Buk wa To̱ni̱a̱u̱ 13
13
I̱tto̱nte̱ Sauli ki Barnabas
1Anyak ba̱li̱ye̱ ke̱le̱ci̱a̱ ci aave o̱rge̱ ci Antiyoki a̱ri̱tto̱k ki de̱me̱zzo̱k ciko: Barnabas, Si̱mo̱ne̱ wa een zara uggak ne Niger, ki Lucius wa Cyrene, ki Manaen wa bali ingazi ki alaan He̱ro̱d Antipas nga̱to̱de̱ bali ngen e̱e̱ggi̱n dooli ke̱, kar zin Saul. 2Imma ngati bali alawe nege Manyi kar bo̱do̱k ki̱ya̱yo̱,#13:2 Ki̱ya̱yo̱: Aavtte ol cik Ya̱u̱do̱ gon i̱i̱nya̱ u̱gge̱ ne̱ko̱ cik iróng bu̱k adak rok da̱i̱ne̱t u̱gge̱ abarik orong kar nege kanycik e̱le̱tti̱ cigge̱k kize cik alawe nege Ta̱mu̱ta̱dde̱n. ize Vongizi ci A̱li̱le̱ ne, “Atahaltta Saul ki Barnabas ku̱tu̱gu̱zzo̱ li̱ngli̱ngo̱n bali kawak anna nogo la̱du̱n ke̱.” 3Baling ovvo nege edeca i̱ya̱wi̱ne̱t ki lawinet, a̱ta̱dde̱k azzin nogo kar zin ki̱tto̱nni̱t koot.
Uwait Barnabasi ki Saul o̱rge̱ ci een Cyprus
4I̱tto̱n Vongizi ci A̱li̱le̱ Saul ki Barnabas ku̱lu̱ce̱ koot o̱rge̱ ci een Seleucia kar zin keronit i̱bo̱wa̱ koot orog ci aburuk maama een Cyprus. 5Baling a̱ra̱yya̱ nege orog ci een zara Salamis, uwaktek ol zoz ci Ta̱mu̱ta̱dde̱no̱ Ce̱e̱ze̱ wa Lawinto Ya̱u̱do̱. Aavtte bali nege ki Jon#13:5 Jon: Awu ol Jon bu̱k zare cik een Marko, abunge oowa buwe ci To̱ni̱a̱u̱ 12:12. Eher enne bu̱k buk ci Marko. kar keela nogo bu̱k.
6Eron zin nege ngati aburuk maama ko̱ do̱o̱k kar ki̱vi̱ta̱k orog ci een zara Paphos, u̱ru̱mto̱ zin nege ki e̱e̱t ci Ya̱u̱do̱ een zara Bar-Ye̱su̱ gon a̱ru̱k agura kar bo̱do̱k kize a̱ri̱to̱i̱t ci volongo, 7een enne gooni Sergius Paulus wa een ddi̱ki̱ryo̱i̱t ci gaala cik Romi, e̱e̱t ci egenyi oroot. Utu zin ddi̱ki̱ryo̱i̱ti̱ Barnabas ki Saul eci enne orong kizik zoz ci Ta̱mu̱ta̱dde̱no̱. 8Imma Bar-Ye̱su̱ wa a̱ru̱k agura, een zara uggak Elymas, abure zoz cinne̱ng, abarik orong kalam ddi̱ki̱ryo̱i̱t ngati a̱tu̱we̱ zoz ci Ye̱su̱.
9Imma zin Sauli wa een bo̱do̱k zara uggak Pa̱u̱lo̱ ko̱, anyak Vongiz ci A̱li̱le̱, egelem zin enne Elymas e̱e̱t wa a̱ru̱k agura ko̱, kar kize ne, 10“E̱e̱ni̱ i̱nna̱ do̱le̱c ci lo̱rye̱nto̱ kar bo̱do̱k ize mo̱dde̱ni̱t ci kaal cik abunna do̱o̱k. Anyai i̱nna̱ baiz ci a̱lu̱te̱ ol ki ci alabane kaal cik ollu. Alami wo̱ye̱ i̱nna̱ gool wa abunna Manyi? 11I̱yo̱ko̱ zin, omoze Manyi ngatunne. Okko i̱nna̱ e̱e̱ni̱ ru̱be̱n arrak do̱yo̱i̱t, iróng i̱nna̱ acinni vooriten ci kooro.”
Ataman niko i̱ki̱ya̱ i̱do̱ye̱ ki mu̱hu̱ri̱te̱n kar ku̱bu̱ng nonno, kar enne kize ru̱be̱n, orong e̱e̱t imma ka̱gga̱m nonno azzine. 12Baling icin ddi̱ki̱ryo̱i̱ti̱ kaal ne̱ko̱, u̱tu̱wo̱ zin enne, eci a̱ma̱li̱le̱ nonno oo de̱mzi̱nte̱ ci obod ki Manyi Ye̱su̱.
Uwak ci Pa̱u̱lo̱ Antiyokte
13Itingazzo zin Pa̱u̱lo̱ ki gonoggi o̱rge̱ ci een Paphos eron i̱bo̱wa̱ oot o̱rge̱ ci Perga lo̱o̱ce̱ ci Pamphylia, ngati bali utungek Joni nogo kar kuk ki̱mi̱re̱ kuk Jerusalema. 14Imma Pergakte, oot bo̱do̱k lo̱o̱ce̱ ci Pisidian o̱rge̱ ci een Antiyok. Kar I̱i̱te̱ne̱ wa Yu̱bze̱nto̱#13:14 I̱i̱te̱n wa Yu̱bze̱nto̱: Een i̱i̱te̱ni̱ ci a̱yu̱bze̱ olli Ya̱u̱do̱ kar kalac gon Ta̱mu̱ta̱dde̱n. Okko bo̱do̱k gon i̱i̱te̱ne̱ cu a̱a̱dda̱ nege Ta̱mu̱ta̱dde̱n kize Tehenyait ki Ti̱ri̱zo̱i̱t cinne̱ng. Awu olli Ya̱u̱do̱ i̱i̱te̱n necu kize i̱i̱te̱n ci een turgerem biranoca, ma̱i̱je̱ Tenneti awu i̱i̱te̱n necu kize i̱i̱te̱n ci een torkonom biranoca. IkebLu̱ge̱z 20:8-11; Deuteronomy 5:12-16. i̱tto̱zzo̱ Ce̱e̱z wa Lawinto kar zin ka̱vvu̱to̱ lo̱o̱ta̱. 15Baling e̱de̱cca̱ nege ke̱bi̱ne̱t lo̱ti̱nno̱k cik Musesi ki a̱ri̱tto̱k, kar zin ol wak abal Ce̱e̱z wa Lawinto ko̱ ku̱du̱kta̱k nogo zoz ci azi ne, “Gotonogget, ming anyakku ti̱lo̱wi̱ne̱t ci i̱lo̱ttu̱ ol, i̱vi̱ta̱ ozozit labak.”
16Itinga zin Pa̱u̱lo̱, kar arrak kodong azzin kar kozozik ol, kize ne, “Izikttang annita, olli Israilo ki ol wak iróng een Ya̱u̱d a̱tu̱ Ta̱mu̱ta̱dde̱n! 17Atahala Ta̱mu̱ta̱dde̱n ci Israilo ko̱ ji̱ji̱ti̱gga̱c; kar kaanyik ol eezet baling aavtte nege Masira, kar zin komize cinne, u̱lu̱ga̱i̱ enne nogo Masira, 18uzute enne nogo balala e̱rki̱nya̱ moten we̱c, 19a̱li̱b Ta̱mu̱ta̱dde̱n lo̱o̱cco̱k turgerem lo̱o̱ce̱ ci een Kanaan, kar kaanyik lo̱o̱c neci ji̱ji̱ti̱gga̱c kize ci aragiz nege. 20Ogone kaala ne̱ko̱ do̱o̱k e̱rki̱nya̱i̱ cik een obet we̱c ki moten tu̱r (450).
“Ma bali vu̱rrta̱, aanyik Ta̱mu̱ta̱dde̱n nogo ol cik etted zoz zee ki̱ki̱ya̱ i̱i̱te̱ni̱ ci a̱ri̱to̱i̱t ci een Samwel. 21I̱jji̱nne̱t zin ol Ta̱mu̱ta̱dde̱n orongit alaan, aanyik zin enne nogo Saul ngerrti Kisha, wa a̱kku̱ biilete ci Benjamini wa bali abal lo̱o̱c e̱rki̱nya̱ moten we̱c. 22Baling okko Ta̱mu̱ta̱dde̱n aara Saul alaanzeta, aragizek Da̱vi̱de̱ kize alaan cinne̱ng. U̱du̱wa̱k Ta̱mu̱ta̱dde̱n nogo zoz ci obod ki Da̱vi̱de̱: ‘Kumuda anna Da̱vi̱de̱ ngerrti Jesse, een e̱e̱t ci kirezi anna oroot; ogon atin kaal cik korongi anna nonno ku̱tu̱gu̱ do̱o̱k.’
23“Imma zin biilete ci Da̱vi̱de̱, anyahak atin Ta̱mu̱ta̱dde̱n olli Israilo Ti̱ri̱zo̱i̱t Ye̱su̱, ki bali u̱du̱wa̱ enne ke̱. 24Baling ngen Ye̱su̱ ki̱ki̱ya̱, uwahek Joni olli Israilo do̱o̱k kar kuturta mu̱nye̱n ki gga̱mi̱ne̱t ba̱ti̱ti̱mo̱. 25Baling orong Joni kedeca li̱ngli̱ngo̱n cinne, kar kize ne, ‘I̱no̱nnu̱ niga ke̱e̱ni̱ anna ngene? Iróng anna ke̱e̱ni̱ wa o̱de̱ bali u̱du̱wa̱ Manyi ke̱. I̱llo̱i̱, abarik enne a̱kku̱ vu̱rrte̱ cinanni, ommogja enne annita, iróng wo̱ye̱ anna ke̱e̱ni̱ du̱ca̱i̱t cinne.’
26“Gotonogga, doolik Aburahami, ki ol wak iróng een Ya̱u̱d o̱ngo̱o̱le̱ Ta̱mu̱ta̱dde̱n ko̱, izikttang da̱ ju̱rru̱m, i̱tto̱na̱i̱t Manyi agit do̱o̱k kaviyak cik ti̱ri̱ze̱nto̱ ko̱. 27Imma zin olli Jerusalemi ki lo̱ddi̱ki̱re̱ cigge̱k iróng elemna Ye̱su̱, abarik abure nonno, akat zin zoz bali u̱du̱kta̱ a̱rri̱tto̱wa̱ ikeb ol odohize I̱i̱te̱ne̱ wa Yu̱bze̱nto̱ ko̱ mo̱o̱le̱t. 28Iróng zin nege amuda zoz ci gerze kar ku̱ru̱kte̱ Ye̱su̱ ka̱da̱k, i̱jji̱nne̱t zin abarik nege Pilato abunna ming a̱ru̱k Ye̱su̱ ka̱da̱k. 29Baling ovvo nege a̱ru̱k Ye̱su̱ keete ci een ta̱la̱ke̱c ka̱da̱k kar zin nege kartik nonno ilomi. 30Ma̱i̱je̱ zin Ta̱mu̱ta̱dde̱n itingawe nonno daiza, 31imma i̱i̱nya̱ cik meelek i̱ye̱le̱k enne ele cinne ol balik orkor ki nonno lo̱o̱ce̱ ci Ga̱li̱li̱ rok Jerusalem. E̱e̱ggi̱n zin i̱yo̱ko̱ ol ne̱ko̱ bbacak cik ol cigga̱c.
32“Ka̱du̱wa̱kku̱ng kaviyak cik abunna: Zoz bali u̱du̱wa̱k Ta̱mu̱ta̱dde̱n ji̱ji̱ti̱gga̱c ke̱, 33i̱ki̱ya̱ akat mo̱o̱le̱t ngatinna dooli ciginnek, eci itingawe enne Ye̱su̱ daiza. Ki i̱yo̱ko̱ ming e̱he̱rye̱ buwe wa Caliwono zoc rama, azi Ta̱mu̱ta̱dde̱n ne:
“‘E̱e̱ni̱ i̱nna̱ Ngeranni;
kiize anna wazin cu Baatunne.’#Caliwon 2:7
34De̱de̱, itingawe Ta̱mu̱ta̱dde̱n Ye̱su̱ daiza, iróng a̱da̱i̱ udut ku̱mu̱ lo̱o̱wa̱, e̱he̱rye̱ zoz necu azi Ta̱mu̱ta̱dde̱n ne:
“‘Ka̱a̱nyu̱ng atin anna i̱ge̱t zoz ci a̱li̱le̱ ki ma̱yu̱we̱ne̱t ci een de̱de̱ bali ku̱du̱wa̱ha̱ anna Da̱vi̱de̱ ke̱.’#Isaya 55:3
35E̱he̱rye̱ zin bo̱do̱k ngamani azi ne:
“‘Iróng i̱nna̱ anyik ele ci E̱e̱t wa A̱li̱le̱ O̱de̱ ṯok ku̱mu̱ lo̱o̱wa̱.’#Caliwon 16:10
36“U̱tu̱gu̱ Da̱vi̱de̱ li̱ngli̱ngo̱n ci Ta̱mu̱ta̱dde̱no̱ baling ngen enne aruge ke̱, baling okko enne a̱da̱i̱, a̱da̱ye̱k ol nonno ki bali ming a̱da̱ ol ji̱ji̱ti̱gi̱nne̱k ke̱, kar zin enne ka̱da̱k ku̱mu̱ iloma. 37Imma E̱e̱ti̱ ci ingane Ta̱mu̱ta̱dde̱n daiza ko̱, iróng atin ele cinne a̱mu̱we̱ iloma.
38“I̱yo̱ko̱ zin, niga gotonogga, korongi abunna ming a̱gga̱yyu̱ alalnek Ta̱mu̱ta̱dde̱n mu̱nye̱n cigga̱c zo̱ze̱ ci Ye̱su̱. 39Imma zin ngati e̱e̱t ci a̱tu̱ nonno i̱zze̱c mu̱nye̱na̱, iróng lo̱ti̱nno̱wa̱ cik Musesi uule kar kalaleung. 40U̱zu̱tte̱ e̱le̱tti̱, egenyyit, ma anyikku zoz bali u̱du̱kta̱ a̱rri̱tto̱wa̱ ke̱ kize ci i̱na̱ku̱ng i̱ge̱ta̱:
41“‘Izikto niga wak aminyu ol ko̱,
u̱ku̱lte̱k je̱e̱n kar a̱da̱i̱to̱,
eci anna Ta̱mu̱ta̱dde̱n kokko kogonni gi̱i̱ imma i̱i̱nya̱we̱ ne̱ko̱
iróng atin niga a̱tu̱yyu̱,
ming u̱du̱wa̱u̱ng e̱e̱ti̱ imma i̱ge̱t nu̱nu̱n.’#Habakkuk 1:5”
42Baling edeca Pa̱u̱lo̱ zoz, itingazzo ki Barnabas, utungtek Ce̱e̱z wa Lawinto lo̱o̱c, kar zin ol ku̱du̱kta̱k nogo ki̱vi̱ta̱ kozozit dee kaale cik ozoz Pa̱u̱lo̱ I̱i̱te̱ne̱ wa Yu̱bze̱nto̱ okko atin a̱kku̱ ke̱. 43Baling ovvo ol azanne, unuwet ol cik meelek e̱e̱ggi̱n Ya̱u̱d ki i̱do̱ngi̱ wak utuhuye kizeto Ya̱u̱d ko̱ nogo, kar zin Pa̱u̱lo̱ ki Barnabas izektek nogo ne, “A̱vvu̱t labak detente ci Ta̱mu̱ta̱dde̱no̱.”
44Imma I̱i̱te̱ne̱ wa Yu̱bze̱nto̱ reng, i̱vi̱ta̱ ol cik meelek iziyyet zoz ci Manyi Ye̱su̱. 45Baling ovvo Ya̱u̱di̱ acin koole, anyait meder kar zin kozozit gerzet zo̱ze̱ ci ozoz Pa̱u̱lo̱.
46O̱bo̱dde̱k zin bo̱do̱k Pa̱u̱lo̱ ki Barnabas mazeta: Korongnya arrak naga ku̱du̱ktta̱u̱ng i̱ge̱t zoz ci Ta̱mu̱ta̱dde̱no̱. Ma i̱yo̱ko̱ ming aburnnu ko̱, i̱ye̱la̱ zoz necu azi ne, iróng niga orongnyu baiz wa aave udut, kovvo zin naga kuwaheka ol cik iróng e̱e̱ggi̱n Ya̱u̱d. 47Een zoz necu ci a̱du̱wa̱kke̱t agit Manyi Ta̱mu̱ta̱dde̱n:
“‘Kaanyi i̱nne̱t#13:47 Kaanyi i̱nne̱t: Ozozik Ta̱mu̱ta̱dde̱n ngatu Ye̱su̱. ize tukulec ci ol cik iróng e̱e̱ggi̱n Ya̱u̱d,
kar i̱nna̱ nyahak ti̱ri̱ze̱ne̱t lo̱o̱cco̱k do̱o̱k.’”#Isaya 49:6
48Baling iziyyet ol cik iróng e̱e̱ggi̱n Ya̱u̱d zoz necu, ataltto oroot kar zin ki̱di̱ngdi̱nga̱ni̱t zoz ci Manyi; kar ol do̱o̱k wak atahalak Ta̱mu̱ta̱dde̱n kurubta baiz ci aave udut ko̱, ku̱tu̱we̱t. 49Iddera zoz ci Manyi lo̱o̱c do̱o̱k.
50Ma̱i̱je̱ olli Ya̱u̱do̱ oot ulutet odot wak riilik ki ngaai wak riilik o̱ngo̱o̱le̱ Ta̱mu̱ta̱dde̱n. Elemtta nege kar ki̱gi̱de̱t Pa̱u̱lo̱ ki Barnabas, kar zin kotoit nogo lo̱o̱ce̱ cinne̱ng. 51U̱tu̱ru̱rta̱ zin nege todowa zone kize neci gi̱i̱ ci i̱ye̱la̱ ming abure nege nong ngatinne̱ng, kar zin nege koot o̱rge̱ ci een zara Iconium. 52Anyait zin nuyaha talninet ki Vongiz ci A̱li̱le̱.
Zvasarudzwa nguva ino
Buk wa To̱ni̱a̱u̱ 13: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.