Roma 10
10
1Gotonogga ki ngonogga tu̱we̱nta̱, orong zinin cinanni kar kalawek olli Israilo Ta̱mu̱ta̱dde̱n kar nege kurubta ti̱ri̱ze̱ne̱t. 2Ka̱gga̱ niko anyak nege zi̱nze̱tti̱ cik oronge zoz ci Ta̱mu̱ta̱dde̱no̱, abarik zin go̱o̱le̱ ci oronge nege zoz ci Ta̱mu̱ta̱dde̱no̱ iróng een gool ci abunna. 3Eci iróng nege a̱gga̱ bunnat ci a̱kku̱ ngati Ta̱mu̱ta̱dde̱no̱ eleme nogo ko̱, orongit zin bunnat go̱o̱le̱ cinne̱ng. Iróng zin nege arike bunnat ci Ta̱mu̱ta̱dde̱no̱ zi̱nze̱tti̱. 4Aṯurneke lo̱ti̱nno̱wa̱ baling i̱ki̱ya̱ Ki̱ri̱sto̱, kar ol do̱o̱k kurubta bunnat ci Ta̱mu̱ta̱dde̱no̱ eleme enne ol cik a̱tu̱we̱.
5Azi Musesi ne, elemi Ta̱mu̱ta̱dde̱n e̱e̱t kubunna ming azunne enne lo̱ti̱nno̱k, “Ming ogon e̱e̱ti̱ kaal ne̱ko̱, abak atin enne kaale ne̱ko̱.”#Leviticus 18:5 6Ma̱i̱je̱ ol wak ubunntta ngu̱me̱ ci Ta̱mu̱ta̱dde̱no̱ tu̱we̱nta̱ azi ne, “Ma a̱du̱wa̱ zinine cunne, ‘Ngene ci atin ottod okko ta̱mu̱-kenga (kuk kanyahak Ki̱ri̱sto̱ lo̱o̱c)?’”#Deuteronomy 30:13 7“Icima ‘Ngene ci atin okko todowai lo̱o̱ta̱ mininge kar kitingawe nonno daiza kurug?’” (Een necu kar e̱e̱ti̱ kanyaha Ki̱ri̱sto̱ todowai kurug)#Deuteronomy 30:13 8Abarik ol wak a̱tu̱ Ye̱su̱ a̱du̱wa̱ zoz ci azi ba̱li̱ye̱ bo̱do̱k Musesi ne, “Ojon zoz ci Ta̱mu̱ta̱dde̱no̱ ngatinno̱ng, anyakku niga u̱tu̱ge̱tti̱ne̱ icima zi̱nze̱tti̱nne̱,”#Deuteronomy 30:14 kozoz zoz neci odohize. Een necu zoz ci tu̱we̱nto̱ kuwaheka naga ol. 9Ming a̱du̱wa̱ e̱e̱ti̱ utuge cinne zoz ci azi ne, “Een Ye̱su̱ Manyi cinne,” kar bo̱do̱k e̱e̱ti̱ kelema zinine cinne zo̱ze̱ ci ingane Ta̱mu̱ta̱dde̱n Ye̱su̱ daiza, amuda atin enne ti̱ri̱ze̱ne̱t. 10Eci ming a̱tu̱we̱ i̱nna̱ zinine cunne, elemnyi atin Ta̱mu̱ta̱dde̱n ize e̱e̱t ci abunna, kar bo̱do̱k ming a̱du̱wa̱ utuge cunne een Ye̱su̱ Manyi cunne, aruba atin i̱nna̱ ti̱ri̱ze̱ne̱t. 11E̱he̱rye̱ Warage ci Ta̱mu̱ta̱dde̱no̱ zoz ci azi ne, “Ming arik e̱e̱ti̱ imma zinin cinne Ti̱ri̱zo̱i̱t, iróng atin a̱li̱ya̱ni̱ adak nonno.”#Isaya 28:16 12I̱llo̱i̱ zoz imma ci gerze. Ming een e̱e̱ti̱ Ya̱u̱d icima iróng een Ya̱u̱d, kanyak Manyi co̱de̱ ṯok, i̱i̱rke̱ enne ngati ol wak a̱jji̱n nonno do̱o̱k. 13Ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱ ko̱, azi ne, “Imma e̱e̱ti̱ ci awu zar cik Manyi, okko atin enne amuda ti̱ri̱ze̱ne̱t.”#Joel 2:32
14Ma̱i̱je̱ ngatu, a̱jji̱n wo̱ye̱ ol Ye̱su̱ kar keela nogo ming iróng nege a̱tu̱ nonno? A̱tu̱we̱ wo̱ye̱ nege ku̱ ming ngen kiziyet zoz cinne? Aziye wo̱ye̱ nege ku̱ ming iróng e̱e̱ti̱ imma uwahek nogo? 15Uwahek wo̱ye̱ e̱e̱ti̱ imma nogo kaviyak cik abunna ko̱ ming ngen Ta̱mu̱ta̱dde̱n kodola ki̱tto̱n e̱e̱t neci? E̱he̱rye̱ waraga ci Ta̱mu̱ta̱dde̱no̱ azi ne “A̱zi̱ze̱ zoona cik ol wak anyahak ol kaviyak cik abunna.”#Isaya 52:7
16Abarik iróng olli Israilo do̱o̱k cik elemi kaviyak cik abunna. Eci azi a̱ri̱to̱i̱ti̱ ci zoz ci Ta̱mu̱ta̱dde̱no̱ een Isaya ne, “Manyi, ngene ci a̱tu̱ kaviyak cigga̱c?”#Isaya 53:1 17A̱kku̱ tu̱we̱ne̱t ming aziye e̱e̱ti̱ kaviyak, kaziye kaviyak ne̱ko̱ zo̱ze̱ ci Ki̱ri̱sto̱. 18Abarik ka̱jji̱ne̱: Ngen olli Israilo kiziyet kaviyak? Iziyyet zin ba̱li̱ye̱:
“Uzuca mului cinne̱ng lo̱o̱cco̱k do̱o̱k,
ki zo̱zzo̱k cigge̱k bu̱k.”#Caliwon 19:4
19Ka̱jji̱ne̱ anna bo̱do̱k: Iróng olli Israilo azikne? Arrak eher Musesi zoz ci Ta̱mu̱ta̱dde̱no̱, azi ne,
“Ka̱a̱nyu̱ng anyait meder zo̱ze̱ ci ol cik iróng anyak lo̱o̱c. Ka̱a̱nyu̱ng omozte ngati lo̱o̱c ci iróng azikne.”#Deuteronomy 32:21
20Kar Isaya mazeta ku̱du̱wa̱ zoz ci azi Ta̱mu̱ta̱dde̱n ne,
“Urubta ol balik iróng orongnyan annit ke̱;
ki̱ye̱le̱ya̱ zin anna ele cinanni ol wak iróng a̱jji̱nna̱n.”#Isaya 65:1
21Ma̱i̱je̱ zo̱ze̱ ci olli Israilo, ize enne bo̱do̱k ne,
“Kabanyik anna Ta̱mu̱ta̱dde̱n azzin cigannik
ol wak adite iina abure iróng o̱ngo̱o̱le̱ gi̱i̱ imma.”#Isaya 65:2
Zvasarudzwa nguva ino
Roma 10: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.