Mavhesi emuBhaibheri Ane Mukurumbira kubva kuna 1 Piyɛri 2

Pakurirana nevamwe

Kɔnɔ Ala bata wole kan ma bɔnsɔ masubɛreŋɛ la, a ka wo ma mansa la sarika lakela jama la. Wo be maren jama saniyandeŋɛ le la, a ka wo ma a tɛŋɛ yati la. A ka wo kele, a ka wo labɔɔ dibe tɔ, wo ni to a la nɔɔra malanná butɔ. A ka wo bɛ ma le alako wo ni a la wali makaabɛreŋɛnu la ko fɔ.

Isa yɛtɛ ka wo mɔ la junubenu doni a bali bangue tɔ, a banbanta lɔgɔ bangalandeŋɛ tɔ. Junube be toren nun mɔ ye iko mɔ tige. Isa la faga sabue ka ma, a banta mɔ nun junube tɛma feu, alako wo mɔ ni to teleŋɛ tɔ kɔtɛ. Wo bata kendeya sɔtɔ a la mamabanu sabu la. Wo be toren de nun iko kolofen nabolokareŋɛnu , kɔnɔ kɔtɛ, wo bata saagi wo kantalá ma, min be a hakkile toren wo nɛɛ ma.

Fɔlɛ tɔ nun, wo bele maren Ala la jama la nun, kɔnɔ kɔtɛ wo bata ma Ala la jama la. Fɔlɛ tɔ nun, kinikini yo bele wo ye nun, kɔnɔ kɔtɛ Ala la kinikinɛ bata kamali wo ye.

Ala la kuma ni diya wo ye iko bɔɔbɔ nɛnbɛlɛŋɛ be diren a nɛɛnɛ singi je ye ki min na. Ala la kuma be toren de iko singi je beeyareŋɛ. Ka wolo mata wo ye balue la, wo la koloya si sabati le.

N kanunteŋɛnu, wo be maren luntaŋɛnu la minnu be yigiyaren kɛ dunuya bangu munge kunma. Wo butɔ, n be wo madiyala le, wo ni wo yɛtɛ latanga dunuya diyanankoe koroŋɛnu ma, bayi anu be wo kɛlɛla Ala la kila kunma. Wo la tagamanɲa ni bɛn a ɲinma la dunuya mɔgɛnu tɛma. Wo butɔ, hali anu ka wo tɔɲɛgɛ le wali koroŋɛ ma koe la, anu ni wo la wali ɲinma le tun yen, anu le tugun si naa Ala biliya le dantɛgɛ sa luŋɛ.

Wo be wo madonna a la, wo butɔ wole tugun be mala kurenu le la minnu be baluren, kurenu minnu be sɔla Ala la nɔɔra boŋɛ la. Wo mɛn be mala le sarika lakelá jama saniyandeŋɛ la, wo ni wo yɛtɛ bɔɔ sarika la Ala ye, Ala batue sarika min di a ye a la mɔgɔ masubɛreŋɛ Isa sabu la.

Wo butɔ, wo ni ko koroŋɛ mɔɔle bɛ boloka. A mata foniya la ba, filankafuya, miilanteya, anun mɔgɔ tɔgɔtiɲa mɔɔle bɛ, wo ni a bɛ boloka.

Wo be wo madonna Marige Isa la min be misaliren kure la min be baluren. Mɔgɛnu ka a aɲɛ le, kɔnɔ Ala kan be ale le masubɛren, a sɔdula kolo Ala ɲakɔtɔ.

Wo ni tagaman de iko mɔgɛnu minnu bata hɔrɔya sɔtɔ, kɔnɔ wo hɔrɔya kana a ma de wo ni to ko koroŋɛ tɔ, fɔ wo ni ma Ala la jondeŋɛ la.

Ala be diren a ye ɲɔgɔnna le yati: wo la ko ɲinma ma koe si hakkilibɔnɛnu da balan anu la hakkilibɔnɔya tɔ.