Buk wa To̱ni̱a̱u̱ 14
14
Pa̱u̱lo̱ ki Barnabas o̱rge̱ ci een Iconium
1Imma o̱rge̱ ci een Iconium, oot Pa̱u̱lo̱ ki Barnabas Ce̱e̱ze̱ wa Lawinto kiwagon la̱du̱n. Uwaktek ol zoz ci Ye̱su̱ ju̱rru̱m ku̱tu̱we̱t Ya̱u̱di̱ ki ol cik iróng e̱e̱ggi̱n Ya̱u̱d meelek giir. 2Ma̱i̱je̱ Ya̱u̱d wak iróng a̱tu̱we̱, alabta ol cik iróng e̱e̱ggi̱n Ya̱u̱d kitingta kavaraccit ngati ol wak a̱tu̱we̱. 3A̱vvu̱to̱ Pa̱u̱lo̱ ki Barnabas nginati i̱i̱nya̱ cik meelek, uwahek nege ol zoz ci Manyi Ye̱su̱, aanyik enne nogo ku̱tu̱gu̱zzo̱ kaal cik a̱vu̱la̱ meelek giir, i̱ye̱la̱ necu een kaviyaha ciginnek de̱de̱. 4Engerto ol cik Iconiumi; unuwet uggak Ya̱u̱d cik iróng a̱tu̱we̱, ovvo uggak annu to̱ni̱a̱k. 5Ozoza ol wak e̱e̱ggi̱n i̱do̱ngi̱ ki Ya̱u̱d, ki lo̱ddi̱ki̱re̱ cigge̱k nga̱to̱de̱ zoz ci adawe nege Pa̱u̱lo̱ ki Barnabas, orong kar kovoccit nogo biyene. 6Iziyyet Pa̱u̱lo̱ ki Barnabas zoz neci kar zin ki̱vi̱re̱t koot lo̱o̱ce̱ ci Lycaonian o̱ro̱gjo̱we̱ cik een zara Lystra ki Derbe ki o̱ro̱gjo̱k ne̱k aburuk ne̱ke̱ do̱o̱k, 7ngati uwahek nege ol kaviyak cik abunna.
Pa̱u̱lo̱ ki Barnabas o̱rge̱ ci een Lystra ki Derbe
8Imma o̱rge̱ ci een Lystra ko̱, anyak da̱ e̱e̱t ci nyangnyangi zoona ngen koto udut, a̱rri̱ta̱i̱ da̱ enne ogon niko la̱du̱n. 9Baling uwak Pa̱u̱lo̱ azikne da̱ enne. Baling icin Pa̱u̱lo̱ nonno een e̱e̱t ci anyak tu̱we̱ne̱t orong kangaruwe, 10kar zin kutu nonno, izek ne, “Tinga je̱e̱na̱ zoone cigunnek!” Baling okko e̱e̱ti̱ aziye, itinga je̱e̱na̱ ingoz kar zin koto labak.
11Baling icinnet koole neci gi̱i̱ ci ogon Pa̱u̱lo̱, ozozzit utuge cinne̱ng Lycaonian, azi ne, “I̱vi̱tta̱k ta̱mu̱ta̱dde̱ne̱ta̱ lo̱o̱c kiwagon ol cik diirik!” 12A̱ka̱tte̱k zin nege Barnabas zar cik ta̱mu̱ta̱dde̱n cinne̱ng Zeos, ovvo akannek Pa̱u̱lo̱ zar cik ta̱mu̱ta̱dde̱n cinne̱ng Hermes. 13Okko e̱e̱ti̱ ci wawaco Zeosi, ci aave bali ce̱e̱z cinne lawinto orog abanyca, anyahak enne o̱le̱nya̱ cik aimek enne erec aran, eci enne ki koole orong kapaktek wawa Pa̱u̱lo̱ ki Barnabas.
14Baling iziyyet to̱ni̱a̱ha̱ Barnabasi ki Pa̱u̱lo̱ zoz necu, omozte kar zin kereccit ru̱u̱ma̱ni̱ cigge̱k, imma ngatu egerenyit oroot, azi ne, 15“Gotonogget! Ma ogonnu kaal ne̱ko̱. Ke̱e̱ggi̱nna̱ naga ol cik diirik ki i̱yo̱ko̱ niga ko̱. Kanyahakung kaviyak cik abunna, kar utungtek kaal cik gerzek ko̱ lo̱o̱c, u̱tu̱gu̱z kaal cik abunna Ta̱mu̱ta̱dde̱no̱, wa bali eenyca ta̱mu̱-keng ki lo̱o̱c, eenyca nyatapar ci a̱ddi̱ki̱re̱ ki kaal cik aavtte ecito do̱o̱k. 16Aanyik ba̱li̱ye̱ Ta̱mu̱ta̱dde̱n ol cik lo̱o̱tu̱ do̱o̱k ku̱tu̱gu̱zzo̱ kaal cik orong zi̱nze̱tti̱ cigge̱k ku̱tu̱gu̱zzo̱. 17Ma̱i̱je̱ nu̱nu̱n ming iróng niga a̱gga̱yyu̱ nonno; u̱tu̱gu̱ enne kaal cik abunna, a̱a̱nyu̱ng ta̱mu̱ ci i̱i̱na̱ ta̱mu̱-kenga ko̱, a̱a̱nyu̱ng da̱i̱ne̱t cik meelek, nonno bo̱do̱k ci a̱a̱nyu̱ng ataltto.” 18Imma zin zo̱ze̱ necu, uulet to̱ni̱a̱ha̱ kar kalamit ol ngati oronge kar kapaktek nogo wawac.
19Ulutet lo̱ddi̱ki̱re̱ uggak cik een Ya̱u̱d a̱vvu̱ o̱ro̱gjo̱we̱ cik een Antiyok ki Iconium kar ku̱tu̱yya̱ o̱o̱tti̱ cik ollu. Ovvocit zin ol Pa̱u̱lo̱ biyene kar ku̱tu̱gu̱rte̱k orog abanyca, i̱no̱n nege azi ne, a̱da̱ha̱. 20Baling ovvo nuyaha abile aburuk nonno, itinga Pa̱u̱lo̱ i̱mi̱re̱ uk orgato. Okko i̱i̱te̱n ci reng, itingazzo enne ki Barnabas oot o̱rge̱ ci een Derbe.
I̱mi̱rrte̱ Pa̱u̱lo̱ ki Barnabas oot rok Antiyok Syriakte
21Uwait kaviyak cik abunna ngati een Derbe, kar ol cik meelek ku̱tu̱we̱t zoz ci Manyi Ye̱su̱. I̱mi̱rrte̱ zin Pa̱u̱lo̱ ki Barnabas oot o̱ro̱gjo̱we̱ cik Lystra, ki Iconium ki Antiyok, 22edemez nuyak kar bo̱do̱k ku̱du̱kta̱k nogo kokkomit kak tu̱we̱nte̱ cinne̱ng. A̱nne̱k nege nuyak ne, “Abunna la̱du̱n ming kamuda pirnanet ci a̱ppwe̱ kar ki̱tto̱z ba̱a̱li̱ne̱t ci Ta̱mu̱ta̱dde̱no̱.” 23Atahaltta Pa̱u̱lo̱ ki Barnabas lo̱ddi̱ki̱re̱ u̱gge̱ ke̱le̱ci̱a̱nya̱i̱ do̱o̱k kabalit gonoggi, kar zin nege kalayo ki̱ya̱yo̱ ngati alawek nogo Manyi ci aarik nege zi̱nze̱tti̱ cigge̱k ko̱. 24Iyoit Pa̱u̱lo̱ ki Barnabas lo̱o̱ce̱ ci een Pisidia oot lo̱o̱ce̱ ci een zara Pamphylia, 25oot uwaktek ol zoz ci Ye̱su̱ o̱rge̱ ci een Perga, kar zin bo̱do̱k ku̱lu̱ce̱ oot o̱rge̱ ci een Attalia.
26Imma bali vu̱rrta̱, o̱bo̱dda̱ i̱bo̱wa̱ Attaliakte kar koot o̱rge̱ ci een Antiyok lo̱o̱ce̱ ci een Syria, ngin bali atahala nogo Vongizi ci A̱li̱le̱ de̱ti̱nte̱ ci Ta̱mu̱ta̱dde̱no̱ kar kaanyik nogo ku̱tu̱gu̱zzo̱ li̱ngli̱ngo̱n ci i̱yo̱ko̱ e̱de̱cca̱ nege ko̱.
27Baling a̱ra̱yya̱ nege Antiyok, u̱tu̱yya̱ ol wak a̱tu̱we̱ do̱o̱k kar ku̱du̱kta̱k kaal cik u̱tu̱gu̱we̱k Ta̱mu̱ta̱dde̱n nogo ki bo̱do̱k ol wak iróng een Ya̱u̱d u̱tu̱we̱t Ye̱su̱. 28A̱vvu̱to̱ zin nege ki nuyak i̱i̱nya̱ cik meelek giir Antiyokte.
Zvasarudzwa nguva ino
Buk wa To̱ni̱a̱u̱ 14: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.