Tɛnɛ Faalaaliiti 2
2
Ɠimalai ɠa ga ani ɓiigi dɔɔɠuai
1Dòun zunu, ni ɗa dàawooiti sona,
ni ɗa nà-deveiti makɛna è-yiimaʋɛ,
2ni ɗa woilona ɠimalai ma,
è è-yii ve keleɠelegi ya,
3ungo, ni ɗa wooɠulana faaɠaaɠai ma,
ni ɗa keleɠelegi ɠaiziɛna,
4ni ɗa gaiziɛna ga walii ɠɛʋele,
ni ɗa daana ma kpɛ, è gaiziɛ ga naavolo ɠɛʋele,
5názu ɠa è Ɠɔoɠɔ GALAGI ɠaazuluabai ɠwɛɛsu da,
ɗa zoo è GALA kwɛɛ.
6Mazɔlɔɔ Ɠɔoɠɔ GALAGI ɠa a ɗa ɠimalai ve,
daawooi ɠa a ɗa faaɠwɛgi ta keleɠelegi ve.
7Toɠa undaanɛ vai makɛsu sɔle nuiti bɛ.
Eɠɛ kɔɔɠɔ zɛpɛgi, toɠa naati makɛ, niiti ti ziɛzu telebodai zu.
8Niiti ti ta-eteai ziɛzu ga sɔledai, toɠa ɓɔ naati ba.
Niiti ti bɛ ga wooɠɛɠila nuiti, toɠa ɓaa naati ta-ʋelei maazu.
9Ɗa zoo è faiti zɔɠɔzuɠa, telebodai, ta nii soloogai tɔgi ma, ta sɔle fai,
è pele ʋagɔiti kpein kwɛɛ.
10Mazɔlɔɔ ɠimalai ɠa ʋa é zei è-yiimaʋɛ,
faaɠwɛgi ɠa ɠɛ ga è yiima vaiti.
11Kidafaawui ɠa è makɛ,
keleɠelegi ɠa ɓaa è maazu,
12ga ti è unmɔɔ, ti è ɠula pele ɲɔiti su,
ta nu ɲɔiti ta-yaava ɓɔɛiti,
13niiti ti ɠɛlɛzu gaama ʋelei ʋa,
ti ɗa ziɛ ga pelei suɓidiai.
14Ti-yiimai ga faa ɲɔu ɠɛɛ vai,
ti ɠoozunɛɛzu ga ti lɔ woya vai zu.
15Ti-ziɛ ʋeleiti maaʋegai,
ta-ʋeleiti suzeiʋɛ.
16Naazu, ɗa ɠizo wɛɛnziɛ anzanui ná-tɛgai ma,
é ga koloɠolo anzanui woo nɛɛnɛgiti ti da,
17nii kɛlɛai sinigi ʋa, é ɠɛni zea ma niinɛ yeei,
é yeema ná-vulu minazeɠegi ma, nii é boni ná-GALAGI laaseigi zu.
18Mazɔlɔɔ maalaaʋɛ na saai ʋɔ pelei, ʋɛ ná ga seizuʋɛ,#2:18 Mazɔlɔɔ maalaaʋɛ na saai ʋɔ pelei, ʋɛ ná ga seizuʋɛ: Tati pelei taɠili ɓalaa ka ga nii: ná-pɛlɛi maalaaʋɛ na ga saai ʋɔ pelei
siɛ ʋelei ɠa liizu la gɔvɛalaazu.
19Niiti kpein ti liizu pɔ bɛ, taɠila kpalaa ge la ɠalega ma ʋolu, é ʋa ʋa,
taɠila kpalaa ge la zɛnvu ʋelei ɠaa.
20Yiimazeɠe ga nu ʋagɔiti siɛ ʋelei,
ziɛ ga telebo nuiti siɛ ʋelei.
21Mazɔlɔɔ sɔle nuiti ta zei zooi zu,
gaama nuiti ta yɛ zeini ná.
22Kɛlɛ nu ɲɔiti tɔɔ ɠa ɠula ná,
woovele nuiti ta ɠula ná ʋa.
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.