Dtiicanĩ cĩg ꞌThooyyiahu 12
12
Ivvir Pẽẽtũrũ baabuutha
1Ma waathinniook nicciag, ikia aggam habuui Ẽrõõdẽ#12:1 Ẽrõõdẽ: Ĩĩn ciee Ẽrõõdẽ Agirippa, ngeertĩ loholeec cĩ Ẽrõõdẽ Cobbi. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:1-13:1. Baa ĩĩn Ẽrõõdẽ Cobbi habu, baa adiim aruk Yeesu baa nga arrittiaa thõng. Tigiil thõõth cĩnnĩ ꞌBuuhaa cĩ Maatteeo 2:1-8; ꞌLuuka 1:5. Urutaa baa adaahĩ nẽẽnĩ, ikia ĩĩ ngeerĩnĩ Ẽrõõdẽ Antipa habu, baa aggameek Yõaannẽ Yeesu baattithimo. Tigiil thõõth cĩnnĩ ꞌBuuhaa cĩ Maatteeo 14:1; Maarko 6:14; ꞌLuuka 3:1; Dtiicanĩ cĩg ꞌThooyyiahu 4:27. eet ũgĩ cĩg lothippit cĩ lemmioohu, muhẽẽtta ꞌcĩ atĩkĩĩanĩ ĩhõõggõ ꞌcannaana. 2Baa aduhaak nẽẽ athegereeꞌnya hetteeddia õõ cĩ ꞌJeemithi ꞌgõtõnĩ Yõaannẽ. 3Ma baa adtuuha Ẽrõõdẽ ngaatĩ accamanaanĩ eeta cĩg ꞌJudeei thõõth icci ho, ũũk aggam Pẽẽtũrũ buúk. Baa aluba thõõth ciee Karramaawaa cĩ Ũbũnẽẽt ꞌcĩg aitiõõ Abũũlana tõõ.#12:3 Karrama cĩ Ũbũnẽẽt ꞌcĩg aitiõõ Abũũlana tõõ: Baa adak eeta cĩg ꞌJudeei Karrama cĩ Ũbũnẽẽt ꞌcĩg aitiõõ Abũũlana tõõ, hummuktaaĩ kõr baa õõganĩ Nyekuci hĩbaangĩ cĩggĩĩng baag ĩĩn appahacaaꞌnya Ijjiba. Baa aꞌnyak karrama ciee waathinniook tũkĩramma. Waathinnioohĩĩ ꞌcĩg ĩĩn tũrkĩramma ho, aꞌngirannii hĩ eet cĩg ꞌJudeei ngaatĩ aduhi ũbũnẽẽt ꞌcĩg aarĩhoothĩk abũũlana. Tigiil ꞌBuuk cĩ Luugithõõ 13:1-10. 4Ma urutaa ꞌcĩ aggamĩ nẽẽ Pẽẽtũrũ, ikia aarĩk ĩnõõnnõ baabuuthatõõ nẽ aaꞌnyĩk hebehit athegereeꞌnya ꞌcĩg ĩĩn õmmõtõ hĩ tõrkõnõn. Baa adiim Ẽrõõdẽ attĩman ĩnõõnnõ lokihooa cĩ lothippito, urutaa cĩ Kõr cĩ Haangittõõ.#12:4 Kõr cĩ Haangittõõ: Ĩĩn ciee kõr ꞌcĩ ammuhaanĩ eeta cĩg ꞌJudeei kõr baa urwacanĩ nẽẽg hõdẽĩ hõdẽĩ, ngadihẽẽt cĩg hattũũgetu biyyiẽẽtĩĩ cĩg mĩꞌnyoonnu. Ĩnõõ baa aku ahaangĩ Makayyioohiti olooyyiok cĩggĩĩng looccaa cĩ Ijjibi baarkit nẽ tarĩ, ummukta kõr baa aduhi nẽẽg ũbũnẽẽt ꞌcĩg aitiõõ abũũlana tõõ. Tigiil ꞌBuuk cĩ Luugithõõ 12:17-28.
5Nĩngĩtĩ aarĩhõõthĩkĩ Pẽẽtũrũ baabuuth nẽẽthĩ, baa ala lothippiti cĩ lemmioohu Nyekuc gẽrrẽẽt, hĩnĩngĩtĩ ĩnõõnnõ.
Ooggia Pẽẽtũrũ baabuutha
6Ma õõa cĩ baalin ꞌcĩ baa aĩ haꞌnyahaaĩ Ẽrõõdẽ Pẽẽtũrũ lokihooa, baa oongi Pẽẽtũrũ hõrggẽẽnaa cĩ athegereeꞌnya ꞌramma ecebbi nyerikooꞌnyanĩĩ ꞌcĩg obbitig ꞌramma nẽ ebehit athegereeꞌnya hattũũg. 7Ma hĩdĩĩkoothong, uppwaanna aajĩlõ cĩ Makayyiookto nẽ ũttũhũl lanyit baabuuth. Ma ho, õtõmõõĩ aajĩlõ Pẽẽtũrũ ꞌgaaũꞌnya, nĩngĩtĩ attiranĩ ĩnõõnnõ nẽ ĩĩnnĩk, “Tĩnga hĩdĩĩkoothong!” Ma ho, etteeddi nyerikona athĩnĩĩ cĩgĩnnĩg noho dtum.
8Ma nĩngaata, ĩĩnnĩk aajĩlõ Pẽẽtũrũ, “Tihim ceremwa cugunnig hĩ caawa.” Ma ho, ĩdĩman Pẽẽtũrũ noho. Nĩngĩtĩ annẽẽkĩ aajĩlõ ĩnõõnnõ, “Tihim koout cunni nẽ ũnũaanĩ.” 9Nĩngĩtĩ anũaanĩ Pẽẽtũrũ aajĩlõ baabuutha battaala, nẽẽthĩ hinnia, baa hõllõngaa aga Pẽẽtũrũ ngaatĩ ĩĩnnĩ thõõth ꞌcĩ adtican aajĩlõ ho dĩdĩ. Baa ammuk hinnia nẽẽ aĩ hohonooꞌthi thõng. 10Iita ũtũngteek aajĩlõ hĩ Pẽẽtũrũ nĩngĩtĩ ebehiini athegereeꞌnya ꞌcĩg oou hĩ ꞌcĩg anũẽẽkĩ buúk, nĩngĩtĩ õdõlanĩ hattũũg cobbi ꞌcĩ ĩĩn ꞌthiihit ꞌcĩ adukni ꞌgõõl ꞌcĩ õkõ ꞌtaaũnaa cobbi. Baa abbuuhi hattũũg ciee ẽmmẽn, nĩngĩtĩ adukni nẽẽg õõĩ. Ma baa ũꞌthũkũcĩt nẽẽg ꞌgõõla ĩĩtõ ꞌrẽẽttĩg, ikia ammanyanĩ aajĩlõ noho matadaꞌnyak hũtũngeek Pẽẽtũrũ ẽmmẽn.
11Ma ho, ikia agaõõthĩ Pẽẽtũrũ thõõth ꞌcĩ adĩman aajĩlõ ho nẽ ĩĩ, “Hagawa ngaatĩ hatĩ ĩꞌthõõanĩ Makayyioohiti aajĩlõ cĩnnĩ hikia hõõgawaa nganĩĩt cebiittaa cĩ Ẽrõõdẽ ho, hĩ thooꞌthiohĩĩ vẽlẽk ĩcĩg ammuk makayyiooha cĩg ꞌJudeei.”
12Nĩngĩtĩ õkõõĩ Pẽẽtũrũ ꞌcieethaa cĩ Maria aattĩ Yõaannẽ, ꞌcĩ baa haĩ ꞌthaar ũgĩ Maarko. Baa alũtĩ nuyyiooha cĩg Makayyiooktak nĩngaata nẽ alayyio. 13Ma nĩngaata, ikia uruk Pẽẽtũrũ hattũũg cĩ battaalu nẽ ikia ubbuuk bũhẽẽcĩ umwaa ꞌcĩ ĩĩn dticciannioohit ꞌcĩ haĩ ꞌthaar ꞌRõõda. 14Ma baa aku aga bũhẽẽcĩ ciee molook cĩ Pẽẽtũrũ ho, ikia atal gẽrrẽẽt hiittiõõ hõllõngaa nõõ abbuuk hattũũg nẽ ivvir õbõdõõthĩ ꞌcieetõõ nẽ ũũk uduhaak eet ĩĩnnĩk, “Aaĩ Pẽẽtũrũ hattũũga!”
15Baa hinnia anneek eeta ĩnõõnnõ, “Adaki nganiit maangõnĩ!” Ma baa aalla arrĩcana loholeec ciee thõõth noho ho, iita othoothito ĩĩtõ, “Aajĩlõ mõnõ cĩnnĩ thõng.”
16Nẽẽthĩ, baa aalla aruk Pẽẽtũrũ hattũũg noho, ma baa õõ abbuuk nẽẽg hattũũg ko, iita ukullieek ꞌjieen. 17Ma ho, othoothĩk Pẽẽtũrũ eet athĩnĩ hĩjjaaktõ nẽ ẽddẽẽbak ĩhõõggõ ꞌgõõl ꞌcĩ õõganĩ Makayyioohiti ĩnõõnnõ baabuutha ho. Nẽ tarĩ ĩĩnnĩk Pẽẽtũrũ ĩhõõggõ, “Uduktaak ꞌJeemith#12:17 ꞌJeemith: Ĩĩn ꞌJeemithi ciee ꞌgõtõnĩ Yeesu nẽ ĩĩ makayyioohit ꞌcĩ lothippit cĩ lemmioohu ꞌJeruꞌthalẽma. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 15:12-21; 21:18-19; ꞌGalaaꞌthia 1:19. Baa aaĩ ꞌJeemithi umwaa tarĩ ꞌcĩ baa ĩĩn ꞌgõtõnĩ Yõaannẽ nẽ ĩĩ ꞌthooyyiahit cĩ Yeesu, baa aku aruk Eroode ĩnõõnnõ. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:2. hĩ nuyyiook ũgĩ vẽlẽk thõõth icci.” Nĩngĩtĩ õkõõĩ nẽẽ ĩĩmwaanĩ.
18Ma baa loohoth ꞌcĩ ꞌrĩĩng, iita ommoꞌthi athegereeꞌnya baag ebeki gẽrrẽẽt, hĩnĩngĩtĩ muhẽẽnĩt cĩ thõõth ꞌcĩ aꞌnginõõꞌthĩ Pẽẽtũrũ baabuutha ho. 19Ma ho, uduhaak Ẽrõõdẽ athegereeꞌnya cĩgĩnnĩg hidiimito Pẽẽtũrũ, nẽẽthĩ hinnia, baa hõllõngaa ammũda ũdũt. Nĩngĩtĩ ajini Ẽrõõdẽ bekiook nẽ aaꞌnyĩk ĩhõõggõ hurukti. Ma urutaa cĩ thõõth icci, ikia ũtũngeek Ẽrõõdẽ looc cĩ ꞌJudeea nẽ nõõ ũũk aau ꞌtaaũnaa cĩ Caetharea hĩdĩhĩdĩĩc.
Daahĩth cĩ Ẽrõõdẽ
20Baa ẽggẽrꞌnyõõ habuui Ẽrõõdẽ hĩ eet cĩg ꞌtaaũn cĩ ꞌTire hĩ eet cĩg ꞌtaaũn cĩ ꞌThidõõnẽ gẽrrẽẽt. Nẽẽthĩ, baa ammũda lõõcĩ cĩnĩĩng ꞌgẽẽn dhoortaa ꞌcĩ baa aggam Ẽrõõdẽ. Nĩngĩtĩ akuuni lothippiti eetinii cĩggĩĩng, hõõt hothooꞌthio hĩ Balathto ꞌcĩ baa ĩĩn ꞌgaalac cobbi makayyioohĩĩ ꞌcĩg adticanoothĩk Ẽrõõdẽ. Iita amammaayanit eeta Balathto haꞌnyahit ganõn hõrggẽẽnaa cĩ ꞌtaaũnꞌnya cĩggĩĩng ꞌcĩg obbitig hĩ Ẽrõõdẽ.
21Nẽ baa eberria kõrra ꞌcĩ au õmmõtõõnĩ nẽẽg hĩ Ẽrõõdẽ. Ma ho, itihim Ẽrõõdẽ ceremwa cĩgĩnnĩg cĩg habuẽẽꞌthĩtaak, nẽ ikia iccioloongan dtaabawa, nĩngĩtĩ õthõõthĩkĩ eeta. 22Baa accamanoothĩk eeta hawacahit hĩĩtõ, “Ĩĩn ciee molook cĩ Nyekuci, hõllõngaa ĩĩn cĩ eeto.”
23Ma hĩdĩĩkoothong, hĩnĩngĩtĩ baa hõllõngaa abuluth Ẽrõõdẽ Nyekuc, uuk aajĩlõ cĩ Makayyiookto ĩnõõnnõ noho puth hẽttẽẽd looc. Ma uruta, iita adahit Ẽrõõdẽ huluta rũgẽtẽẽt, nĩngĩtĩ adaaknĩ noho ꞌthẽl.
24Nẽẽthĩ, baa aalla ittoorri thõõth cĩ Nyekuci hĩꞌthanothoothĩk lokor vẽlẽk noho.
25Ma baa edecciaak Baarnaba hĩ ꞌThaaulo dtiic cĩnĩĩng baa ĩꞌthõõĩ eeta hõõt hidticanit, iita oboddia nẽẽg ĩĩcĩ ꞌJeruꞌthalẽmĩ othohotit Yõaannẽ buúk ꞌcĩ haĩ ꞌthaar ũgĩ Maarko.
Zvasarudzwa nguva ino
Dtiicanĩ cĩg ꞌThooyyiahu 12: did
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2017, Wycliffe Bible Translators, Inc., All rights reserved.