1 Kɔlɛ́ntɛ 1
1
Mbédíígí
1Yɔmɔ́ɔ Póolo, Asaŋa a mbaá tɔ́ŋɛ́nɔ́ go golɛ́ga gɛ́hɛ́, goŋaá mbɛ́ɛmba apótɛlɛ ba Yésu Kilítu. Dɛ lɛ́ namɛ na Sosotɛ́nɛ, ondimóní bɛcɔ́ naá gioliminyo#1.1 Sosotɛ́nɛ: go ɛ́na Meŋ 18.17 . 2Dɛ á nyó ɔ́ŋɛ́nɔ́, bɛɛnyɔ́ɔ giimbó gá boolímínyí Asaŋa gɛ́ɛgɛ naá Kɔlɛ́ɛntɛ, kálata, bɛɛnyɔ́ɔ báaba no lɔ́mɔ́ yáŋónáalú go busío bá Asaŋa goŋaá no bɛ́ɛmba bɛ́hɛ́ naá gobálada gɛ́nyɔ́ gɔ́ɔgɔ na Yésu Kilítu, gɔnɔ́ na biimée báaba bá fínenyemú ufíno yá Daadáa bɛcɔ́ Yésu Kilítu hoóma hiimée bá amɔ́ Daadáa babɔ́, nɛcɔ́ kɛ́. 3Ŋgáa Asaŋa Isée bɛcɔ́ na Daadáa Yésu Kilítu bá nyó boogo, bá nyó fáa buumbénú. 4Go busío bɛ́nyɔ́, mbéhiigi Asaŋa kanɛ tɔmbɛ́nɔ́ɔ go goŋaá a mba nyó boogóo naá gobálada gɛ́nyɔ́ gɔ́ɔgɔ na Yésu Kilítu. 5Gɔ́ɔ, naá gobálada gɛ́nyɔ́ gɔ́ɔgɔ na Kilítusu, Asaŋa a mba nyó hóógío na makana má bonɔ́mɛ miimée, dómbá dómbáa bonɔ́mɛ bá dogálɔ na bɔ́ɔbɔ bá goíyimene. 6Mammana yɛ́ɛyɛ bá mbaá nyó oyáná go Kilítusu, ɛ lɛ́ suméelú tɛ́ŋɛ́tɛŋɛ naá bɛɛnyɔ́ɔ, 7bó húme aŋa no lɔ́mɔ́ no do taŋánáa akɛ́ pááná mmue ya niibo ná Asaŋa, bɛɛnyɔ́ɔ báaba no gɛ́ganamɔ́ buisí bɔ́ɔbɔ Daadáa bɛcɔ́ Yésu Kilítu a ŋgaá nyó bóloodío. 8Moatɛ́, mɔ́ɔ gɔnɔ́ a ŋgaá nyó gíndíe gó ɛ́da húme naá mesúgidinye, goŋaá no bɛ́ɛmba kanɛ cigí naá buisí bá Daadáa bɛcɔ́ Yésu Kilítu goncogunde. 9Asaŋa mɔ́ɔnyɔ a mbaá nyó dɔ́ŋɛ́nɔ́ go go bálada na moɔnɔ́ bɛhɛ́ Yésu Kilítu, Daadáa bɛcɔ́, a dɛ súgénée tánɔ yɛhɛ́#1.9 O bana, go eninye na Bicele 7.9..
Boolímínyí bá básalasala
10Boolímínyí, go ufíno yá Daadáa bɛcɔ́ Yésu Kilítu, sɔ́kɔlɛ, bɛ́ɛ́mba nɔnɔ ukelú yúmmue; gobásalasala gó do bɛ́ɛ́mbá naá kadɛ́gadɛ́ɛ yɛnyɔ́. Mbééníŋínyí yɛnyɔ́ ɛ bɛ́ɛmba táŋɛ́ mmue na odɛ́má yúmmue. 11Kanɛ́, bolimóní bámɛ, batɔ naá nnyaŋá ya Koloé bá lɛ́ ŋgoyánáalú bá amɔ́ no lɛ́ na gobásalasala naá kadɛ́gadɛ́ɛ yɛnyɔ́. 12Nɔ́ɔnɔ gó lɛ́ aá, no lɛ́ na onyɔ moánɛ a gálagala a amɔ́: «Yɔmɔ́ɔ ndɔ́mɔ́ gá Póolo.» Uncodío a amɔ́: «Yɔmɔ́ɔ ndɔ́mɔ́ gá Apolóso.» Uncodío a amɔ́: «Yɔmɔ́ɔ ndɔ́mɔ́ gá Sɛ́fasɛ#1.12 Apolóso: go ɛ́na Meŋ 18.24. Píele: naá ŋgɔ́ŋɛ́ moatɛ́ moatɛ a lɔ́mɔ́ Sɛ́fasɛ na noalamɛ́ɛ bó lɔ́mɔ́ naá cí Gɛdánɛ́dánɛ́ (go ɛ́na naá Sáŋa 1.42)..» Uncodío gɔnɔ́ a amɔ́: «Yɔmɔ́ɔ ndɔ́mɔ́ gá Kilítusu.» 13Ábɔ caá go sala gá Kilítusu gɔ́gɔ́ɔ o? A lɔ́mɔ́ Póolo mɔ́ɔ bá mbaá gilénée naá kolósi go busío bɛ́nyɔ́ lí? Bó lɔ́mɔ́ go ufíno yá Póolo gɔ́ɔ bá mbaá nyó yumínyée lí? 14Mbéhiigi Asaŋa aŋa ndɔ́mɔ́ yumínyéelú goana Kilípusu na Géyusu naá bɛɛnyɔ́ɔ biimée#1.14 Kilípusu: go ɛ́na Meŋ 18.8. Géyusu: go ɛ́na Meŋ 19.29.. 15Nɔ́ɔnɔ, mɔtɔ a dɛ báá ba go gálɛda a amɔ́, bá mba nyó yumínyée go ufíno yámɛ. 16Ɛɛ́ɛŋ! Ŋgaá gɔnɔ́ béeniŋinye goŋaá mba yumínyée Tɛpánɛsɛ na ncíbo yɛhɛ́ ya batɔ kɛ́. Aáŋa caá goana bɔ́ɔbɔ, cɛ bééníŋényée goŋaá mba gɔnɔ́ yuminye mɔtɔ uncodío. 17Kilítusu a lɛ́ kanɛ go tóma go go yumeninye batɔ, kanɛ́, a mbaá tómá go go dúmeninye Gɛnɔ́gɔ́ gá Cɔ́mɔ. Bó do bɛ́ɛ́mbá na nciŋí ya dogálɔ dá batɔ, aáŋa bó lɔ́mɔ́ nɔ́ɔnɔ, gásɛ́ bó gaá gundíe nigúe ná Kilítusu naá kolósi boóma bá dugúnú.
Kilítusu a lɛ́ bogaaga, a lɛ́ nciŋí ya Asaŋa
18Kɔ́ɔ, ŋgoyáamɔ́ yɛ́ɛyɛ ɛ lɔ́mɔ́ goŋaá, Kilítusu a mba gúé naá kolósi, ɛ lɛ́ buegu go go ɛ́na gá batɔ báaba bá lɔ́mɔ́ naá gonana; kanɛ́, ɛ lɛ́ bogaaga bá Asaŋa, go bɛɛcɔ́ɔ báaba dɛ lɔ́mɔ́ naá pɛ́ ya gisódio. 19Mammana bó lɛ́ ɔ́ŋɔ́ɔlú naá kálata ya Asaŋa náana: «Ka ŋgu úlíe nciŋí naá ɛdóɛ ya benciŋínciŋi, nníŋiside pɛgɔ ya bapɛgɔpɛ́gɔ́ɔ.» 20Unciŋínciŋi a lɔ́mɔ́ kanɛ́ áhanɛ́ɛ o? Iloodio há bicele hɛ́ lɔ́mɔ́ kanɛ́ áhanɛ́ɛ? Ugélígélí ba ogɛlɛ yɔ́ɔyɔ a lɔ́mɔ́ kanɛ́ áhanɛ́ɛ o? Asaŋa a lɛ́ gundíelú nciŋí ya batɔ bá cí boóma bá buegu#1.20 O bana, go eninye na Iseyíi 44.25.. 21Mammana, naá go fúmbe na nciŋí yabɔ́ ya moatɛ́, batɔ bá cí yɛ́ɛyɛ bá lɛ́ kanɛ go lɛnca anáa Asaŋa a dúfenyemú nciŋí yɛhɛ́. Ŋgoyáamɔ́ ya nigúe ná Kilítusu naá kolósi, yɛ́ɛyɛ batɔ bá cí bá mbɛɛ́ ɛ́ná goŋaá ɛ lɛ́ buegu, na yɛ́ gɔ́ɔ Asaŋa a mbaá sómbá go sódio báaba bó olimonyomú. 22Ɛɛ́ɛŋ! Naá gɛcamɛna gɛ́ɛgɛ Beyúdene bú úhenemú go ɛ́na bieninye bá gobékúke, Bágɛlɛ́gɛ bɔ́ɔ bá fúmbe nciŋí, 23bɛɛcɔ́ɔ, dɛ oya Kilítusu mɔ́ɔnyɔ bá mbaá gilénée naá kolósi, boóma moánɛ bó sɛga Beyúdene, Bágɛlɛ́gɛ bɔ́ɔ bá amɔ́ buegu bɔ́bɔ́ɔ. 24Kanɛ́ go báaba Asaŋa a mbaá dɔ́ŋɛ́nɔ́, akɛ́ a bɛ́ɛmba ba Beyúdene, akɛ́ ba Bágɛlɛ́gɛ, Kilítusu mɔ́ɔnyɔ dɛ oyamɔ́ mɔ́ɔ a lɔ́mɔ́ bogaaga na nciŋí ya Asaŋa. 25Ɛɛ́ɛŋ, bɔ́ɔbɔ batɔ bá gɔ́lɔnɔmɔ́ bá amɔ́ buegu bá Asaŋa, bó dómbana nciŋí ya batɔ; bɔ́ɔbɔ batɔ bá gɔ́lɔnɔmɔ́ bá amɔ́ bó lɔ́mɔ́ bonɔ́nɔ́ bá Asaŋa, bó gɛ́nda, bó dómbana nciŋí ya batɔ.
26Bolimóní, ɛ́ná nɔnɔ kanɛ́ odɛ́má yɛ́nyɔ́; bɛɛnyɔ́ɔ báaba Asaŋa a lɔ́mɔ́ nyó dɔ́ŋɛ́nɔ́ɔlú goŋaá no bɛ́ɛmba bɛ́hɛ́, no lɛ́ kanɛ́ ŋkádɛ? Naá kadɛ́gadɛ́ɛ yɛnyɔ́, benciŋínciŋi, go go ɛ́na gá batɔ, bá dɛ báá gɛca; bɛgaaga bɛ́ dɛ báá gɛca, bɛyáŋáŋáa bɛ́ dɛ bɛ́ɛ́mbá gɛca. 27Kanɛ́ bɔ́ɔbɔ batɔ bá cí bá gɔ́lɔnɔmɔ́ bá amɔ́ bó lɛ́ buegu, bɔ́ Asaŋa a mbií iyídé go go núugie benciŋínciŋi odóɛ; bɔ́ɔbɔ batɔ bá cí bá gɔ́lɔnɔmɔ́ bá amɔ́ bó lɛ́ bonɔ́nɔ́, a bíí iyídé go go núugie bɛgaaga odóɛ. 28Bɔ́ɔbɔ batɔ bá cí bá núunemú boóma bá dugúnú, bá bó fánɛnafanɛna, bɔ́ɔbɔ bá lɔ́mɔ́ bá dɛ ɛ́nánáa, bɔ́ Asaŋa a mbií iyídé go go níŋiside bɔ́ɔbɔ batɔ bɛ́ ɛ́nanamɔ́ bá amɔ́ bó lɛ́ na ndénégé. 29Bo lɔ́mɔ́ nɔ́ɔnɔ goŋaá, akɛ́ mɔtɔ ummue, a dɛ béségídé naá busío bá Asaŋa. 30Go bogaaga bá Asaŋa gɔ́ɔ no lɔ́mɔ́ báladáalú na Yésu Kilítu, mɔ́ɔ a bɛ́ɛ́ ɛ́yá nciŋí yɛ́ɛyɛ yɛ ɛ́damɔ́ go úlene naá Asaŋa. Kilítusu mɔ́ɔ a có íyenyemú bɛtɛ́nɛ́ɛ naá busío bá Asaŋa, a có soga bobɛ́, a có dúgune naá magálá má gɛlɔgɔ, 31aŋa bó lɔ́mɔ́ naá Ŋgɔ́ŋɛ́ goŋaá: «Mɔ́ɔnyɔ a béségimú, ŋgáa a béségi naá Daadáa#1.31 Go ɛ́na Selemíi 9.23..»
Zvasarudzwa nguva ino
1 Kɔlɛ́ntɛ 1: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda