ᒫᑎᔪ 28
28
ᒋᓴᔅ ᐁᑮ ᑮᐌᐱᒫᑎᓯᒡ
(Mark 16.1-10; Luke 24.1-12; John 20.1-10)
1ᐁᐃᔥᒀ ᐊᓉᐲᐎ ᑮᔑᑲᓂᓂᒃ ᑕᔥ ᐁᐊᓂ ᐙᐸᓂᓂᒃ ᐁᐊᓇᒥᐁᑮᔑᑲᓂᓂᒃ,#28.1 ᐁᐊᓇᒥᐁᑮᔑᑲᓂᓂᒃ: ᐸᑳᓐ ᐐᓇᐙ ᒎᐗᒃ ᑮᐃᔑᑮᔑᑲᓄᑫᐗᒃ᙮ ᑳᐐᓐ ᑮᐃᔑ ᐊᓉᐱᓰᐗᒃ ᑮᓇᐎᓐᑦ ᑳᔑ ᐊᓉᐱᔭᕽ᙮ ᑳᔑ ᐊᓇᒥᐁᑮᔑᑲᓄᑫᔭᕽ ᐅᔕ ᐐᓇᐙ ᐅᑮᐃᔑ ᒫᒋᓭᑑᓈᐙ ᑳᑕᐗᑌᓂᒃ᙮ ᒦ ᐐᓇᐙ ᐃ ᐊᐲ ᑳᐃᔑ ᐊᓄᑮᐎᑮᔑᑲᓄᑫᐙᒡ᙮ ᒣᕒᐃ ᒫᑲᑕᓬᐊᐎᑴ Mary Magdalene, ᐊᐊ ᑲᔦ ᑯᑕᒃ ᒣᕒᐃ Mary ᑮᐃᔖᐗᒃ ᐁᑮᐊᑕᐙᐸᑕᒧᐙᒡ ᒌᐯᑲᒥᒃ᙮ 2ᓭᓴᑰᒡ ᑕᔥ ᑮ ᑯᔥᑾᑲᒥᑭᓭᓂ᙮ ᑳᑎᐯᒋᑫᒡ ᐅᑌᒐᓬᐃᒪᓐ ᑭᒋᑮᔑᑯᕽ ᑮᐱ ᐅᒌᐗᓐ, ᓂᑯᒋ ᐅᑮᐃᔑ ᑎᑎᐱᓈᓂ ᐃᓂ ᐊᓯᓃᓐ, ᒦᑕᔥ ᐃᐃᒫ ᐊᓯᓃᕽ ᑳᐃᔑ ᓇᒪᑕᐱᓂᒡ᙮ 3ᒦᓴ ᑖᐱᔥᑰ ᑳᐙᑌᓭᒃ ᑳᐊᐲᒋᐙᓭᓈᑯᓯᓂᒡ, ᐅᑭᑭᔥᑭᑲᓂᓂ ᑲᔦ ᑖᐱᔥᑰ ᑰᓂᕽ ᐁᑮᐊᐲᒋᐙᐱᔥᑭᓈᑾᓂᓂᑭᓐ᙮ 4ᐃᑭ ᑕᔥ ᑳᑮ ᑲᓇᐌᒋᑫᐙᒡ ᔑᒫᑲᓂᔕᒃ ᐐᑫ ᑮᓂᓂᑳᓂᒥᓯᐗᒃ ᑳᐊᐲᒋ ᓭᑭᓯᐙᒡ, ᐁᑮ ᑲᐎᓭᐙᒡ, ᑖᐱᔥᑰ ᐁᑮᓂᐳᐙᒡ ᐁᑮᐃᔑᓈᑯᓯᐙᒡ᙮
5ᐊᐊ ᑕᔥ ᐁᒐᓬ ᐅᑮ ᑲᓅᓈᐞ ᐃᐃ ᐃᑴᐗᐞ: ᑫᑯ ᓭᑭᓯᑫᒃ, ᐅᑮᐃᓈᐞ᙮ ᑭᑭᑫᓂᒥᓂᓂᒻ ᐋᓃᔥ ᐁᓇᓈᑕᐙᐸᒣᒃ ᒋᓴᔅ ᑳᑮᐊᑯᓴᑲᐅᓐᒡ᙮ 6ᑳᐐᓐ ᓴ ᐅᐅᒫ ᐊᔮᓰ᙮ ᑮᑮᐌᐱᒫᑎᓯ ᐅᔕ ᑖᐱᔥᑰ ᑳᑮᐃᑭᑐᒡ᙮ 7ᐌᔩᑉ ᑕᔥ ᐊᑕ ᐐᑕᒪᐎᒥᒃ ᐅᑭᑭᓄᐊᒪᐙᑲᓇᐞ, ᐁᑮ ᑮᐌᐱᒫᑎᓯᒡ᙮ ᐋᔕ ᑕᔥ ᐌᑎ ᑳᓬᐊᓬᐄᕽ Galilee ᑭᑕᐎᐲᐃᑯᐙ᙮ ᒦ ᐃᒫ ᑫᔑ ᐙᐸᒣᒃ᙮ ᒫᒥᑲᐎᒃ ᑕᔥ ᐃᐃ ᑳᐃᓂᓇᑰᒃ, ᐅᑮᐃᑯᐙᓐ᙮
8ᒦᑕᔥ ᔐᒫᒃ ᑳᐃᔑ ᓇᑲᑕᒧᐙᒡ ᐃᐃ ᒌᐯᑲᒥᒃ ᐁᑮ ᑯᑖᒋᐙᒡ᙮ ᔖᑰᒡ ᐃᑕᔥ ᐐᑫ ᑮᒌᑫᑕᒨᒃ, ᐁᑮᐊᐸᑑᐙᒡ ᐁᐐᐐᑕᒪᐙᐙᒡ ᐃᐃ ᑭᑭᓄᐊᒪᐙᑲᓇᐞ᙮
9ᓭᓴᑰᒡ ᑕᔥ ᐅᑮᓇᑭᔥᑳᑯᐙᓐ ᒋᓴᓲᓐ: ᐴᔔ, ᐁᐃᑯᐙᒡ᙮ ᐅᑮ ᓴᑭᓯᑌᓈᐙᓐ ᓴ ᐁᑮᐅᒋᒌᑾᓃᑕᐙᐙᒡ᙮ 10ᒦᑕᔥ ᑳᐃᑯᐙᒡ: ᑫᑯ ᓭᑭᓯᑫᒃ! ᒫᒑᒃ ᓴ, ᐊᐎᑲᓅᓂᑾᒃ ᓃᒋᑭᐌᔭᒃ#28.10 ᓃᒋᑭᐌᔭᒃ: ᐅᑭᑭᓄᐊᒪᐙᑲᓇᐞ ᐄᑐᒃ ᐃᐃ ᑳᑮ ᑕᔑᒫᒡ᙮ ᒋᐃᔖᐙᒡ ᑳᓬᐊᓬᐄᕽ, ᒦᑕᔥ ᐌᑎ ᑫᔑ ᐙᐸᒥᐙᒡ, ᐅᑮᐃᑯᐙᓐ᙮
ᑳᑮᐃᓈᒋᒧᐙᒡ ᐃᐃ ᑳᑮ ᑲᓇᐌᑕᒧᐙᒡ ᒌᐯᑲᒥᒃ
11ᒣᒀ ᑕᔥ ᐁᐊᓂ ᐱᒥᐊᔮᐙᒡ ᐃᑭ ᐃᑴᐗᒃ, ᐋᓂᑕ ᑕᔥ ᔑᒫᑲᓂᔕᒃ ᑳᑮ ᑲᓇᐌᑕᒧᐙᒡ ᒌᐯᑲᒥᒃ, ᑮᑮᐌᐃᔖᐗᒃ ᐌᑎ ᒉᕒᐆᓴᓬᐊᒥᕽ Jerusalem ᐁᑮᐐᑕᒪᐙᐙᒡ ᑭᒋᐊᓇᒥᐁᐎᑭᒫᐞ ᑲᑭᓇ ᑫᑰᓂᓂ ᑳᑮᐃᓇᑲᒥᑲᓂᓂᒃ᙮ 12ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᓃᑳᓂᓯᐙᒡ ᒎᐗᒃ ᑮᐅᓀᑕᒨᒃ ᐋᓃᓐ ᑫᐃᔑᒋᑫᐙᒡ᙮ ᒦᑕᔥ ᑳᐃᔑ ᒦᓈᐙᑦ ᓃᐳᐗᐞ ᔔᓂᔮᓐ ᐃᓂ ᔑᒫᑲᓂᔕᐞ, 13ᐁᐃᓈᐙᒡ: ᐅᐅ ᓴ ᑭᑲ ᐃᑭᑐᒻ: ᐅᑭᑭᓄᐊᒪᐙᑲᓇᐞ ᑮᐱ ᑕᑯᔑᓅᐞ ᐁᑎᐱᑲᓂᓂᒃ ᒣᒀ ᐁᓂᐹᔮᕽ, ᒦᑕᔥ ᐄᓴᓐ ᑳᐃᔑ ᑭᒨᑎᓂᒡ ᐃᐃ ᐅᐐᔭᐤ᙮ 14ᑮᔥᐱᓐ ᑕᔥ ᑭᒋᐅᓇᔓᐌᐎᑭᒫ ᓅᑕᕽ ᐅᐅᐌᓂ, ᓃᓇᐎᓐᑦ ᓴ ᓂᑲ ᑲᔥᑭᒫᓈᓐ ᑮᓇᐙ ᑫᑰᓐ ᒋᐸᑲᒥᔥᑳᑯᓯᐌᒃ, ᐅᑮᐃᓈᐙᐞ᙮
15ᐃᑭ ᑕᔥ ᐅᑲᓇᐌᒋᑫᒃ ᐅᑮᐅᑖᐱᓈᐙᓐ ᐃᓂ ᔔᓂᔮᓐ, ᐁᑮᐃᔑᒋᑫᐙᒡ ᑳᑮᐃᓂᑣ᙮ ᒦᑕᔥ ᒎᐗᒃ ᑫᔮᐱ ᓅᑯᒻ ᑳᑮᔑᑲᓂᓂᒃ ᐅᐅ ᐯᐹᐃᑭᑐᐙᒡ᙮
ᒋᓴᔅ ᐁᑮᓈᑯᓰᑕᐙᒡ ᐅᑭᑭᓄᐊᒪᐙᑲᓇᐞ
(Mark 16.14-18; Luke 24.36-49; John 20.19-23; Acts 1.6-8)
16 # Mat 26.32; Mark 14.28. ᐃᑭ ᑕᔥ ᒥᑖᔑᐯᔑᒃ 11 ᑭᑭᓄᐊᒪᐙᑲᓇᒃ ᑮᐃᔖᐗᒃ ᐌᑎ ᑳᐃᔑ ᐱᑾᑎᓈᓂᒃ ᑳᓬᐊᓬᐄᕽ Galilee ᑳᑮᐃᑯᐙᒡ ᒋᓴᓲᓐ ᒋᐃᔖᐙᒡ᙮ 17ᐊᐲ ᑕᔥ ᐁᐙᐸᒫᐙᒡ ᐅᑮᐅᒋᒌᑾᓃᑕᐙᐙᓐ᙮ ᐋᓂᑕ ᑕᔥ ᑳᐐᓐ ᐅᑮ ᑾᔭᑴᓂᒫᓯᐙᐙᓐ᙮ 18ᒋᓴᔅ ᐃᑕᔥ ᐯᔓ ᐅᑮ ᐱᓈᓯᑲᐙᐞ ᐁᑮᐃᓈᒡ: ᑲᑭᓇ ᓴ ᑲᔥᑭᐁᐎᓯᐎᓐ ᓂᑮᒦᓂᑰᐎᔅ ᑲᑭᓇ ᑫᑰᓐ ᒋᑎᐯᑕᒫᓐ ᑭᒋᑮᔑᑯᕽ, ᐊᑮᕽ ᑲᔦ᙮ 19#Acts 1.8. ᒫᒑᒃ ᑕᔥ, ᓈᓯᑲᐎᑾᒃ ᐃᑭ ᑲᑭᓇ ᑳᑕᓶᐙᓇᑭᓯᐙᒡ ᐯᒫᑎᓯᐙᒡ, ᑭᑭᓄᐊᒪᐎᑾᒃ ᒋᐱᒥᓂᔕᐅᐙᒡ᙮ ᓰᑲᐊᑕᐎᑾᒃ ᑲᔦ ᐅᑎᔑᓂᑳᓱᐎᓂᓃᕽ ᐃᓂ ᐌᔫᓯᒥᒥᓐᒡ, ᐃᓂ ᑲᔦ ᐌᑯᓯᓯᒥᒥᓐᒡ, ᐃᓂ ᑲᔦ ᑭᔐᒪᓂᑑ ᐅᑕᒑᑾᓐ᙮ 20ᒋᑭᑭᓄᐊᒪᐌᒀ ᑲᔦ ᒋᑑᑕᒧᐙᒡ ᑲᑭᓇ ᑫᑰᓂᓂ ᑳᑮᐃᓂᓇᑰᒃ᙮ ᒨᔕᒃ ᑕᔥ ᐁᔮᑕᓱᑮᔑᒃ ᑭᑲ ᐐᒌᐎᓂᓂᒻ ᐲᓂᔥ ᐃᐃ ᐊᐲ ᒋᐃᔥᒀᓭᑭᓐ ᐅᓄ ᑳᐱᒥᓭᑭᓐ ᐅᐅᒫ ᐊᑮᕽ, ᑮᐃᑭᑐ᙮
Zvasarudzwa nguva ino
ᒫᑎᔪ 28: OJBS
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ojibwe Shorter Bible (Syllabic Script) © 2008 Canadian Bible Society