Buk wa To̱ni̱a̱u̱ 8
8
1Aave bali Sauli nginati, kar kelema zoz ci a̱ru̱we̱ ol Stephen ka̱da̱k.
I̱gi̱dde̱ ol cik ke̱le̱ci̱a̱k kar zin nege kazante
Imma i̱i̱te̱ne̱ neci ize gi̱de̱ne̱t a̱ppwa̱ ke̱le̱ci̱e̱ ci aave Jerusalema, azzante zin ol do̱o̱k lo̱o̱ce̱ ci Ju̱de̱ya̱ ki Samariya, kize to̱ni̱a̱k do̱ cik ngen aavtte. 2A̱da̱c ol wak Ta̱mu̱ta̱dde̱no̱ Stephen nege do̱ kar zin kartik u̱lu̱wa̱. 3Ma̱i̱je̱ zin Sauli akate azan olli ke̱le̱ci̱o̱. Okko ce̱e̱zi̱nne̱ e̱co̱de̱ e̱co̱de̱, kar ku̱tu̱gu̱ra̱ odot ki ngaai karik nogo lagam.
Vilip Samariya
4Imma ol balik azzante ke̱ uwak kaviyak cik abunna ngati ovvoye nege do̱o̱k. 5Uluce Vilipi#8:5 Vilip: Iróng bali Vilipi cu een to̱na̱i̱t, abarik een enne e̱e̱t co̱de̱ ngati ol balik ahalai kar keela ngaai cik boyek kengerek da̱i̱ne̱t. IkebBuk wa To̱ni̱a̱u̱ 6:1-6. uk o̱rge̱ ci aave Samariya kar zin kuwahek ol zoz ci Ki̱ri̱sto̱ nginati. 6Ma baling iziyyet koole Vilip kar bo̱do̱k kicinnet kaal cik a̱vu̱la̱ balik u̱tu̱gu̱ enne ke̱, izikto zin nege ju̱rru̱m zo̱ze̱ ci ozoz enne. 7Iyokta kuulo ngati ol cik meelek, Angaruyye ol cik meelek nganynganyik ki wak ngooltik zoona. 8Anyak ba̱li̱ye̱ talninet ci a̱ppwe̱ oroot o̱rge̱ neci.
Si̱mo̱ne̱ wa a̱ru̱k agura
9Anyak e̱e̱t imma ci een zara Si̱mo̱ne̱ a̱ru̱k agura orgato, aanyik zoz cinne ol do̱o̱k ka̱ma̱li̱ltte̱ o̱o̱tti̱. Odong ele azi ne, een enne e̱e̱t imma ci a̱ddi̱ki̱ri̱ oroot, 10kar ol do̱o̱k wak riilik ki wak iróng riile, kiziyet zoz cinne oroot azi ne, “Een e̱e̱ti̱ cu komiz ci Ta̱mu̱ta̱dde̱no̱, awu ol azi ne Komiz wa A̱ddi̱ki̱re̱.” 11Unuwet nege nonno eci enne ogon kaal cik aanyik nogo ka̱ma̱li̱ltte̱ o̱o̱tti̱ nginti reeni. 12Ma zin baling iziyyet nege Vilip ngati uwahek ol kaviyak cik abunna ba̱a̱li̱nte̱ ci Ta̱mu̱ta̱dde̱no̱ ki doiz ci zar cik Ye̱su̱ Ki̱ri̱sto̱, kar ku̱tu̱we̱t zoz neci, a̱gga̱mi̱t zin ol cik macik ki ngaai ba̱ti̱ti̱mo̱. 13Elema Si̱mo̱ne̱ eliya bu̱k Ye̱su̱, kar zin enne a̱gga̱ma̱ ba̱ti̱ti̱mo̱ bu̱k. A̱vvu̱ ngati Vilipi ojonun, u̱ku̱le̱k je̱e̱n oroot kaale cik a̱vu̱la̱ acin enne ogon Vilipi.
14Ma baling iziyyet to̱ni̱a̱ha̱ Jerusalema ming elemtta olli Samariya zoz ci Ta̱mu̱ta̱dde̱no̱, i̱tto̱ni̱t nege Peturu ki Jon koot ngatinne̱ng. 15Baling ovvo nege arawa, alayek ol Ta̱mu̱ta̱dde̱n kar abunna ming aruba Vongiz ci A̱li̱le̱, 16eci Vongizi ci A̱li̱le̱ ngen ki̱ta̱k e̱e̱t imma ngatinne̱ng; eci nege bali a̱gga̱m ba̱ti̱ti̱mo̱ zare cik Manyi Ye̱su̱. 17Kar zin Peturu ki Jon ka̱ta̱dde̱k azzin cigge̱k nogo, kar zin nege ka̱gga̱mta̱ Vongiz ci A̱li̱le̱ niko.
18Baling icin Si̱mo̱ne̱ Vongiz ci A̱li̱le̱ i̱ta̱k nogo ngati atadek to̱ni̱a̱ha̱ azzin nogo, anyik zin enne Peturu ki Jon o̱ro̱bi̱ya̱ 19kar kize ne, “Icang annit bu̱k arizet cunno̱ng ko̱ kar abunna ming katadek anna e̱e̱t imma a̱zzi̱t kar Vongizi ci A̱li̱le̱ ki̱ta̱k nonno bu̱k.”
20O̱bo̱de̱k Peturu nonno: “Anyik bai o̱ro̱bi̱ya̱ cigunnek kiditai ki i̱nne̱t do̱o̱k, eci i̱nna̱ i̱no̱ni̱ azi ne, uuta wo̱ye̱ i̱nna̱ muci ci Ta̱mu̱ta̱dde̱no̱ o̱ro̱bi̱ya̱i̱! 21Iróng i̱nna̱ anyai li̱ngli̱ngo̱n imma ngatu, eci zinin cunne iróng abunna ngu̱me̱ ci Ta̱mu̱ta̱dde̱no̱. 22Tura mu̱nye̱n cigunnek kar la Manyi. Alalneki atin wo̱ye̱ enne i̱nne̱ta̱ i̱no̱ni̱nte̱ ci anyai i̱nna̱ zinine cunne. 23Kacinni anna anyai i̱nna̱ mozinet kar bo̱do̱k kecebti mu̱nye̱na̱ cigunnek.”
24O̱bo̱de̱k Si̱mo̱ne̱ nonno, “Alayeang Manyi annit kar abunna zoz ci a̱du̱wa̱nnu̱ niga ko̱ iróng atin i̱nna̱ka̱n.”
25Baling uwaktek nege ol zoz ci Manyi Ye̱su̱, i̱mi̱rrte̱ Peturu ki Jon ovvo Jerusalema, kar goola kuwaktek ol cik meelek kaviyak cik abunna o̱ro̱gjo̱we̱ cik meelek Samariya.
Vilip ki e̱e̱t ci een Ethiopia
26I̱yo̱ko̱ zin, iizek anjilo ci Manyi Vilip ne, “Bit go̱o̱le̱ ci i̱do̱li̱ya̱ gool wa balalo aluce Jerusalema okko ki orog ci Gaza.” 27Uk zin enne akate we̱t, imma zin goola u̱ru̱mto̱ ki e̱e̱t ci Ethiopio a̱ddi̱ki̱re̱,#8:27 E̱e̱t ci Ethiopio a̱ddi̱ki̱re̱: Een necu e̱e̱t ci aara ol te̱ri̱ kar abunna ming a̱li̱ngli̱ng ki ngaai cik alaano nga̱to̱de̱. a̱gga̱m o̱ro̱bi̱ya̱ ci ngaa ci een Candace alaan ci Ethiopio. Oboda e̱e̱ti̱ necu Jerusalema ngati okko enne ba̱li̱ye̱ a̱di̱ngdi̱nga̱n Ta̱mu̱ta̱dde̱n, 28imma goola ngati okkoye ce̱e̱za̱, a̱vvu̱ toromile cinne kar kikeb buk ci a̱ri̱to̱i̱t Isaya. 29U̱du̱wa̱k Vongizi Vilip, a̱nne̱k ne, “Bit toromile neci kar a̱vvu̱ ojonun.”
30Uk Vilipi rok toromile kar zin kizik ming ikeb e̱e̱ti̱ neci buk ci a̱ri̱to̱i̱t Isaya. I̱jji̱n zin Vilipi nonno, “A̱gga̱ i̱nna̱ zoz ci ikebi i̱nna̱ ko̱?”
31O̱bo̱de̱k zin enne Vilip, a̱nne̱k ne, “Ka̱gga̱ wo̱ye̱ anna ku̱ ming iróng e̱e̱ti̱ imma a̱du̱wa̱ka̱n?” Utu zin enne Vilip kar ka̱vvu̱to̱ ki nonno.
32Ikeb bali e̱e̱ti̱ ci Ethiopio zoz cu Warage ci Ta̱mu̱ta̱dde̱no̱:
“Ovvoye ol nonno kiwagon a̱zze̱ti̱ ci ovvo ol otodongi,
kiwagon nyoon#8:32 Nyoon: Aanyik Ta̱mu̱ta̱dde̱n lo̱ti̱nno̱k Muses kar ku̱du̱wa̱k olli Israilo kapaktek nyoon kar Ta̱mu̱ta̱dde̱n kicin bi̱ye̱ abanyce ci tatuget cik ce̱e̱zi̱ cigge̱k Masire I̱i̱te̱ne̱ wa Va̱rda̱ngi̱nto̱. Zoz zin ci azi ol ne, een Ye̱su̱ Nyoon ci Ta̱mu̱ta̱dde̱no̱ ci a̱vi̱la̱ mu̱nye̱n cik ol wak elemtta nonno lo̱o̱ta̱ ngatu ko̱ do̱o̱k. IkebLu̱ge̱z 12:13-15; Marko 14:12; Lu̱ka̱ 22:7; Jon 1:29-36; 1 Ko̱ri̱nto̱ 5:7; 1 Peturu 1:19. ci etted ol ima aave li̱i̱m,
ngen zin enne koo utug cinne.
33Anyak ol nonno gerzet, iróng etted lo̱ki̱ko̱ cinne ju̱rru̱m.
Ngene wo̱ye̱ ci ozoz zoz ci biilet cinne?
Eci u̱ru̱we̱t ol nonno lo̱o̱ta̱ ngatu.”#Isaya 53:7-8
34I̱jji̱n zin e̱e̱ti̱ ci Ethiopio Vilip, “Nger du̱wa̱ka̱n, ozoz a̱ri̱to̱i̱ti̱ ngene, nonno yo e̱e̱t imma da̱?” 35Akate zin Vilipi Warage ci Ta̱mu̱ta̱dde̱no̱ ngatu kar ku̱du̱wa̱k nonno kaviyak cik abunna obod ki Ye̱su̱.
36Ma baling ngen nege owo ke̱, u̱mu̱dda̱ maam u̱gge̱, kar zin e̱e̱ti̱ ci Ethiopio kize ne, “Cinno, maam iciko, ma wo̱ye̱ ming a̱gga̱me̱ka̱ ba̱ti̱ti̱mo̱?” 37I̱jji̱n Vilipi nonno a̱nne̱k ne, “Ming elema i̱nna̱ de̱de̱ zinine cunne do̱o̱k, ka̱gga̱me̱ki̱ wo̱ye̱ anna i̱nne̱t ba̱ti̱ti̱mo̱ labak.” Iizek zin enne Vilip, “Ka̱tu̱we̱ anna, een Ye̱su̱ Ki̱ri̱sto̱ Ngerrti Ta̱mu̱ta̱dde̱no̱.” 38Kar zin e̱e̱ti̱ ci Ethiopio ko̱ ku̱du̱wa̱k e̱e̱t ci amacuc toromile ko̱ kibil. I̱tto̱zzo̱ zin nege maam kar zin Vilipi ka̱gga̱me̱k nonno ba̱ti̱ti̱mo̱. 39Baling ovvo nege iyowa maame, i̱ki̱ya̱ Vongizi ci Manyi uwe Vilip dakdak ci iróng ngen e̱e̱ti̱ ci Ethiopio acin nonno dee, abarik zin enne atalne je̱e̱na̱ ngati owoye. 40Uk zin Vilipi i̱ye̱la̱i̱ o̱rge̱ ci een Azotus kar zin koto o̱ro̱gjo̱we̱ uwahek ol zoz ci Ta̱mu̱ta̱dde̱no̱ zee kuzuca enne orog ci een Kesarea.
Zvasarudzwa nguva ino
Buk wa To̱ni̱a̱u̱ 8: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.