Meŋiigíe 20
20
Oŋɛndɔ yá Póolo naá Tolóasɛ
1Aŋa ologodo mɔ́ɔnyɔ a mbaá dɔmbɔ́, Póolo go bándɛgɛna boolímínyí. Aŋa a mbaá ŋá a báá go bó fáanana dogálɔ dá magɛ́nda, gɛ́hɛ́ go bó síe a bɛ́ɛ́ ɛ́dá naá Masɛdóanɛ. 2A báá dómbá naá gigísi gá hoóma gɛ́ɛgɔ, ɛ ɛ́da a gúlumeninye boolímínyí, a bó fáanana ɛsɔ́mɔ. Kanɛ́ gɛ́hɛ́ go ɛ́da naá Gɛlɛ́sɛ. 3Go bɛ́dɛmana hɔ́ɔ ɛfɛ́ ɛdadɔ́. Kanɛ́ aŋa a mbaá ŋá a ná lɛ́ ba go gɔ́lɔ sitíme go go ɛ́da naá Silíi, go ɔ́bɔ goŋaá Beyúdene bá mba lɛ́ mo gálɛ́náalú ɛdɔgɛ. Gɔ́ɔ a bégediemú goŋaá a nco gunde na nnyimé naá Masɛdóanɛ. 4A mba lɛ́ olɔŋɔ na Sopátɛlɛ, ohaŋa ba Pílusu ba tɛ́sɔnɔ ya Belée, Alɛsɛtálakɛ na Sɛkɔ́ndɛsɛ, batɔ bá tɛ́sɔnɔ ya Tesoloníke, Géyusu ba tɛ́sɔnɔ ya Délébe, na Timotée, tɔ́nɔ na Tisíke, na Tolofíme, batɔ bá Esíi. 5Báaba go dóanana, bá bɛ́ɛ́ ɛ́dá có gɛ́gana naá Tolóasɛ. 6Kanɛ́ bɛɛcɔ́ɔ, aŋa medúgú má bɛlɛ́dɛ bá kanɛ ondɔ yá go fudugenye má mbaá dómbá, Gɛ́cɔ́ go gɔ́lɔ sitíme naá Filípe, naá nnyimé ya medúgú mátáanɔ, dɛ báá gó ɛ́da bó huenye naá Tolóasɛ, dɛ báa ŋaáa hɔ́ɔ gɛanyɛ gímmue.
7Buisí bá busío bá gɛanyɛ, dɛ mba lɛ́ bábándɛ́gɛ́náalú go go gɔ́lɔ manyáanya má Asaŋa. Póolo mɔ́ɔnyɔ a mbaá sɛmɛ́gánánáa go dómba anáa nembeli, a mba lɛ́ gɔ́lɔ́ɔlú dogálɔ naá kadɛ́gadɛ́ɛ ya boolímínyí, dogálɔ moánɛ go ɛ́da bola na odɛ́má ya budúgú. 8Lámba sɛ́ mba lɛ́ gɛca naá nɛgɛlɛ́ ná ncíbo ná mmoɛná, anáa dɛ mbaá lɔmɔ́ bábándɛ́gɛ́náalú. 9Kanɛ́ moádɔmbɔ́ ba ohaŋa, ufíno Etíkusu, a mba lɛ́ ndukíi naá hóndi, go bépéle godɔnɔ́ɔ aŋa Póolo a mbaá lɔmɔ́ ɛ ɛ́dana na Dogálɔ naá busío. Kɔ́ɔ ɛ ɛ́damɔ́ káfoga naá kɛgɛlɛ ya gádadɔ́ɔ ya nnyaŋá ya mmoɛná yɛ́ɛyɔ, go nco bétumidinye go cí, bá báá ncó mo fediginye hɔ́ɔ a báá go gúe. 10Kanɛ́ Póolo go siise, go gudimene a báá mo gɔ́lɔ́ naá mɔ́ ɛmbɔ́gɔ, gɛ́hɛ́ go gálɛda a amɔ́: «No do bɛáa bofoá, a lɛ́ ogɔ́sɔ.» 11Aŋa a mbaá gundé go bólɛga, gɛ́hɛ́ go gɛ́sa gɛlɛ́dɛ a báá nyáá, go ɛ́da naá busío na dogálɔ gó báá mo seemídíné, gɔgɔ́ a gálagala. Naá nnyimé hɔ́ɔlɔ́, gɛ́hɛ́ go síe batɔ a báa dómbá. 12Kɔ́ɔ bá gundemú na moádɔmbɔ́ ba ohaŋa ogɔ́sɔ, bó báa bɛ́ɛ́mbá boóma bá odɛ́má go fuuge.
Póolo a á ádógáná na bafɛanɔ́ɔ bá Ɛ́fɛsɛ a bɛ́ɛ́ ɛ́dá naá Mílete
13Kanɛ́ bɛɛcɔ́ɔ, gɛ́cɔ́ go dóanana naá sitíme go go ɛ́da naá Asoso, anáa dɛ mbaá sɛmɛ́gánánáa go gɔnɔ gɔ́lɔ Póolo. Nɔ́ɔnɔ gɔ́ɔ a mbaá lɔmɔ́ gedíelú, goakɛ́ a mba lɛ́ goŋaá ɛ ɛnda go cí. 14Aŋa a mbaá ncó có huenye naá Asoso, gɛ́cɔ́ go mo gɔ́lɔ naá sitíme, dɛ bɛ́ɛ́ ɛ́da bola naá Mitílene. 15Dɛ á gɔnɔ́ fadɛgɛna hɔ́ɔlɔ́, gɛ́cɔ́ go ɛ́da bola cɛŋɛ na Cío naá gobélie. Naá budúgú bá goɛndɛga, dɛ bɛ́ɛ́ ɛ́dá naá Sámoso. Kanɛ́ naá budúgú bá go gɔnɔ go ɛ́da go ɛndɛga, gɛ́cɔ́ go ɛ́da bola naá Mílete. 16Póolo a mba lɛ́ gedíelú a amɔ́ a dɛ bolá naá Ɛ́fɛsɛ, goakɛ́ a dɛ mbáa lɛ a lɛ́galɛga go yímie gɛcamɛna naá Esíi. A mba lɛ́ a bágáyɛgana goŋaá aáŋa bó lɛ́ aŋa nɛɛ́nɛ, ɛ ɛ́da bola naá Yolósalɛmɛ buisí bá gibíné gá Pantɛkótɛ.
17Naá Mílete hɔ́ɔlɔ́, Póolo go dóma batɔ goŋaá bɛ́ ɛ́da dɔ́ŋɛnɔ bafɛanɔ́ɔ bá boolímínyí báaba naá Ɛ́fɛsɛ. 18Aŋa bá mbaá ncó bola, Póolo go ɛ́da go bó oyanɛna a amɔ́: «No íyimene aŋa ŋgaá ná lɔmɔ́ kɛ́ga nɛnyɔ́ bɛcamɛna biimée, gó bayɛga naá buisí bá busío aŋa mmbaá bolá naá Esíi. 19Ndɛ́ yɔgɔ́nɛ́nɔ́ yɔgɔ́nɛ́nɔ́ Daadáa na gobésiisie guimée, na biósino naá oŋgíso naá kadɛ́gadɛ́ɛ ya bɛdɔmbɔ go modɔgɛ má Beyúdene. 20Kanɛ go nyó ɔsɛgɛnɔ boóma, mmba lɛ́ nnyó oyanɛna kunde nnyó dúfenye hoóma hiimée na naá nnyaŋá sɛ́nyɔ́ buimée bɔ́ɔbɔ bó mbaá lɔmɔ́ ba go bɛ́ɛmba bese go busío bɛ́nyɔ́. 21Mmba dɔ́ŋɔ́nɔ́ɔ Beyúdene na Bágɛlɛ́gɛ goŋaá bá békikilidie naá Asaŋa, bá ága odɛ́má yábɔ́ naá Daadáa bɛcɔ́ Yésusu.
22«Háalá godɔ́ɔdɔ, Gimmúmpúu gá Giliíli a kóda go go ɛ́da naá Yolósalɛmɛ, kanɛ go íyime bɔ́ɔbɔ bó gaá ná mbolɛ́ná hɔ́ɔ. 23Kanɛ́ ŋgíyimene caá, naá tɛ́sɔnɔ iŋkimée, Gimmúmpúu gá Giliíli a tóogoninyo goŋaá ncíbo ya gɛaŋɔ́ na bɛdɔmbɔ mó kɛ́gana. 24Cɛ ɛ́nánáa caá gɛɔyɔ gámɛ gɛ́ lɛ́ gɛantá gá boóma; bó lɔ́mɔ́ goana goŋaá ŋgɛ́da naá busío na bɛyaŋa gó ɛ́da bola naá ombálá yá bosɔ́mɔ bámɛ, kunde nyibe buelí bɔ́ɔbɔ Daadáa Yésusu a lɔ́mɔ́ páalú. Buelí moánɛ bó lɔ́mɔ́ gooya gá Gɛnɔ́gɔ́ gá Cɔ́mɔ ya niibo ná Asaŋa#20.24 O bana, go eninye 2 Tim 4.7..
25«Kɔ́ɔ godɔ́ɔdɔ yɛ́ɛyɛ háalá, ŋgíyimene caá no do ná gɔnɔ go ɛ́na busío bámɛ, bɛɛnyɔ́ɔ biimée báaba ndɔ́mɔ́ dómbáná dómbáná naá kadɛ́gadɛ́ɛ yɛnyɔ́, túfenye goŋaá Asaŋa a lɛ́ Ufuŋe, a gúme naá kadɛ́gadɛ́ɛ yɛnyɔ́. 26Boóma moánɛ bɔ́ɔ ncomɔ́ bákóa ínoni caá: Ummue naá bɛɛnyɔ́ɔ a amɔ́ a yíme, gɛ́ dɛ nnúúnée. 27Mammana, ndɛ́ kanɛ go nyó ɔsɛgɛnɔ boóma, ndɛ́ nyó dúfíelú nɛkɛsa ná Asaŋa niimée. 28Boóma moánɛ bɔ́ɔ nnyó oyanamɔ́ caá bébeŋéemú nɔnɔ bese, no gunde no beŋe giimbó gá boolímínyí gɛ́ɛgɛ Gimmúmpúu gá Giliíli a lɔ́mɔ́ nyó íŋénéelú go go indenye. Beŋé nɔnɔ ncíbo ya Asaŋa yɛ́ɛyɛ a mbaá bódá go manɔ́ŋɔ́ má moɔnɔ́ bɛhɛ́ ba moatɛ́.
29«Ŋgíyimene caá aŋa nná dómbamɔ́, batɔ aŋa bɛkándáa bá nnyama, bá ná nyó íŋenine, bá dɛ ɛŋá boolímínyí. 30Gɔnɔ́ naá kadɛ́gadɛ́ɛ yɛnyɔ́, batɔ bá ná hémene, bá gálagala dogálɔ dá mbele naá kadɛ́gadɛ́ɛ yɛnyɔ́, go go gɔ́gɛdɔ behúúní naá olɔŋɔ yábɔ́. 31Bɛ́ɛmba nɔnɔ kanɛ́ go gɛfɛ́fa, no béeniŋenye goŋaá nnyómá ɛ́dadɔ́ sɛ́ɛsɛ ndɔ́mɔ́ dúmbíelú nɛnyɔ́, sisíi aŋa budúgú ndɛ́ kanɛ go dɔmbɔ go témbugenye uŋkimée mɔ́ɔnyɔ naá kadɛ́gadɛ́ɛ yɛnyɔ́ akɛ́ na biósino naá oŋgíso.
32«Kanɛ́ godɔ́ɔdɔ, ŋgaá nyó dɛ́ɛ́ná naá ɛmbɔ́gɔ ya Asaŋa na naá dogálɔ dá niibo nɛ́hɛ́. A bɛanana bogaaga buimée bá go nyó gíndenye, a gunde a nyó fáa moóma má bese muimée mɔ́ɔmɔ a bɛ́dɛganɛnamɔ́ biiménénée báaba bá lɔ́mɔ́ bɛ́hɛ́.
33«Ndɛ́ kanɛ go ága oŋgíso akɛ́ naá muinyí, akɛ́ naá góolo, akɛ́ naá gɛla gá mɔtɔ. 34No íyimene bɛɛnyɔ́ɔ moatɛ́ goŋaá ɛmbɔ́gɔ yamɛ yɛ́ɛyɛ yɛ́ yɛ á ná túgúnée na buelí bá yɛ́, ɛ báá gundé ɛ báá dúgúnée tɔ́nɔ basɔ́gɔ́ɔ. 35Naá buimée, ndɛ́ nyó dúfíelú goŋaá mɔtɔ a sɛmɛganana go yɔgɔnɔ goŋaá á ba dúgúnée báaba bá lɔ́mɔ́ kanɛ bogaaga, gɔnɔ́ a béeniŋinye dogálɔ dá Daadáa Yésusu dɔ́ɔdɔ a mbaá gálɛ́dá mɔ́ɔ moatɛ́ a amɔ́: “Gofáa gó lɛ́ na besé makɔ́nɔ́ gó dómba gogɛ́ndɛgɛna.”»
36Aŋa Póolo a mbaá maná dogálɔ, gɛ́hɛ́ go kunce enúu go cí go go bósógolonyo Asaŋa olɔŋɔ na biimée. 37Gɔ́ɔ batɔ biimée bá dúmbugemú na mbií, bá báa bágódánáa Póolo naá ukelú go mbédíígí ya go ádogana. 38Bá mbaá lɔmɔ́ bá dómba mpímí goakɛ́ Póolo a mba bó oyáná a amɔ́ bá dɛ ná gɔnɔ go ɛ́na busío bɛ́hɛ́. Gáábɔ́ kanɛ́ go ɛ́da mo díligene naá sitíme.
Zvasarudzwa nguva ino
Meŋiigíe 20: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda