Buk wa To̱ni̱a̱u̱ 15
15
Uwai Jerusalema
1U̱lu̱ca̱i̱ zin ol uggak lo̱o̱ce̱ ci Ju̱de̱ya̱ a̱vvu̱na̱k orog ci een Antiyok kar ki̱vi̱ta̱ ke̱de̱me̱zi̱t gotonogget, a̱nne̱k ne, “Ming iróng niga etteddu wucic vi̱ca̱vi̱cce̱t#15:1 Etteddu wucic vi̱ca̱vi̱cce̱t: Azi olli Ya̱u̱do̱ ne anyik ol wak iróng een Ya̱u̱d a̱tu̱ zoz ci Ye̱su̱ kettedit wucic vi̱ca̱vi̱cce̱t, ki baling u̱du̱wa̱k Ta̱mu̱ta̱dde̱n Aburaham ke̱. IkebKananet 17:1-14. ki baling edemez Musesi lo̱ti̱nno̱we̱ ke̱, iróng amudannu ti̱ri̱ze̱ne̱t.” 2Utuburet Pa̱u̱lo̱ ki Barnabas nong oroot kar kadangto ki nogo. Atahaltta zin lo̱ddi̱ki̱re̱ cik ke̱le̱ci̱a̱k Pa̱u̱lo̱ ki Barnabas ki ol u̱gge̱ wak a̱tu̱we̱, kar ki̱tto̱nni̱t nogo koot rok Jerusalem, koot kicinnet to̱ni̱a̱k ki lo̱ddi̱ki̱re̱ zo̱ze̱ necu. 3Baling ovvo ol cik atahaltai ko̱ ovvo, iyok nege go̱o̱le̱ ci lo̱o̱c ci Phoenicia ki Samariya, a̱du̱wa̱k ol zoz ci elemtta ol cik iróng e̱e̱ggi̱n Ya̱u̱d Ye̱su̱. Aanyik kaviyaha ne̱ko̱ ol wak a̱tu̱we̱ do̱o̱k katalto. 4Baling i̱vi̱tta̱k Pa̱u̱lo̱ ki Barnabas Jerusalem, a̱gga̱mtta̱ zin ol cik ke̱le̱ci̱a̱k, to̱ni̱a̱k ki lo̱ddi̱ki̱re̱ nogo, kar zin ku̱du̱kta̱k nogo kaal do̱o̱k cik ogonik Ta̱mu̱ta̱dde̱n ol cik iróng e̱e̱ggi̱n Ya̱u̱d li̱ngli̱ngo̱ne̱ ci ogon nege.
5Ma̱i̱je̱ ol uggak wak a̱tu̱we̱ wak annu zoz ci Varacis, itingazzo je̱e̱na̱ kar kizeto ne, “Aanycik ol cik iróng e̱e̱ggi̱n Ya̱u̱d do̱o̱k la̱du̱n kettedit wucic vi̱ca̱vi̱cce̱t, kar bo̱do̱k ko̱to̱ngo̱o̱ltte̱ lo̱ti̱nno̱k wak Musesi.”
6U̱lu̱tte̱ zin to̱ni̱a̱ha̱ ki lo̱ddi̱ki̱re̱ wak ke̱le̱ci̱a̱ Jerusalema kar kozozit zoz neci. 7Baling ozozit ol zoz necu oroot, itinga Peturu je̱e̱na̱ kar kozozek nogo, a̱nne̱k ne, “Gotonogga, a̱gga̱yyu̱ niga ba̱li̱ye̱ atahala Ta̱mu̱ta̱dde̱n annit orgene cunno̱ng kar ol wak iróng e̱e̱ggi̱n Ya̱u̱d kiziyet kaviyak cik abunna Ye̱su̱ kar ku̱tu̱we̱t. 8Imma Ta̱mu̱ta̱dde̱n wa a̱gga̱ zi̱nze̱tti̱ cik ollu do̱o̱k, i̱ye̱le̱kke̱t agit ngati bali anyike enne ol wak iróng e̱e̱ggi̱n Ya̱u̱d Vongiz ci A̱li̱le̱, ki baling aanyet enne agit ke̱. 9Katubo naga do̱o̱k ngu̱me̱ cinne, eci enne adiman zi̱nze̱tti̱ cigge̱k kizeto caale tu̱we̱nte̱ ci anyak nege. 10I̱yo̱ko̱ zin, nya ming atimanu Ta̱mu̱ta̱dde̱n anyikku nuyak kaal cik a̱di̱ngdi̱nge̱, iróng wo̱ye̱ naga icima ji̱ji̱ti̱gga̱c uule ko̱? 11Iróng zin een niko! Ka̱tu̱yya̱ naga eci zo̱ze̱ ci deten ci Manyitinna Ye̱su̱ kurubta naga ti̱ri̱ze̱ne̱t, ki i̱yo̱ko̱ nege bu̱k.”
12Ijjakte ol do̱o̱k li̱i̱m, ngati azzikne nege Pa̱u̱lo̱ ki Barnabas a̱du̱wa̱k nogo kaal cik a̱vu̱la̱ u̱tu̱gu̱we̱k Ta̱mu̱ta̱dde̱n ol cik iróng e̱e̱ggi̱n Ya̱u̱d li̱ngli̱ngo̱ne̱ ci u̱tu̱gu̱zzo̱ nege. 13Baling e̱de̱cca̱ Pa̱u̱lo̱ ki Barnabas zoz, itinga Je̱mi̱si̱ je̱e̱na̱ ozoza: “Gotonogget, izikttang. 14Oobekket Si̱mo̱ne̱ zoz wa a̱kku̱na̱ke̱ Ta̱mu̱ta̱dde̱n ol cik iróng een Ya̱u̱d, orong kanyaha ol ne̱ko̱ u̱gge̱ kizeto ciginnek. 15Orkor zo̱zo̱wa̱ cik a̱ri̱tto̱u̱ ki zoz cu, ki ming e̱he̱rye̱ u̱du̱wa̱ Ta̱mu̱ta̱dde̱n:
16“‘Okko vu̱rrta̱ kokko atin anna koboda,
kar kidiman alaanzet ci Da̱vi̱de̱ bo̱do̱k.
Ming egerzanne ba̱li̱ye̱ nu̱nu̱n, kadimani atin anna dee,
kar atin anna kidiman ju̱rru̱m,
17kar ol wak ngen aavtte, ovvo atin orong Manyi,
kar ol wak iróng een Ya̱u̱d do̱o̱k a̱gga̱ zar cigannik,
azi Manyi ci ogon kaal ciko’#Amos 9:11-12
18a̱gga̱ bu̱u̱llo̱wa̱ zoz necu bali reena.
19“Een zin necu zoz cinanni, gerza ming kaanyik ol wak iróng een Ya̱u̱d no̱ngi̱tto̱n ming orong ku̱tu̱we̱t Ta̱mu̱ta̱dde̱no̱. 20Abarik ku̱du̱kta̱k nogo gerza ming adak da̱i̱ne̱t cik aanyik ol to̱do̱yyo̱k ki bo̱do̱k a̱li̱ya̱kze̱t, ki da̱i̱ne̱t e̱le̱gi̱t ci adale icima ci anyak bi̱ye̱. 21Eci lo̱ti̱nno̱wa̱ cik Musesi uwakte ba̱li̱ye̱ e̱rki̱nya̱ cik meelek o̱ro̱gjo̱we̱ do̱o̱k, ngen zin ol rok i̱yo̱ko̱ ikeb Ce̱e̱zi̱nne̱ wak Lawinto, I̱i̱te̱ne̱ wa Yu̱bze̱nto̱ odohize dee.”
Waraga ci i̱tto̱na̱k ol wak a̱tu̱we̱ iróng e̱e̱ggi̱n Ya̱u̱d
22Odolta zin to̱ni̱a̱ha̱ ki lo̱ddi̱ki̱re̱ ki ol cik ke̱le̱ci̱a̱k do̱o̱k, kar katahalta ol u̱gge̱ cigge̱k kar ki̱tto̱nni̱t koot o̱rge̱ ci een Antiyok ki Pa̱u̱lo̱ ki Barnabas. Ahala nege Judas wa een zara uggak ne Barsabbas ki Silas, e̱e̱ggi̱n nege lo̱ddi̱ki̱re̱ cik ol wak a̱tu̱we̱. 23Anyak nege ki waraga ci e̱he̱rye̱ azi ne:
To̱ni̱a̱k ki lo̱ddi̱ki̱re̱, gotonoggu,
Keherakkung i̱ge̱t ol wak iróng een Ya̱u̱d a̱tu̱we̱ o̱rge̱ ci Antiyok, ki lo̱o̱c ci Syria ki Cilicia:
Kizzayung do̱o̱k!
24Kazikna niko zoz ci ovvo ol uggak ba̱li̱ye̱ a̱a̱nyu̱ng utuburet nong de̱mzi̱nte̱ cinne̱ng, amire agit cik ki̱tto̱na̱nna̱ nogo! 25Kelemtta zin naga do̱o̱k kar katahalta ol u̱gge̱ ngatinna̱ng kar ki̱tto̱ntta̱ ki̱vi̱ta̱ ki gonogget cik zi̱nze̱tti̱ cigga̱k Barnabas ki Pa̱u̱lo̱, 26balik abaza e̱le̱tti̱ cigge̱k li̱ngli̱ngo̱nte̱ ci Manyitinna Ye̱su̱ Ki̱ri̱sto̱. 27I̱yo̱ko̱ zin, ki̱tto̱na̱nna̱ Judas ki Silas abunna oobekkung keng ci waraga ci keherya naga ko̱. 28Abarik kazi ne, abunna ngati Vongiz ci A̱li̱le̱ ki ngatinna ming iróng ka̱a̱nyu̱ng lo̱ti̱nno̱k ci okkomi kommog ciko: 29Ma adakku da̱i̱ne̱t cik amuci ol ta̱mu̱ta̱dde̱n ci adimanai azzine, ma adakku i̱di̱ng ci ngen anyak bi̱ye̱ icima e̱le̱gi̱t ci adal ol, ma e̱e̱ggi̱nnu̱ a̱li̱ya̱k. Ogonnu atin ju̱rru̱m ming azunnu lo̱ti̱nno̱k ne̱ko̱.
Oot labak.
30U̱lu̱cce̱ ol ciko oot o̱rge̱ ci een Antiyok ngin bali i̱tto̱ne̱ ol nogo ke̱, u̱tu̱ya̱ olli ke̱le̱ci̱o̱ kar kaanycik waraga bali anyaha nege ke̱. 31Baling ovvo ol ikeb waraga neci, atalne nege oroot.
32Ozozzit zin Judasi ki Silas balik e̱e̱ggi̱n a̱ri̱tto̱k ke̱ oroot, i̱lo̱t nogo kar abunna okkomi tu̱we̱nta̱. 33Baling a̱vvu̱to̱ nege nginati i̱i̱nya̱ u̱gge̱ cik meelek, i̱tto̱ni̱t zin ol nogo ki̱mi̱rte̱ koot Jerusalema labak. 34Ma̱i̱je̱ Silasi a̱vvu̱ iróng ngen a̱mi̱re̱. 35A̱vvu̱to̱ zin Pa̱u̱lo̱ ki Barnabas Antiyokte, kar nege ki ol u̱gge̱ cik meelek ke̱de̱me̱zi̱t ol kar bo̱do̱k kuwaktek nogo zoz ci Manyi Ye̱su̱.
Engerto Pa̱u̱lo̱ ki Barnabas
36Imma bali i̱i̱nya̱ u̱gge̱, a̱nne̱k Pa̱u̱lo̱ Barnabas ne, “Ize we̱t ki̱mi̱rte̱ koo o̱ro̱gjo̱we̱ balik kuwahek ol kaviyak wak Manyi Ye̱su̱ abunna ke̱, koo kicinnet gotonogget ki ngonogget ming aavtte ucca nege tu̱we̱nta̱ ku̱.” 37Orong zin Barnabasi kar kuwe Jon wa een zara uggak ne Marko bu̱k, 38imma zin Pa̱u̱lo̱ abure eci bali Joni odotek nogo lo̱o̱c, lo̱o̱ce̱ ci Pamphylia, ngen enne ki̱li̱ngli̱nge̱t ki nogo nga̱to̱de̱. 39Adangto zin nege oroot, kengerto. Uwe Barnabasi Marko, otoddit i̱bo̱ oot lo̱o̱ce̱ ci aburuk maama een Cyprus, 40Alayek ol cik a̱tu̱we̱ nogo Ta̱mu̱ta̱dde̱n kar zin Pa̱u̱lo̱ kengera Silas kar zin korkorrit bu̱k. 41Iyok nege lo̱o̱co̱we̱ cik Syria ki Cilicia, a̱du̱wa̱k olli Ta̱mu̱ta̱dde̱no̱ kokkomit tu̱we̱nta̱ kak.
Zvasarudzwa nguva ino
Buk wa To̱ni̱a̱u̱ 15: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.