ᒫᑎᔪ 26
26
ᐁᐐᓂᓯᓐᒡ ᒋᓴᔅ
(Mark 14.1-2; Luke 22.1-2; John 11.45-53)
1ᐁᑮᐃᔥᒀ ᑭᑭᓄᐊᒫᑫᒡ ᑕᔥ ᒋᓴᔅ ᑲᑭᓇ ᑫᑰᓂᓂ, ᐅᑮᐃᓈᐞ ᑕᔥ ᐅᑭᑭᓄᐊᒪᐙᑲᓇᐞ: 2#Ex 12.1-27. ᓃᔓᑮᔑᑾᑳᓂᒃ ᐃᓴ ᐁᑭᑫᑕᒣᒃ ᒦᐃ ᐋᔕ ᒋᐱᒫᒋᐃᑰᐎ ᐐᑾᑎᓈᓂᐗᕽ, ᒦᑕᔥ ᐃᓂᓂ ᐅᑯᓯᓴᓐ ᒋᐃᔑᐎᒋᑲᓂᐎᓂᒡ ᒋᐊᑯᓴᑲᐅᒥᓐᒡ ᐋᔑᑌᔮᑎᑯᕽ, ᒦ ᑳᐃᑭᑐᒡ᙮
3ᐃᐃᔥ ᐯᔑᑾᓐ ᐊᐲ, ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᓃᑳᓂᓯᐙᒡ ᐅᓇᔓᐌᐎᓂᕽ ᑮᓇᑭᔥᑯᑖᑎᐗᒃ ᒋᐅᓈᑯᓂᑫᐙᒡ ᐃᐃᒫ ᐅᐙᑳᐃᑲᓂᓃᕽ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ ᑫᔭᐸᔅ Caiaphas ᑳᑮᐃᔑᓂᑳᓱᓂᒡ, 4ᐁᑮᐅᓀᑕᒧᐙᒡ ᐋᓃᓐ ᑫᑮᐃᔑ ᑮᒨᒋ ᑳᒋᑎᓈᐙᒡ ᒋᓴᓲᓐ ᐁᐐᓂᓵᐙᒡ᙮ 5ᑳᐐᓐ ᐃᐃ ᑭᑖᑮᐃᔑᒋᑫᓰᒥᓐ ᒣᒀ ᐁᐐᑾᑎᓈᓂᐗᕽ, ᒫᑭᔖ ᐅᓵᒻ ᑖᐅᒻᐺᑲᒥᑭᓯᓈᓂᐗᓐ, ᑮᐃᑭᑐᐗᒃ᙮
ᐃᑴ ᑳᑮ ᐴᓯᑎᒀᓀᓈᒡ ᒋᓴᓲᓐ
(Mark 14.3-9; John 12.1-8)
6ᒣᒀ ᑕᔥ ᒋᓴᔅ ᐁᐊᔮᒡ ᐃᐃᒫ ᓵᐃᒪᓇᓐ Simon ᑳᑮᐅᒥᑮᐙᐱᓀᓂᐸᓐ ᐅᐙᑳᐃᑲᓂᓃᕽ ᐃᐃᒫ ᐯᑕᓃᕽ Bethany ᐆᑌᓇᐌᓯᕽ, 7#Luke 7.37-38. ᐃᑴᐗᓐ ᐅᑮ ᐱᓈᓯᑳᑰᓐ ᐁᑮ ᐲᑑᓂᒡ ᐴᓯᒥᓈᑾᐅᓂᓂ ᐐᑫ ᐁᑮᐋᑾᑭᑌᓂᒃ, ᑳᑮᐃᔑ ᐲᑌᓂᒃ ᐋᓬᐊᐹᔅᑕᕒ alabaster ᐊᓯᓃᐎᐅᒨᑕᔮᐱᑯᕽ᙮ ᒦᑕᔥ ᑳᐃᔑ ᓰᑭᓇᒥᓂᒡ ᒥᓈᑾᐅᓂᓂ ᐅᑎᒀᓂᕽ, ᒣᒀ ᐁᐊᔫᐱᒣᔑᕽ ᐁᐐᓯᓂᒡ᙮ 8ᑭᑭᓄᐊᒪᐙᑲᓇᒃ ᐁᑮᐙᐸᑕᒧᐙᒡ ᑮᐃᑭᑐᐗᒃ ᐁᑮᒫᓈᐸᑕᒧᐙᒡ: ᐁᑕᑕᐌ ᑮᑭᒋᐗᓂᒋᑫᒻ! 9ᐃᐃ ᓴ ᒥᓈᑾᐅᓐ ᐋᐱᒋ ᓃᐳᐗᐞ ᑖᑮᐃᓇᑭᑌ ᑮᔥᐱᓐ ᐊᑖᐙᑲᓂᐗᑭᐸᓐ᙮ ᔔᓂᔮᓐ ᑕᔥ ᑖᑮᒦᓈᐗᒃ ᑳᑭᑎᒫᑭᓯᐙᒡ᙮ ᒦ ᑳᐃᑭᑐᐙᒡ᙮
10ᒋᓴᔅ ᐅᑮ ᑭᑫᓂᒫᐞ ᐋᓃᓐ ᑳᐃᑭᑐᓂᒡ, ᒦᑕᔥ ᐁᑮᐃᓈᒡ: ᐌᑯᓀᓐ ᐌᒋᑲᑴᐗᓈᐁᒃ ᐊᐊ ᐃᑴ? ᐋᐱᒋ ᓴ ᐅᓂᔑᔑᓐ, ᒥᓄᓈᑾᓂᓂ ᑲᔦ ᐃᐃ ᑳᑑᑕᐎᔑᒡ᙮ 11#Deut 15.11. ᑳᑭᑎᒫᑭᓯᐙᒡ ᐃᓴ ᒨᔕᒃ ᑭᐐᒌᐙᐙᒃ, ᓃᓐ ᑕᔥ ᑳᐐᓐ ᒨᔕᒃ ᑭᑲ ᐐᒌᐎᓰᒻ᙮ 12ᐅᐅᐌᓂ ᓴ ᑳᓰᑭᓇᕽ ᒥᓈᑾᐅᓂᓂ ᓂᐐᔭᐎᕽ, ᒦᓴ ᐱᑯ ᑖᐱᔥᑰ ᐁᑾᔮᒋᑑᒡ ᓂᐐᔭᐤ ᐁᐐᓂᑾᐅᑰᔮᓐ᙮ 13ᑫᑫᑦ ᑕᔥ ᑭᑎᓂᓂᓂᒻ, ᑕᔑᑌᒃ ᓴ ᐃᐃ ᒥᓍᒋᒧᐎᓐ ᒥᓯᐌ ᐊᑮᕽ, ᑕᑎᐹᒋᒫ ᓴ ᐊᐊ ᐃᑴ ᐋᓃᓐ ᑳᐃᔑᒋᑫᒡ ᒋᒫᒥᑲᐎᓄᑕᐎᓐᒡ, ᑮᐃᑭᑐ᙮
ᒎᑕᔅ ᐁᐃᓀᑕᕽ ᐁᐐᒪᒥᔑᒫᒡ ᒋᓴᓲᓐ
(Mark 14.10-11; Luke 22.3-6)
14ᒦᑕᔥ ᐃᐃ, ᐯᔑᒃ ᐃᑭ ᑳᒥᑖᔑᓃᔑᐙᒡ ᑭᑭᓄᐊᒪᐙᑲᓇᒃ, ᒎᑕᔅ ᐃᔅᑫᕒᐃᔭᑦ Judas Iscariot, ᑳᐃᔑ ᐊᑕᐙᐸᒫᒡ ᑭᒋᐊᓇᒥᐁᐎᑭᒫᐞ 15ᐁᑮ ᑲᓅᓈᒡ: ᐌᑯᓀᓐ ᑫᒦᔑᔦᑭᐸᓐ ᐃᔑᐎᓂᓇᑰᒃ ᑳᔑ ᐊᔮᒡ ᒋᓴᔅ? ᐅᑮᐃᓈᐞ᙮ ᒦᑕᔥ ᑳᐃᔑ ᓴᑲᑲᑭᒫᓂᒡ ᐃᓂ ᔔᓂᔮᓐ, ᓂᓯᒥᑕᓇ ᑭᒋᐙᐹᐱᑯ ᔔᓂᔮᓴᐞ#26.15 ᓂᓯᒥᑕᓇ ᑭᒋᐙᐹᐱᑯ ᔔᓂᔮᓴᐞ: ᐯᔑᒃ ᑭᒋᐙᐹᐱᑯ ᔔᓂᔮᔅ ᑮᐊᐲᑌᑖᑯᓯ ᓃᐎᓐ ᐙᐹᐱᑯ ᔔᓂᔮᓴᒃ ᙮ ᐁᑮᒦᓂᑯᒡ᙮ 16ᒦᑕᔥ ᐃᐃ ᐊᐲ ᒎᑕᔅ ᑳᐃᔑ ᒫᒌᐊᑕᐙᐸᑕᕽ ᑮᔥᐱᓐ ᐃᔑᓭᓂᒃ ᐁᐐᐃᔑᐎᓈᒡ ᐋᑎ ᐁᔑ ᐊᔮᓂᒡ ᐃᓂ ᒋᓴᓲᓐ᙮
ᒋᓴᔅ ᐁᑮᐐᒋᐐᓯᓃᒫᒡ ᐅᑭᑭᓄᐊᒪᐙᑲᓇᐞ
(Mark 14.12-21; Luke 22.7-13; John 13.21-30)
17ᓂᑕᒻ ᐃᑕᔥ ᐁᐐᑾᑎᐎᑮᔑᑲᓂᓂᒃ ᐊᐲ ᑮᐊᒧᒥᓐᒡ ᐸᑴᔑᑲᓇᓐ ᑳᑮᐅᐱᓯᑲᓂᐎᓯᓂᒃ,#26.17 ᐸᑴᔑᑲᓇᓐ ᑳᑮᐅᐱᓯᑲᓂᐎᓯᓂᒃ: ᐙᐸᑕᓐ ᐱᒫᒋᐃᑰᐎ ᐐᑾᑎᐎᓐ, ᐃᑭᑐᐎᓇᓐ ᑳᔑ ᐅᔑᐲᐃᑳᑌᑭᓐ᙮ ᑭᑭᓄᐊᒪᐙᑲᓇᒃ ᐅᑮᓈᓯᑲᐙᐙᓐ ᒋᓴᓲᓐ ᐁᑮᐃᓈᐙᒡ: ᐋᑎ ᑕᔥ ᓃᓇᐎᓐᑦ ᑫᔑ ᑾᔮᒋᑕᒫᑰᔭᓐ ᒋᐱᒫᒋᐃᑰᐎ ᐐᑾᑎᕽ? ᑮᐃᑭᑐᐗᒃ᙮
18ᐅᐅ ᑕᔥ ᐅᑮᐃᓈᐞ: ᐊᑕᐙᐸᒥᒃ ᓴ ᐯᔑᒃ ᐃᓂᓂ ᐃᐃᒫ ᐆᑌᓈᕽ᙮ ᐅᐅ ᑕᔥ ᑭᑲ ᐃᓈᐙ: ᓂᑭᑭᓄᐊᒫᑫᒥᓈᓐ ᓴ ᐃᑭᑐ: ᐋᔕ ᐯᔓᓈᑾᓐ ᐃᐃ ᑳᐐᐃᔑᓭᔮᓐ, ᓂᐐᐐᑑᐸᒫᒃ ᓴ ᓂᑭᑭᓄᐊᒪᐙᑲᓇᒃ ᐃᐃᒫ ᑭᐙᑳᐃᑲᓂᕽ, ᐁᐐᐐᒋᐐᓯᓃᒪᒀ ᐅᐅ ᐱᒫᒋᐃᑰᐎ ᐐᑾᑎᐎᓐ᙮
19ᑭᑭᓄᐊᒪᐙᑲᓇᒃ ᑕᔥ ᑮᐃᔑᒋᑫᐗᒃ ᑳᑮᐃᑯᐙᒡ ᒋᓴᓲᓐ ᐁᑮ ᑾᔮᒋᑑᐙᒡ ᑳᐐᐃᔑ ᐱᒫᒋᐃᑰᐎ ᐐᑾᑎᐙᒡ᙮
20ᐁᐊᓂ ᐅᓈᑯᔑᓂᓂᒃ ᐃᑕᔥ ᑮᐅᔑᔑᓅᒃ ᒋᓴᔅ, ᐅᑭᑭᓄᐊᒪᐙᑲᓇᐞ ᑲᔦ, ᐁᐐᐐᓯᓂᐙᒡ᙮ 21ᒣᒀ ᑕᔥ ᐁᐐᓯᓂᐙᒡ ᒋᓴᔅ ᑮᐃᑭᑐ: ᑭᑎᓂᓂᓂᒻ, ᐯᔑᒃ ᐅᐅᒫ ᓂᑲ ᑑᑖᒃ ᒋᑕᑯᓂᑰᐗᒃ, ᑮᐃᑭᑐ᙮
22ᑭᑭᓄᐊᒪᐙᑲᓇᒃ ᑕᔥ ᑮᒫᓀᑕᒨᒃ ᐁᑮᐃᔑ ᑲᑴᒋᒫᐙᒡ ᒣᒣᔥᑾᒡ: ᑌᐯᒋᑫᔭᓐ, ᑳᐐᓐ ᐄᑐᒃ ᓃᓐ ᑳᐃᔑᔭᓐ?
23 # Psa 41.10. ᒋᓴᔅ ᑕᔥ ᑮᐃᔑ ᓇᑴᑕᒻ: ᑮᓇᐙ ᓴ ᑳᐐᒋᐐᓯᓃᒥᓇᑰᒃ ᐯᔑᒃ ᑳᒉᑭᐲᓈᒡ ᐅᐸᑴᔑᑲᓂᒪᓐ, ᑫᓃᓐ ᑳᐃᔑ ᒉᑭᐲᓂᒪᒃ ᓂᐸᑴᔑᑲᓂᒪᓐ ᐅᓈᑲᓂᕽ, ᒦᓴ ᐊᐌ ᑳᐐ ᑑᑕᐎᒡ᙮ 24ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ ᒋᓂᐳᓂᒡ ᐃᓂ ᐃᓂᓂ ᐅᑯᓯᓴᓐ᙮ ᑌᐺ ᓴ ᓂᑲ ᓂᑉ᙮ ᐋᐱᒋ ᓴ ᑕᑰᐹᓯᓈᑯᓯ ᐊᐊ ᐃᓂᓂ ᑳᐐ ᑑᑕᐙᒡ ᐃᓂ ᐃᓂᓂ ᐅᑯᓯᓴᓐ ᒋᑕᑯᓂᒥᓐᒡ᙮ ᐋᐱᒋ ᑖᑮᐅᓂᔑᔑᓂᓂ ᐐᑳ ᓂᑖᐎᑭᓯᑭᐸᓐ ᐊᐊ ᐃᓂᓂ, ᑮᐃᑭᑐ᙮
25ᒎᑕᓴᓐ Judas ᑕᔥ ᑳᐐᒪᒥᔑᒥᑯᒡ ᐅᑮᐃᑰᓐ: ᐅᑭᑭᓄᐊᒫᑫ, ᑳᐐᓐ ᐄᑐᒃ ᓃᓐ ᑳᐃᔑᔭᓐ? ᐅᑮᐃᑰᓐ᙮
ᒋᓴᔅ ᐅᑮᐃᓈᓐ: ᑮᓐ ᐄᑐᒃ ᑳᐃᑎᓱᔭᓐ᙮
ᒋᓴᔅ ᐃᔥᒀᒡ ᐁᑮᐐᒋᐐᓯᓃᒫᒡ ᐅᑭᑭᓄᐊᒪᐙᑲᓇᐞ
(Mark 14.22-26; Luke 22.14-20; 1 Corinthians 11.23-25)
26ᒣᒀ ᑕᔥ ᐁᐐᓯᓂᐙᒡ ᒋᓴᔅ ᐅᑮᐅᑖᐱᓈᓐ ᐸᑴᔑᑲᓇᓐ ᐁᑮᓇᓈᑯᒧᒡ᙮ ᒦᑕᔥ ᑳᐃᔑ ᐸᐸᑴᐱᓈᒡ, ᐁᑮᒫᒦᓈᒡ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐅᑖᐱᓂᒃ ᐊᐊ ᐸᑴᔑᑲᓐ, ᐊᒧᒃ, ᒦ ᐄᑐᒃ ᐃᐃ ᓂᐐᔭᐤ, ᑮᐃᑭᑐ᙮
27ᒦᓇᐙ ᑕᔥ ᐅᑮᐅᑖᐱᓈᓐ ᒥᓂᒀᑲᓐ, ᐁᑮᓇᓈᑯᒧᒡ, ᐁᑮᒦᓈᒡ ᐁᑮᐃᓈᒡ: ᒦ ᓴ ᐃᒫ ᐅᒋ ᒥᓂᑴᒃ ᑲᑭᓇ ᑳᑕᔑᔦᒃ᙮ 28#Ex 24.8; Jer 31.31-34. ᒦᓴ ᐃᐌ ᓂᒥᔅᑸᒻ᙮ ᒦ ᐃᒫ ᑭᔐᒪᓂᑑ ᐅᑕᔓᑕᒫᑫᐎᓐ ᑳᐅᒋ ᒫᒋᐊᓄᑮᒪᑲᓂᓂᒃ᙮ ᒦᐃ ᑳᐹᑏᓄᐙᒡ ᑳᐅᒋ ᓰᑭᓇᒪᐎᑣ ᒥᔅᑸᓂ ᒋᐴᓀᑕᒪᐎᑣ ᐅᒪᒋᑑᑕᒧᐎᓂᐙᓐ᙮ 29ᑭᐐᑕᒪᐎᓂᓂᒻ ᐃᑕᔥ, ᑳᐐᓐ ᓴ ᐐᑳ ᒦᓇᐙ ᓂᑲ ᒥᓂᑴᓰ ᐅᐅ ᔔᒥᓈᐳ, ᐹᒫ ᓴ ᐌᑎ ᑭᑲ ᐐᒋᒥᓂᑴᒥᓂᓂᒻ ᒋᒥᓂᑴᔭᕽ ᐅᔥᑭᔔᒥᓈᐳ ᐊᐲ ᓂᑌᑌ ᑮᔑᓯᑑᒡ ᐅᑎᐯᒋᑫᐎᓐ᙮
30ᒦᑕᔥ ᑳᐃᔑ ᐊᓇᒥᐁᓂᑲᒧᐙᒡ,#26.30 ᑳᐃᔑ ᐊᓇᒥᐁᓂᑲᒧᐙᒡ: ᐃᓂ ᓴ ᓂᑲᒧᓇᓐ ᑫᑌᒪᓯᓇᐃᑲᓂᕽ ᑳᐅᔑᐲᐃᑳᑌᓂᑭᓐ 115 ᐲᓂᔥ 118, ᒦᐗᓐ ᓴ ᐃᓂ ᑳᓂᑖᓂᑲᒧᐙᒡ ᑮᐃᔥᒀ ᐱᒫᒋᐃᑰᐎ ᐐᑾᑎᐙᒡ᙮ ᐁᑮᐊᓂ ᒫᒑᐙᒡ ᐌᑎ ᐁᑮᐃᔖᐙᒡ ᐱᑾᑎᓈᕽ ᐋᓬᐃᑉ Olive ᑭᑎᑳᓈᑎᑯᑳᕽ ᑳᑮᐃᔑᓂᑳᑌᒃ᙮
ᐲᑕᕒ ᐁᑮᐐᑕᒪᐎᓐᒡ ᒋᐋᓇᐌᓂᒫᒡ ᒋᓴᓲᓐ
(Mark 14.27-31; Luke 22.31-34; John 13.36-38)
31 # Zech 13.7. ᒋᓴᔅ ᑕᔥ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᓅᑯᒻ ᓴ ᑳᑎᐱᑲᒃ ᑲᑭᓇ ᑳᑕᔑᔦᒃ ᑭᑲ ᑕᐸᓰᒻ, ᒋᓇᑲᔑᔦᒃ᙮ ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ,
ᑭᔐᒪᓂᑑ ᓴ ᐅᑲ ᐸᑭᑌᐙᓐ ᐅᑲᓇᐎᒫᓇᒑᓂᔑᐌᓐ,
ᑳᐅᑯᐊᔮᓂᒡ ᑕᔥ ᒫᓇᒑᓂᔕᐞ ᑕᒥᒋᐲᐎᐸᐃᐌᐗᐞ,
ᐃᑭᑑᒪᑲᓐ᙮ 32#Mat 28.16. ᐊᐲ ᑕᔥ ᑮᐌᐱᒫᑎᓯᔮᓐ, ᑭᑲᐊᐎᐲᐃᓂᓂᒻ ᐌᑎ ᑳᓬᐊᓬᐄ Galilee ᐊᑮᕽ, ᐅᑮᐃᓈᐞ᙮
33ᐅᑮᐃᑰᓐ ᐃᑕᔥ ᐲᑕᕒᐆᓐ Peter: ᒥᓴᐙ ᓴ ᑮᔥᐱᓐ ᑯᑕᒃ ᓇᑲᓂᒀ, ᑳᐐᓐ ᓃᓐ ᐐᑳ ᑭᑲ ᓇᑲᓂᓯᓅᓐ, ᐅᑮᐃᑰᓐ᙮
34ᒋᓴᔅ ᑕᔥ ᐅᑮᐃᓈᓐ: ᑭᑎᓂᓐ ᓴ, ᐅᐅ ᓴ ᓅᑯᒻ ᑳᑎᐱᑲᒃ, ᒋᑆ ᓅᑖᑯᓯᒡ ᓈᐯᐹᑲᐋᒀᓐ, ᒦ ᓴ ᐋᔕ ᓂᓯᕽ 3 ᒋᐃᑭᑐᔭᓐ ᐁᑭᑫᓂᒥᓯᐗᓐ, ᐅᑮᐃᓈᓐ᙮ 35ᐲᑕᕒ ᑕᔥ ᑮᐃᑭᑐ: ᑳᐐᓐ ᐐᑳ ᓂᑖ ᐃᑭᑐᓰ ᐃᐃ ᑳᐃᔑᔭᓐ, ᒥᓴᐙ ᐱᑯ ᐐᐐᒋ ᓂᐴᒥᓈᓐ, ᑮᐃᑭᑐ᙮
ᒦᑕᔥ ᐯᔑᑾᓐ ᑯᑕᒃ ᑭᑭᓄᐊᒪᐙᑲᓇᒃ ᑳᐃᑭᑐᐙᒡ᙮
ᒋᓴᔅ ᐁᑮᐃᔖᒡ ᐃᐃᒫ ᑫᓭᒪᓃᕽ
(Mark 14.32-42; Luke 22.39-46)
36ᒋᓴᔅ ᑕᔥ ᐅᑮᐃᔑᐎᓈᐞ ᐅᑭᑭᓄᐊᒪᐙᑲᓇᐞ ᐊᔮᐎᓂᕽ ᑫᓭᒪᓂ#26.36 ᑫᓭᒪᓂ: ᒦ ᐃᐌ ᐊᔮᐎᓐ ᐁᔑᐲᐌᑭᓱᓂᒡ ᑭᑎᑳᓈᑎᑰᐞ, ᐃᐃᒫ ᑳᑮᐃᔑᐊᔮᒃ ᓂᑳ ᐲᐊᓄᕽ ᐃᓇᑫ ᐁᔑ ᐋᓴᒪᑎᓈᒃ ᐃᐃ ᐱᑾᑎᓈ ᐋᓬᐃᑉ ᑭᑎᑳᓈᑎᑯᑳᕽ ᐁᐃᔑᐐᑌᒃ᙮ ᐋᓬᐃᑉ ᔔᒥᓇᒃ ᑳᐃᔑᓰᓂᐲᑲᐃᑳᓱᐙᒡ ᐃᒋᑳᑌ ᐃᐃ ᐃᔑᓂᑳᓱᐎᓐ ᑫᓭᒪᓂ᙮ Gethsemane ᑳᐃᔑᓂᑳᑌᓂᒃ᙮ ᐅᐅ ᑕᔥ ᐁᑮᐃᓈᒡ: ᒦᓴ ᐅᐅᒫ ᐊᐱᒃ, ᐌᑎ ᑕᔥ ᓃᓐ ᓂᐐᐃᔖ ᐁᐐᐊᑕ ᐊᓇᒥᐋᔮᓐ, ᑮᐃᑭᑐ᙮ 37ᒦᑕᔥ ᐅᐅ ᐁᑕ ᑳᒫᒌᓈᒡ, ᐲᑕᕒᐆᓐ Peter, ᐃᓂᔥ ᑲᔦ ᓃᔑᓐ 2 ᓭᐸᑏᓐ Zebedee ᐅᑯᓯᓯᓂ᙮ ᑲᒀᑕᑫᑕᒧᐎᓐ, ᐐᓴᑫᑕᒧᐎᓐ ᑲᔦ ᐅᑮᐅᑎᓯᑯᓐ ᒋᓴᔅ᙮ 38ᒦᑕᔥ ᑳᐃᓈᒡ: ᑫᑳ ᐅᔕ ᓂᓂᓯᑯᓐ ᓂᒫᓀᑕᒧᐎᓐ ᐁᐲᒋ ᑲᒀᑕᑫᑕᒫᓐ᙮ ᒦᑕᔥ ᐅᐅᒫ ᐊᔮᒃ, ᑫᑯ ᑫᑮᓇᐙ ᓂᐹᑫᒃ, ᐅᑮᐃᓈᐞ᙮
39ᓈᑫ ᑕᔥ ᐐᓐ ᐙᓴ ᑮᐃᔖ ᐁᑮᐊᓂᒥᑯᑖᒡ, ᐁᑮᐃᔑ ᐊᓇᒥᐋᒡ: ᓂᑌᑌ! ᑮᔥᐱᓐ ᓴ ᐃᔑᓈᑾᑭᐸᓐ, ᑕᑲ ᐅᑖᐱᓇᒪᐎᔑᓐ ᐅᐅ ᒥᓂᒀᑲᓐ ᑳᐐᐃᔑ ᑲᒀᑕᑭᑑᔮᓐ᙮ ᑳᐐᓐ ᓴ ᓃᓐ ᐁᔑ ᒥᓴᐌᑕᒫᓐ, ᑮᓐ ᓴ ᐁᔑ ᐊᑕᐌᑕᒪᓐ ᑕᐃᔑᒋᑳᓂᐗᓐ, ᑮᐃᑭᑐ᙮
40ᐁᑮ ᑮᐌᓈᓯᑲᐙᒡ ᑕᔥ ᐃᐃ ᓂᓯᓐ 3 ᐅᑭᑭᓄᐊᒪᐙᑲᓇᐞ, ᐅᑮᐙᐸᒫᐞ ᐁᓂᐹᓂᒡ᙮ ᐲᑕᕒᐆᓐ ᓴ ᐅᑮᐃᓈᓐ: ᐌᑯᓀᓐ ᐃᑕᔥ ᐌᒋ ᑆᓇᐎᑑᔦᒃ ᒋᓂᐹᓯᐌᒃ ᑲᓇᑫ ᐯᔑᑯ ᑎᐸᐃᑲᓐ? 41ᐊᔕᐙᐱᒃ ᓴ, ᐊᓇᒥᐋᒃ ᑲᔦ, ᒋᐅᑎᓯᑯᓯᐌᒃ ᐃᐃ ᑳᐐᐃᔑ ᑯᒋᐃᑯᔦᒃ᙮ ᐋᓇᐐᓐ ᐁᒥᓴᐌᑕᒣᒃ ᒋᑑᑕᒣᑭᐸᓐ ᐃᐃ ᑳᑾᔭᑯᓈᑾᒃ, ᑳᐐᓐ ᑕᔥ ᑭᑌᐊᐲᒋᑌᐁᓰᒻ ᐃᐃ ᒋᐃᔑᒋᑫᔦᒃ, ᑮᐃᑭᑐ᙮
42ᒦᓇᐙ ᑕᔥ ᒋᓴᔅ ᑮᐊᓂ ᒫᒑ ᐁᑮᐊᑕ ᐊᓇᒥᐋᒡ᙮ ᓂᑌᑌ! ᑮᔥᐱᓐ ᐃᔑᓈᑾᒃ ᒋᐅᑖᐱᓂᑳᑌᓯᓄᒃ ᐅᐅ ᒥᓂᒀᑲᓐ ᑳᐐᐃᔑ ᑲᒀᑕᑭᑑᔮᓐ, ᐃᔑᓈᑾᒃ ᐃᑕᔥ ᒋᒥᓂᒀᑕᒫᓐ, ᑭᑎᓀᑕᒧᐎᓐ ᓴ ᑕᑑᒋᑳᑌ, ᑮᐃᑭᑐ᙮ 43ᐁᑮ ᑮᐌᐊᑕᐙᐸᒫᒡ ᐃᑕᔥ ᐅᑭᑭᓄᐊᒪᐙᑲᓇᐞ, ᐅᑮᐙᐸᒫᐞ ᐁᓇᓂᐹᓂᒡ ᐁᑮ ᑲᐐᑾᔑᓂᒡ᙮
44ᒦᓇᐙ ᑕᔥ ᒋᓴᔅ ᐅᑮᓇᑲᓈᐞ, ᓂᓯᕽ 3 ᐁᑮᐊᓇᒥᐋᒡ, ᐯᔑᑾᓐ ᐁᑮᐊᐎ ᐃᑭᑐᒡ᙮ 45ᒦᓇᐙ ᑕᔥ ᐅᑮᓈᓯᑲᐙᐞ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᑫᔮᐱ ᓇ ᑭᓂᐹᒻ, ᐁᐊᓉᔑᓀᒃ ᑲᔦ? ᐃᓇᔥᑫ ᒦ ᐅᔕ ᐃ ᐋᔕ ᐁᐯᔓᓈᑾᒃ ᑳᐐᐃᔑᓭᔮᓐ᙮ ᐃᓂᓂ ᐅᑯᓯᓴᓐ ᐃᓴ ᑕᐅᑖᐱᓂᑲᓂᐎᐗᓐ, ᒦᑕᔥ ᐅᒪᒋᑑᑕᒨᒃ ᒋᑑᑕᐙᐙᒡ ᐋᓃᓐ ᐃᑯ ᐁᔑ ᐊᑕᐌᑕᒧᐙᒡ᙮ 46ᐗᓂᔥᑳᒃ, ᐊᓂ ᒫᒑᑖ! ᐃᓈᐱᒃ, ᒦᓴ ᐗᐊ ᐃᓂᓂ ᑳᒪᒥᔑᐃᒡ! ᑮᐃᑭᑐ᙮
ᒋᓴᔅ ᐁᑮᐅᑖᐱᓂᑲᓂᐎᒡ
(Mark 14.43-50; Luke 22.47-53; John 18.3-12)
47ᒣᒀ ᑕᔥ ᒋᓴᔅ ᐁᑳᑮᑭᑐᒡ, ᒎᑕᔅ Judas ᑮᐱ ᑕᑯᔑᓐ, ᒦ ᓴ ᐃᓂ ᐯᔑᒃ ᑳᒥᑖᔑᓃᔑᓂᒡ ᒋᓴᔅ ᐅᑭᑭᓄᐊᒪᐙᑲᓇᐞ᙮ ᒎᑕᔅ ᐃᑕᔥ ᐅᑮᐱ ᐐᒌᐙᐞ ᐃᓂᓂᐗᐞ ᐁᐹᑏᓄᓂᒡ, ᐸᔑᐸᐃᑫᐎᑯᒫᓇᓐ, ᐸᑲᒫᑲᓇᓐ ᑲᔦ ᐁᑮ ᐲᑑᓂᒡ᙮ ᐅᑯ ᓴ ᑲᑭᓇ ᐅᑮ ᐲᒋᓂᔕᐅᑯᐙᐞ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑳᓃᑳᓂᓯᓂᒡ ᐅᓇᔓᐌᐎᓂᕽ᙮ 48ᑳᑮᒪᒥᔑᒥᐌᒡ ᐃᑕᔥ ᐅᑮᐃᓈᑯᐸᓐ: ᐊᐊ ᓴ ᐃᓂᓂ ᑫᐅᒌᒪᒃ, ᒦᓴ ᐊᐊᐌ ᑳᐊᑕᐌᓂᒣᒃ, ᐅᑖᐱᓈᑫᒃ ᐃᑕᔥ᙮
49ᔐᒫᒃ ᐃᑕᔥ ᐊᐊ ᒎᑕᔅ ᐅᑮᓈᓯᑲᐙᓐ ᒋᓴᓲᓐ ᐁᑮᐃᓈᒡ: ᐴᔔ, ᐅᑭᑭᓄᐊᒫᑫ! ᐅᑮᐃᓈᓐ᙮ ᒦᑕᔥ ᑳᐃᔑ ᐅᒌᒫᒡ᙮
50ᒋᓴᔅ ᑕᔥ ᐅᑮᐃᓈᓐ: ᓃᒌ, ᐌᔩᑉ ᓴ ᐃᔑᒋᑫᓐ ᑳᐐ ᐃᔑᒋᑫᔭᓐ! ᐅᑮᐃᓈᓐ᙮
ᐃᓂᓂᐗᒃ ᐃᑕᔥ ᑮᐲᔖᐗᒃ, ᐁᑮᐅᑖᐱᓈᐙᒡ ᐁᑮᒪᒫᒋᑯᓈᐙᒡ᙮
51ᐯᔑᒃ ᑕᔥ ᒋᓴᔅ ᑳᑮᐐᒌᐎᑯᒡ, ᐅᑮᒪᓂᐱᑑᓂ ᐸᔑᐸᐃᑫᐎᑯᒫᓂᓂ, ᐁᑮ ᐸᑭᑌᐙᓂᒡ ᐯᔑᒃ ᐅᑕᓄᑮᐋᑲᓂᓂ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ, ᒦᑕᔥ ᐁᑮ ᑮᔥᑭᐌᐸᑲᓈᑕᒪᐙᒡ ᐅᑕᐗᑳᓂ᙮ 52ᒋᓴᔅ ᑕᔥ ᐅᑮᐃᓈᓐ: ᐲᓇᐊᓐ ᓴ ᐃᐃ ᑭᐸᔑᐸᐃᑫᐎᑯᒫᓐ ᐋᑎ ᐁᔑᐲᑌᒃ᙮ ᑲᑭᓇ ᓴ ᑳᐋᐸᒋᑑᐙᒡ ᐃᐃ ᐸᔑᐸᐃᑫᐎᑯᒫᓐ, ᒦᓴ ᐃᐃᒫ ᑫᐅᒋ ᓂᔑᐗᓈᑎᓯᐙᒡ᙮ 53ᑳᐐᓐ ᐃᓇ ᑭᑭᑫᑕᓰᓐ ᒋᑲᓅᓇᑭᐸᓐ ᓂᑌᑌ ᒋᓈᑕᒪᐎᒡ? ᔐᒫᒃ ᐃᓴ ᐅᑖ ᐲᒋᓂᔕᐙᐞ ᑳᒥᑖᔑᓃᔗᐙᓇᑭᓯᓂᒡ ᑳᐊᔫᑯᐹᑏᓄᓂᒡ ᐁᒐᓬᐊᐞ᙮ 54ᑮᔥᐱᓐ ᓴ ᐃ ᐃᔑᒋᑫᔮᐹᓐ, ᑳᐐᓐ ᓴ ᐄᓴᓐ ᑖᐃᔑᓭᓯᓅᓐ ᑳᐃᔑᐲᐃᑳᑌᒃ ᑭᒋᒪᓯᓇᐃᑲᓐ, ᒦ ᐄᑐᒃ ᑳᐃᔑᐲᐃᑳᑌᒃ ᒋᐃᔑᓭᑭᐸᓐ, ᑮᐃᑭᑐ᙮
55 # Luke 19.47; 21.37. ᒋᓴᔅ ᐃᐃ ᐊᐲ ᐅᑮ ᑲᓅᓈᐞ ᐃᐃ ᑳᐹᑏᓄᓂᒡ ᑳᑮ ᐱᓈᓯᑳᑯᒡ: ᑖᐱᔥᑰ ᑮᒨᒋᔥᑮᐎᓂᓃᕽ ᑭᑑᑕᐎᔑᒻ, ᐸᔑᐸᐃᑫᐎᑯᒫᓇᓐ, ᐃᓂ ᑲᔦ ᐸᑲᒫᑲᓇᓐ ᐁᐋᐸᒋᑑᔦᒃ ᐁᐱ ᑳᒋᑎᓂᔦᒃ᙮ ᐁᑕᓱᑮᔑᒃ ᑕᔥ ᐁᑮᓇᒪᑕᐱᔮᓐ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐁᑭᑭᓄᐊᒫᑫᔮᓐ, ᑳᐐᓐ ᑭᑮᐅᑖᐱᓂᓰᒻ᙮ 56ᒦᑕᔥ ᐃᐃ ᑳᑮᐅᒋ ᐃᔑᓭᒃ, ᒪᔮ ᓴ ᑯ ᒋᐃᔑᓭᓂᒃ ᐋᓃᓐ ᑳᑮᐃᔑᐲᐃᑫᐙᒡ ᐃᑭ ᑳᑮ ᑲᓅᑕᒪᐙᐙᒡ ᑭᔐᒪᓂᑑᓐ, ᐅᑮᐃᓈᐞ᙮
ᒦᑕᔥ ᑲᑭᓇ ᐅᑭᑭᓄᐊᒪᐙᑲᓇᐞ ᑳᐃᔑ ᓇᑲᓂᑯᒡ ᐁᑮ ᑕᐸᓰᓂᒡ᙮
ᒋᓴᔅ ᐁᑮ ᑎᐹᑯᓂᑯᒡ ᒎᐗᐞ
(Mark 14.53-65; Luke 22.54-55, 63-71; John 18.13-14, 19-24)
57ᑫᔭᐸᔅ Caiaphas ᒫᐗᒡ ᑭᒋᐊᓇᒥᐁᐎᑭᒫ ᐅᐙᑳᐃᑲᓂᕽ ᓴ ᑮᐃᔑ ᒫᐗᑑᐱᐃᑎᐗᒃ ᐅᓇᔓᐌᐎᑭᑭᓄᐃᑫᒃ, ᐃᑭ ᑲᔦ ᑳᓃᑳᓂᓯᐙᒡ᙮ ᒦᑕᔥ ᐃᐃᒫ ᑳᐃᔑᐎᓂᑯᒡ ᐊᐊ ᒋᓴᔅ ᐃᐃ ᑳᑮ ᑕᑯᓂᑯᒡ᙮ 58ᐲᑕᕒ Peter ᑕᔥ ᐁᑯᑌᐹᐱᒡ ᑮᐱᒥᓂᔕᐃᑫ᙮ ᐃᐃᒫ ᓴ ᒫᐗᒡ ᑭᒋᐊᓇᒥᐁᐎᑭᒫᓐ ᐅᐙᑳᐃᑲᓂᓃᕽ ᐊᑾᒌᕽ ᑳᑮᐃᔑ ᐐᐱᒋᑳᑌᓂᒃ ᑮᐃᔖ᙮ ᐅᑮᐐᑕᐱᒫᐞ ᑲᔦ ᐃᐃ ᔑᒫᑲᓂᔕᐞ ᑳᑮᓂᑖ ᑲᓇᐌᒋᑫᓂᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐁᐐᐙᐸᑫᒡ ᐋᓃᓐ ᑫᔑ ᐃᔥᒀᑲᒥᑲᓂᓂᒃ᙮ 59ᑭᒋᐊᓇᒥᐁᐎᑭᒫᒃ ᑕᔥ ᐃᑭ ᑲᔦ ᑲᑭᓇ ᑳᓂᑖ ᐅᓈᑯᓂᑫᐙᒡ ᐅᑮ ᑲᑴᒥᑳᓈᐙ ᑫᑰᓂᓂ ᑳᑌᐺᐎᓂᐗᓯᓂᓂᒃ ᒋᐃᓈᒋᒥᒥᓐᒡ ᒋᓴᓲᓐ ᒋᐅᒋ ᓂᓯᒥᓐᒡ᙮
60ᐋᓇ ᑕᔥ ᐐᓐ ᐁᑮ ᐹᑏᓄᐙᒡ ᐊᐎᔭᒃ ᐁᑮᐱ ᓂᒥᓈᐌᑳᐸᐎᐙᒡ ᐁᑮ ᑮᐗᓂᒧᐙᒡ ᓅᒋᑯ ᐁᑮᐃᓈᐙᒡ ᒋᓴᓲᓐ, ᑳᐐᓐ ᓴ ᔖᑰᒡ ᑮᑌᐱᒥᒫᓰ ᐋᓃᓐ ᑳᐃᓂᒥᓐᒡ᙮ ᓃᔑᓐ ᐃᑕᔥ ᐃᓂᓂᐗᒃ ᑮᐸᓯᑸᐗᒃ 61#John 2.19. ᐁᑮᐃᑭᑐᐙᒡ: ᐊᐊ ᓴ ᐃᓂᓂ ᑮᐃᑭᑐ: ᓂᑖ ᑲᔥᑭᑑᓐ ᓴ ᒋᐲᑯᐱᑑᔮᓐ ᐃᐃ ᑭᔐᒪᓂᑑ ᐅᑕᓇᒥᐁᐎᑲᒥᒃ, ᒋᑮᐌᐸᑕᑭᑑᔮᐹᓐ ᑕᔥ ᓂᓱᑮᔑᑾᑳᒃ, ᑮᐃᑭᑐ, ᐅᑮᐃᓈᐙᓐ᙮
62ᒫᐗᒡ ᑭᒋᐊᓇᒥᐁᐎᑭᒫ ᑕᔥ ᑮᐸᓯᑸ ᐁᑮᐃᓈᒡ ᒋᓴᓲᓐ: ᑳᐐᓐ ᐃᓇ ᑫᑰᓐ ᑭᐐᐃᑭᑐᓰ ᐅᐅ ᑳᐃᔑ ᐊᓈᒥᒥᑰᔭᓐ? ᐅᑮᐃᓈᓐ᙮ 63ᒋᓴᔅ ᑕᔥ ᑳᐐᓐ ᑮᓅᑖᑎᓰ᙮ ᒫᐗᒡ ᑭᒋᐊᓇᒥᐁᐎᑭᒫᓐ ᑕᔥ ᐅᑮ ᑲᓅᓂᑰᓐ ᒦᓇᐙ᙮ ᐅᑎᔑᓂᑳᓱᐎᓂᕽ ᓴ ᑳᐱᒫᑎᓯᒡ ᑭᔐᒪᓂᑑ ᑭᑎᔑ ᑲᓅᓂᓐ ᒋᐃᔑᑌᐺᔭᓐ! ᐐᑕᒪᐎᔑᓈᒻ ᑮᔥᐱᓐ ᑮᓐ ᐁᑎᓄᐎᐗᓀᓐ ᑭᔐᒪᓂᑑ ᑳᐅᓀᓂᒫᒡ ᒋᐱᒫᒋᐃᐌᓂᒡ, ᑭᔐᒪᓂᑑ ᐅᑯᓯᓴᓐ, ᐅᑮᐃᑰᓐ᙮
64 # Dan 7.13. ᒋᓴᔅ ᑕᔥ ᐅᑮᐃᓈᓐ: ᒪᔮ ᑭᑌᐺ ᑳᐃᑭᑐᔭᓐ! ᐅᐅ ᑕᔥ ᑭᑎᓂᓂᓂᒻ: ᐐᐸ ᓴ ᑕᐃᔑᓭ ᒋᐙᐸᒥᒣᒃ ᐃᓂᓂ ᐅᑯᓯᓴᓐ ᒋᐊᐱᓂᒡ ᐅᑭᒋᓂᑭᓃᕽ ᐃᓇᑫ ᒫᐗᒋᑯ ᑳᒪᔥᑲᐎᓰᓂᒡ ᐱᑕᑯᔑᓂᓂᒡ ᐃᐃᒫ ᑭᒋᑮᔑᑰᐗᑸᕽ, ᑮᐃᑭᑐ᙮
65 # Lev 24.16. ᒫᐗᒡ ᑭᒋᐊᓇᒥᐁᐎᑭᒫ ᑕᔥ ᐁᓅᑕᕽ ᐅᐅᐌᓂ, ᐁᐲᒋ ᔒᑭᑕᕽ, ᐅᑮ ᑖᔥᑭᐱᑑᓇᓐ ᐅᑭᑭᔥᑭᑲᓇᓐ, ᐁᑮᐃᑭᑐᒡ: ᒦᓴ ᐅᐅ ᐁᐹᐱᓄᑕᐙᒡ ᑭᔐᒪᓂᑑᓐ! ᑳᐐᓐ ᓴ ᐊᐗᔑᒣ ᑭᓇᑕᐌᓂᒫᓯᐙᓈᓂᒃ ᐅᑎᐹᒋᒨᒃ᙮ ᑭᑮᓅᑕᐙᐙ ᐄᑐᒃ ᐁᐹᐱᓄᑖᑫᒡ᙮ 66ᐋᓃᓐ ᓴ ᑫᑑᑕᐎᑎᐸᓐ? ᐅᑮᐃᓈᐞ ᑳᐅᓈᑯᓂᑫᓂᒡ᙮
ᒦᑕᔥ ᐅᐅ ᑳᐃᑯᒡ: ᒦᓴ ᐃ ᐁᑲᔥᑭᑕᒫᓱᒡ ᒋᑮᓂᐳᐸᓐ᙮
67 # Isa 50.6. ᒦᑕᔥ ᑳᐃᔑ ᓴᓰᒀᓈᐙᒡ ᒋᓴᓲᓐ ᐅᐐᒀᓂᓃᕽ, ᐁᑮ ᐸᐸᑭᑌᐙᐙᒡ ᑲᔦ᙮ ᐃᑭ ᑕᔥ ᑳᑮ ᐸᐸᑭᑌᐙᐙᒡ 68ᐅᑮᐃᓈᐙᓐ: ᑮᓐ ᐄᑐᒃ ᑭᔐᒪᓂᑑ ᑳᐅᓀᓂᒥᒃ ᒋᐱᒫᒋᐃᐌᔭᓐ! ᐐᑕᒪᐎᔑᓈᒻ ᓴ ᐊᐌᓀᓐ ᐊᐊ ᑳᐸᑭᑌᐅᒃ!
ᐲᑕᕒ ᐁᑮᐃᑭᑐᒡ ᐁᑭᑫᓂᒫᓯᒃ ᒋᓴᓲᓐ
(Mark 14.66-72; Luke 22.56-62; John 18.15-18, 25-27)
69ᐲᑕᕒ Peter ᒣᒀ ᐁᓇᒪᑕᐱᒡ ᐃᐃᒫ ᐊᑾᒌᕽ ᑳᔑ ᐐᐱᒋᑳᑌᓂᒃ, ᐯᔑᒃ ᒫᐗᒡ ᑭᒋᐊᓇᒥᐁᐎᑭᒫ ᐅᑕᓄᑮᐋᑲᓇᓐ ᑳᑮᐃᑴᐎᓂᒡ ᐅᑮ ᐱᓈᓯᑳᑰᓐ ᐁᑮᐃᑯᒡ: ᑳᓬᐊᓬᐄᕽ Galilee ᓴ ᑳᐅᒌᒡ ᒋᓴᔅ, ᑫᑮᓐ ᓴ ᑭᑮᐐᒌᐙ, ᐅᑮᐃᑰᓐ᙮
70ᑮᐋᓉᑕᒻ ᐃᑕᔥ ᐁᑮ ᑲᓇᐙᐸᒥᑯᒡ ᑲᑭᓇ ᐊᐎᔭᐞ᙮ ᒦᑕᔥ ᑳᐃᑭᑐᒡ: ᐊᓂᔖ ᐅᔕ ᑭᑎᑭᑦ ᑳᐃᑭᑐᔭᓐ, ᐅᑮᐃᓈᓐ᙮ 71ᐃᔥᒀᑌᕽ ᐃᑕᔥ ᑮᐊᓂ ᐃᔖ ᑳᑮᐅᒋ ᐲᑎᑫᓈᓂᐗᓂᓂᒃ᙮ ᑯᑕᒃ ᐃᑕᔥ ᐊᓄᑮᐋᑲᓇᓐ ᑳᑮᐃᑴᐎᓂᒡ ᐅᑮᐙᐸᒥᑰᓐ, ᐁᑮᐃᓈᓂᒡ ᐃᐃᒫ ᑳᑮᐊᔮᓂᒡ: ᑫᐐᓐ ᐅᔕ ᐗᐊ ᐅᑮᐐᒌᐙᓐ ᐃᓂ ᓈᓴᕒᐊᑎᕽ Nazareth ᑳᐅᒌᓂᒡ ᒋᓴᓲᓐ, ᑮᐃᑭᑐᐗᓐ᙮
72ᒦᓇᐙ ᑕᔥ ᐲᑕᕒ ᑮᐋᓉᑕᒻ ᐁᑮᐃᑭᑐᒡ: ᑌᐺ ᓴ ᓂᑎᑭᑦ ᑳᐃᑭᑐᔮᓐ! ᑳᐐᓐ ᓂᑭᑫᓂᒫᓰ ᐊᐊ ᐃᓂᓂ! ᑮᐃᑭᑐ᙮
73ᓈᓈᑫ ᑕᔥ ᐁᐊᓂ ᐃᔑᓭᓂᒃ, ᐃᓂᓂᐗᐞ ᐃᐃᒫ ᑳᓈᓃᐸᐎᓂᒡ ᐅᑮ ᐱᓈᓯᑳᑰᐞ ᐁᑮᐃᑯᒡ: ᑫᑫᑦ ᓴ ᑮᓐ ᐯᔑᒃ, ᐋᓃᔥ ᑭᑎᔑᑮᔗᐎᓂᕽ ᑭᑑᒋ ᑭᑫᓂᒥᑰ, ᐅᑮᐃᑰᐞ᙮
74ᐲᑕᕒ ᑕᔥ ᑮᐃᑭᑐ: ᐐᑫ ᐱᑯ ᓂᑌᐺ ᑳᐃᑭᑐᔮᓐ! ᑭᔐᒪᓂᑑ ᓴ ᓂᑲ ᑲᒀᑕᑭᐃᒃ ᑮᔥᐱᓐ ᑌᐺᓯᐙᓐ᙮ ᑳᐐᓐ ᓴ ᓂᑭᑫᓂᒫᓰ ᐊᐊ ᐃᓂᓂ!
ᒦᑕᔥ ᑳᑮᓅᑖᑯᓯᒡ ᐊᐊ ᓈᐯᐹᑲᐋᒀᓐ᙮ 75ᐲᑕᕒ ᑕᔥ ᑮᒫᒥᑲᐎ ᑳᑮᐃᑯᒡ ᒋᓴᓲᓐ: ᒋᑆ ᓅᑖᑯᓯᒡ ᓴ ᓈᐯᐹᑲᐋᒀᓐ, ᒦᓴ ᐋᔕ ᓂᓯᕽ 3 ᒋᐃᑭᑐᔭᓐ ᐁᑭᑫᓂᒥᓯᐗᓐ, ᐁᑮᐃᑯᒡ᙮ ᒦᑕᔥ ᑳᐃᔑ ᓵᑲᐊᕽ ᐁᑮᐊᐎ ᑭᒋᒪᐎᒡ᙮
Zvasarudzwa nguva ino
ᒫᑎᔪ 26: OJBS
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Ojibwe Shorter Bible (Syllabic Script) © 2008 Canadian Bible Society