Maak 9
9
1Yeezu yaa weeni ba ayen, <<Wensie ate mi a weeni ni, nama baai ale bo dela la, gela a kan kpi ka ni nin nya Wen naamu ale bu cheena ale pagrim.>>
2Daa ŋayuebi ale jam taam la, Yeezu yaa wi Piita ale Jeemsi ale Jɔɔn a ta ba jueli guuk kpioŋ zuk badek ba nyiini. Ba ale jam bo dula jigini la, Yeezu yaa deri tagri ba niŋ. 3Wa gattaŋa mɛ a tagri ale peenti a nyaksi nna kpelim kpelim. Nuru waai a jam ka a baga a nye ate ti a peenti ale a nyaksi dila. 4Ba yaa nya Elaja#9:4 2 Nalima 2:11 ale Moosis#9:4 Teerika 34:5-6 ale ba boro a biisi ale Yeezu.
5Piita yaa weeni Yeezu ayen, <<Sagrɔ, tama ale bo dela la ku nala kama. Basi ate tama a ti viita tita a te ni ate fi soa kunyi abe Moosis a soa kunyi abe Elaja mɛ a soa kunyiwa.>> 6Wa jam zɛ dii ate wa le weeni la, dii nyiŋla wa ale mbala a jam a chali ka yɔgsum yegayega.
7Chiŋmari yaa jam lik ba ate ba wom lueluk ale ku nyini chiŋmanni po a weeni ba ayen, <<Mi Nidoabili dii ate mi a yaali la ale nna. Ni wom wa.>>
8Ba le deri gisi nya la ba an nya waai ya, ka Yeezu nyiini ale jam bo dula jigini ale ba.
9Ba ale basi guuku zuk a siŋ la, Yeezu yaa weeni ba ayen, <<Dii ate ni poom nya la, ni kan weeni sak waai ya, ka dai dii dai ate Mi Saalɔbiika a yiti kum po la.>>
10Ba yaa siak wa ale weeni diila ale pai ŋa a nyo ba suiniima po ale a bek chaab ayen, <<Wa kummu po yitika kiri ale boa?>>
11Ba yaa bek Yeezu ayen, <<Ka boa ate Sinsak sagrɔma a weeni ayen ka Wen biisiteerɔwa Elaja le wa liŋ jam abe wa ge ate Kirisitawa a jamu?>>
12Wa yaa jam weeni ba ayen, <<Elaja liŋ cheen kama ayen wa gomsi jaab buuri meena. Ku abe ŋmarisi a va Saalɔbiika nyiŋ kama ayen wa le nam wie yegayega nyiŋ abe ba nye ate wa chim javaliŋ. 13Alege mi a weeni ni kama ayen Elaja a poom ŋaam jam kama ate ba nye wa badek ale a yaali diila. Ase ba ale ŋmarisi dii a ta va wa nyiŋ la.>>
14Ba yaa jam gum chaab ale wa ŋaaŋviirɔ mbala ate nuru boari yegayega a za gilim ba ate Sinsak sagrɔma gela yaa ta nanpaga ale ba. 15Nuru boanni ale jam nya Yeezu la, ku yaa cha ba nna yegayega ate ba yaa chali ga tu wa a puusi wa.
16Yeezu yaa bek wa ŋaaŋviirɔma ayen, <<Ka boan daluŋ ate ni ta ale Sinsak sagrɔma?>>
17Nuru yaa jam bo nuru boanni po a weeni wa ayen, <<Sagrɔ, m ta ka m nidoabili a jam fi jigi. Chichirik biok ale bo wa po ate wa an baga a biisi. 18Chichirik bioku a dan ga yiti, ku nyiem a pai wa kama a kasim a fɔbi tɛŋ diipo meena ate tintupuuk a nyini wa nɔnni po a nyini ate wa a ŋɔbi wa nyinaŋa ate wa nyiŋka mɛ a deri ate m yaa saalim fi ŋaaŋviirɔma ayen ba yiak chichirik bioku wa po a basi alege ba an baga a nyeya.>>
19Yeezu yaa tulisi ayen, <<Nama gaŋ kaai ale kan ta siaka la, mi ale bo ale nama a beni ka sɛ abe mi a ŋmagli ale ni? Ta fi nidoabinni a jam de.>>
20Wa yaa ta wa a jam Yeezu jigi. Chichirik bioku ale ga nya Yeezu la, ku yaa deri yiti nna yegayega a pai biika a fɔbi tɛŋka ate wa a bilim ate tintupuuk a nyini wa nɔnni po a nyini.
21Yeezu yaa bek biika kowa ayen, <<Chichirik bioku ale jo fi biika la, ka benaŋa dina?>> Wa kowa yaa weeni Yeezu ayen, <<Ku jo wa ka wa bi fiik po. 22Dai po dai po ku a yuk wa kama a lɔnsi bolim po ale nyiam po ayen ku ko wa. Fi dan baga a maari ti, ta jiirim ale ti abe fi maari ti.>>
23Yeezu yaa ŋman bek wa ayen, <<Ka boa ate fi a bek ayen m nin baga? Wie meena a baga a nye kama a te nuru waai ale ta siaka la.>>
24Biika kowa yaa deri kaari a weeni ayen, <<Mi ta siaka kama, alege m siaka an soa diiya. Maari mu ate m ta siaka a gum du.>>
25Yeezu ale nya ale nuru boari a chali cheena jigini la, wa yaa toariŋ chichirik bioku ayen, <<Fi chichirik biok kuui ale basi ate biika de an baga a biisi ale kan wom la, mi a biisi ale ka fi. Nyini biika jigi a nyini abe fi kan ŋman jo a bo ale wa.>>
26Chichirik bioku yaa deri kaari nna yegayega a yuk wa lɔnsi alege yaa nyini biika nyiŋka po a nyini, alege ate wa dua ase wa kpi la ate nuruba yegayega a jam a weeni ayen, <<Wa kpi kama.>> 27Yeezu yaa yik wa nisaŋa a zak wa a zaani ŋmai.
28Yeezu ale wa ŋaaŋviirɔma ale cheŋ a ga jo dɔk po badek ba nyiini la, ba yaa bek wa ayen, <<Ka boa ale soa ate tama an baga yiak chichirik bioku ate ku nyini biika jigiya?>>
29Wa yaa weeni ba ayen, <<Chichirik bioku de choawa ni dan kan bobi nɔi ale puusi a te Wen nalimnyiini, ni an baga a yiak ate ku a nyini.>>
30Yeezu ale wa ŋaaŋviirɔma yaa basi dula ale cheŋ taam Galili tɛŋka po. Yeezu an jam a yaali ayen nuru seba ba ale a cheŋ juijui la, 31dii nyiŋla wa jam a sak ka wa ŋaaŋviirɔma. Wa yaa weeni ba ayen, <<Nuruba le jam yik Mi Saalɔbiika, a ta ga nyo nuru baai ale ba ko mu la nisa po, alege daa ŋata dan paari, m le yiti kum po.>> 32Wa ale weeni dila la, ba an jam miŋ dii ate wa a biisi la kiriya, alege ba jam a chali ka yɔgsum ale wa bekka.
33Ba yaa jam paari Kapernaum tɛŋka po a ga jo yeri po. Yeezu yaa bek ba ayen, <<Ti ale poom bo suiku po a cheena la, ka boan jaab nanpaga ate nama poom a nagi?>> 34Alege ba an weeni wa wari ya, dii nyiŋla ba ale poom bo suiku po la, ba ta ka nanpaga ase ka ba wana ale wa chim kpagi a gaam ba meena.
35Yeezu yaa kali tɛŋ a wi wa ŋaaŋviirɔma pi ale bayewa ate ba jam wa jigi ate wa weeni ba ayen, <<Nuru waai ale a yaali ayen wa chim niŋdeerɔ la, ku a fɛ ate wa pai wadek a zaani ŋaaŋ abe wa chim ba meena tomteerɔ.>>
36Wa yaa yik biik wanyi a ta jam zaani ba suŋsuŋ a pai wa nisaŋa a gbaari wa ale weeni ba ayen, 37<<Nuru waai ale a tuesi biik ase biika de la mi nyiŋ, wa tuesi ka mi dila. Waai mɛ abe ale a tuesi mi la, a tuesi ka waai mɛ ale tom mi ate m jam la.>>
38Jɔɔn yaa weeni Yeezu ayen, <<Sagrɔ, tama nya ka nuru wanyi ale wa pai fi yuenni nyiŋ a yiak chichirik baata nuruba po a basi, ate tama yaa weeni wa ayen wa basi, dii nyiŋla wa daa tama po wanyi.>>
39Yeezu yaa weeni ba ayen, <<Ni dan ŋman nya wa ase dila la, ni basi wa abe ni kan weeni wa ate wa basi. Nuru waai a dan pai mi yuenni nyiŋ a baga a tom wakperikaliik kula nyɔnɔwa a kan ŋman baga a kpabi kaasi mi yuenni. 40Nuru waai ale kan ta chaab ale ti la, kula nyɔnɔwa va ti kama. 41Wensie ate mi a weeni ni, nuru waai a dan nye nyiam fii fiiga a te ni, ni ale ka mi ŋaaŋviirɔba la nyiŋ, Wen le tuni wa.
42<<Nuru waai abe dan nye ate bisaŋa de wanyi a jɔk wa siaka, ku le zunchoŋ kama a te kula nyɔnɔwa ase ba nin pai niri kpien a bobi yik wa ŋiri a ta wa ga yuk basi nyakpiemu po. 43Nuru waai nisima a dan a nye ayen wa jɔk wa siaka, kula nyɔnɔwa a gebi ni sila a basi, dii nyiŋla, ku zunchoŋ kama ate kula nyɔnɔwa nya Wen nyuvuri dii ale kan a kpeglim la ale ni yeŋ a gaam wa nin ta nisima siye alege cheŋ ninam jigi, juijui ate bolim boro a kan maara kpi la. 44Nanzue ŋaai ale bo dula a dɛ ba la a kan maari a kpi. Bolim buui mɛ ale bo dula a dɛ la a kan maari a kpimsi. 45Nuru waai naŋ a dan a nye ayen wa jɔk wa siaka, kula nyɔnɔwa a gebi naŋ kala a basi, dii nyiŋla, ku zunchoŋ kama ate kula nyɔnɔwa nya nyuvuri dila ale naŋ yeŋ a gaam wa nin ta naŋsa siye alege cheŋ ninam jigi. 46Nanzue ŋaai ale bo dula a dɛ ba la a kan maari a kpi. Bolim buui mɛ ale bo dula a dɛ la a kan maari a kpimsi. 47Nuru waai mɛ num a dan a nye ayen wa jɔk wa siaka, kula nyɔnɔwa a yeeri num bula a basi, dii nyiŋla, ku zunchoŋ kama ate kula nyɔnɔwa jo Wen naamu po ale num bunyi a gaam wa nin ta nina ŋaye alege cheŋ ninam jigi. 48Nanzue ŋaai ale bo dula a dɛ ba la a kan maari a kpi. Bolim buui mɛ ale bo dula a dɛ la a kan maari a kpimsi. 49<<Waai meena tuima ale chamsi nya ale bolim.>>#9:49 1 Korinti 3:13; 1 Piita 1:7
50Yesa masa kama. Yesaŋa masimu a dan jam nueri, ni le nye ka sɛ a ŋman te si masimmoa? Ase yesa ale a te jenta masim diila, ku a fɛ kama ate nama dek meena a ta nyemagsika ale chaab ate ni boro ale suiyɔgni.>>
Zvasarudzwa nguva ino
Maak 9: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation