Mavhesi emuBhaibheri Ane Mukurumbira kubva kuna Romã 14

Pakurirana nevamwe

Kee rewarà mõ aepo a'e pejẽ. Janerõvijã ywete tè Janejare'e. Ajawyi jajirovija ee remẽ, ja'umã'ẽ rã rè rõwã jajipy'amogeta ipi. Ãmõ, jane'ywa kõ rã rè rõwã teve. Ivoa rupi tekoua rè tè jajipy'amogeta ipi. Ãmõ, poropy'amory katua rè teve jajipy'amogeta ipi. Janerorya rè teve. Janejare'e 'Ãg tè janemokasi a'evo tijaiko ipi. A'evo Kiristu rekoa rupi jaiko remẽ, ãmẽ si Janejare'e py'a rupi katuwarà rõmõ jaikotà ipi. Ãmõ kõ ve “ivo katu mã'ẽ tè ãwĩ” e'ità janeupewarà mõ kupa.

Janejare'e ãkarã tè jane wyi a'evotà jaiko. Ajawyi jakuve jẽ remẽ, ijupewarà mõ tè jaiko ipi. Ãwĩvo ve kãramõ, jamãnõ remẽ, ijayvu rupi jamãnõ tevetà. A'evo manyvo jaiko remẽ, Janejare'e upewarà kõ rõmõ tè jaiko. [A'e teve janemomoeratà ajaire.]

Ajawyi ikatusa rupi tijaiko ãmẽ ipi. Tijajipy'amokasiay ojeeve Janerõvijã Jesu Kiristu rè jajirovija mãe kõ rõmõ jaiko ipi.

Ajawyi kee a'e pejẽ. Tijajimokasi ojee Jesu morya rè ipi. Tisimojaiweoka e'ã ãmõ kõ pè ipi. Nikatui nijamokasiokari ãmõ kõ pè Jesu jirovijaa remẽ ipi. A'evoa rè kee e'i Janerõvijã Jesu Kiristu imojikuwaoka ije. Pirujẽ ja'umã'ẽ ojevo jevo jẽ Janejare'e pè. Ajamã'ẽ ãmõgwerà kee e'i: “Eky'atà Janejare'e pè a'u remẽ”, e'i. Aepo e'i sõ remẽ, to'u e'ã aepo e'i paire, a'e. “Janejare'e morya rõwã a'evoa”, e'ipa opy'a pupe ajawyi.

Kee e'i Janejare'e ikusiwaokapa: “Aje ywete, awyje jẽ pewarà tè ije aiko, Jõvijã wasu rõmõ. Ajawyi kãramõ pirujẽ jane kõ ojimoenãpa'ãtà erovake emoe'e. ‘Janejare'e tè ene’, e'ità eupewarà mõ kupa, ijãvijõ kõ jẽ”, e'i ikusiwaokapa tijakuwa. Aje ywete a'evotà jaiko ãmẽ, ijayvukwerà rupi katu. Janejare'e pè jajimome'upa katutà ike yvy pè janerekokwerà rè, janejãvijõ jẽ.

Ikatusa rupi tijaiko Jesu koty rewarà kõ rõmõ jaiko ipi. Ojirovija ypy Jesu rè mãe kõ reve ywesõ ikatusa rupi tijaiko, a'e kõ nikasi ywe'ei Jesu rè ojirovijaa rewarà mõ. Ajawyi tijamory kõ jẽ ipi. Tijaaka kõ e'ã imosĩoka kõ ipi.

Janejare'e remĩgwai kõ tè jane pirujẽ, Jesu koty rewarà kõ rõmõ. Ajawyi nijamosã'ãga'ãi kuwa wemikuwa rupi tè o'u mãe kõ. Janerõvijã tè okuwa janeaiwererà. A'e tè aje ywete “ivo mã'ẽ tè ene” e'ità jane. Ajamã'ẽ nivoia rupi sõ jaiko remẽ, “nivoi ene” e'i tary ve jane ãmẽ. Janejare'e tè okasia ome'ẽ janepy'a pupe ipi, ãwisõ ivo tekoua rupi tijaiko jẽ jaiko, a'e pejẽ.