Dtiicanĩ cĩg ꞌThooyyiahu 13
13
Heeroni cĩ Paaulo ꞌcĩ oou
1Lothippitaa cĩ lemmiook cĩg Antiohĩ, baa aattĩg põrõvẽtaaꞌnya hĩ ꞌlimmanniook. Ĩhõõggõ Baarnaba hĩ ꞌThimiõõnẽ ꞌcĩ haĩ ꞌthaar ũgĩ Niger, hĩ Luuccio cĩ looc cĩ Cireene hĩ Manaaen ꞌcĩ baa ĩĩn ꞌgõõnĩ habu Ẽrõõdẽ hĩ ꞌThaaulo. 2Ma baa nga abuluth nẽẽg Makayyioohit nẽ edettia eleeti ꞌgẽẽna,#13:2 Ẽdẽta eeta eleeti ꞌgẽẽna: Baa gõõng ẽdẽta eeta cĩg ꞌJudeei eleeti ꞌgẽẽna waathinnioohĩĩ ũgẽẽgĩ, halayyiõõĩ eleeti cĩggĩĩng hĩ Nyekuc. ikia ĩĩnnĩk Lorii ꞌcĩ Ẽllẽẽmĩth ĩhõõggõ, “Eberriahaangu Baarnaba hĩ ꞌThaaulo, hátĩ hidticanit dtiic ꞌcĩ havveehi naa ĩhõõggõ ho.” 3Ma baa edettia nẽẽg eleeti nẽ alayyio, iita ataaddik nẽẽg athĩn cĩggĩĩng ootinii cĩg Baarnaba hĩ ꞌThaaulo, hĩĩ terethiinit ꞌcĩ eberriaanĩ nẽẽg hidticanit dtiic icci. Nĩngĩtĩ ĩꞌthõõĩkĩ ĩhõõggõ ꞌgõõl hõõt.
Baarnaba hĩ ꞌThaaulo dtuungaa cĩ Ciporo
4Ma urutaa ꞌcĩ ĩꞌthõõĩ Lorii ꞌcĩ Ẽllẽẽmĩth Baarnaba hĩ ꞌThaaulo, õõt nẽẽg Theleucia. Ma nĩĩca, otodit haahũl õõt dtuungaa cĩ Ciporo ĩĩcĩ aaĩ bũlũca hõrggẽẽna. 5Ma baa ma õdõlan nẽẽg ꞌtaaũn ꞌcĩ haĩ ꞌThalami ho, õõt illimatteek eet thõõth cĩ Nyekuci ꞌCieethinii cĩg Laiittak ĩcĩg ꞌJudeei. Baa ẽẽl Yõaannẽ ꞌcĩ haĩ ꞌthaar ũgĩ Maarko ĩhõõggõ dtiicaa cĩnĩĩng ko.
6Baa ẽhẽẽrõn nẽẽg dtuung cĩ Ciporo hũtũrũũr ĩꞌthõng hiita hõdõlanit ꞌtaaũn ꞌcĩ haĩ Paavvo, ngaatĩ baa au õmmõtõõnĩ hĩ ꞌJudeeinit umwa ꞌcĩ haĩ ꞌBaar-Yeesu, ꞌcĩ baa ĩĩn ngarĩ nẽ ĩĩ põrõvẽtaac ꞌcĩ ĩĩn oloꞌngiaahit.#13:6 Põrõvẽtaac ꞌcĩ ĩĩn oloꞌngiaahit: Põrõvẽtaacĩ ꞌcĩ ĩĩn oloꞌngiaahit ko, hõllõngaa ĩĩn põrõvẽtaac cĩ Nyekuci. 7Nẽ baa adticanoothĩk ngarĩ ciee Theerjio Paaulo, ꞌcĩ baa ẽggẽẽnyĩth gẽrrẽẽt nẽ ĩĩ ꞌgaalac cobbi. Baa adiim Theerjio Paaulo athĩhĩ nyeemuut cĩ Nyekuci, nĩngĩtĩ ĩꞌthõõĩ eet hottieek Baarnaba hĩ ꞌThaaulo hiita. 8Nẽẽthĩ, baa abũrĩ ꞌBaar-Yeesu ꞌcĩ haĩ ꞌthaar ũgĩ Elimath ĩhõõggõ. Nẽ baa atattaaman ꞌBaar Yeesu ꞌgõõl ꞌcĩ atalmaanyanĩ ꞌgaalac cobbi, hũtũbũr Makayyioohit Yeesu. 9Nĩngĩtĩ aggamĩ Lorii ꞌcĩ Ẽllẽẽmĩth ꞌThaaulo ꞌcĩ haĩ ꞌthaar ũgĩ Paaulo hakatĩ Elimath hẽbẽrĩ nẽ ĩĩ, 10“Ĩĩnĩ nii ngeertĩ habu cĩ loriẽẽt ꞌcĩg abathĩ nẽ iinu mirohit cĩ thõõth vẽlẽk ꞌcĩ aũlanĩ! Nẽ maka nganiit ꞌgooliniti ꞌcĩ õgõllẽẽkĩ eeta. Hõllõngaa ꞌthẽk occa abili ngaatĩ alaamĩ thooꞌthiok ꞌcĩg aũlan dĩdĩ cĩg Makayyiooktak? 11Nẽ ꞌyioko, uuki hatĩ Makayyioohiti nganiit nẽ aaꞌnyi nõõ ĩĩ ruben hĩdĩhĩdĩĩc.”
Ma hĩdĩĩkoothong, idiitti eet hẽbẽrĩ noho dtip hĩ lõõcĩ muguur ꞌcĩ holittup hatattaaman looc hidiim eet ꞌcĩ occa atĩꞌthĩtĩ. 12Ma baa acĩn ꞌgaalacĩ cobbi thõõth icci ho, ikia ukuleek ꞌjieen, hĩnĩngĩtĩ ꞌlimman cĩ Makayyiookto. Nĩngĩtĩ mĩĩ aꞌnyahĩ nẽẽ lemiinit hĩ Makayyioohit.
Paaulo hĩ Baarnaba ꞌtaaũnaa cĩ Antiohĩ
13Ma ho, iita ũtũngteek Paaulo hĩ ꞌgõõnõgĩ Paavvo nẽ otodit haahũl õõt ꞌtaaũnaa cĩ Pẽrga looccaa cĩ Pamvilia. Nẽẽthĩ, baa ũtũngeek Yõaannẽ Maarko ĩhõõggõ nẽ ũũk ꞌJeruꞌthalẽma. 14Ma ꞌtaaũnaa cĩ Pẽrga, õõt edeccieek nẽẽg ĩĩcĩ ꞌtaaũn cĩ Antiohĩ looccaa cĩ Pithidia. Ma Kõr cĩ ꞌYiommaanõ,#13:14 Kõr cĩ ꞌYiommaanõ: Baa iyyioman eeta cĩg ꞌJudeei Kõrraa cĩ ꞌYiommaanõ halaacõ Nyekuc. Kõrraa cĩ, ammuha nẽẽg Nyekuc ngaatĩ ĩĩnnĩ Teheꞌnyioohit nẽ ĩĩ ellioohit cĩnĩĩng. Hanneek naag Kõr cĩ ꞌYiommaanõ ho, lõõcĩ tõrkõnõn, nẽẽthĩ, avvĩ eeta cĩg ꞌJudeei Kõr cĩ ꞌYiommaanõ anneek, “Thabath” ꞌcĩ baa ĩĩn Kõr cĩnĩĩng ꞌcĩ ĩĩn tũkĩramma. Tigiil ꞌBuuk cĩ Luugithõõ 20:8-11, Ditoronomi 5:12-16. õõt uduhunit ꞌCieethaa cĩ Laiitto, nẽ õõt aauto loota. 15Ma urutaa cĩ tigiilẽnĩt ꞌcĩ aku nyattaala cĩ Mũũꞌtha hĩ ĩĩcĩ põrõvẽtaaꞌnyanu, ĩꞌthooyyia makayyiooha cĩg ꞌCieeth cĩ Laiitto eet umwa hikia huduhaak Paaulo hĩ Baarnaba hĩĩnnĩk, “ꞌGotoonoga, má aꞌnyaku nyeemuut umwa ꞌcĩ ẽẽl eeta, iita nuun udukta.”
16Ma ho, ĩtĩnga Paaulo ꞌjieena odongeek eet athĩn ꞌthaaittaa nẽ ĩĩ, “Eeta cĩg Ĩꞌthĩraẽlĩ hĩ eet ꞌcĩg hõllõngaa ĩĩn ꞌJudeei ꞌcĩg abuluth Nyekuc, ĩthĩktaangu nganĩĩta! 17Ẽbẽra Nyekuci cĩ eet cĩg Ĩꞌthĩraẽlĩ hĩbaangĩ cĩggaac nẽ aaꞌnyĩk eet cĩggaac hubulli gẽrrẽẽt baa aattĩg Ijjiba. Ma ho, ikia uluugi Nyekuci ĩhõõggõ ꞌtirriaanaa cĩnnĩ looccaa cĩ Ijjibi battaala, 18nẽ ũꞌthũũtĩ ĩhõõggõ irkiꞌnyia hẽẽn ꞌwec horrwatõõ ꞌcĩ õdõhõhĩĩ kak. 19Baa ĩꞌthaan nẽẽ eet cĩg loonyin tũkĩramma Kanaana nẽ aaꞌnyĩk looc cĩnĩĩng eet cĩgĩnnĩg hõlõmanit ũdũt. 20Baa õkõõĩ thõõth ciee vẽlẽk irkiꞌnyia ꞌmiiaꞌnya ꞌwec hĩ hẽẽn ꞌtur.
“Ma urutaa cĩ, ikia aaꞌnyĩk Nyekuci ĩhõõggõ habuẽẽt ꞌcĩg ẽttẽẽd thooꞌthiok, ĩꞌthõng hõdõlan kõr cĩ põrõvẽtaac Thamueele. 21Nẽẽthĩ, baa hinnia adiim eeta Nyekuc haaꞌnyĩk ĩhõõggõ habu, nĩngĩtĩ aaꞌnyĩkĩ nẽẽ ĩhõõggõ habu ꞌThaaulo, ngeertĩ eet ꞌcĩ haĩ Kĩĩth, haggam ĩhõõggõ irkiꞌnyia hẽẽn ꞌwec. Baa ĩĩn Kiithi eet cĩ habuccieet cĩ Benyemiino. 22Ma baa ittik Nyekuci habu ꞌThaaulo battaala, ikia aaꞌnyĩk Daavide hirigith hĩĩ habu cĩnĩĩng. Nĩngĩtĩ aĩnnĩ Nyekuci, ‘Hũmmũda Daavide ngeertĩ ꞌJeeꞌthe, eet umwa ꞌcĩ haccamana naana. Adĩman hatĩ nẽẽ thooꞌthiok vẽlẽk ꞌcĩg hatabi naa ĩnõõnnõ hidtican.’#Tigiil ꞌBuuk cĩ 1 Thamueele 13:14; Tegellwaanu 89:20
23“Baa arĩnyana Nyekuci ngaatĩ aĩnnĩ, aku hatĩ eet umwaa hattũũgaa cĩ Daavide, hikia hĩĩ Ellioohit cĩ Ĩꞌthĩraẽlĩ, eet tĩho Yeesu. 24Baa nga hikia Yeesu, baa irrioonĩk Yõaannẽ eet cĩg Ĩꞌthĩraẽlĩ hũtũngteek ꞌthẽccan, helemit Nyekuc nẽ aggamit baattithimo. 25Ma baa ẽdẽcaak Yõaannẽ dtiic cĩnnĩ ĩĩ, ‘Ammuku niig ainnu nganĩĩt nganĩ? Ammuku niig ainnu hĩĩnĩ naa eet ꞌcĩ ereeyyu niig ko? Aku hatĩ ẽẽtĩ tĩho uruta nẽ hõllõngaa hũũlũ naa ngaatĩ hõõgĩ lõhamũcĩ cĩg caawa cĩgĩnnĩg.’
26“ꞌGotoonoga hĩ ngoonoga, lõhõlẽẽtĩg Abũrahamĩ hĩ ngagiit eet ꞌcĩg hõllõngaa iiginnu eet cĩg ꞌJudeei nẽ iꞌngolinnu Nyekuc ko, ngagĩĩt vẽlẽk ꞌcĩg baag iꞌthooyyiakeet nyeemuut ciee elliitto ho. 27Baa hõllõngaa aga eeta cĩg ꞌJeruꞌthalẽmĩ hĩ ꞌgaala cĩggĩĩng Yeesu. Nẽ hõllõngaa athĩhĩ thooꞌthiok cĩg põrõvẽtaaꞌnyanu ꞌcĩg ara agiil nẽẽg hõdõõkõthĩ Kõr cĩ ꞌYiommaanõ ho ũdũt. 28Tananga baa hõllõngaa ammũda nẽẽg ꞌgõõl ꞌcĩ aũlan ꞌcĩ ẽttẽẽdĩkĩ Yeesu daahĩth, iita uduktaak nẽẽg Pĩlaatõ huruk ĩnõõnnõ. 29Ma baa ĩdĩmanit nẽẽg thooꞌthiok vẽlẽk ꞌcĩg õthõõthĩ ꞌBuuhi cĩ Nyekuci Yeesu, iita aarria nẽẽg ĩnõõnnõ hurucceea loota nẽ õõt ũmmũtĩta. 30Nẽẽthĩ, baa ũrũgũtha Nyekuci ĩnõõnnõ daahĩtha, 31baa adtuuha eeta ꞌcĩg baag õõkõr hĩ ĩnõõnnõ ꞌGalileea õõ ꞌJeruꞌthalẽma ĩnõõnnõ, tabattĩ mẽẽlĩg. Ĩĩn ꞌyioko eeta tĩko hẽbẽrĩ cĩgĩnnĩg huduktaak eet cĩggaac thõõth cĩnnĩ.
32“Haduhaakuung naag ngagiit nyeemuut ꞌcĩ abũnnaa. Thõõth baa aduhaak Nyekuci hĩbaangĩ cĩggaac, 33idticaneeheet Nyekuci ngagĩĩt lõhõlĩ cĩg hĩbaangĩ cĩggaac, thõõth ꞌcĩ arũgthaanĩ nẽẽ Yeesu. Hĩcĩ eheeddi ꞌBuuhaa cĩ Tegellwaanu dhoortaa ꞌcĩ ĩĩn ꞌramma aĩ,
“ ‘Iini nii Loholeec caannĩ
nẽ ꞌyioko kõr nicci, hanneekii hĩĩna naa Maaꞌnyu.’#Tigiil ꞌBuuk cĩ Tegellwaanu 2:7
34Baa arũgtha Nyekuci Yeesu daahĩtha nẽ hõllõngaa aaꞌnyĩk ẽlẽ cĩnnĩ hõtõngõl. Aaĩ ꞌthẽk hĩ baa aduha Nyekuci aĩ,
‘Haaꞌnyuung hatĩ naa ngagiit ꞌlẽẽmĩth hĩ ꞌgattan ꞌcĩ ĩĩn dĩdĩ, haau hĩ baa haduhaahi Daavide.’#Tigiil ꞌBuuk cĩ Iꞌthaia 55:3
35Nẽ ẽtẽhẽẽdĩ ꞌBuuhaa cĩ Tegellwaanu ngamwaanĩ tarĩ ĩĩ,
‘Hĩnĩngĩtĩ hõllõngaa hatĩ uunnihi nii Dticciannioohit cunni ꞌcĩ Ẽllẽẽmĩth hõtõngõl.’#Tigiil ꞌBuuk cĩ Tegellwaanu 16:10
36“Baa nga arũgĩ Daavide, baa athĩhĩ nẽẽ Nyekuc. Ma baa adaaha, ikia adaĩ biyyiẽẽnĩĩ cĩg halang cĩnĩĩng nẽ õtõngõl ẽlẽ cĩnnẽẽnĩ. 37Nẽẽthĩ, baa arũgtha Nyekuci Yeesu daahĩtha nẽ baa aitiõõ ẽlẽ cĩnnĩ hõllõngaa õꞌngõlĩ.
38“ꞌGotoonoga hĩ ngoonoga, hatabbuung naa ngagiit agaac Yeesu ꞌcĩ occa ũũnnĩk ꞌthẽccanẽẽt cugguung. 39Nẽ ẽẽtĩ ꞌcĩ ẽlẽmĩ ĩnõõnnõ, ooggiaa hatĩ hẽlẽggẽẽnnĩ vẽlẽk ĩcĩg baa hõllõngaa ũũlũ nyattalĩ cĩ Mũũꞌtha. 40Uꞌthuutti eleeti jurrung thooꞌthiohĩĩ baag aduha põrõvẽtaaꞌnya, hiittiõõ hõllõngaa aggammuung ngagiita. Baa aĩ nẽẽg,
41“Ĩcĩnĩt niig eeta ꞌcĩg ararru Nyekuc ko!
Abarrittu hatĩ nẽ adaaktu hĩĩ lõõcĩ ꞌthĩĩ.
Hadĩmani hatĩ naa kõr nicci ꞌgiimwa
ꞌcĩ hõllõngaa elemmu niig ũdũt,
tananga huduhaahuung eet umwaanĩ!”#Tigiil ꞌBuuk cĩ Habakkuhi 1:5
42Ma baa ũtũngteek Paaulo hĩ Baarnaba ꞌCieeth cĩ Laiitto, iita alaacõ eeta ĩhõõggõ hiita hillimanit thooꞌthiok iccig tarĩ Kõrraa cĩ ꞌYiommaanõ ĩcĩ anũẽẽkĩ. 43Ma baa edeccia laiiniti, baa anũ Paaulo hĩ Baarnaba eeta cĩg ꞌJudeei hĩ eet ꞌcĩg hõllõngaa ĩĩn ꞌJudeei, ꞌcĩg baag iita elemit thõõth cĩ Nyekuc cĩ Ĩꞌthĩraẽlĩ. Nĩngĩtĩ aduhaakĩ nẽẽg eet huꞌthuutti bũnnai cĩ Nyekuc gõõng ammaannĩk ĩhõõggõ hõdõõkõthĩ.
44Ma baa õdõlan Kõrraa cĩ ꞌYiommaanõ ho, iita ũllũngattaa eeta vẽlẽk ꞌtaaũn hũtũrũũr, hiita hĩthĩhĩt thõõth cĩ Makayyioohit Yeesu. 45Ma baa adtuuha eeta cĩg ꞌJudeei lothippit ko, iita ĩlĩĩllẽẽcõ gẽrrẽẽt, nẽ odoomito Paaulo, hĩnĩngĩtĩ thooꞌthiok ꞌcĩg aduha nẽẽ ho.
46Nẽẽthĩ, baa ẽdẽcĩ Paaulo hĩ Baarnaba tõrõmẽẽꞌthĩta anneek, “Baa hadiimma naag hallimaneekuung ngagiit nyeemuut cĩ Nyekuci ĩĩcĩ oou, õõa ꞌcĩ nga hillimatteeha eet ũgĩ, aburru hinnia niig nyeemuut tĩho! Ĩko aburru rũgẽt ꞌcĩ aalla ooo. Nẽẽthĩ ꞌyioko, hoottia naag nyeemuut icci, hĩ eet ꞌcĩg hõllõngaa ĩĩn ꞌJudeei, 47hĩnĩngĩtĩ baa aaꞌnyeet ngagĩĩt Makayyioohiti tilooinit icci aĩ,
“Haaꞌnyuung naa ngagiit, ĩĩtõ lanyit cĩ eet ꞌcĩg hõllõngaa ĩĩn ꞌJudeei.
Ootti eliinit cĩ Nyekuci õõt illimatteek eet loonyini vẽlẽk loota nĩnga.”#Tigiil ꞌBuuk cĩ Iꞌthaia 49:6
48Ma baa athĩhĩ eeta ꞌcĩg hõllõngaa ĩĩn ꞌJudeei nyeemuut icci ho, iita accamattoothĩk gẽrrẽẽt nẽ ubuluthit thõõth cĩ Makayyiookto. Nẽ eeta vẽlẽk ꞌcĩg baag ẽbẽra rũgẽt ꞌcĩ aalla ũdũt, elemit Makayyioohit Yeesu.
49Nĩngĩtĩ ĩꞌthanõthõõthĩkĩ thõõth cĩ Makayyioohit Yeesu looc niccia vẽlẽk. 50Ma nĩngaata, baa hinnia õõ alũllũũman makayyiooha cĩg ꞌJudeei eet ũgĩ ꞌcĩg obbitig ꞌtaaũnatõõ, hĩ ngaaĩ ũgĩ ꞌcĩg iꞌngolli thõõth cĩ Nyekuci. Nĩngĩtĩ aaꞌnyĩkĩ eeta cĩg ꞌJudeei ĩhõõggõ hutuhuyyioothĩk Paaulo hĩ Baarnaba nẽ iꞌthiattaaĩ ĩdĩmanit ĩhõõggõ ꞌbuth. Nĩngĩtĩ iiggiaĩ ĩhõõggõ looccaa cĩnĩĩng battaala. 51Ma ho, utuddungit Paaulo hĩ Baarnaba tuduhaac ꞌthõõnĩĩ cĩggĩĩng ngaatĩho noho nẽ õõt ĩĩcĩ ꞌtaaũn ꞌcĩ haĩ Ikonium. 52Nẽẽthĩ, baa accamanoothĩk nuyyiooha ꞌtaaũnaa cĩ Antiohĩ nẽ baa ikia Lorii ꞌcĩ Ẽllẽẽmĩth hĩ ĩhõõggõ.
Zvasarudzwa nguva ino
Dtiicanĩ cĩg ꞌThooyyiahu 13: did
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2017, Wycliffe Bible Translators, Inc., All rights reserved.