ᒫᕒᒃ 4
4
ᐁᐋᐌᒋᑳᑫᒡ ᐅᑭᑎᑫᓐ
(Matthew 13.1-9; Luke 8.4-8)
1 # Luke 5.1-3. ᒦᓇᐙ ᑕᔥ ᑮᒫᒌᑭᑭᓄᐊᒫᑫ ᐊᐊ ᒋᓴᔅ ᐃᐃᒫ ᒌᑭᐲᒃ ᑳᓬᐊᓬᐄᐎ ᓵᑲᐃᑲᓃᕽ Lake Galilee᙮ ᒦᑕᔥ ᑳᐃᔑ ᒫᐗᒋᐃᑎᓂᒡ ᑫᒋᐹᑏᓄᓂᒡ ᐃᐃᒫ ᐁᐊᔮᒡ, ᐁᑮᐅᒋ ᐴᓯᒡ ᒌᒫᓂᕽ᙮ ᒦ ᑳᐃᔑ ᐅᓇᐱᒡ ᐁᑮᐊᑯᒧᒡ ᒌᑲᑳᒻ᙮ ᐃᐃᒫ ᑕᔥ ᑲᑭᓇ ᑮᐊᔮᐗᐞ ᐃᐃ ᐱᔮᑏᓄᓂᒡ ᒥᑕᑲᒥᒃ ᐁᑯᐊᑮᐗᓂᓂᒃ᙮ 2ᓃᐱᐗᐞ ᐃᑕᔥ ᑫᑰᓇᓐ ᐅᑮᐅᒋ ᐐᑕᒪᐙᐞ ᐁᐋᐌᒋᑫᒡ᙮ ᒦᑕᔥ ᐁᑮ ᑭᑭᓄᐊᒫᑫᒡ ᐅᑮᐃᓈᐞ: 3ᐃᓇᔥᑫ ᐱᓯᑕᒧᒃ! ᐋᐱᑎᕽ ᑮᐃᔖ ᐯᔑᒃ ᑭᑎᑫᐎᓂᓂ ᐁᑮᐊᐎ ᓴᓰᓶᐌᐱᓇᕽ ᑭᑎᑳᓀᓴᓐ᙮#4.3 ᐁᑮᐊᐎ ᓴᓰᓶᐌᐱᓇᕽ ᑭᑎᑳᓀᓴᓐ: ᑭᑎᑫᐎᓂᓂ ᓴ ᐅᑮ ᐸᐹ ᐅᓶᐌᐱᓈᓇᓐ ᑭᑎᑳᓀᓴᓐ ᑮᑭᑎᑫᒡ᙮ ᐯᔑᒃ ᐃᑕᔥ ᐊᐎᔭ ᐅᑖᓈᕽ ᑮᐱᒥᐊᔮ ᑳᑮ ᐸᐲᑾᐊᑮᒡ ᐯᑭᔥ ᐁᑮᐱᓂᑾᐊᕽ ᐃᓂ ᑭᑎᑳᓀᓴᓐ᙮ 4ᐁᓴᓰᓶᐌᐱᓇᕽ ᑭᑎᑳᓀᓴᓐ, ᑮᐸᑭᓯᓅᓐ ᐋᓂᓐᑦ ᐃᐃᒫ ᑳᐃᔑ ᒪᔥᑲᐗᒧᒃ ᒦᑲᓀᔅ᙮ ᐱᓀᔒᔕᒃ ᐃᑕᔥ ᐃᐃᒫ ᑮᐱ ᐴᓂᓭᐗᒃ ᐁᑮᐊᓂᑭᑖᐙᒡ᙮ 5ᔑᑾ ᐋᓂᓐᑦ ᑲᔦ ᑮᐃᔑ ᐸᑭᓯᓅᓐ ᐃᓂ ᑭᑎᑳᓀᓴᓐ ᐃᐃᒫ ᔔᔥᒀᐱᑳᕽ ᐁᐱ ᐸᑲᑲᒥᑳᓂᒃ᙮ ᔐᒫᒃ ᐃᑕᔥ ᑮᐱᓵᑲᑮᐗᓐ᙮ ᐋᓃᔥ ᑳᐐᓐ ᑮᑭᐸᑲᑲᒥᑳᓯᓅᓐ᙮ 6ᐊᐲ ᑕᔥ ᐁᓂ ᐃᔥᐸᑰᒋᕽ ᑮᓯᔅ, ᑮᐊᓂ ᐹᑌᐗᓐ, ᑮᐊᓂ ᐸᐲᒀᑾᑑᔥᑳᐗᓐ᙮ ᐸᑮ ᐋᓃᔥ ᐁᑕ ᑮᐅᒌᐱᑯᐗᓅᓐ᙮ 7ᔑᑾ ᐋᓂᑕ ᑲᔦ ᑮᐃᔑ ᐸᑭᓯᓅᓐ ᐃᓂ ᑭᑎᑳᓀᓴᓐ ᐃᐃᒫ ᐅᑳᐎᒥᓇᑭᔒᒃ ᑳᔑ ᓂᑖᐎᑭᐙᐸᓐ᙮ ᐊᐲ ᑕᔥ ᒦᓇᐙ ᐁᔑ ᓵᑲᑮᐙᒡ ᐅᑯ ᐅᑳᐎᒥᓇᑭᔒᒃ, ᐅᑮᐗᓈᑑᓈᐙᓐ ᐃᓂ ᑳᑮ ᑭᑎᑳᑌᓂᑭᓐ᙮ ᒦᑕᔥ ᑳᐐᓐ ᑮᑮᔑ ᓂᑖᐎᑭᓯᓅᓇᓐ, ᑳᐐᓐ ᑲᔦ ᒦᓇᐙ ᑭᑎᑳᓀᓴᓐ ᑮᐅᒋ ᓂᑖᐎᑭᓯᓅᓇᓐ ᐃᐃᒫ᙮ 8ᔑᑾ ᐋᓂᓐᑦ ᑲᔦ ᑮᐸᑭᓯᓅᓐ ᐃᐃᒫ ᐁᔑ ᐅᓂᔑᔑᕽ ᐊᑭ᙮ ᒦᑕᔥ ᑮᓵᑲᑮᐗᓐ, ᐲᓂᔥ ᑲᔦ ᑮᐊᓂ ᑮᔑᑭᓅᓐ; ᑲᔦ ᑫᔮᐱ ᑮᐅᒋ ᓂᑖᐎᑭᓅᓐ ᑭᑎᑳᓀᓴᓐ, ᐲᓂᔥ ᐋᓂᓐᑦ ᓂᓯᒥᑕᓇ ᑕᓯᓐ ᑮᐅᒋ ᓂᑖᐎᑭᓅᓐ, ᑲᔦ ᐋᓂᓐᑦ ᓂᑯᑣᓯᒥᑕᓇ, ᑲᔦ ᐋᓂᓐᑦ ᓂᑯᑣᒃ ᑕᓯᓐ ᑮᐅᒋ ᓂᑖᐎᑭᓅᓐ ᐁᑕᓯᕽ, ᑮᐃᑭᑐ᙮
9ᔑᑾ ᑕᔥ ᐅᑮᐃᓈᐞ: ᑕᑲ ᐱᓯᑕᒧᒃ, ᒥᓂᒃ ᐌᑕᐗᑳᔦᒃ, ᑮᐃᑭᑐ᙮
ᐅᐐᑖᓐ ᐃᐃᐌᓂ ᐌᑯᓀᓐ ᐌᒋ ᐋᐌᒋᑫᒡ
(Matthew 13.10-17; Luke 8.9-10)
10ᐊᐲ ᑕᔥ ᓂᔑᑫ ᑳᐊᔮᐙᒡ ᑳᑮᐐᒌᐎᑯᒡ, ᒫᒪᐤ ᐃᐃ ᒥᑖᔑᓃᔑᓐ ᐅᑭᑭᓄᐊᒪᐙᑲᓇᐞ, ᐅᑮ ᑲᑴᒋᒥᑰᐞ ᐋᓃᓐ ᑫᐃᔑ ᓂᓯᑐᑖᑾᓂᓂᑭᐸᓃᓐ ᐃᓂ ᐋᐌᒋᑲᓇᓐ᙮ 11ᐅᐅ ᑕᔥ ᐅᑮᐃᓈᐞ: ᑮᓇᐙ ᑭᑭᑫᑕᒧᐃᑯᐙ ᑭᔐᒪᓂᑑ ᑳᓴᓇᑲᓂᓂᑭᓐ ᑫᑰᓇᓐ ᑳᑮ ᑭᑫᑖᑾᓯᓂᓂᑭᐸᓃᓐ, ᒦᐃᐌᓂ ᑭᔐᒪᓂᑑ ᐅᑎᐯᒋᑫᐎᓐ ᐁᑕᔑᑌᓂᒃ᙮ ᐃᑭᐌᓂᐗᒃ ᐃᑕᔥ ᐁᑳ ᑳᐐᒌᐎᓯᓄᐗᒀ, ᑲᑭᓇ ᑫᑰᓐ ᐋᐌᒋᑲᓂᕽ ᐃᔑᑭᑭᓄᐊᒪᐙᐗᒃ᙮ 12#Isa 6.9-10. ᒦ ᐅᐌ ᑳᐅᒋ ᐃᔑᒋᑫᐃᑣ:
ᒥᓴᐙ ᓴ ᑯ ᐋᓇ ᐙᐙᐸᑕᒧᐙᒡ,
ᑳᐐᓐ ᐅᑲ ᓂᓯᑖᐌᑕᓰᓈᐙ᙮
ᔑᑾ, ᒥᓴᐙ ᓴ ᑯ ᐋᓇ ᓈᓅᑕᒧᐙᒡ,
ᑳᐐᓐ ᑕᓂᓯᑐᑕᓰᐗᒃ᙮
ᑮᔥᐱᓐ ᓂᓯᑐᑕᒧᐙᐸᓐ ᐅᑖ ᐱᑮᐌᓄᑕᐙᐙᓐ ᑭᔐᒪᓂᑑᓐ,
ᒦᑕᔥ ᒋᑮ ᐴᓀᑕᒫᑯᐙᒡ,
ᑮᐃᑭᑐ᙮
ᐌᐌᓂ ᐅᐐᑖᓐ ᒋᓴᔅ ᐃᐃᐌᓂ ᑳᐃᔑ ᐋᐌᒋᑳᑫᒡ ᐅᑭᑎᑫᓐ
(Matthew 13.18-23; Luke 8.11-15)
13ᔑᑾ ᑕᔥ ᐅᑮᐃᓈᐞ: ᑳᐐᓐ ᐃᓇ ᑭᓂᓯᑐᑕᓰᒻ? ᐋᓃᓐ ᑕᔥ ᑫᑮᐅᒋ ᓂᓯᑐᑕᒣᑭᐸᓐ ᑲᑭᓇ ᐃᓂ ᐋᐌᒋᑲᓇᓐ ᑮᔥᐱᓐ ᓂᓯᑐᑕᓯᐌᒃ ᐅᐅ ᐯᔑᒃ ᐋᐌᒋᑲᓐ? 14ᐊᐊ ᑭᑎᑫᐎᓂᓂ, ᒦ ᑳᐃᒋᑳᓱᒡ ᐊᐎᔭ ᐁᐸᐹᐐᑕᕽ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮ 15ᐃᓇᔥᑫ ᐋᓂᑕ ᐊᐎᔭᒃ ᑖᐱᔥᑰ ᐃᔑ ᐊᔮᐗᒃ ᐃᐃᐌ ᑳᐃᔑ ᒪᔥᑲᐗᒧᒃ ᐃᐃᒫ ᑭᑎᑳᓀᓴᓐ ᐁᐃᔑ ᐸᑭᓯᑭᓐ᙮ ᐅᓅᑖᓈᐙ ᐃᐌ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮ ᐱᒌᓇᒃ ᐃᑕᔥ ᐁᓅᑕᒧᐙᒡ, ᐅᐱ ᐅᑖᐱᓇᒫᑯᐙᓐ ᐃᓂ ᓭᑕᓇᓐ Satan ᒋᐗᓃᑫᐙᒡ ᐃᐃ ᑳᑮᓅᑕᒧᐙᒡ ᑎᐹᒋᒧᐎᓐ᙮ 16ᔑᑾ ᐋᓂᑕ ᐊᐎᔭᒃ ᐃᓀᑖᑯᓯᐗᒃ ᑖᐱᔥᑰ ᑭᑎᑳᓀᓴᓐ ᐁᐸᑭᓯᑭᓐ ᐃᐃᒫ ᐁᔑ ᐱ ᐸᑲᑲᒥᑳᒃ ᐁᔔᔥᒀᐱᑳᒃ᙮ ᑮᓅᑕᒧᐙᒡ ᑎᐹᒋᒧᐎᓐ, ᔐᒫᒃ ᐃᑯ ᐅᑑᑖᐱᓈᓈᐙ ᐁᒨᒋᑫᑕᒧᐙᒡ᙮ 17ᒦᑕᔥ ᑖᐱᔥᑰ ᑳᓂᑖᐎᑭᑭᓐ ᐁᐅᒌᐱᑳᐗᓯᓄᑭᓐ, ᑳᐐᓐ ᑭᓉᔥ ᐊᔮᓰᐗᒃ᙮ ᐊᒋᓇ ᐁᑕ ᑌᐺᑕᒨᒃ᙮ ᐹᓂᒫ ᑕᔥ ᐅᑑᒋ ᒥᑯᔥᑳᒋᐃᑯᐙᓐ ᐊᐎᔭᓐ ᑯᒫ ᑲᔦ ᐅᑑᒋ ᑲᒀᑕᑭᐃᑯᐙᓐ ᐁᑮᐅᑖᐱᓇᒧᐙᒡ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮ ᒦᑕᔥ ᐌᔩᑉ ᐃᑯ ᐃᔑ ᐸᑭᒌᐗᒃ᙮ 18ᔑᑾ ᐋᓂᓐᑦ ᑖᐱᔥᑰ ᐃᔑ ᐊᔮᐗᒃ ᐁᑮᐃᔑ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᐊᑮᕽ ᐁᔑ ᐅᑳᐎᒥᓇᑭᔒᑳᒃ᙮ ᐅᑖᓇ ᓅᑖᓈᐙ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮ 19ᐅᑑᓵᒣᑖᓇᐙᓐ ᐃᑕᔥ ᐅᓄ ᑫᑰᓇᓐ ᐅᐅᒫ ᐊᑮᕽ ᑳᔭᔮᓂᑭᓐ, ᑲᔦ ᐅᒥᓉᑖᓈᐙ ᐌᓅᑎᓯᐎᓐ, ᑲᔦ ᐸᑳᓐ ᑫᑰᓇᓐ ᐅᓇᓈᑕᐌᑖᓈᐙᓐ᙮ ᒦ ᓴ ᐅᓄ ᑫᑰᓇᓐ ᑳᐗᓈᐃᑯᐙᒡ ᐁᑳ ᒋᐸᐹᒥᑕᓯᒀ ᑭᔐᒪᓂᑑᓐ ᐅᑎᐹᒋᒧᐎᓂᓂ, ᒦᑕᔥ ᑳᐐᓐ ᑫᑰᓐ ᑕᐅᒌᒪᑲᓯᓅᓐ᙮ 20ᐋᓂᓐᑦ ᐃᑕᔥ ᐃᔑᔭᔮᐗᒃ ᑖᐱᔥᑰ ᐁᑮᐃᔑ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᐁᔑ ᒥᓄᑲᒥᑳᒃ᙮ ᒦᐗᒃ ᐅᑯ ᑳᓅᑕᒧᐙᒡ ᐃᐃ ᑭᔐᒪᓂᑑᓐ ᐅᑎᐹᒋᒧᐎᓂᓂ, ᐁᐅᑖᐱᓇᒧᐙᒡ ᑲᔦ᙮ ᒦᑕᔥ ᐁᐊᓂ ᐲᒋᓂᔥᑳᐙᒡ, ᑖᐱᔥᑰ ᑳᓂᑖᐎᑭᑭᓐ ᐁᐃᔑᓈᑯᓯᐙᒡ ᐃᐃᒫ ᑫᔮᐱ ᑳᓂᑖᐎᑭᑭᓐ ᑭᑎᑳᓀᓴᓐ, ᐋᓂᓐᑦ ᓂᓯᒥᑕᓇ 30 ᑕᓯᓐ, ᐋᓂᓐᑦ ᑲᔦ ᓂᑯᑣᓯᒥᑕᓇ 60 ᑕᓯᓐ, ᐋᓂᓐᑦ ᑲᔦ ᓂᑯᑣᒃ 100 ᑕᓯᓐ, ᒦᐃ ᐁᔑᓈᑯᓯᐙᒡ, ᑮᐃᑭᑐ᙮
ᐁᑮᐋᐌᒋᑳᑫᒡ ᐙᓴᑯᓀᒋᑲᓐ ᒋᔐᑯᓂᑳᑌᓯᓄᒃ
(Luke 8.16-18)
21 # Mat 5.15; Luke 11.33. ᔑᑾ ᑕᔥ ᑮᐊᓂ ᐃᑭᑐ ᒋᓴᔅ: ᐊᐎᔭ ᐲᑎᑲᑑᒡ ᐙᓴᑯᓀᒋᑲᓐ, ᐅᑲᔭᓂᒥᑯᔑᒫᓐ ᐃᓇ ᐊᑑᐹᓇᑭᑾᓐ ᒋᑳᑑᒡ? ᔒᐹᓂᐯᐎᓈᒃ ᐃᓇ ᐅᑲᔑ ᔐᑯᓈᓐ? ᑳ ᒫᐐᓐ᙮ ᐃᓍᑌ ᐋᓃᔥ ᒋᐊᑰᑌᑭᐸᓐ ᐙᓴᑯᓀᒋᑲᓈᑎᑯᕽ᙮ 22#Mat 10.26; Luke 12.2. ᑲᑭᓇ ᑫᑰᓐ ᑳᑳᒋᑳᑌᒃ, ᒦᐃᐌ ᐱᒌᓇᒃ ᒋᒧᔐᔮᐸᒋᑳᑌᒃ᙮ ᔑᑾ ᑮᔥᐱᓐ ᐋᓇᑮᐋᑾᓇᐃᑳᑌᑭᐸᓐ ᑫᑰᓐ, ᒥᓴᐙ ᑕᓈᑾᓐ ᐙᓭᔮᕽ᙮ 23ᒥᓂᒃ ᐌᑕᐗᑳᔦᒃ, ᐌᐌᓂ ᐱᓯᑕᒧᒃ! ᑮᐃᑭᑐ᙮
24 # Mat 7.2; Luke 6.38. ᔑᑾ ᑕᔥ ᐅᑮᐃᓈᐞ: ᐊᔮᒀᒣᑕᒧᒃ ᐅᐅ ᑳᐱᓯᑕᒣᒃ᙮ ᐃᐃᐌ ᐃᓈᑯᓂᑫᐎᓐ ᑫᐅᒋ ᑎᐹᑯᓀᒀ ᑮᒋᐱᒫᑎᓰᐙᒃ, ᐊᒦᐃᐌ ᐯᔑᑾᓐ ᐃᓈᑯᓂᑫᐎᓐ ᑫᑮᓇᐙ ᑫᐅᒋ ᑎᐹᑯᓂᓀᒃ ᑭᔐᒪᓂᑑ, ᑲᔦ ᐊᐗᔑᒣ ᑭᑲ ᐃᓇᑭᑕᒫᑯᐙ᙮ 25#Mat 13.12; 25.29; Luke 19.26. ᐊᐊᐌ ᓴ ᑳᒥᓄᔮᐸᒋᑑᒡ ᐃᐌ ᑳᓂᓯᑐᑕᕽ, ᒦᐊᐌ ᑫᔮᐱ ᑫᒦᓂᓐᒡ ᓂᓯᑐᑕᒧᐎᓐ᙮ ᐊᐊᐌ ᑕᔥ ᑳᒪᓈᔮᐸᒋᑑᒡ ᐃᐌ ᑳᓂᓯᑐᑕᕽ, ᐊᐴᔥᑫ ᑕᐅᑖᐱᓇᒪᐙ#4.25 ᑕᐅᑖᐱᓇᒪᐙ: ᐅᐅ ᒫᐐᓐ ᑳᐃᒋᑳᑌᒃ: ᐊᐎᔭ ᑳᑭᑫᑕᓯᒃ, ᑳᐐ ᑭᑫᑕᓯᒃ ᑲᔦ ᐋᓃᓐ ᑭᔐᒪᓂᑑᓐ ᑳᔑ ᑎᐯᒋᑫᓂᒡ, ᒦᓴ ᐊᐌ ᑭᔐᒪᓂᑑᓐ ᑫᐅᑖᐱᓇᒫᑯᒡ ᑫᑮᐃᔑ ᑭᑫᑕᑭᐸᓐ᙮ ᐃ ᒥᓂᒃ ᐋᓇᑮᓂᓯᑐᑕᑭᐸᓐ, ᑮᐃᑭᑐ᙮
ᐁᐋᐌᒋᑳᑫᒡ ᑭᑎᑳᓀᔅ ᐁᔑ ᒫᒌᑭᒃ
26ᐅᐅ ᑕᔥ ᑲᔦ ᑮᐊᓂ ᐃᑭᑐ: ᒦ ᓴ ᐅᐌ ᐁᔑ ᐊᔮᓂᒃ ᑭᔐᒪᓂᑑ ᐅᑎᐯᒋᑫᐎᓐ, ᑖᐱᔥᑰ ᐊᐎᔭ ᐃᓂᓂ ᐃᐃᒫ ᐁᐊᐸᑭᑑᒡ ᑭᑎᑳᓀᓴᓐ ᐊᑮᕽ᙮ 27ᓂᐹ ᐁᑎᐱᑲᓂᓂᒃ, ᐗᓂᔥᑳ ᐁᑮᔑᑲᓂᓂᒃ᙮ ᐲᓂᔥ ᐃᓂᐌ ᑭᑎᑳᓀᓴᓐ ᐊᓂ ᓵᑲᑮᓂᐗᓐ, ᐁᐊᓂ ᓂᑖᐎᑭᓂᓂᑭᓐ, ᐋᓇᐐᓐ ᐁᑭᑫᑕᓯᒃ ᐊᐊ ᐃᓂᓂ ᐋᓃᓐ ᐁᔑ ᒫᒌᑭᑭᓐ᙮ 28ᑎᐱᓇᐌ ᐋᓃᔥ ᐅᐅ ᐊᑭ ᓂᑖᐎᑭᒋᑫᒪᑲᓐ, ᓂᑕᒻ ᐁᐊᓂ ᒪᔥᑯᓯᐗᕽ, ᐲᓂᔥ ᐁᐊᓂ ᓃᔅᑲᓇᑭᑭᕽ, ᒦᑕᔥ ᐲᓂᔥ ᐁᑮᔑᑭᒃ᙮ 29#Joel 4.13. ᐊᐲ ᑕᔥ ᑳᑮᔑᑭᒃ, ᒦᑕᔥ ᐌᔩᑉ ᐁᔑ ᑮᔥᑭᔑᑫᒡ ᐃᓂᓂ, ᐋᓃᔥ ᒦ ᐅ ᐊᐲ ᒋᒫᐗᒋᒋᑫᒡ, ᑮᐃᑭᑐ᙮
ᐁᑮᐋᐌᒋᑳᑫᒡ ᒫᐗᒡ ᑳᔭᑳᓯᕽ ᑭᑎᑳᓀᔅ
(Matthew 13.31-32,34; Luke 13.18-19)
30ᔑᑾ ᑲᔦ ᑮᐃᑭᑐ ᒋᓴᔅ: ᐌᑯᓀᔥ ᒦᓇᐙ ᑫᐐᑕᒪᐎᓇᑰᑭᐸᓐ ᒋᑭᑫᑕᒨᓂᓇᑰᒃ ᑭᔐᒪᓂᑑ ᐅᑎᐯᒋᑫᐎᓐ? ᐌᑯᓀᔥ ᑎᓄ ᐸᑳᓐ ᐋᐌᒋᑲᓐ ᑫᐅᒋ ᐙᐸᑕᐃᓇᑰᑭᐸᓐ ᐋᓃᓐ ᐃᐃ ᐁᔑᓈᑾᒃ? 31ᒦ ᐅᐌ ᐁᔑᓈᑾᒃ: ᑖᐱᔥᑰ ᐃᐌ ᐯᔑᒃ ᑭᑎᑳᓀᔅ, ᐃᐌ ᒫᐗᒡ ᑳᔭᑳᓯᕽ ᐅᐅᒫ ᐊᑮᕽ ᑳᐸᑭᑎᓂᑳᑌᒃ ᑭᑎᑳᓀᔅ᙮ 32ᒦ ᓴ ᐅ ᑳᐅᒋ ᐲᒋᓂᑭᒃ ᐅᐅ ᒫᐗᒡ ᑳᒥᒑᑾᒃ, ᐃᓂ ᑕᔥ ᐐᓐ ᑲᑭᓇ ᑳᒥᒋᐱᒥᐊᔮᒪᑲᑭᓐ᙮ ᑭᒋᒪᒫᑲᑎᑾᓇᑭᓯ᙮ ᐃᑭ ᑕᔥ ᐱᓀᔒᔕᒃ ᐱ ᐃᔑᐗᓯᔀᓂᑫᐗᒃ ᐁᔑ ᐊᑲᐙᑌᓂᒃ, ᑮᐃᑭᑐ᙮
33ᓃᐱᐗᐞ ᐃᓴ ᐅᓄ ᑎᓄ ᐋᐌᒋᑲᓇᓐ ᐅᑮᐃᔑ ᐐᑕᒪᐙᐞ ᐃᐌ ᑭᔐᒪᓂᑑᓐ ᐅᑎᐹᒋᒧᐎᓂᓂ, ᒥᓂᒃ ᐃᓴ ᑳᐃᔑ ᑲᔥᑭᑑᓂᒡ ᒋᐃᔑ ᓂᓯᑐᑕᒥᓂᒡ᙮ 34ᐋᐌᒋᑫᐎᓂᕽ ᐁᑕ ᐅᑮᐅᒋ ᑲᑲᓅᓈᐞ᙮ ᐊᐲ ᑕᔥ ᐁᓂᔑᑫᐊᔮᐙᒡ ᐅᑮᓂᓯᑐᑕᒨᓈᐞ ᑲᑭᓇ ᑫᑰᓐ ᐃᐃ ᐅᑭᑭᓄᐊᒪᐙᑲᓇᐞ᙮
ᒋᓴᔅ ᐁᑮ ᑭᐱᑎᓇᕽ ᑭᒋᓅᑎᓐ
(Matthew 8.23-27; Luke 8.22-25)
35ᒦᑕᔥ ᐃᐃ ᐯᔑᑾᓐ ᐁᑮᔑᑲᓂᓂᒃ, ᐊᐲ ᐌᓈᑯᔑᓂᓂᒃ, ᐅᑮ ᑲᓅᓈᐞ ᐃᐃ ᐅᑭᑭᓄᐊᒪᐙᑲᓇᐞ: ᐊᐤ ᐃᓴ ᐃᔖᑖ ᐌᑎ ᐊᑳᒥᕽ, ᐅᑮᐃᓈᐞ᙮ 36ᒦᑕᔥ ᐃᐃ ᑳᐃᔑ ᓇᑲᓈᐙᒡ ᐃᐃ ᒥᔮᒪᐌᓄᓂᒡ, ᐁᑮᐃᔑ ᒫᒌᐆᓈᐙᒡ ᒋᓴᓲᓐ ᐃᐃᒫ ᑳᑮᐃᔑ ᓇᒪᑕᐱᓂᒡ ᐲᑑᓇᒃ᙮ ᐸᑳᓐ ᐃᑕᔥ ᑲᔦ ᑮᐊᔮᐗᓐ ᒌᒫᓇᓐ ᑳᐐᑕᐆᒥᑯᒡ᙮ 37ᒦᑕᔥ ᑫᑕᑐ ᑮᑭᒋᐸᑲᒫᓂᒪᓐ ᐁᑮ ᑭᒋᒪᒫᑳᔥᑳᓂᒃ ᐃᑕᔥ, ᑮᓵᓰᑲᐅᑯᐗᒃ ᐁᑮᐊᓂ ᒨᔥᑭᓀᐲᒃ ᐃᐃ ᒌᒫᓐ᙮ 38ᐐᓐ ᐃᑕᔥ ᒋᓴᔅ ᐃᐃᒫ ᑮᑕᔑᓂᐹ ᐅᑖᑳᓂᕽ, ᐊᐸᐱᐎᓂᕽ ᐁᑮᐊᐱᑴᔑᕽ᙮ ᒦᑕᔥ ᐅᑮᐋᒪᒋᐃᑰᐞ ᐁᐃᑯᒡ: ᐅᑭᑭᓄᐊᒫᑫ! ᑳᐐᓐ ᐃᓇ ᑭᐐ ᐸᐹᒣᑕᓰᓐ ᐁᐐᓂᓵᐹᐌᔭᕽ? ᐅᑮᐃᑰᐞ᙮
39ᒦᑕᔥ ᑳᐃᔑ ᐗᓂᔥᑳᒡ᙮ ᐅᑮ ᑭᔒᑲᓅᑖᓐ ᓅᑎᓐ, ᑲᔦ ᐅᑮ ᑲᓅᑖᓐ ᐃᐃ ᓂᐱ: ᒦᐃ ᒥᓂᒃ! ᒦᐃ ᑫᔑ ᐋᓍᑎᕽ! ᐅᑮᐃᑖᓐ᙮ ᒦᑕᔥ ᑳᐃᔑ ᑭᐱᑖᓂᒪᓂᓂᒃ, ᐐᑫ ᑲᔦ ᑳᐃᔑ ᐋᓍᔮᔥᑳᓂᒃ᙮ 40ᐅᐅᐌ ᑕᔥ ᐅᑮᐃᓈᐞ ᒋᓴᔅ ᐅᑭᑭᓄᐊᒪᐙᑲᓇᐞ: ᐋᓃᔛᓐ ᐌᒋ ᓭᑭᓯᔦᒃ? ᑳᐐᓐ ᐃᓇ ᒪᔑ ᑭᑕᐯᓂᒧᓄᑕᐙᓯᐙᐙ ᑭᔐᒪᓂᑑ? ᑮᐃᑭᑐ᙮
41ᐋᐱᒋ ᑕᔥ ᑮᑭᒋᓭᑭᓯᐗᒃ᙮ ᐅᐅᐌ ᑕᔥ ᑮᐃᑎᐗᒃ: ᐊᐌᓀᓐ ᐗᐊ? ᐊᐴᔥᑫ ᓅᑎᓐ ᑲᔦ ᓵᑲᐃᑲᓐ ᐅᓇᐃᑖᑯᓐ! ᑮᐃᑭᑐᐗᒃ᙮
Zvasarudzwa nguva ino
ᒫᕒᒃ 4: OJBS
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ojibwe Shorter Bible (Syllabic Script) © 2008 Canadian Bible Society