Jon 20
20
I̱zzi̱ Ye̱su̱ iloma to
(Ma̱te̱yo̱ 28:1-10; Marko 16:1-8; Lu̱ka̱ 24:1-12)
1Ma̱i̱je̱ nge̱rre̱t ri̱ri̱wo̱na̱ i̱i̱te̱ne̱ wa een Dominika,#20:1 I̱i̱te̱ne̱ wa een Dominika: Eci ngati olli Ya̱u̱do̱ akane i̱i̱nya̱ cik biranocak ngatinne̱ng i̱i̱te̱ne̱ ci een oo kar kuṯurei i̱i̱te̱ne̱ ci een turgerem biranoca, nonno ci een I̱i̱te̱n wa Yu̱bze̱nto̱. Kovvo naga Tenneti kikeb i̱i̱nya̱ cigga̱c biranocak do̱ ngati olli Ya̱u̱do̱. Kazi naga ne I̱i̱te̱n wa Yu̱bze̱nto̱ ci een i̱i̱te̱n ci een torkonom kar i̱i̱te̱n ci annu I̱i̱te̱n wa Yu̱bze̱nto̱ ko̱ kawu naga kize i̱i̱te̱n turgerem. Kawu naga bo̱do̱k i̱i̱te̱n cinne̱ng oowu ko̱ kize Dominika icima I̱i̱te̱n ci Lawinto ming ka̱a̱da̱ naga i̱i̱te̱n bali ingane Ye̱su̱ daiza. uk da̱ Ma̱ri̱ya̱ Madalina ngi̱lo̱me̱ ci Ye̱su̱, kar zin kuk kumuda bee bali tatuge ci ngi̱lo̱mo̱ ke̱ i̱zzi̱ to. 2I̱vi̱r zin enne uk ngato Si̱mo̱ne̱ Peturu ki nuyait wa irez Ye̱su̱ oroot kar zin kizek ne, “O̱o̱tte̱ ol uggak ele ci Manyi ngi̱lo̱ma̱ ngamani, iróng zin bu̱k ka̱gga̱yya̱ arike ucca nonno i̱ni̱n!”
3I̱yi̱he̱t Peturu ki nuyait imma oot ki ngi̱lo̱m. 4A̱vi̱r nege do̱o̱k, imma nuyaiti imma ijar ciko Peturu kar kuzuca ngi̱lo̱m oowa. 5Ibil zin enne kar ki̱vo̱n ngi̱lo̱m ci Ye̱su̱, edenya abarik ru̱u̱m bali ecebek ol Ye̱su̱ ke̱ do̱ ming a̱tta̱dde̱ nginati, ngen zin enne kuk ecito. 6Imma vu̱rrte̱ cinne, uzuca Si̱mo̱ne̱ Peturu bali ijar enne ke̱, i̱tto̱ uk ngi̱lo̱ma̱ ecito. Icin ru̱u̱ma̱ni̱ balik a̱lu̱ce̱k ol nonno ke̱ ming aavtte ngi̱lo̱ma̱, 7ki ru̱u̱m bali a̱lu̱ce̱k ol oo ci Ye̱su̱ ke̱, ming aave nginati. A̱lu̱ce̱ ru̱u̱m neci do̱, engero ki ru̱u̱m co̱de̱ ke̱. 8I̱tto̱ zin nuyaiti bu̱k ngi̱lo̱m neci, icin enne bu̱k ming i̱zzi̱ Ye̱su̱ to, kar zin kelema zoz neci niko. 9Ngen zin bu̱k nege ka̱gga̱c zoz wa e̱he̱rye̱ Warage ci Ta̱mu̱ta̱dde̱no̱ azi ne, ingazi atin Ye̱su̱ daiza. 10I̱me̱rte̱ zin nuyaha oot ce̱e̱zi̱nne̱ cigge̱k.
I̱ye̱le̱k Ye̱su̱ Ma̱ri̱ya̱ Madalina ele
(Marko 16:9-11)
11Ma̱i̱je̱ Ma̱ri̱ya̱ ibil ngi̱lo̱me̱ neci reena kar zin ku̱tu̱lu̱. Baling ngen enne a̱lu̱, u̱lu̱le̱ kar zin ki̱vo̱n ngi̱lo̱m, 12icin zin anjilonya ram cik Ta̱mu̱ta̱dde̱no̱ aim ru̱u̱ma̱ni̱ cik voorik, aavtte ngin bali abahek ol Ye̱su̱ ke̱. Okko anjilo co̱de̱ aave o̱to̱ne̱ ci oowu imma co̱de̱ aave o̱to̱ne̱ ci zoonu.
13I̱jji̱nne̱t zin nege Ma̱ri̱ya̱ izettek ne, “Ngaa cu, a̱lu̱ nya?”
O̱bo̱de̱k Ma̱ri̱ya̱ nogo izek ne, “O̱o̱tte̱ ol uggak Manyi wananni, iróng zin anna bu̱k ka̱gga̱ oot aartik i̱ni̱n.” 14Baling u̱du̱wa̱ zoz necu utuhuwe kar zin kicin Ye̱su̱ ming abile nginati, ngen zin enne bu̱k ka̱gga̱ ming een Ye̱su̱ neci.
15Izek zin Ye̱su̱ nonno ne, “Ngaa cu, a̱lu̱ nya? Orongi dim ette i̱nna̱ ngene?”
I̱no̱n Ma̱ri̱ya̱ ize ne een i̱yo̱ko̱ e̱e̱ti̱ neci kozozona ko̱ manyi arata neci, izek ne, “Ming ette uuwe ele cinne ngamani, du̱wa̱ka̱ nginti arike i̱nna̱, kar kuk anna kidima ke̱.”
16Izek zin Ye̱su̱ nonno ne, “Ma̱ri̱ya̱!” Utuhuwek zin Ma̱ri̱ya̱ nonno kar zin kegereny zo̱ze̱ ci ol cik e̱e̱ggi̱n Aramaik kize ne, “Rabboni” Azi keng cinne ne, “De̱me̱zo̱i̱t!”
17Izek Ye̱su̱ nonno ne, “Ma odoknonikan, ngen zin bu̱k anna ki̱mi̱re̱ kuk ngati Baba. Bit abarik ngati gotonogga kar zin izek ne, ka̱mi̱re̱ kokko ngati Baba wa bo̱do̱k een be̱e̱ti̱nno̱ng bu̱k, Ta̱mu̱ta̱dde̱n wa nanni kar bo̱do̱k kize Ta̱mu̱ta̱dde̱n cinne̱ng.”
18I̱mi̱ro̱zi̱k Ma̱ri̱ya̱ Madalina nuyak, uk izek nogo ne, kicina Manyi, kar ku̱du̱wa̱k nogo zoz ci u̱du̱wa̱k Ye̱su̱ nonno.
I̱ye̱le̱k Ye̱su̱ nuyak ciginnek ele
(Ma̱te̱yo̱ 28:16-20; Marko 16:14-18; Lu̱ka̱ 24:36-49)
19Ize da̱ looci yo̱mo̱n, i̱i̱te̱ne̱ wa een Dominika, alute nuyaha ce̱e̱za̱ ecito, eci nege o̱ngo̱o̱le̱ lo̱ddi̱ki̱re̱ cik Ya̱u̱do̱. I̱ki̱ya̱ zin Ye̱su̱ ibil orgene cinne̱ng, kar kizzawo kize ne, “A̱vvu̱t labak!”
20Baling ize enne niko, i̱ye̱le̱k zin nogo azzin ki ma̱ryo̱i̱t bali akati ol ke̱. Atalit nuyaha oroot baling icinnet Manyi.
21O̱bo̱de̱k bo̱do̱k Ye̱su̱ nogo, ize ne, “A̱vvu̱t labak ki i̱yo̱ko̱ ming i̱tto̱na̱na̱ Baba ko̱, ki̱tto̱nnu̱ng anna i̱ge̱t bu̱k.”
22Baling u̱du̱wa̱ zoz necu, otovongik nogo kar zin kizek ne, “A̱gga̱mtta̱ Vongiz ci A̱li̱le̱. 23Ming alalnekku ol mu̱nye̱n, alalnek Ta̱mu̱ta̱dde̱n nogo de̱de̱; ming iróng niga alalnekku nogo mu̱nye̱n cigge̱k, iróng Ta̱mu̱ta̱dde̱n alalnek nogo.”
I̱ye̱le̱k Ye̱su̱ ele Tomas
24Ma̱i̱je̱ to̱ni̱a̱ti̱ co̱de̱ to̱ni̱a̱he̱ wak e̱e̱ggi̱n omoto ki rama ci een zara Tomas, wa bo̱do̱k een cuudenit, a̱zze̱ da̱ enne to baling a̱kku̱nna̱k Ye̱su̱ nuyak waginnek. 25U̱du̱ktta̱k zin nuyaha ne̱ke̱ nonno izettek ne, “Kicinnta naga Manyi!”
Izek zin Tomasi nogo ne, “Ming ngen anna kicin bboroyyok balik odode ol azzin ciginnek, kar bo̱do̱k ku̱u̱m azzin ne̱ke̱ ki ma̱ryo̱i̱t, iróng anna kelemi zoz necu.”
26Baling edeccai i̱i̱nya̱ cik e̱e̱ggi̱n turgerem, a̱vvu̱to̱ nuyaha ce̱e̱za̱ ecito, aavtte da̱ Tomasi ki nogo. Anyuge ba̱li̱ye̱ tatugeta, abarik Ye̱su̱ i̱tto̱ orgen cinne̱ng ca̱a̱to̱ kibil kar zin kizek nogo ne, “A̱vvu̱t labak!” 27Izek zin Ye̱su̱ Tomas ne, “Arik da̱ vallak cigunnek ngintu, kar cin azzin cigannik; nyaha bo̱do̱k azzin u̱u̱m ma̱ryo̱i̱t cinanni. Ma anyike zinin kodok, abunna ming a̱tu̱we̱.”
28O̱bo̱de̱k zin Tomasi nonno zoz ci azi ne, “Manyi ki Ta̱mu̱ta̱dde̱n wananni!”
29U̱du̱wa̱k zin Ye̱su̱ nonno zoz ci azi ne, “A̱tu̱we̱ i̱nna̱ ma̱rri̱t ming icinnan. U̱mu̱yu̱kte̱ ol cik ngen kicintan imma ngatu a̱tu̱we̱.”
30Baling a̱vvu̱ Ye̱su̱ orgene ci nuyak ciginnek, u̱tu̱gu̱ kaal cik a̱vu̱la̱ meelek iróng e̱he̱rye̱ buwe cu, icinnet nege do̱. 31Ma̱i̱je̱ zin kaala ne̱ko̱ e̱he̱rye̱ kar niga anyait tu̱we̱ne̱t ngati Ye̱su̱ wa een Ki̱ri̱sto̱ nenen bali atahalai, Ngerrti Ta̱mu̱ta̱dde̱no̱, kar ming a̱tu̱yyu̱ niga nonno, arubannu ruget.
Zvasarudzwa nguva ino
Jon 20: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.