Roma 13
13
Abunna ming ko̱ngo̱o̱le̱ alaat
1Abunna ol do̱o̱k ming aziye zoz ci ddi̱ki̱ryyo̱k wak abal nogo, eci i̱llo̱i̱ e̱e̱t imma ci aanyik ele cinne do̱ alaanzet ming ngen Ta̱mu̱ta̱dde̱n kaanyik nonno. 2Ming ibbez e̱e̱ti̱ alaanzet ci alaano, ibbez enne zoz ci u̱tu̱gu̱ Ta̱mu̱ta̱dde̱n ele, anyahak ol cik ibbez alaan ko̱ e̱le̱tti̱ de̱zi̱ne̱t ci Ta̱mu̱ta̱dde̱no̱. 3Imma alaata wak abal ol go̱o̱le̱ ci abunna ko̱, iróng ol cik abunna o̱ngo̱o̱le̱ nogo. Ma̱i̱je̱ ol cik ogon kaal cik gerzek, o̱ngo̱o̱le̱ alaan. Iróng i̱nna̱ orongi kar to̱ngo̱o̱lle̱ ol wak aavtte alaanzeta? Tu̱gu̱ zin gi̱i̱ ci abunna kar abunna alaani irezi i̱nne̱ta̱. 4E̱e̱ggi̱n alaata du̱cca̱k cik Ta̱mu̱ta̱dde̱no̱ kar ku̱tu̱gu̱zze̱k ol kaal cik abunna. Imma ming i̱i̱na̱ zoz ci gerze, to̱ngo̱o̱lle̱ zin, eci alaata anyak komiz ci edeze ol cik abaci. 5Imma zin zo̱ze̱ necu, abunna ol do̱o̱k ming aziye zoz ci alaat wak abal nogo, eci a̱gga̱yyu̱ niga zoz ci een de̱de̱ kar e̱e̱ti̱ ku̱tu̱gu̱, iróng een zo̱ze̱ ci aburne Ta̱mu̱ta̱dde̱n nong. 6Abunna zin ming a̱ru̱we̱kku̱ mucuru alaat. Een alaata du̱cca̱k cik Ta̱mu̱ta̱dde̱no̱, een li̱ngli̱ngo̱ni̱ cinne̱ng ci a̱li̱ngli̱nge̱k Ta̱mu̱ta̱dde̱n ngati abale ol ciginnek. 7Abunna zin ming a̱ru̱we̱kku̱ e̱e̱t kaal cik orong nege ngatinno̱ng. Ming orong mucuru, u̱ru̱ktte̱k. Abunna bu̱k niga ming o̱ngo̱o̱li̱nnu̱ ol wak agano ki to̱ngo̱o̱li̱ne̱t, abunna bo̱do̱k a̱di̱ngdi̱nga̱nnu̱ ol wak agano ki di̱ngdi̱nga̱ni̱ne̱t.
Abunna ol wak a̱tu̱we̱ ming irezzo
8Ru̱k ngabolet cigunnek olle do̱o̱k. Ogon rezinet ki ci kanyak naga nga̱bo̱lo̱, abunna zin kirez naga ol do̱o̱k, ming irez e̱e̱ti̱ imma gooni, azunne enne lo̱ti̱nno̱k cik Ta̱mu̱ta̱dde̱no̱. 9Anyak lo̱ti̱nno̱wa̱ kaal cik meelek cik orong Ta̱mu̱ta̱dde̱n ku̱tu̱gu̱ e̱e̱ti̱ ci diiri, ki i̱yo̱ko̱ ciko: “Ma orootonu ki ngaai cik ollu. Ma amunyi e̱e̱t ci diiri. Ma ogorze. Ma anyai zinin ci a̱ppwe̱ ce̱e̱ze̱ ci e̱e̱t imma.” Urumte lo̱ti̱nno̱u̱ ne̱ke̱ do̱o̱k odowe ṯok,#Lu̱ge̱z 20:13-17; Deuteronomy 5:17-19; 5:21 azi ne, “Irez e̱e̱t ci locariyo#13:9 E̱e̱t ci locariyo: Oob Ye̱su̱ keng ci ireze i̱nna̱ locari cunne. IkebLu̱ka̱ 10:27-37. ki i̱yo̱ko̱ ming irezi i̱nna̱ ele cunne ko̱.”#Leviticus 19:18 10Ming irez e̱e̱ti̱ ol do̱o̱k, iróng rezinet aanyi tu̱gu̱ zoz ci gerze. Adiman rezinet zoz ci lo̱ti̱nno̱u̱ kakat mo̱o̱le̱t.
I̱i̱te̱n ci okko Ye̱su̱ obodane
11U̱tu̱gu̱z kaal ne̱ko̱ do̱o̱k, a̱gga̱c i̱i̱te̱n necu ju̱rru̱m, eci i̱i̱te̱ni̱ necu ci kar ki̱ti̱ri̱ze̱t Ta̱mu̱ta̱dde̱n agita ize ojon oroot kommog i̱i̱te̱n bali ka̱tu̱we̱ naga Ye̱su̱ arrak oowa ke̱. 12Ogon i̱i̱te̱ni̱ ci kabahe naga lo̱o̱ta̱ ngatu kiwagon ba̱a̱li̱ni̱ ci okko aliz looci ataman. Abunna kabiliz mu̱nye̱n cik ogon ol ba̱a̱l, kar ku̱tu̱gu̱z kaal cik abunna ogon ol waz. 13Abunna kabak baiz ci abunna ki i̱yo̱ko̱ ol wak abak vooritene ci wazino ko̱. Ma ovvoyyu ngati alutene ol cik aud merten kar kibbakte. Ma owowonu ki a̱li̱ya̱k. Ma oyohonu ki ol. Ma anyikku zi̱nze̱tti̱ kizeto a̱ppi̱nte̱k kaale cik ollu. 14Abarik abunna ming arikku baiz ci Manyi Ye̱su̱ Ki̱ri̱sto̱ zi̱nze̱tti̱ cuggo̱k, kar abait baiz ci abunna, ma i̱no̱nnu̱ kaal cik lo̱o̱tu̱ gerzek orong e̱le̱tti̱ cuggo̱k wak anyaha mu̱nye̱n.
Zvasarudzwa nguva ino
Roma 13: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.