Matiu 25
25
1<<Wen naamu ale nye ase ka nipokbilisa piwa baai ale yiti pai ba zeuŋta a ta cheŋ ayen ba tu nipok fiaka nyɔnɔwa la. 2Ba piwa po ka banu ale jam ta yam, alege mbala banuwa me a jam chim betta. 3Bettaŋa tinuwa a yaa pai ba zeuŋtaŋa alege ba an pai kpaam a magsi ase mbula a dan nueri abe ba pai nyoro la. 4Alege yammu nyama a ta kpaam a gum du a magsi ayen mbula a dan nueri abe ba pai nyoro. 5Nipok fiaka nyɔnɔwa a yaa an jam nwuli, ate nipokbilisaŋa yaa doa a goa.
6<<Ku le jam paari goota suŋsuŋ la, nuru wanyi yaa kaari ayen, <Nipok fiaka nyɔnɔ a cheena. Ni yiti nwuli ate ni ga tu wa.> 7Nipokbilisaŋa piwa yaa deri yiti nna nwuli a viriŋ ayen ba nya ase ba zeuŋtaŋa diem a dɛ ya. 8Bettaŋa nyama zeuŋtaŋa kpaamu nyiini ale jam nueri, ate ba yaa weeni yammu nyama ayen ba nye ba kpaamu a te ba ate ba nyo ba zeuŋtaŋa po. 9Yammu nyama yaa weeni ba ayen, <Tama kpaamu an soa diiya. Dila nyiŋ, ni cheŋ yeeŋa po a ga da kpaam.> 10Bettaŋa yaa cheŋ ayen ba da ba kpaamu. Ba le cheŋ a ga nueri la, nipok fiaka nyɔnɔwa a yaa jam. Yammu nyama ale poom ta ba kpaamu a magsi la, yaa deri va nipok fiaka nyɔnɔwa a jo yenni po ayen ba maa dɛ nipok fiak ŋandiintaŋa. Ba meena ale jo yenni po a nueri la, ba yaa yik nansuiŋku tuoku a lik. 11Ku le ga nye magadek la, bettaŋa tinuwa yaa le ŋmani jam paari la ale tuoku a lik kama. Ba yaa za tuoku nɔi a nak ale a wi ayen ba jam lagri a te ba. 12Nipok fiaka nyɔnɔwa ale wom ba luelutaŋa la, wa yaa weeni ba ayen, <Ni goori ni wanni abe ni cheŋ du. Mi zɛ ni ale ka baai la.> 13Ni chiib a limisi, dii nyiŋla ni zɛ diipo ate mi a cheena la.
14<<Mi dan ŋman jam, Wen naamu ale nye ase ka nuru waai ale gomsi a magsi ayen wa nyiem la. Wa le gomsi nueri la, wa yaa wi wa tomteerɔma batawa yaa pai wa ŋantaŋa meena a nyo ba nisima po ayen ba a nya ba zuk ate wa jam. 15Wa yaa pai wa ŋantaŋa a chari ba a va waai meena ale a tom wa tuima diila. Wa yaa te niŋ nyɔnɔwa ligra tusa ŋanu (5,000), ale te waai ale pai saŋ la ligra tusa ŋaye (2,000), ale ge te butawa nyɔnɔwa ligra tusidi. Wa le chari ba nueri la, wa yaa cheŋ. 16Tomteerɔ waai ale tuesi ligra tusa ŋanuwa (5,000) la, a pai ŋa kama a gerim a nya ligra tusa ŋanu (5,000) nyuenta. 17Buyewa nyɔnɔwa mɛ ale tuesi ligra tusa ŋayewa (2,000) la, a pai ŋa kama a gerim a nya ligra tusa ŋaye (2,000) mɛ nyuenta. 18Alege tomteerɔ waai ale tuesi ligra tusini la a pai wa nyɔnɔwa ligraŋa kama a tu tɛŋ a gu.
19<<Ku yaa ale ga beni ate ba nyɔnɔwa a nyini wa nyeerimu jigini a jam la ate wa yaa wi ba ayen ba jam wa jigi. Ba le jam wa jigi la, wa yaa bek ba ayen wa a yaali kama ayen wa nya waai meena ale pai wa ligra a gerim a nya dii nyuenta la. 20Tomteerɔwa waai ale tuesi ligra tusa ŋanuwa (5,000) la, yaa nyini a weeni wa ayen, <M nyɔnɔ, fi daam pai ka ligra tusa ŋanu (5,000) a te mi ate mi yaa pai ŋa a gerim a nya ligra tusa ŋanu (5,000) nyuenta a ŋman gum du.> 21Wa nyɔnɔwa yaa weeni wa ayen, <Fi ka nuru maŋ ale nye ate ku nala. Mi daam pai ka ligra maga dega a nyo fi nisima po alege fi yaa baga a nye ate ŋa zuak a gum du. Yɔgyɔgla de mi a yaali kama ayen m pai ligra yegayega a nyo fi nisima po ate fi ale mi ta suipeentik.>
22<<Tomteerɔwa waai ale tuesi ligra tusa ŋayewa (2,000) la, mɛ yaa nyini a weeni ayen, <M nyɔnɔ, fi daam pai ka ligra tusa ŋaye (2,000) a te mi ate mi yaa pai ŋa a gerim a nya ligra tusa ŋaye (2,000) nyuenta a ŋman gum du.> 23Wa nyɔnɔwa yaa weeni wa ayen, <Fi mɛ ka nuru maŋ ale nye ate ku nala. Mi daam pai ka ligra maga dega a nyo fi nisima po, alege fi a yaa baga a nye ate ŋa zuak a gum du. Yɔgyɔgla de mi a yaali kama ayen m pai ligra yegayega a nyo fi nisima po, ate fi ale mi a ta suipeentik.>
24<<Tomteerɔwa waai ale tuesi ligra tusini la, mɛ yaa nyini a taam zaani wa niŋ a weeni ayen, <M nyɔnɔ, m seba ayen fi nyeka tua kama, dii nyiŋla fi a che ka za ŋaai ate fi an bori la ale a vaari za ŋaai mɛ ate fi an fɔbi la. 25Fi le pai ligraŋa a te mi la, mi daam a chali ka yɔgsum yaa ta ŋa a ga tu tɛŋ a gu. Nya, lig ŋaai ate fi daam a pai te mi la ale nna.>
26<<Wa nyɔnɔwa ale wom dii ate wa weeni la, wa sui yaa jam puuri nna yegayega ale wa ate wa yaa weeni wa ayen, <Fi ka nuru biok ale nyiŋworuk nyɔnɔ. Fi a poli kama ayen mi a che ka za ŋaai ate mi an bori la ale a vaari za ŋaai mɛ ate mi an fɔbi la. 27Ku magsi kama ayen fi daam ate pai m ligraŋa a te ka nuru waai ale wa pai ŋa a gerimu a nya nyuenta a gum du a te mu la. 28Tuesi ligraŋa wa jigi a pai ŋa a te m tomteerɔma wanyi wa waai ale ta ligra tusa piwa (10,000) la.
29<<Nuru waai ale a pii nyiŋla, ale nya ŋanta a gum du, alege waai ale kan a pii nyiŋla a kan nya jaaboa. 30Ni yik nyiŋworuk nyɔnɔwa de a ta wa a nyini peelim a yuk basi legini po. Dula jigini wa le kum nna yegayega, abe wa a ŋɔbi wa nyinaŋa.>
31<<Alege Mi Saalɔbiika a dan jam ale m zulaŋa ale wa maarɔma m le jam a kala ka m naamu zukpaglika zuk a yaa soa tɛŋka meena. 32Abe m wi waai meena ate ba tigsi a jam m tɛŋ. M le poori ba buye ase naapeerik ale a poori wa piisa ale wa bua diila. 33M le yik baai ale a nye ase piisa la a zaani m juga geŋ, abe m yik baai mɛ ale a nye ase bua la a zaani m gala geŋ.
34<<Naawa yaa weeni baai ale bo m juga geŋ la ayen, <M Kowa a maari ni abe wa niak ni. Wa le jam a nye tɛŋzuk meena la, wa gomsi ka ŋanta a zaani a te ni. Ni be jam a tuesi ba yɔgyɔgla de. 35Kɔm ale jam ta mi la, nama a te mu ŋandiinta ate m dɛ. Nyanyuila mɛ ale jam ta mu la, ni te mu nyiam ate m nyu. M le jam ka nichaanɔ la, ni nye m tia ale ta mu a jo ni yeeŋa po. 36Mi ale jam kan ta gatta la, ni te mu gatta ate m jo. Mi ale jam a yuak la, ni nya m zuk. Ba le jam yik mu a lik la, ni jam a puusi mu.> 37Baai ale ka wayɔrisima nyam a za m juga geŋ la, ba wanyi ale weeni mu ayen, <Naawen yaa, ka dimpo ate tama a nya fu ale kɔm a ta fu ate ti te fu ŋandiinta ate fi dɛ? Ka dimpo mɛ ate tama a nya fu ale nyanyuila a ta fu ate ti te fu nyiam ate fi nyu? 38Ka dimpo ate tama a nya fu ale fi chim nichaanɔ ate tama a nye fi tia ale yik fu a ta jo ti yeeŋa po? Ka dimpo mɛ ate tama a nya fu ale fi an jo gatta ate tama a te fu gatta ayen fi jo? 39Ka dimpo mɛ ate tama a nya fu ale fi a yuak yaase ba yik fu a lik ate tama a jam puusi fu?> 40Naawa weeni ba ayen, <Wensie ate mi a weeni ni ayen dii meena ate nama a nye a te mi ŋaaŋviirɔma po baaŋka mɛ dek la, ni nye a te ka mi dila.>
41<<Dula jigini m le cheem a weeni tuimbaata nyama baai ale bo m gala geŋ la ayen, <Nama baai ate Naawen a ka te ni la, ni cheŋ du mi tɛŋ a cheŋ bolim buui ale kan maara kpimsi ate Naawen a gomsi a magsi a te jabioku ale wa maarɔma. 42Kɔm ale jam ta mu la, nama an te mi ŋandiinta ayen m dɛ. Nyanyuila ale jam ta mu la, nama an te mi nyiam ayen m nyu. 43Mi le jam ka nichaanɔ la, nama an te mi tia ale ta mu a jo ni yeeŋa po. Mi le jam kan ta gatta a jo la, nama an te mi gatta ayen m jo. Mi le jam a yuak ale bo likka dɔk po mɛ la, nama an jam ayen ni nya mi zuwa.> 44Baai ale jam za m gala geŋ la, ba wanyi ale weeni mu ayen, <Naawen yaa, ka dimpo ate tama a nya fu ale kom a yaase nyanyuila a ta fu? Ka dimpo mɛ ate tama a nya fu ale fi ka nichaanɔ yaase fi ka gatta a jo? Ka dimpo ate tama a nya fu ale fi a yuak yaase ba yik fu a lik dɔk po, alege tama an maari fu?> 45M le ŋman weeni ba ayen, <Wensie ate mi a weeni ni ayen diipo meena ate nama an jam maari mi ŋaaŋviirɔma po baaŋka mɛ dek la, nama an maari daa mi.> 46Bade ale jɔk ninam buui ale kan ta kpeglimka la, alege wayɔrisima nyama ale nya nyuvuri dii ale kan ta kpeglimka la.>>
Zvasarudzwa nguva ino
Matiu 25: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation