɔ́ɔnɔ, nɔ́ moánɛ dɛ dúmeninyemú. 9Kɔ́ɔ go amɔ́ o gálagala na nyuudé náhɔ go amɔ́ Yésusu a lɛ́ Daadáa, aáŋa go olimonyo naá odɛ́má yáhɔ go amɔ́ Asaŋa a mba mo fúfúné naá kadɛ́gadɛ́ɛ ya begúe, Asaŋa a ŋga go sódío. 10Mammana, mɔ́ɔnyɔ o olimonyomú naá odɛ́má yɛ́hɛ́, Asaŋa a mo íyenye gɛtɛ́nɛ́ɛ; gɔnɔ́, mɔ́ɔnyɔ o oyamɔ́ daŋɛ́daŋɛ na nyuudé nɛ́hɛ́ a amɔ́ Yésusu a lɛ́ Daadáa, Asaŋa a mo sódonyo. 11Ŋgɔ́ŋɛ́ yɛ oya yɛ amɔ́: Mɔ́ɔnyɔ a áganamɔ́ odɛ́má yɛ́hɛ́ naá mɔ́ɔ, a dɛ ŋgá nóa odóɛ#10.11 Iseyíi 28.16, naá ŋgɔ́ŋɛ́ sá cóá cóá na nogɛlɛ́gɛ.. 12Gɔ́ɔ, godádoga gó lɔ́mɔ́ gó do bɛ́ɛ́mbá na Beyúdene na boɛ́nɔ búntió. Bá lɛ́ Daadáa babɔ́ táŋɛ́ ummue. Biimée báaba bá mo fínenyemú, a bó ŋanana niibo. 13Ɛɛ́ɛŋ, uŋkimée mɔ́ɔnyɔ a ŋgaá fínídínyée ufíno yá Daadáa, Asaŋa a ŋga mo sódío#10.13 Soɛ́lɛ 3.5..
14Kanɛ́ bá ŋgaá mo fínényée nɛɛ́nɛ aáŋa bá lɛ́ kanɛ go ága odɛ́má yábɔ́ naá mɔ́ɔ o? Gɔnɔ́ bá ŋgaá ágá odɛ́má yábɔ́ naá mɔ́ɔ nɛɛ́nɛ, bɔ́ɔ kanɛ go mo ɔ́bɔ o? Gɔnɔ́ bá ŋgaá mo ɔ́bɔ́ nɛɛ́nɛ, aáŋa mɔtɔ ba go mo dúmenye a dɛ bɛ́ɛ́mbá hɔ́ɔ o? 15Gɔnɔ́, mɔtɔ ba go mo dúmenye a ŋgaá bɛ́ɛ́mbá hɔ́ɔ nɛɛ́nɛ, aáŋa bá dɛ mo dómá o? Nɔ́ɔ gɔ́ɔ tɔ́nɔ bó lɔ́mɔ́ naá Ŋgɔ́ŋɛ́ goŋaá: Ɛ́ná aŋa bɛ́ lɔ́mɔ́ bɛnɔ́gɔ́! bɛgɔ́ndɔ́ bá báaba bá dúmenyemú bɛnɔ́gɔ́ bá Cɔ́mɔ#10.15 Iseyíi 52.7.! 16Kanɛ́ mɔtɔ uŋkimée a lɛ́ kanɛ go oliminyo Gɛnɔ́gɔ́ gá Cɔ́mɔ moánɛ. Mbúsí ya Asaŋa Iseyíi yɛ oya moatɛ́ yɛ amɔ́: Daadáa, ánɛ́ɛ a mboó olímínyóo Cɔ́mɔ yɛcɔ́#10.16 Iseyíi 53.1, naá ŋgɔ́ŋɛ́ sá cóá cóá na nogɛlɛ́gɛ. o? 17Bɛ́ ɛ́yanamɔ́ uŋgolímínyí go Cɔ́mɔ yɛ́ɛyɛ go ɔ́bɔnɔmɔ́, kanɛ́ Cɔ́mɔ ya ndiemi, gibédímbígéné gá yɛ́ gɛ́ lɔ́mɔ́ nogálɔ ná Kilítusu. 18Gɔ́ɔ ŋgúhenemú caá: Bá lɛ́ kanɛ go ɔ́bɔ nogálɔ moánɛ o? Bá mba nó ɔ́bɔ! Ŋgɔ́ŋɛ́ yɛ oya yɛ amɔ́: Ikelú ya moóma mɔ́ɔmɔ Asaŋa a mbaá gedíe yɛ á dónógógá naá cí iŋkimée. Dogálɔ dá mɔ́ dó báá saáa naá cí iŋkimée. 19Kɔ́ɔ ŋgúhunemú caá: Boɛ́nɔ bá Ɛ́sɛlahɛ́ɛlɛ bó lɛ́ kanɛ go ɔ́bɔ cɔ́mɔ moánɛ lí? Mɔ́sɛsɛ a mba lɛ́ ba busío ba go bó oyana go busío bá Asaŋa, a amɔ́: Ka ŋga ŋaáa goŋaá no bɛa hɛagá na boɛ́nɔ bá kanɛ ŋgénéménée. Ka ŋga búlúmúncée mpímí yɛnyɔ́ na boɛ́nɔ bá kanɛ nciŋí. 20Iseyíi ɛ ɛ́dana naá busío o oya go busío bá Asaŋa a amɔ́: Bá lɛ́ kídéelú, báaba bá mbaá lɔmɔ́ bá dɛ púúmbée. Mmba gɔnɔ́ bóloodio go báaba bá mbaá lɔmɔ́ bá dɛ ŋgúhúné boóma. 21Kanɛ́ o oya go busío bá Ɛ́sɛlahɛ́ɛlɛ a amɔ́: Buisí buimée buimée mmba lɛ́ tóŋonyo ɛmbɔ́gɔ go boɛ́nɔ bá kanɛ ŋgɔ́bɛnɔ na mpálɔ́#10.21 Go bigísi 18 a húme 21: go gig. 18 Ɛsagɔ 19.5, ŋgɔ́ŋɛ́ sá cóá cóá naá nogɛlɛ́gɛ go gig. 19 go ɛ́na naá Bicele 32.21 go gig. 20-21 Iseyíi 65.1-2, ŋgɔ́ŋɛ́ sá cóá cóá naá nogɛlɛ́gɛ..
Zvasarudzwa nguva ino
Olóma 10: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda