Buk wa To̱ni̱a̱u̱ 7
7
Uwai ci Stepheni
1I̱jji̱n zin alaani ci a̱ddi̱ki̱re̱ wawaco Stephen, azi ne, “Ma dim zoz cu een de̱de̱?”
2O̱bo̱de̱k zin Stepheni izek nogo ne, “Gotonogga ki be̱e̱ti̱ga̱ni̱k, izikttang annit ju̱rru̱m! I̱ye̱le̱k Ta̱mu̱ta̱dde̱n bunnat cinne ji̱ji̱ti̱nna̱ Aburaham bali ngen enne aave lo̱o̱ce̱ ci Mesopotamia, ngati ngen kuk o̱rge̱ ci een Haran. 3A̱nne̱k Ta̱mu̱ta̱dde̱n Aburaham ne, ‘Tungek orog cunne ki boor cigunnek lo̱o̱c, kar bit lo̱o̱ce̱ ci kokko atin anna ki̱ye̱le̱ki̱n.’#Kananet 12:1
4“Utungek zin enne lo̱o̱c ci Chaldean kar kuk ka̱vvu̱ o̱rge̱ ci een Haran. Baling a̱da̱k baatinne, u̱lu̱k zin Aburahami uk abak lo̱o̱ce̱ ci abakku niga i̱yo̱ko̱ ko̱. 5Iróng zin Ta̱mu̱ta̱dde̱n aanyik nonno gi̱i̱ imma lo̱o̱ce̱ cu, i̱llo̱i̱ rok nginti arike zoc. Abarik zin Ta̱mu̱ta̱dde̱n a̱nne̱k nonno ne, i̱nne̱ta̱ ki dooli cigunnek ki dooli cik dooli cigunnek ovvo atin aragiz lo̱o̱c cu, ma̱i̱je̱ nu̱nu̱n da̱ iróng Aburahami anyak do̱le̱c. 6A̱nne̱k Ta̱mu̱ta̱dde̱n bo̱do̱k nonno ne, ‘Ovvo atin dooli cik dooli cigunnek e̱e̱ggi̱n i̱do̱ngi̱ lo̱o̱ce̱ ci iróng een cinne̱ng, ovvo atin nege e̱e̱ggi̱n du̱cca̱k e̱rki̱nya̱ obet we̱c (400) 7Ma̱i̱je̱ atin anna ke̱de̱zi̱ ol ne̱k aanyik nogo kizeto du̱cca̱k ke̱, imma vu̱rrta̱ ovvo atin nege iyowa lo̱o̱ce̱ neci kar kalayya annita ngatu.’#Kananet 15:13-14 8Aanyik zin enne Aburaham olom ci ettede vi̱ca̱vi̱ca̱#7:8 Etted vi̱ca̱vi̱ca̱: U̱du̱wa̱k bali Ta̱mu̱ta̱dde̱n Aburaham a̱nne̱k ne, ming anyait dooli cigunnek macik i̱i̱nya̱ tu̱rge̱, anyik ol kettedit wucic vi̱ca̱vi̱cce̱t kar ki̱ye̱la̱ azi ne, e̱e̱ggi̱n nege dooli cik Ta̱mu̱ta̱dde̱no̱. IkebKananet 17:9-14.. I̱ti̱rra̱ zin Aburahami ngerinne I̱sa̱ko̱, baling izeto i̱i̱nya̱ ciginnek tu̱rge̱, etted zin vi̱ca̱vi̱ca̱. Ize I̱sa̱ko̱ be̱e̱ti̱ Ya̱ko̱bo̱, okko Ya̱ko̱bo̱ een be̱e̱ti̱ tatuget wak e̱e̱ggi̱n omoto ki rama ko̱.
9“Eci ji̱ji̱ti̱ggo̱k emederan gotoni cinne̱ng wa een zara Yosevo,#7:9 Yosevo: Een bali enne do̱le̱c wa irez Ya̱ko̱bo̱ oroot. Utek bali gotonoggja nonno Masir kize du̱ca̱i̱t. Aanyik Ta̱mu̱ta̱dde̱n nonno keela ol ciginnek Masira e̱rki̱nya̱i̱ balik e̱e̱ggi̱n turgerem magizo ke̱. IkebKananet 30-50. u̱tu̱yye̱k nege nonno Masir kuk kize du̱ca̱i̱t. Abarik zin Ta̱mu̱ta̱dde̱n ngen azunne Yosevo, 10kar keela nonno kaale cik gerzek do̱o̱k. Aanyik Ta̱mu̱ta̱dde̱n Yosevo genyiz ci zozo, kar zin alaani ci Masiro#7:10 Alaan ci Masiro: Awu ol alaan ci Masiro utuge ci ol cik ozoz Ingilic ko̱ azi ne Pharaoh. katal nonno, atahala nonno kize e̱e̱t ci abal Masir ki ol ce̱e̱ze̱ cinne do̱o̱k.
11“Baling adak magiz lo̱o̱c ci Masiro ki Kanaan do̱o̱k, ipirta zin be̱e̱ti̱gga̱c oroot, eci i̱zzi̱ gi̱i̱ ci adak nege to. 12Baling izik Ya̱ko̱bo̱ azi ne, anyak labi Masira, i̱tto̱na̱ dooli ciginnek een be̱e̱ti̱gga̱c we̱t wa een oo. 13Imma we̱t wa rama, u̱du̱wa̱k Yosevo gotonoggi ele cinne, a̱gga̱ zin alaani boor ci Yosevo. 14Iizek zin Yosevo gotonoggi ne, oot anyaktta baba Ya̱ko̱bo̱ ki boor do̱o̱k Masir, e̱e̱ggi̱n da̱ ol ne̱ke̱ moten turgerem ki tu̱r do̱o̱k. 15U̱lu̱cce̱ zin Ya̱ko̱bo̱ ki boor do̱o̱k oot Masire, ngin wa a̱da̱kne̱ enne ki be̱e̱ti̱gga̱c ke̱. 16O̱bo̱dda̱i̱ zin nege e̱le̱tti̱ ne̱ko̱ do̱o̱k rok orog ci een zara Shechem kar zin kaartik ngi̱lo̱m ci bali uuta Aburahami ngati dooli cik Hamori, o̱rge̱ ci een Shechem.
17“Baling ize ojon i̱i̱ bali a̱du̱wa̱k Ta̱mu̱ta̱dde̱n Aburaham zoz ke̱, otorte ol cigga̱c Masira izeto meele giir. 18Atahaltta zin ol cik Masiro alaan ci een jor kabal nogo, iróng zin alaani neci a̱gga̱ Yosevo. 19A̱gga̱m alaani neci ol cigga̱c gerzet kar gon kadangek ji̱ji̱ti̱gga̱c ku̱ju̱ktte̱k zari dooli cik macik ngen a̱rri̱ta̱i̱ jor abunna ming ovvo a̱da̱i̱.
20“I̱ti̱rra̱i̱ bali Musesi e̱rki̱te̱ ci aminye ol olli Israilo ko̱, irez bali Ta̱mu̱ta̱dde̱n Muses oroot. Uzute zin yaatinne nonno nyelowi cik een i̱i̱yo̱ ko̱ ce̱e̱ze̱ ci baatinne. 21Imma bali vu̱rrta̱, utungtek Muses lo̱o̱c, i̱ki̱ya̱ zin buweenyi alaano umuda nonno kar kuk kanyak kize do̱le̱c cinne. 22Edemezit zin nege Muses genyiz ci olli Masiro kar bo̱do̱k kanyak komiz zoza ki li̱ngli̱ngo̱na̱.
23“Baling ize e̱rki̱nya̱ cik Musesi moten we̱c, odola enne kar keeron kuk kicin boor ciginnek Israil. 24Imma goola icin e̱e̱t ci Masiro ming aminye e̱e̱t ci Israilo, uk zin Musesi eela e̱e̱t neci kar ku̱ru̱k e̱e̱t ci Masiro ko̱ ka̱da̱k. 25I̱no̱n Musesi azi ne ovvo atin ol ciginnek a̱gga̱ ming anyaha Ta̱mu̱ta̱dde̱n nonno kar ki̱ki̱ya̱ kangara nogo, abarik nege iróng a̱gga̱ gi̱i̱ imma. 26Imma i̱i̱te̱n ci reng, umuda Musesi ol rama cik Israilo ming oyoho. Orong zin enne kaganiz nogo, a̱nne̱k ne, ‘Dooli, e̱e̱ggi̱nnu̱ niga ol co̱de̱, ma oyohonu gaganiko?’
27“Imma e̱e̱ti̱ co̱de̱ aminye gooni ko̱, ojokor Muses, kar kizek ne, ‘Ngene ci aanyi i̱nne̱t ize alaan ci ettedi zoz cinna̱ng? 28Orongi i̱yo̱ko̱ ru̱wa̱ ki bali ming a̱ru̱i̱ i̱nna̱ e̱e̱t bali Masiro ka̱da̱k ke̱?’#Lu̱ge̱z 2:14 29Baling izik Musesi zoz necu niko, i̱vi̱r zin uk abak lo̱o̱ce̱ ci ol cik een Midian, abak nginati ki̱ti̱ra̱ logoz ciginnek een rama.
30“Baling edeca Muses e̱rki̱nya̱ moten we̱c bo̱do̱k, i̱ye̱le̱k anjilo Muses ele zare ci atuze kiwagon gwa̱a̱ ngati ojono ki bee ci een Sinai. 31Baling icin Musesi gwo̱o̱ neci, a̱ma̱li̱le̱ nonno oo niko. Baling okko enne okko ojonun orong kar kicin, izik enne muluk ci Manyi: 32‘Ke̱e̱ni̱ anna Ta̱mu̱ta̱dde̱n ci baatunne, Ta̱mu̱ta̱dde̱n ci Aburahami, Ta̱mu̱ta̱dde̱n ci I̱sa̱ko̱ ki ci Ya̱ko̱bo̱.’#Lu̱ge̱z 3:6,15 O̱to̱ngo̱o̱le̱ zin Musesi iróng ngen orong kar kicin gwo̱o̱ neci.
33“Kar zin Manyi kizek nonno ne, ‘Ma a̱kku̱nni̱ ojonun rok ngintu, aara caava cigunnek, eci a̱li̱le̱ nginti abilne i̱nna̱ ko̱. 34Kicina anna de̱de̱ piryanzet ci ol cigannik Masire. Kiziya anna u̱lu̱wa̱ cinne̱ng, ka̱kku̱na̱k anna lo̱o̱c kar ki̱ki̱ya̱ keela nogo. I̱yo̱ko̱ zin, i̱jja̱, ki̱tto̱nni̱ atin anna i̱nne̱t mi̱re̱ bit Masire.’#Lu̱ge̱z 3:5-10
35“Een necu Muses bali abure ol ke̱ kar bali kizettek nonno ne, ‘Ngene ci aanyi i̱nne̱t ize alaan ci ettedi zoz cinna̱ng?’#Lu̱ge̱z 2:14 I̱tto̱n zin Ta̱mu̱ta̱dde̱n abarik nonno kize e̱e̱t ci abal kar bo̱do̱k keela nogo ngati anjilo bali iyowak nonno garuwe zare bali atuze kiwagon gwa̱a̱ ke̱. 36U̱lu̱ga̱i̱ enne nogo Masira kar ku̱tu̱gu̱ kaal cik a̱ma̱li̱le̱ ol o̱o̱tti̱ ki kaal cik a̱vu̱la̱ Masire, kar bo̱do̱k Nyatapare ci Ma̱ri̱, kar balala e̱rki̱nya̱ cik een moten we̱c.
37“U̱du̱wa̱k Musesi eliya ol cik Israilo, a̱nne̱k ne, ‘I̱tto̱na̱kku̱ng atin Manyi Ta̱mu̱ta̱dde̱n a̱ri̱to̱i̱t ci zoz cinne#7:37 I̱tto̱na̱kku̱ng atin Manyi Ta̱mu̱ta̱dde̱n a̱ri̱to̱i̱t ci zoz cinne: Een Ye̱su̱ a̱ri̱to̱i̱t ci bali ozoz Musesi zoz ci obod ki nonno. IkebDeuteronomy 18:15-18; Jon 1:21; 6:14; Buk wa To̱ni̱a̱u̱ 3:22-23. orgene cunno̱ng ki i̱yo̱ko̱ anna ko̱.’#18:15 38Alut bali Musesi ol balala, ki anjilo ci ozozek nonno biye ci Sinai, ki be̱e̱ti̱gga̱c kar zin enne uruba genyiz ci i̱yo̱ko̱ a̱du̱wa̱kke̱t enne agita ko̱.
39“Utuburet be̱e̱ti̱gga̱c kar ko̱to̱ngo̱o̱ltte̱ nonno. Abarik zin utuburet nonno, imma zi̱nze̱tti̱nne̱ cigge̱k orong ki̱mi̱rte̱ koot Masire. 40U̱du̱kta̱k zin nege Aaron, a̱nne̱k ne, ‘Dimaneket ta̱mu̱ta̱dde̱ne̱t cik atin ovvo oowa ngatinna̱ng, eci iróng ka̱gga̱yya̱ nyaa ci i̱i̱na̱k gotonet Muses wa bali anyahannet Masira!’#Lu̱ge̱z 32:1 41Een neci i̱i̱te̱n bali ovvo nege adiman to̱do̱yo̱i̱t kize ta̱mu̱ta̱dde̱n ci ogon ki mo̱o̱lti̱ ke̱. Anyaktta kaal cigge̱k kar kapaktek wawa kar ku̱tu̱gu̱zzo̱ kwo̱o̱r ci atalne gi̱i̱ ci adiman nege azzine cigge̱k. 42Iróng zin Ta̱mu̱ta̱dde̱n ngen edeconik nogo kar kaanyik nogo kalac koor, nye̱lo̱k ki munyuny kize ta̱mu̱ta̱dde̱ne̱t cigge̱k! Aave zoz necu e̱he̱rye̱ buwe ci a̱ri̱tto̱u̱ ke̱te̱:
“‘Olli Israilo bai, anyaktang da̱ niga annit wawac ki muci
e̱rki̱nya̱ moten we̱c balala?
43Odongtu niga aduwe ci ta̱mu̱ta̱dde̱n ci een zara Molech,
ki munyunyoc ci ta̱mu̱ta̱dde̱n cunno̱ng Rephan,
a̱di̱ngdi̱nga̱nnu̱ ta̱mu̱ta̱dde̱ne̱t wak adimanai azzine.
I̱yo̱ko̱ zin, ka̱a̱nyu̱ng atin oot izet i̱do̱ngi̱’#Amos 5:25-27 lo̱o̱ce̱ ci reeni many kommog Babilon.#7:43 Babilon: Baling edeccai i̱i̱te̱ni̱ bali Nowa ke̱, idimanit ol ce̱e̱z ci u̱u̱ni̱ okko rok ta̱mu̱-keng ngati een Babel kar e̱rki̱nya̱ cik meelek bali vu̱rrta̱ utuwet ol azi ne Babilon, imma bali e̱rki̱nya̱ cik meelek i̱ki̱ya̱ alaani Nebuchadnezzar ci Babiloni kar ki̱ki̱ya̱ kuwe ol u̱gge̱ cik Israilo lo̱o̱ce̱ ci Babilona. Ogon enne zoz necu ngati enne azan Jerusalem e̱rki̱te̱ ci een obet tu̱r ki moten turgerem (570) bali ngen Ye̱su̱ ki̱ti̱rra̱i̱ ke̱. IkebKananet 11; 2 Alaat 24-25; Daniel 1:1-7.
44“Anyak bali ji̱ji̱ti̱gga̱c Ce̱e̱z wa Ta̱mu̱ta̱dde̱no̱ een ti̱ti̱ balala#7:44 Ce̱e̱z wa Ta̱mu̱ta̱dde̱no̱ een ti̱ti̱ balala: U̱du̱wa̱k Ta̱mu̱ta̱dde̱n Muses kidiman Ce̱e̱z wa Ta̱mu̱ta̱dde̱no̱ een ti̱ti̱ balala, kar ming a̱lu̱g nege a̱lu̱ge̱ ki Ce̱e̱z wa Ta̱mu̱ta̱dde̱no̱ ko̱ bu̱k. Imma bali vu̱rrta̱ eteheeny Solomoni Ce̱e̱z wa Ta̱mu̱ta̱dde̱no̱ Jerusalema ci iróng ol a̱lu̱ge̱ bu̱k. IkebI̱bu̱ru̱ 8:5. bu̱k. Adimanai ki bali ming a̱du̱wa̱k Ta̱mu̱ta̱dde̱n Muses ke̱, go̱o̱le̱ bali icinne enne ke̱. 45Baling u̱mu̱dda̱ ji̱ji̱ti̱gga̱c Ce̱e̱z wa Ta̱mu̱ta̱dde̱no̱ een ti̱ti̱ ke̱, o̱o̱tte̱ nege bu̱k ngati ovvo nege orkore ki Joshua#7:45 Joshua: Ahala Ta̱mu̱ta̱dde̱n nonno kar kize ddi̱ki̱ryo̱i̱t ci olli Israilo kar kuwe ol lo̱o̱ce̱ ci een Kanaan baling a̱da̱k Musesi. IkebLu̱ge̱z 17-24; Joshua 1-24. rok lo̱o̱c bali ottowe Ta̱mu̱ta̱dde̱n ol ke̱. A̱vvu̱ ti̱ti̱ lo̱o̱ce̱ neci zee rok i̱i̱te̱n bali okko Da̱vi̱de̱ abale lo̱o̱c ke̱.
46“Kar zin Ta̱mu̱ta̱dde̱n katalo ngati alaan Da̱vi̱de̱ oroot, eci enne orong keteehenyek Ce̱e̱z Ta̱mu̱ta̱dde̱n ci Ya̱ko̱bo̱. 47Abarik zin ize ngerinne Solomon ci okko eenycek Ta̱mu̱ta̱dde̱n Ce̱e̱z wa Lawinto.
48“I̱yo̱ko̱ zin, iróng Manyi wa Ommog Veelek abak ce̱e̱zi̱nne̱ cik eenyet e̱e̱ti̱ ci diiri. Ki baling u̱du̱wa̱ a̱ri̱to̱i̱ti̱ ke̱:
49“‘Een ta̱mu̱-kengi lecer cinanni,
kar looci kize nginti aavtte zoona cigannik.
Eenycika wo̱ye̱ atin niga annit ce̱e̱z ci ogon ku̱?
azi Manyi
icima aave atin nginti ki̱ye̱be̱ze̱ anna nga?
50Annit ci keenyca kaal cik ta̱mu̱-kenga ki lo̱o̱ta̱ ko̱ do̱o̱k.’#Isaya 66:2
51“Niga ol cik okkomi o̱o̱tti̱ kak kar bo̱do̱k kiditeung iina! Ogonnu niga ki ji̱ji̱ti̱ggo̱k: Aburnnu niga odohize Vongiz ci A̱li̱le̱. 52Anyak de̱de̱ da̱ a̱ri̱to̱i̱t ci ngen ji̱ji̱tu̱ggo̱k ki̱gi̱de̱t? U̱ru̱we̱t abarik nege a̱ri̱tto̱k wak a̱du̱wa̱ zoz ci a̱kku̱nne̱ E̱e̱ti̱ wa Abunna O̱de̱ ṯok. I̱yo̱ko̱ zin adayau niga nonno kar bo̱do̱k u̱ru̱we̱t nonno ka̱da̱k, 53niga ol balik anyonikkung lo̱ti̱nno̱wa̱ balik u̱du̱kta̱ anjilonya#7:53 Anjilonya: E̱e̱ggi̱n nege vongizzok cik aavtte ki Ta̱mu̱ta̱dde̱n ta̱mu̱-kenga kar bo̱do̱k iróng nege anyak e̱le̱tti̱ cik okkomi. I̱tto̱n gon Ta̱mu̱ta̱dde̱n nogo i̱i̱te̱n imma koot lo̱o̱ta̱ kanyaktak ol zoz cinne. ke̱ kar abarik bo̱do̱k iróng o̱ngo̱o̱li̱nnu̱ lo̱ti̱nno̱k ne̱ke̱.”
Ovvocit ol Stephen biyene
54Baling iziyyet ol wak etted zoz ko̱ zoz ci Stepheni niko, utuburtek nonno nong oroot, kar zin kubbucet ngatinne. 55Imma bali Stepheni anyak Vongiz ci A̱li̱le̱ ju̱rru̱m, egelem ta̱mu̱-keng kar kicin di̱ngdi̱ngo̱n ci Ta̱mu̱ta̱dde̱no̱, ki Ye̱su̱ ming abile ngati Ta̱mu̱ta̱dde̱no̱ a̱tte̱ ci a̱zzo̱. 56Kar zin Stepheni ku̱du̱wa̱k nogo zoz ci icin enne, “Izikto da̱ ju̱rru̱m! Kicina ta̱mu̱-keng ming o̱o̱ye̱ kar zin Ngerrti E̱e̱to̱#7:56 Ngerrti E̱e̱to̱: Awu Ye̱su̱ ele cinne azi ne, ke̱e̱ni̱ enne Ngerrti E̱e̱to̱. I̱ye̱la̱ zoz necu azi ne, een enne Ki̱ri̱sto̱, alaan ci ba̱a̱li̱ne̱t ci abak udut. IkebDaniel 7:13-14. abile a̱tte̱ ci a̱zzo̱ ngati Ta̱mu̱ta̱dde̱no̱.”
57Egerenyit zin ol ne̱ko̱ oroot muluwe ci a̱ppwe̱ kar koot ngatinne niko, 58u̱tu̱gu̱rre̱t zin ol nonno o̱o̱tte̱ orog abanyca kar zin kovoccit biyene. Kar zin bbacaha karta ru̱u̱ma̱ni̱ cigge̱k kanyakta ki̱vi̱ta̱ ku̱ju̱kte̱k zo̱o̱ cik e̱e̱t ci een zara Saul.#7:58 Saul: Baling ize enne to̱na̱i̱t ci Ye̱su̱, ize zara ciginnek Pa̱u̱lo̱. IkebBuk wa To̱ni̱a̱u̱ 13:9.
59Baling ovvocit nege Stephen, alawo zin enne, azi ne, “Manyi Ye̱su̱, bite vongiz cinanni.” 60Kar zin kuduk lo̱o̱c kakatek u̱zu̱ngti̱nne̱ kar ku̱tu̱lu̱, “Manyi, ma edezi nogo mu̱nye̱ne̱ cik ogon nege ko̱.” Baling ming okko enne a̱du̱wa̱ zoz necu niko, etteda zinin a̱da̱ha̱.
Zvasarudzwa nguva ino
Buk wa To̱ni̱a̱u̱ 7: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.