Roma 3
3
Ngen Ta̱mu̱ta̱dde̱n azunne ol
1I̱yo̱ko̱ zin “Nya ci riili ming ize e̱e̱ti̱ Ya̱u̱do̱c? Nya bo̱do̱k ci abunna ming etted e̱e̱ti̱ wucic vi̱ca̱vi̱ca̱? 2Ming ize e̱e̱ti̱ Ya̱u̱do̱c, riile nege go̱o̱lo̱we̱ cik meelek giir: Arrak oowa, a̱du̱wa̱k Ta̱mu̱ta̱dde̱n kaviyak ciginnek wak abunna ol utuge ci ol cik een Ya̱u̱d.
3“Anyak ol u̱gge̱ cik meelek ngatinne̱ng wak iróng a̱tu̱ kaviyak ne̱ke̱. Azi ungec ci zoz necu ne iróng zin ngen karike zi̱nze̱tti̱ Ta̱mu̱ta̱dde̱n, iróng zin Ta̱mu̱ta̱dde̱n ngen azunne zoz bali u̱du̱wa̱ enne ke̱? 4Iróng een niko! A̱du̱wa̱ Ta̱mu̱ta̱dde̱n zoz ci een de̱de̱, ming nu̱nu̱n ovolong ol do̱o̱k, aalna zoz cinne een de̱de̱ udut. E̱he̱rye̱ Warage ci Ta̱mu̱ta̱dde̱no̱ zoz ci obod ki Ta̱mu̱ta̱dde̱n, azi ne,
“I̱ye̱la̱i̱ atin zoz cunne een de̱de̱ ming ozozi i̱nna̱,
ommogi atin i̱nna̱ ol wak orong kadayi i̱nne̱t lo̱ki̱ka̱.”#Caliwon 51:4
5Ja ku̱du̱wa̱ go̱o̱le̱ ci ozoze ol, ming anyaha zoz ci gerze kogon naga ko̱ ol ka̱gga̱c bunnat ci Ta̱mu̱ta̱dde̱no̱, kozoz wo̱ye̱ naga nya zo̱ze̱ necu? Abaci Ta̱mu̱ta̱dde̱n ngati ettedekket lo̱ki̱ko̱? Iróng Ta̱mu̱ta̱dde̱n abaci. 6Ka̱nne̱kku̱ng zin ne, i̱llo̱i̱, iróng een niko! Ming iróng enne abunna oroot, iróng wo̱ye̱ Ta̱mu̱ta̱dde̱n ettedik olli lo̱o̱tu̱ lo̱ki̱ko̱ ju̱rru̱m. 7Azi wo̱ye̱ e̱e̱ti̱ imma ne, “Ming kovolongi, kar kanyahak volong cinanni ko̱ ol ka̱gga̱c Ta̱mu̱ta̱dde̱n ming a̱du̱wa̱ zoz ci een de̱de̱, kar ol ki̱di̱ngdi̱nga̱ni̱t nonno oroot. Ovvo uggak a̱jji̱nne̱, nya ming azi Ta̱mu̱ta̱dde̱n ne ke̱e̱ni̱ anna e̱e̱t ci mu̱nye̱nu̱?” 8Azi gon ol uggak volonga ne agit cik ka̱du̱wa̱nna̱ zoz cu, “Ku̱tu̱gu̱z mu̱nye̱n, kar ol kicinnet kengerta zoz ci abunna ju̱rru̱m.” Abunna zin ming edez Ta̱mu̱ta̱dde̱n atin nogo do̱o̱k.
I̱llo̱i̱ e̱e̱t ci abunna ngu̱me̱ ci Ta̱mu̱ta̱dde̱no̱
9Kazi wo̱ye̱ naga ne? Kommogja naga olli Ya̱u̱do̱ ol do̱o̱k? Iróng een niko. Ku̱du̱kta̱ wanai arrak naga oowa, kizeto ne abaccit ol do̱o̱k ngu̱me̱ ci Ta̱mu̱ta̱dde̱no̱, ming een e̱e̱ti̱ Ya̱u̱do̱c icima iróng een Ya̱u̱d. 10Azi Waraga ci Ta̱mu̱ta̱dde̱no̱ ne,
“I̱llo̱i̱ rok e̱e̱t co̱de̱ ṯok ci abunna ngu̱me̱ ci Ta̱mu̱ta̱dde̱no̱;
11i̱llo̱i̱ rok e̱e̱t imma ci a̱gga̱ zoz cinne een de̱de̱,
i̱llo̱i̱ e̱e̱t imma ci orong Ta̱mu̱ta̱dde̱n.
12Utuhuyek ol do̱o̱k bo̱i̱ci̱ zoz ci Ta̱mu̱ta̱dde̱no̱,
izeto nege ol cik gerzek;
i̱llo̱i̱ rok e̱e̱t co̱de̱ ṯok ci abunna.”#Caliwon 14:1-3; Caliwon 53:1-3; Ecclesiastes 7:20
13“Ogon u̱tu̱ge̱tti̱ cigge̱k ki e̱le̱gi̱ti̱ ci a̱da̱k i̱ri̱ya̱,
a̱du̱wa̱ a̱ha̱tti̱ cigge̱k zoz ci een volong.”#Caliwon 5:9
“A̱du̱wa̱ bo̱do̱k u̱tu̱ge̱tti̱ cigge̱k zoz ci a̱du̱l emmen ci e̱e̱to̱ ogon ki ming adak uwat e̱e̱t.”#Caliwon 140:3
14“Abbize zoz ci een to̱ri̱ne̱t ki mozinet u̱tu̱ge̱tti̱ cigge̱k do̱ niko.”#Caliwon 10:7
15“Irez nege kumunyet ol ataman.
16Imma ngati ovvoye, egerzan ngin neci kize gerza.
17Iróng nege a̱gga̱ kar kabaito labak.”#Isaya 59:8
18“Iróng nege o̱ngo̱o̱le̱ rok Ta̱mu̱ta̱dde̱n.”#Caliwon 36:1
19Ka̱gga̱yya̱ e̱he̱rye̱ lo̱ti̱nno̱wa̱ kar kozozik ol wak elemi ku̱zu̱tte̱. Kar ming ovvo lo̱ti̱nno̱wa̱ ettedik olli Ya̱u̱do̱ lo̱ki̱ko̱, ettedik atin Ta̱mu̱ta̱dde̱n ol do̱o̱k lo̱ki̱ko̱. I̱llo̱i̱ e̱e̱t co̱de̱ ṯok ci aliti. 20Iróng Ta̱mu̱ta̱dde̱n elemi e̱e̱t imma eci azunne lo̱ti̱nno̱k. Anyak gi̱i̱ co̱de̱ ṯok ci ogon lo̱ti̱nno̱wa̱, i̱ye̱le̱k ol ming abaccit zoz ci ogone nege mu̱nye̱n.
Aanyik Ta̱mu̱ta̱dde̱n e̱e̱t kubunna tu̱we̱nta̱
21I̱yo̱ko̱ kicinnet naga gool ci adimannet Ta̱mu̱ta̱dde̱n kubunnta, iróng een go̱o̱le̱ ci kazunne lo̱ti̱nno̱k cik Musesi. U̱du̱kta̱ lo̱ti̱nno̱wa̱ cik Musesi ki zo̱zzo̱k balik eher a̱ri̱tto̱wa̱ gool ci karubane naga bunnat ci Ta̱mu̱ta̱dde̱no̱. 22A̱kku̱ gool ci zoz ci abunna ko̱ ngati Ta̱mu̱ta̱dde̱no̱, kar ol do̱o̱k kubunnta, elemi enne e̱e̱t ming a̱tu̱ Ye̱su̱ Ki̱ri̱sto̱ kize ti̱ri̱zo̱i̱t cinne. 23Eci ol do̱o̱k anyak ba̱ci̱nno̱k cik mu̱nye̱nu̱, iróng zin naga ngen kazuca di̱ngdi̱ngo̱n ci Ta̱mu̱ta̱dde̱no̱. 24Imma zin abarik Manyi bunnate cinne aanyik ol kubunnta ngu̱me̱ cinne ollin zo̱ze̱ ci Ye̱su̱ Ki̱ri̱sto̱, wa bali a̱da̱i̱ keete ci een ta̱la̱ke̱c. 25I̱tto̱na̱ Ta̱mu̱ta̱dde̱n Ye̱su̱ Ki̱ri̱sto̱ kar kize ci a̱vi̱la̱ ol mu̱nye̱n bi̱ye̱te̱ ciginnek, ming a̱tu̱ nege nonno. I̱ye̱la̱ zoz neci ming abunna Ta̱mu̱ta̱dde̱n, eci alali nonno zinin mu̱nye̱ne̱ cik ollu ba̱li̱ye̱, ngen zin kedez ol. 26I̱ye̱la̱i̱ zin bo̱do̱k zoz necu i̱yo̱ko̱ abunna Ta̱mu̱ta̱dde̱n, eci enne aanyik e̱e̱t imma ci a̱tu̱ zoz ci Ye̱su̱ kubunna, zoz zin ci ka̱gga̱we̱ abunna Ta̱mu̱ta̱dde̱n ko̱ neci.
27Aanyyet zin i̱yo̱ko̱ Ta̱mu̱ta̱dde̱n bunnate cinne go̱o̱le̱ ci aarane ba̱ci̱nno̱k cigga̱c. Kanyak zin i̱yo̱ko̱ naga gool ci kadihize e̱le̱tti̱ zo̱ze̱ necu? I̱llo̱i̱ udut, aarannet enne mu̱nye̱n ming ka̱tu̱ naga Ye̱su̱, iróng een go̱o̱le̱ ci kazunne lo̱ti̱nno̱k. 28Ka̱gga̱c naga elemi Ta̱mu̱ta̱dde̱n ol eci nege anyak tu̱we̱ne̱t, iróng een go̱o̱le̱ ci o̱ngo̱o̱li̱nne̱ nege lo̱ti̱nno̱k. 29Een Ta̱mu̱ta̱dde̱n ci Ya̱u̱do̱ do̱? Iróng een niko, iróng een ci ol u̱gge̱ bu̱k? De̱de̱, een ci olli Ya̱u̱do̱ ki ol cik iróng een Ya̱u̱d bu̱k. 30O̱de̱ Ta̱mu̱ta̱dde̱n ṯok, elemi enne Ya̱u̱d wak etted vi̱ca̱vi̱cce̱t tu̱we̱nta̱, elemi bo̱do̱k ol wak iróng etted vi̱ca̱vi̱cce̱t tu̱we̱nta̱. 31Kegerezanit naga lo̱ti̱nno̱k wak Musesi tu̱we̱nte̱ cinna? Iróng een niko! Kaanycik abarik naga lo̱ti̱nno̱k kokkomit kak.
Zvasarudzwa nguva ino
Roma 3: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.