Matiu 19
19
1Yeezu ale biisi a ga nueri la, wa yaa basi Galili ale ŋman cheŋ Judia a taam Jodan benni kauk kunkula. 2Nuru boari yegayega yaa jam wa jigi ate wa tebi yɔgnyieŋsaŋa meena dula jigini.
3Farisiima gela yaa jam wa jigi ayen ba choa wa nɔi a nya ase wa ale biisi wari a kaasi ya. Ba yaa bek wa ayen, <<Nuru waai a dan zɛri wa pok, kula a kisi?>> 4Yeezu yaa weeni ba ayen, <<Ba ŋmarisi Wen gbaŋka po ayen, <Ku piilimka po ate Wen a nye tɛŋzuk meena la, wa nye ka nidoa ale nipok.> (Piilimka 1:27) 5A yaa weeni ayen, <Ku nala kama ate nidoa a basi wa ko ale wa ma ale ge a ga faari nipok ate ba nɔi bayewa a chim bunyi.> (Piilimka 2:24) 6Ba ŋman daa nuruba baye, ba yaa ka nuru yeŋ. Dila nyiŋla baai ate Wen a basi ate ba chim nuru yeŋ la, ku an magsi ayen nuru a poori ba.>> 7Farisiima yaa bek wa ayen, <<Dii ate fi a weeni la ka wensie, alege ka boa ate Moosis a sak nuruba dipo ayen nuru waai a dan zɛri wa pok, kula nyɔnɔ a ŋmarisi gbaŋ ate ku sak nuruba ayen wa zɛri wa powa kama?>>#19:7 Teerika 24:1 8Yeezu yaa weeni ba ayen, <<Moosis a te ni suik ayen ni a nye dila kama dii nyiŋla ni sakka a pagra kama. Alege ku jam daa dila a nyini diipo ate Wen a nye tɛŋka la. 9Dila nyiŋ nuru waai pok a dan kan pai wadek a te nidoa yoŋŋoa, alege ate wa zɛri wa powa ale faari nipok wa choa kula nyɔnɔwa a nye ka kaboŋ.>>
10Wa ŋaaŋviirɔma yaa weeni wa ayen, <<Ku dan ka dila nidoa ale wa pok jigi, ku zunchoŋŋa kama ate nidoaba meena a kali dakɔksa.>> 11Wa yaa weeni ba ayen, <<Waai meena a kan baga a va mi sinsaŋŋa de. Ka baai nyiini ate Wen a lueri la, ale ba va ŋa. 12Dila wie tɔgatɔga nyiŋ ale soa ate nuruba a kan faari nipooba. Ba gela a kan faari diila ba biak ba ka dila. Baai mɛ a kan faari diila ba je ba kama. Mba mɛ a kan faari Wen naamu nyiŋ. Baai ale baga a va mi sinsaŋŋa de la, ni basi ate ba va ŋa.>>
13Dula jigini nuruba gela yaa pai ba bisa a ta jam Yeezu jigi ayen wa pai wa nisaŋa a tiri ba abe wa puusi a te ba, alege wa ŋaaŋviirɔma yaa toariŋ ba. 14Yeezu yaa weeni wa ŋaaŋviirɔma ayen, <<Ni te bisaŋa suik ate ba jam mi jigi. Ni kan yiak ba. Nama a zɛ ayen ka bala ale soa Wen naamu?>> 15Wa yaa pai wa nisaŋa a tiri ba a yaa le ge a cheŋ.
16Ase Yeezu ale jam bo suiku po a cheŋ la, nuru wanyi yaa jam bek wa ayen, <<M sagrɔ, ka boan jaab tuimaŋ ale mi m tom ate m baga a nya nyuvuri dii ale kan ta kpeglimka la?>> 17Yeezu yaa bek wa ayen, <<Ka boa ate fi a bek mu ŋan maŋsa wie? Nuru waai an baga a chim nuru maŋŋa ka Wen nyiini. Fi daa yaali ayen fi nya nyuvuri dii ale kan ta kpeglimka la, be va sinsaŋŋa.>> 18Nuruwa yaa bek wa ayen, <<Ka boan jaab sinsaga?>> Yeezu yaa weeni wa ayen, <<Moosis Sinsaŋŋa ale nna. Kan ko nuru, kan nye kaboŋsa, kan zu, kan chim venta seerɔ, 19a zuli fi ma ale fi ko abe fi a yaali fi saalɔ choa ase fidek la.>>#19:18-19 Nyinika 20:12-16; Kaabka 19:18 20Nuruwa yaa weeni wa ayen, <<Wieŋa de meena mi kasim a va ŋa kama. Mi abe m ŋman nye ka boa a gum du?>> 21Yeezu yaa weeni wa ayen, <<Fi dan a yaali ayen fi kan ta kaasuŋŋoa ate fi nya nyuvuri dii ale kan ta kpeglimka la, cheŋ ga pai fi ŋantaŋa meena a da a pai ligraŋa a te niwomma abe fi jam va mi. Fi dan nye dila fɛ le jam nya ŋanta Wen jigi.>>
22Wa ale wom dii ate Yeezu a weeni wa la, wa sui yaa deri kaasi, dii nyiŋla wa jam ka jigsirɔ. Wa yaa deri cheem wa ŋaaŋ te Yeezu a cheŋ.
23Yeezu yaa weeni wa ŋaaŋviirɔma ayen, <<Ku le pagra a te baai ale ka jigsirɔba la a baga jo Wen naamu po. 24M ŋmaa weeni ni ayen, ku ka moali ate laalaakomi a baga va garuk pein vɔrup po a nyini a gaam jigsirɔ a nin baga a jo Wen naamu po.>>
25Ku yaa cha wa ŋaaŋviirɔma nna yegayega ate ba yaa weeni chaab ayen, <<Ku dan ka dila, ka wana ale wa baga a jo Wen naamu po?>>
26Yeezu yaa nya ba a weeni ayen, <<Dan ka nuruba nyiini jigi, ku kan baga a nye, alege dan ka Wen jigi, wie meena a baga a nye kama.>>
27Piita yaa weeni wa ayen, <<Nya, tama basi ka ti ŋanta meena ale jam va fu. Tama ale nya ka boa ku nyiŋŋa?>>
28Yeezu yaa weeni ba ayen, <<Wensie ate mi a weeni ni, Mi Saalɔbiika a dan ŋman jam ayen m soa tɛŋzuk meena demma abe m bo ba buusa, nama ŋaaŋviirɔba pi ale bayewa de ale jam a bo Izirali dɔkdemma pi ale bayewa buusa. 29Nuru waai ale basi wa yeri ale wa suata ale wa toaba ale wa koba ale wa maba ale wa bisa ale wa kaduksa mi nyiŋla, Wen ale ŋman pai wa ŋanta bala po wanyi wanyi kook kook a gum du a te wa abe wa pai nyuvuri dii ale kan ta kpeglimka mɛ a te wa. 30Baai ale dɛ niŋ la yega ale jam wari ŋaaŋ ate baai ale wari ŋaaŋ la jam dɛ niŋ.
Zvasarudzwa nguva ino
Matiu 19: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation