Gaalu Sɛʋɛi 3
3
Aalɔn ná-doun zunuiti ta-wotii
1Aalɔn ta Moize ti-mavofodai ʋɛtɛ, siɛgi zu Ɠɔoɠɔ GALAGI ɓɔɛni la Moize ʋɔ Sinayi gizei ma.
2Aalɔn ná-doun zunuiti daaseigiti kaa: ma mɔungi laaseigi ɠɛni ga Nadaɓe, naa ʋolumai Aɓiyu ta Eleazaal, ta Itamaal. 3Ti ɠɛni ga zalaɠa ɠula nuiti, gulɔ ɲadegai ziɛni ti ma, zobogi ve ti ya, ga ti zalaɠa ɠula wotii ɠɛ. 4Kɛlɛ Nadaɓe ta Aɓiyu ti zaani Ɠɔoɠɔ GALAGI ɠaazu Sinayi teʋebai zu, tɔɔzei ti ʋaani ga abu ɠiligi. Ti la ɠɛni dounɠa zɔlɔɔni. Eleazaal ta Itamaal ti zalaɠa ɠula wotii ɠɛɛni, ti-ɠɛɛ Aalɔn ɗa wɛlɛ ti ma.
Levi nuiti kɛɛ vai zalaɠa ɠula nuiti ta-wotii zu
5Ɠɔoɠɔ GALAGI ɓɔɛni Moize ʋɔ, é ɠɛ ma: 6«Ʋa ga Levi mavofodai, è ma nuɓusɛiti pu zalaɠa ɠula nui Aalɔn yeema, ga ti ɗa ɓɔ ba. 7Ta ɠɛɛzu ná-botii zu, ta nuɓusɛiti ta-wotii, GALA daaɠomi seɠe ʋɛlɛi ɠakala, ti ti-losuʋɛti kpein kɛ, ti daazeeli, é lo seɠe ʋɛlɛ ɲadegai ʋa. 8Ti ɠaaɓa GALA daaɠomi seɠe ʋɛlɛi wu zɔɔlaiti ma, ti ti makɛ, ti ɠɛ Izilayɛle nuiti ta-wotii zu, ti ti-losuʋɛ kpein kɛ, ti daazeeli, é lo seɠe ʋɛlɛ ɲadegai vai ʋa. 9Ɗa Levi nuiti fe Aalɔn ta ná-doun zunuiti zea. Ta veezu bɛ ɲɛgɛlɛin, ti ɠɛ ga Izilayɛle nuiti gaazuʋɛ. 10Ɗa Aalɔn ta ná-doun zunuiti sei, ti zalaɠa ɠula wotii ɠɛ. Zɔi nɔpɛ a maaɓuɠana seɠe ʋɛlɛ ɲadegai ʋa, nii é la ga ta-ʋɛlɛyeɠei wu nui ta, ta naama nui ʋaa.»
11Ɠɔoɠɔ GALAGI ɓɔɛni Moize ʋɔ, é ɠɛ ma: 12«Wɛlɛ, gè yiimazeɠea ga Levi nuiti, Izilayɛle nuiti saama, doun zunu mɔungiti kpein potogi zu, Izilayɛle anzanuiti ti-loun mɔungiti. Ta ga nɔ̀nɔiti. 13Doun zunu mɔungi kpein ka ga nɔ̀nɔ, é zo naama voloi ma, yeei gè Ezipete yooi zu loun zunu mɔungiti paani la, gè Izilayɛle loun zunu mɔungiti makɛni ɓɔɠɔ ʋɛ, é zo nuiti ti-lointi ma, é li suaiti ti-yiʋoiti pɔ. Ta ga nɔ̀nɔ. Nà ga Ɠɔoɠɔ GALAGI.»
Levi nuiti gaalu fai
14Ɠɔoɠɔ GALAGI devei veeni Moize ya, Sinayi teʋebai zu, é ɠɛ ma: 15«Levi mavofodaiti gaalu, eɠɛʋelei ta-ʋɛlɛyeɠeiti ti la, ta ta-wolodamaiti. Ɗa zunuiti kpein gaalu, é zo alu gila ma, é lɛ zeemaazu.» 16Moize ti ɠaaluni Ɠɔoɠɔ GALAGI ná-devei zu, eɠɛʋelei é ma levei zɔlɔɔni da.
17Levi ná-doun zunuiti daaseigiti ti ɠɛni ga: Gɛɛlɛson, Keɠate ta Melali. 18Gɛɛlɛson ná-doun zunuiti daaseigiti kaa, eɠɛʋelei ta-wolodamaiti ti la: Liɓini ta Simeyi. 19Keɠate ná-doun zunuiti daaseigiti kaa, eɠɛʋelei ta-wolodamaiti ti la: Amalame, Yiseɠaal, Eɓelɔn, ta Uziyɛle. 20Melali ná-doun zunuiti daaseigiti kaa, eɠɛʋelei ta-wolodamaiti ti la: Maali ta Musi. Levi ná-bolodamaiti kana, eɠɛʋelei ta-ʋɛlɛyeɠeiti ti la.
21Gɛɛlɛson mavofodaiti ti ɠɛni ga Liɓini ná-bolodamaiti ta Simeyi nɔnɔiti. 22Ti-liegɔi ɠɛni ga zunu waadɔfela undɔɔlugɔ (7.500), é zo alu gila ma, é lɛ zeemaazu. 23Gɛɛlɛson ná-bolodamaiti ti-ʋuuzuʋɛ ɠɛni ga seɠe ʋɛlɛ ɲadegai ʋoluʋelei, folo liizu ʋelei. 24Gɛɛlɛson ná-bolodamaiti ta-ɠundiɠii ɠɛni ga Eliasafe, Layɛle ná-doun zunui. 25Ti-losuʋɛ ɠɛni ga ti ɠaaɓa GALA daaɠomi seɠe ʋɛlɛi ʋaalobazuʋɛ niiti ma: seɠe ʋɛlɛ ɲadegai, ta ma ʋɛɛmazeɠei, ta kwɛpele seɠezuɠoozagi, nii é GALA daaɠomi seɠe ʋɛlɛi laaʋɛ, 26ta koii ma zasai laaʋɛ ma ɠwɛpele seɠezuɠoozagi, ta sasai ma zeɠeiti, nii é seɠe ʋɛlɛ ɲadegai ta zalaɠa ɠulazuʋɛ maaɠoolii zu, é ʋɛɛ ta-ɠaluiti ba. Tiya ɠa ti-ɠasɔ ɠɛni ga botii, nii togai naama aniiti kpein ba.
27Keɠate mavofodaiti ti ɠɛni ga Amalame ná-bolodamaiti, ta Yiseɠaal nɔnɔiti, naa ʋɛɛ Eɓelɔn ta Uziyɛle tɔnɔiti ba. 28Ti-liegɔi ɠɛni ga zunu waadɔsaʋa undɔzita (8.600), é zo alu gila ma, é lɛ zeemaazu. Ti pɛ ka ti ɠɛni seizu ɲadegai ma wotii zu. 29Keɠate ná-bolodamaiti ti-ʋuuzuʋɛ ɠɛni ga nu yeezazu ʋelei seɠe ʋɛlɛ ɲadegai ɠilazuʋɛ. 30Keɠate ná-bolodamaiti ta-ʋɛlɛyeɠeiti ta-ɠundiɠii ɠɛni ga Elisafan, Uziyɛle ná-doun zunui. 31Ti-losuʋɛ ɠɛni ga ti ɠaaɓa GALA daaɠomi seɠe ʋɛlɛi ma zɔɔlai niiti ma: minazeɠe kesui, ta taɓalii, ta fitina zei anii, ta zalaɠa ɠulazuʋɛti, ta seizu ɲadegai ma zɔɔlaiti kpein, niiti botii ɠɛni ɠɛɛzu ga tiye, ta kwɛpele seɠezuɠoozagi. Tiya ɠa ti-ɠasɔ ɠɛni ga botii, nii togai naama aniiti kpein ba. 32Levi nuiti ta-ɠundiɠi wolai ɠɛni ga Eleazaal, zalaɠa ɠula nui Aalɔn ná-doun zunui. Tɔ ɠa é ɠɛni wɛlɛzu Levi nuiti ma, niiti ti ɠɛni seizu ɲadegai ma wotii zu.
33Melali mavofodaiti ti ɠɛni ga Maali ná-bolodamaiti ta Musi nɔnɔiti. 34Ti-liegɔi ɠɛni ga zunu waadɔzita unfelegɔ (6.200), é zo alu gila ma, é lɛ zeemaazu. 35Melali ná-bolodamaiti ta-ʋɛlɛyeɠeiti ta-ɠundiɠii ɠɛni ga Suliyɛle, Aɓiyayile ná-doun zunui. Ti-ʋuuzuʋɛ ɠɛni ga seɠe ʋɛlɛ ɲadegai ɠilazu ʋelei nu ɠɔʋɛzuʋɛ. 36Ti-losuʋɛ ɠɛni ga ti ɠaaɓa GALA daaɠomi seɠe ʋɛlɛi ʋaalobazuʋɛ niiti ma: seɠe ʋɛlɛ ɲadegai zuzo guluiti, ta ma wulu zɔkpɔiti, ta ma lɔkpalaiti, ta ta-labuiti, ta ta-zɔɔlaiti kpein niiti botii ɠɛni ɠɛɛzu ga tiye, 37ta tɔkpalaiti ti ɠɛni ga koii ma zasai, é ɠooli ma, é ʋɛɛ ta-labuiti ba, ta ti zuzo kɔluiti, ta ta-ɠaluiti.
38Moize-o, Aalɔn ta ná-doun zunuiti-yo, ti ʋuuni seɠe ʋɛlɛ ɲadegai ɠakalaʋɛ, folo ɠulazu ʋelei, GALA daaɠomi seɠe ʋɛlɛi laaʋɛ. Ti ɠɛni seizu ɲadegai ma wotii ɠɛɛzu Izilayɛle nuiti daaseigi zu. Zɔi nɔpɛ a la maaɓuɠana ná ʋa, ta naama nui ʋaa.
39Levi nuiti kpein, niiti Moizeni ta Aalɔn ti ti ɠaaluni, zunuiti, é zo alu gila ma, é lɛ zeemaazu, eɠɛʋelei Ɠɔoɠɔ GALAGI ná-devei ɠɛni la, é lo pɛlɛyeɠeiti ba, ti ɠɛni ga zunu waaʋuufele maazu felegɔ (22.000).
Doun mɔungiti unmɔɔ fai
40Ɠɔoɠɔ GALAGI ɠɛni Moize ma: «Doun zunu mɔungiti kpein gaalu Izilayɛle nuiti saama, é zo alu gila ma, é lɛ zeemaazu, è ti-laaseigiti sɛʋɛ. 41Ɗa Levi nuiti fe bɛ̀, Izilayɛle nuiti ti-loun zunu mɔungiti potogi zu. Nà ga Ɠɔoɠɔ GALAGI. Levi nuiti ta-loganiiti ta ɠɛ ga nɔ̀nɔ, Izilayɛle nuiti ta-logani zinɛ mɔungiti potogi zu.» 42Moize doun zunu mɔungiti kpein gaaluni Izilayɛle nuiti saama, eɠɛʋelei Ɠɔoɠɔ GALAGI ma levei veeni la zea. 43Doun zunu mɔungi kpein gaaluni, é zo alu gila ma, é lɛ zeemaazu. Ti-liegɔi ɠɛni ga waaʋuufele maazu fele unfele puulɔfela maazu saʋagɔ (22.273).
44Ɠɔoɠɔ GALAGI ɓɔɛni Moize ʋɔ, é ɠɛ ma: 45«Levi nuiti fe bɛ̀, Izilayɛle nuiti ti-loun zunu mɔungiti potogi zu, ta Levi nuiti ta-loganiiti, Izilayɛle nuiti ta-loganiiti potogi zu. Levi nuiti ta ɠɛ ga nɔ̀nɔ. Nà ga Ɠɔoɠɔ GALAGI. 46Izilayɛle nuiti ti-loun zunu mɔungiti, zunu unfele puulɔfela maazu saʋagɔ (273) unmɔɔ fai zu, nii daai ma, ti yɔɠɔzu ma ta Levi nuiti, 47naa ɠa ga ɗa wali ɠae lɔɔludɔɔlu kula ti ɠilagilagi unmɔɔ fai zu. Wali ɠaei naa zoloo seizu ɲadegai ma walii ma, nii buɲɛgi ga galamu puugɔ. 48Ɗa walii naa ve Aalɔn ta ná-doun zunuiti zea, ga naati unmɔɔ ganii, niiti ti-liegɔi a leʋe Levi nuiti tiegɔi ʋa.» 49Moize unmɔɔgi ma walii zoni, é ɠula naati zea, niiti ti-liegɔi ɓudɛni Levi nuiti maazu, ti unmɔɔgai, 50é walii zoni, é ɠula Izilayɛle nuiti ti-loun zunu mɔungiti zea, é ɠɛ ga wali ɠae waagila unsaʋa puulɔzita maazu lɔɔlugɔ (1.365), eɠɛʋelei seizu ɲadegai ma walii la. 51Moize unmɔɔgi ma walii veeni Aalɔn ta ná-doun zunuiti zea, é zoloo Ɠɔoɠɔ GALAGI ná-devei ma, eɠɛʋelei Ɠɔoɠɔ GALAGI Moize ɓɔɠɔi leveni la.
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.