Matiu 23
23
1Yeezu yaa ŋman sak nuru boanni ale wa ŋaaŋviirɔma. 2Wa yaa weeni ba ayen, <<Sinsak sagrɔma ale Farisiima ale ta suik a sak nama sinsak ŋaai ate Wen a pai te Moosis la. 3Bala dek mɛ a kan va ba ale a sak ni diila. Ka dila ale soa ate ku chim fifiok ayen nama va dii ate ba a sak ni la, alege ni kan va ba nyeka ale ka diila. Diila ba a sak ka wie alege kan nye ŋa. 4Ba nyiem gomsi ka jib dobrita a ta jam dueni ayen nuruma a kɔti a ji, alege badek a kan maari a pai nandub a tiri a nya.
5<<Ba kasim a nye ka wie nna yegayega ayen nuruba a nya ba. Ba nyiem gebi ka gbaŋ labsita a ŋmarisi Wen wieŋa a dueni du a pai bobi ba dieŋa ale ba nisaŋa nyiŋ. Ba gattaŋa zuesaŋa mɛ a woŋŋa kama.#23:5 Chiinika 15:38; Teerika 6:8 6Ba dan tigsi chaab ayen ba dɛ ba dakpienni ŋandiintaŋa, yaase ba jo ba tuka dɔkku po, ba a yaali kama ayen ba a kali zukpaglik sii ate ba kpaŋŋa a kali la zuk. 7Ba nyiem kasim a yaali kama ayen nuruba a puusi ba yabaŋa po abe ba a zuli ba abe ba a wi ba ayen, <Sagrɔba>. 8Ni kan ta kanjanta abe ni a yaali ayen nuruba a wi ni ayen, <Sagrɔba.> Nama meena ka suata ale ta Sagrɔ wanyi dekki. 9Ni kan a wi nuru waai ale bo tɛŋzuk de la ayen ni <koa>, dii nyiŋla ni meena a ta ka Ko yeŋ ate wa bo wenŋmazuk. 10Ni kan ta kanjanta abe ni a yaali nuruba a wi ni ayen <niŋdeerɔba.> Mi waai ate nuruba a wi ayen Kirisita la nyiini ale nama meena Niŋdeerɔ. 11Ni dan a yaali ayen ni gaam ni suata, ku a fɛ kama ayen ni pai nidek a chim ase ba tomteerɔba la. 12Nuru waai a dan zak wadek ŋmai, Wen ale basi ate wa siŋ tɛŋ. Alege waai a dan yik wadek tɛŋ tɛŋŋa, Wen ale zak kula nyɔnɔwa ŋmai.
13<<Nama Sinsak sagrɔma ale Farisiima, ku le jam bie kama ni jigi. Ni ka sakpaŋ zula nyam. Nama ale a sak nuruma diila a nye ase nama a yik ka Wen naamu nansuiŋku tuoku a lik ba nimbie po la. Nama dek a kan yaali ayen ni jo du, ni be kan basi ate nuruba a jo du. 14Nama Sinsak sagrɔma ale Farisiima, ku le jam bie kama ni jigi. Ni ka sakpaŋ zula nyam. Nama nyiem a ga a paasi ka pukɔga a tuesi ba ŋanta ale ge a paasi waai meena a puusi puusi woŋta a te Wen. Dila nyiŋla, wa dan jam ayen wa bo ni buusa, ni waalika le zuak yegayega.
15<<Nama Sinsak sagrɔma ale Farisiima, ku le jam bie kama ni jigi. Ni ka sakpaŋ zula nyam. Nama nina a muni ka nna yegayega ayen ni nye ate nuruba a tagri a va nama Wen puusika suiku. Ba dan va nama nyeka ba yaa tom tuimbaata a nya waalika a gaam nama.
16<<Nama yeema nna, baai ale a de nuruba niŋ la. Ku le jam bie kama ni jigi. Nama a sak kama ayen, <Nuru waai a dan wi Wen yenni yuei a pɛ ŋmoruk, ku daa wari ya. Alege wa dan wi ligmɔniŋka ale bo Wen yenni po la yuei a pɛ ŋmoruk, ku ka wakpienni.> 17Nama yeo bettaŋa nna, ka ba wana ale gaam wa choa? Wen yenni yaa ligmɔniŋka ale bo di po la? Ka Wen yenni ale a basi ate ligmɔniŋka a nala. 18Ni be ŋman sak mɛ ayen, <Waai a dan wi kuŋkuŋku yuei a pɛ ŋmoruk ku daa wari ya. Alege waai a dan wi Wen tiirim buui ale bo wa yenni po la yuei a pɛ, ku ka wari.> 19Ni ka yeeba. Ka ba wana ale gaam wa choa? Tiirimu yaa jabuui zuk ate tiirimu a dua la? Ka kuŋkuŋku ale a nye ate tiirimu a welema. 20Nuru waai a dan wi kuŋkuŋku yuei a pɛ, wa maa pɛ ka kuŋkuŋku ale jaab meena ale dua ku zuk la yuei mɛ nyiŋ. 21Nuru waai abe dan wi Wen yenni yuei a pɛ, wa maa pɛ ka Wen yenni ale waai ale bo di po la mɛ yuei nyiŋ. 22Nuru waai a dan wi wenŋmazuk yuei a pɛ, wa maa pɛ ka Wen zukpaglika ale waai ale kali ka zuk la, yuei mɛ nyiŋ.
23<<Nama Sinsak sagrɔma ale Farisiima, ku le jam bie kama ni jigi. Ni ka sakpaŋ zula nyam. Ni a sak kama ayen ŋan baai ate ni pai a nyo jenta po la, ni a lueri ku nɔi piwa po bunyi a te Wen. Alege nyemagsika ale jiirim ale wensie ale nye wari yegayega la ni zɛri. Wie ŋaai ale magsi ayen ni a nye la ale la ase ni a nin poom a nye nŋala. 24Ni a nye ase ka yeeba la. Nama nyiem zɛri ka nanjuŋ nɛka alege nɛ laalaakomi.
25<<Nama Sinsak sagrɔma ale Farisiima, ku le jam bie kama ni jigi. Ni ka sakpaŋ zula nyam. Ku a nye ka nna ase ni ale a nari beerisa ale china ŋaaŋ alege a basi puusaŋa po diila. Ni suiniimaŋa po a sueri ale ka varuk ale butuem nyeka nyiini. 26Nama Farisiima a nye ase ka yeeba la. Ni liŋ sugri ni suiniimaŋa po ate nuruba a sum seba ayen nama a tom ka tuimaŋsa.
27<<Nama Sinsak sagrɔma ale Farisiima, ku le jam bie kama ni jigi. Ni ka sakpaŋ zula nyam. Nama a nye ase ka boosi tii nyiŋsa ale a nyaksi alege ti puusaŋa po a sueri ale koba nyiini ale daŋ mɛ nna yegayega la. 28Suik kula po ate nama a nyiem a paasi nuruba ayen nama a tom ka tuimaŋsa, alege ni suiniimaŋa po a sueri ale ka sakpaŋ zula ale tuimbaata nyiini.
29<<Nama Sinsak sagrɔma ale Farisiima, ku le jam bie kama ni jigi. Ni ka sakpaŋ zula nyam. Nama a nye ate Wen biisiteerɔma ale nuru maŋsa baai ale kpi dipo la, boositaŋa a kasim a nyaksi. 30Ni nyiem a kasim a weeni chaab ayen ase tama a dan jam maa bo ka ti kokpieŋsaŋa tɛŋka po, tama ate an jam maa gum ba po a ko Wen biisiteerɔma. 31Nama a siak kama ayen nama ka baai ale ko Wen biisiteerɔma la, ŋaaŋbisa. 32Ni kokpieŋsaŋa ale piilim diila, ni kasim tom nueri. 33Ni a nye ase ka wiiga la. Ni ka waapiisa buuri. Nama a poli ayen nama ale nye ka sɛ a chali bɛ ale bolim buui ale kan maara kpimsi la po joka?
34<<Mi a weeni ni kama ayen, mi ale tom Wen biisiteerɔba ale yam nyam ale sagrɔba ate ba jam ni jigi. Nama ale pai ba gela a yik ŋanbarinta nyiŋsa a ko ba, abe ni miiri ba gela ale fiŋsa ni tuka dɔkku po abe ni yiak ba ate ba nyini ni tɛŋsaŋa po a nyini. 35Ni kokpieŋsaŋa a liŋ jam ko ka nuru wanyi waai ate ba a wi ayen Abel#23:35 Piilimka 4:8 ate wa an jam a kaasi wari la. Ba jam ko nuru maŋsa yegayega. Nuru waai ate ba jam ko kpeglim la a jam le Barakaya nidoabinni Zakaria.#23:35 2 Ŋiak Wie 24:20-22 Ba jam ko wa ka kuŋkuŋku ale Wen yenni suŋsuŋ. Wen ale te ni waalika abe wa weeni ayen nama ale soa baai meena ale jam kan kaasi wari la, kummu. 36Wensie ate mi a weeni ni Wen ale te Juuma baai ale diem boro jinla la waalika abe wa weeni ayen bala ale soa ate wieŋa de meena a nye.
37<<Jerusalem, Jerusalem, nama a ko Wen biisiteerɔma ale yuk baai ate Wen a tom ba ni jigi la ale tana, ka bu dina ate mi ale tigsi ni bisaŋa jigi yeŋ ase kpiak ale a pɔbi ka bisa diila alege nama a kan siagi? 38Ku kan beni ate Wen yenni a kaasi. 39Mi a weeni nama kama yɔgyɔgla de ayen ni kan ŋman nya mi see ka m ŋman jamka danni. Da dila danni a dan paari, nama ale weeni ayen, <Niaka a bo waai ale cheena Naawen yuenni nyiŋla.> >> (Yiila 118:26)
Zvasarudzwa nguva ino
Matiu 23: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation