Bassar Ntcham - 2008 Edition (Drama NT)

BIBLE EN N'TCHAM (Bassar) © Alliance Biblique du Togo, 2013.

Kutaafaau pɔ̀lpɔlee, bisaraaŋakpilib kɔkɔ nì Juuda yab tindaŋkpilib kpáfì ki sòon̄ bi nín làá dī nsan ŋun pu ní kí kpɔ̀ Yeesuee. Ní bi bóob́-u ŋŋmii ki cáá-u ki ŋúbiǹ gɔmina Piilati.


Juudasi un nìn dū Yeesu ki nyáfèe nín ká yii bi làá kpɔ̀ Yeesuee, ní u-pɔbil bíil̀ tin u ŋée pu, ní u cáań animbil jitɔmbi mmuŋku nì saalaayee ki gíiǹ ki tīī bisaraaŋakpilib nì Juuda yab tindaŋkpilib, ní ki bí-bi yii: «M ŋá ikpiti ní ki dū un kaa ŋá tibee ki tīī ní kpɔ̀!» Ní bíǹ kíí-u yii: «An ká timbi la? Sii nì a-bɔti dee!» Ní Juudasi dū animbilee ki yàl̄ kunimbɔtidiin, ní ki cūtìi lúntì u-ba ŋŋmii ki kpíì. Niinee bisaraaŋakpilib cūtì ki tōō animbilee, ní ki bí yii: «Ti-marau kaa pú-ti nsan tí dū an nimbiliŋee kí ŋá kunimbɔtidii nimbiliŋ dakaaun, kun puee an sá fatiku nimbiliŋ ní.» Ní bi sòon̄ ki gbìlīǹ tɔb, ní ki dū animbilee ki dá uyɔɔmaati ubɔ kpaabu ki dūu ŋá binicambi ceeku. An puee, bi yíì bukpaa gbanti yii «Fatiku kpaabu» áli nìn díǹ. An ŋá kii Unimbɔti bɔnaatiliu Yeereemii nín nìn sòon̄ puee dee yii: «Ní bi fōō animbil jitɔmbi mmuŋku nì saalaa ŋin Isirayeel yab nìn kíí yii bí pà u-puee, ní ki dū an nimbiliŋ ki dá uyɔɔmaati kpaabu, kii ti-Dindaan nín nìn tùkū-mi puee.»


Bi cáá Yeesu gɔmina nimbiin, ní gɔmina bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee.» Ama, bisaraaŋakpilib nì Juuda yab tindaŋkpilib nín dū tibɔti tin ki túǹ u-puee, waa gātì báà tiba. Ní gɔmina Piilati bí-u yii: «Aa gbìl̄ tin kɔkɔ bi sòoǹ ki tūntí a-puee níii?» Ama Yeesu kaa pée gātì-u báà tiba an poon, ní an mɔ̄tìi bākatiǹ gɔmina tikpil.


Dilákatil jiŋaaliu kamaayee, gɔmina nìn gīintí usarkadaan un samaa kɔkɔ yaa bālifèe ní kí líí. Ŋyunti gbantee usarkadaan ubɔ nìn bí un pu báà ŋma pée nyée, bi yíì-u Baaraabaasi. Ní Piilati bālifì samaa un nìn kpáfèe yii: «Ŋma ní ni là ḿ gíiǹ kí líí, Baaraabaasaaa, Yeesu un bi yíì yii Kriisitooyee?» Di sá yii u nìn nyí yii nnimbidiki ŋun bi cáá Yeesu puee di yì-tì ní bi cáań-u ki ŋúbiǹ-u. Ŋyunti ŋun u kā ibɔsoon puee, ní u-nimpuu túnní bí tùkù-u yii: «Á taa pée cèeǹ deedeedaan nee bɔtin! Di sá yii m jíń u-pu falaa tikpil kudamintiiun díǹ.»
Ní bisaraaŋakpilib nì Juuda yab tindaŋkpilib téé kunipaau ń lì yii bi là bí gíiǹ Baaraabaasi kí líí kí kpɔ̀ Yeesu. Ní gɔmina fātìi tí būsì ki bālifì-bi yii: «Binib bili nee kansikinee, ŋma ní ni là ḿ gíiǹ kí líí ní?» Ní bi kíí-u yii: «Baaraabaasi ní ti là á gíiǹ kí líí!» Ní u fātìi bālifì-bi yii: «Kin, m làá ŋá Yeesu un bi yíì yii Kriisitooyee úǹ mana?» Ní bi-kɔkɔ kíí yii: «Bí kpáá-u ndɔpuntikaa pu!» Ní u bālifì-bi yii: «Mimmee, ba kpitii ní u ŋá?» Ama ní bi mɔ̀tīi kūuntí mpɔn yii: «Bí kpáá-u ndɔpuntikaa pu!» Gɔmina Piilati ká yii waa ti ŋūǹ kí ŋá tiba, fìkil fikil mɔ̀tīi bíi wīintée, ní u yōoǹ nnyim ki fíntì u-ŋalii samaa kɔkɔ nimbiin, ní ki bí yii: «Maa bí uninja nee kúm poon, ni nì ni-bɔti dee!» Ní kunipaauee kɔkɔ kíí yii: «U-kpuulool ń lúntí timbi nì ti-biyaamu pu!» Niinee ní gɔmina gíiǹ Baaraabaasi ki líì, ní ki yāntì bi gbáń Yeesu anaalab, ní ki dū-u ki tīī bí cáá-u kí kpáá ndɔpuntikaa pu.


Niinee ní Piilati soojab cáá Yeesu ki kɔ́ǹ gɔmina cindi poon, ní ki yíiń disoojakitil kɔkɔ dɔ́miń ki kpáfì. Bi nìn pēetì u-wanti ní ki dū dibɔkutimandi cínciŋ ki pēeǹ-u. Bi nìn dū ikuŋkum ki lùn̄ kibeefuulii ki cíkiǹ-u, ki dū ŋkpandɔ ki ŋúbiǹ u-ŋaŋgiil, ní ki kíǹ ki gbàantí u-nimbiin ki bèel̄-u yii: «Ti jáaḿ-si, Juuda yab bɔtiu!» ní ki tíiĺ timɔtan ki làbitī-u, ki fòol̄ ŋkpandɔee ki cáa fátí u-yil. Bi bēel̀-u míǹ ki dóòyee, ní ki cúú dibɔkutimandee ki pēetì-u, ní ki gíiǹ úǹ u-ba wanti ki pēeǹ-u, ní ki cáá-u ki búntì kí tin kpáá ndɔpuntikaa pu.


Bi nyáń ki cée, ki tú uninja ubɔ nsanni u sá Siireen tiŋkin, bi yíì-u Siimɔn. Bi nìn páb́-u ú fōō Yeesu dɔpuntikaaŋu kí bùkun̄. Bi nìn cáá Yeesu ki bānnì laakin bi yii Gɔlgɔtee, an taapu sá yii: «Kuyikpabiku laŋki.» Bi nìn dū ŋkaam ki ŋmālim̀ ndamam poon ki tīī-u ú nyɔ̀. U dákée ní ki yíì, kaa nyùn̄.
Ní bi dū-u ki kpáá ndɔpuntikaa pu, ní ki tɔ́ kasi ki yākatì u-bɔkutiŋ, ki kíǹ ki kā ki cí-u. Bi nìn ŋmàn̄ tiŋmaŋmabiti ki nákáǹ u-yil pú kí dàkà kun pu ní bi kūū-uee, yii: «Un bí nee di sá Yeesu, Juuda yab bɔtiu.» Bi nìn kpáá digaŋgandambi bili idɔpuntikaa pu ki ŋàl̄-u, ubɔ bí u-ŋaŋgiil pú ní un kíǹee bí u-ŋaŋgan pú.
Bisanjitiliibi nìn bèel̄-u, ki gàatī bi-yiliŋ, ki lì yii: «Sii un gbáà kí wīī kunimbɔtidii kí fàtīí mā-ku iwiin itee, a yaa sá Unimbɔti biki, fīī a-ba kí kpákatiń ndɔpuntikaa pu!» Míǹ mbaantiim, bisaraaŋakpilib, nì bimaradakaliibi nì Juuda yab tindaŋkpilib mun bí ki bèel̄-u, ki lì yii: «U fīī biba dee, kaa ŋūǹ kí fīī u-ba! U sá Isirayeel yab bɔtiu naa! Ú kpákatiń ndɔpuntikaa pu kɔŋkɔnnee! Mimmee, ti làá fōō-u kí kíí. U dū u-mákal ki ŋá Unimbɔti pu dee, ki lì yii: <Man sá Unimbɔti Jipɔɔn>. Too, kɔŋkɔnnee Unimbɔti yaa néeń-u, ú fīī-uaa!» Digaŋgandambi bin bi nìn kpáá ki ŋàl̄-uee mun nìn sìí-u míǹ mbaantiim.


Kuwiŋkuluuee, dibɔmbɔndi jéetì kitiŋ kɔkɔ pu ki tin sāā tikúti tita. Ki cá tikúti titee, Yeesu fáá mbiil mpɔn, yii: «Eelii, Eelii, lama sabakitanii?» Taapu sá yii, «M-Nimbɔtiu, m-Nimbɔtiu, ba ŋá ní a dū-mi ki fá?» Yeesu fáá mbiil mimmee, ní bin bí niinee biba gbìl̄ u-biiliŋuee pu, ní ki lī yii: «U yíì Eelii dee!» Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ki dūu túuń ŋkpandɔ pu ki tīī-u ú nyɔ̀. Ama ní bin kíǹee bí yii: «Yàntī! Tí kpèèmaan Eelii yaa làá dāá fīī-u!»
Yeesu gíti fáá mbiil mpɔnee ní ki sīntì. Niinee, sata un bi nìn dūu pītì kunimbɔtidii poon ki gāntì laakin bi yíì circir páaa laŋkee nì laan kíǹee cúu cátì yilpu ki tin kátì taapu, ní kitiŋ cīŋkì, ní titaŋkpanaakɔti cúu búkutì. Akaakul nìn cúu bīitì, ní bin nìn nóó Unimbɔti ki kpíìyee tikpil fīkitì, ki nyáń bi-kaakuliŋin. Yeesu fìkititam boonee, an nibee kɔ́ Jeerusaleem tiŋkin, ní binib tikpil ká-bi.
Room soojakpiliu nì u-yab bin nìn cí Yeesuee nín ká kitiŋ cìŋkitam nì tin kɔkɔ pée jítèe, ní tifaandi cúú-bi tikpil ní bi lī yii: «Tiŋman, kijapaai nee lafun sá Unimbɔti Jipɔɔn ní.» Binimpoobi kupaau mun nìn yú ndan ki kpèeń. Bi nìn céeǹní-u doooo Galiilee ní ki tútúǹ-u atuun. Maarii un sá Magidalaa tiŋkinee nì Maarii un sá Yakubu nì Jooseefi nee, nì Seebeedee jipɔmbi na nìn bí bi-kansikin.


Kujoou jóotèe, ní ugaaja ubɔ dɔ́miń laakin bi nìn kpáá Yeesuee, bi yíì-u Jooseefi, u sá Arimatee tiŋkin. U mun nìn sá Yeesu boonnooliu. Ní u cūtì ki ká Piilati, ní ki mēē-u nsan kí yòon̄ Yeesu wunti, ní Piilati bí yii bí dūú tīī-u. Ní u cūtìi yōoǹ, ki nyàab̄ ŋŋaapiin mpɔɔn ki dūu fìn̄-u, ní ki cáa ŋá u-kaakupɔndi din u nìn lùkū ditaŋkpalinee poon, ní ki bíntì ditaŋkpakpaandi diba ki pīiǹ dikaakul nyɔkɔpu, ní ki búntì. Maarii un sá Magidalaa tiŋkinee nì Maarii un kíǹee mun nìn cūtì ki kā ki pìl̄ dikaakulee nyɔkɔpu.

Bi bɔ́ntì ŋwiŋŋuŋfikaa kutaa wúntèe, ní bisaraaŋakpilib nì Fariisab nóó dicilpu ki cūtìi ká Piilati, ní ki bí-u yii: «Ukpil, ti téetí yii unyimɔndaan nee nín nìn dáá bí dimaŋfalinee u nìn bí yii, u yaa kpíìyee, winta dalee u làá fìkitī. Míǹ puee, yàntī soojab ń cù kí cīití u-kaakul áli iwiin ita, án nín làá ŋá pu u-boonnooliibi ń taa dāan̄ kí yɔ̀ u-wunti kí tùkù samaa yii u fīkitèe: mimmee, nnyimɔn gbanti ŋúǹ dāa pɔ́ɔkí kí jītíǹ mpeepeekaa.» Ní Piilati kíí-bi yii «Ni cáá soojabaa! Cáámaan-bi bí cīití u-kaakul ni nín là puee.» Ní bi dū kudaaŋŋu ki nákáǹ ditaŋkpalee pu ubɔ yaa gbēēyee bí bée, ní ki cáá soojab ki cíitì.

Terera ku Matthieu 27