ZAA 'BƆGƲ 1
1
Yʋlokpë -yɛ 'pɩ 'sɔɔ wɛlɩ
1'Pɩɛ tɛnɩde, Wɛlɩ -bhlɩ la 'kɩ, 'mɩ Wɛlɩ -yɛ -Lagɔ 'sɔ -bhlɩ la -bha, 'n 'mɩ Wɛlɩ glɩnɩ la-a -Lagɔ. 2'Pɩɛ tɛnɩde, -bha -Lagɔ yawʋ ɩ -wʋ la -bha. 3-Ma ɩ 'mö -Lagɔ nʋnʋ-a -li 'bhuo nɛ, -lu -mʋ 'nɩ -ma ɩ 'mö nɛ 'nʋnʋɔ ʋ'ʋ -bhlɩ. 4-Ma ɩ 'mö 'pɩ -wʋ la -bha, 'n 'mɛ 'pɩ glɩnɩ la-a nɩkpaa yʋlokpë. 5Yʋlokpë ngöna-a -ma 'misikpoko 'mö, 'misikpoko 'nɩa-a 'wʋ nglu.
6Nɩkpɛ -bhlʋ -Lagɔ tia-a, ɔ nglɩ-ɩ -yɛ-a Za. 7Wɛlɩkwanyɔɔ swɩ ɔ ji la -bha ɔ 'yɛ yʋlokpëë 'dɩ -sa, nɩkpa 'bhuo 'yɛ ɔ 'nglɩ 'mö -Lagɔ dlɩ 'wʋ -kaa yɛ. 8Ɔ 'bhë 'nɩ-ɛ la yʋlokpë, wɛlɩkwanyɔ -ɔ ji-a ɔ 'yɛ yʋlokpëë 'dɩ -sa, 'mɔ ɔ glɩnɩ la -bha. 9'Mɩ Wɛlɩ, ɩ 'nyize -yɛ la-a yʋlokpëë -yʋlokpë -a ji-e ma'a 'pɩ 'wʋ a 'yɛ nɩkpa 'bhuo 'wʋ ngönaa yɛ. 10Ɩ -bhlɩ la ma'a 'pɩ 'wʋ, mɩ-ɩ nʋ-a 'pɩ nɛ 'bhë 'pɩnɩkpa 'nɩɩ-ɩ jɩblɩnɩ. 11Ɩ ji-e -ma ɩjɩɛ 'bhɛyɩ, ɩ 'bhɩa 'nɩɩ-ɩ 'wʋ nglu. 12-Ma ɩ 'mö, -wa la'a 'bhuo -wa nglui-a 'wʋ 'bhë -wa kɩ-a dlɩ 'wʋ, 'mʋa ɩ 'nyɛ-a 'gba 'n wa ji-a -Lagɔɔ 'gwie zʋ. 13Sa nɩkpɛ zʋ-ɔ la'a ma'a 'pɩ 'wʋ nɩkpɛɛ 'gu, -sɩbha wa'a -lɛ -nɩ -Lagɔɔ 'gwie zʋ. Ɛ'ɛ -lɛ 'yɛ nɩkpɛ 'jɩbhɩɛ yɛ, -Lagɔɔ bhë-ë 'jɩbhɩ -bha, mʋ-ʋ zʋʋa-a -Lagɔɔ 'gwie 'wʋ. 14'Mɩ Wɛlɩ ɩ zʋ-a nɩkpɛ, 'n ɔ ji-e ma'a -aa 'gbamö sɛ -glɩ kwla'a ji, 'n -a ji-a ɔ 'ghlinɔ 'ji yawʋ bhɩanɩ, 'Gu -bhlabhlʋ -ɔ -su-a ɔ -Tɩbhaa 'ghlinɔ, ɔ -su nɩkpajɩbhajɩbhʋ -yɛ 'dɛdɛ'ɛ 'sɔ.
15Ɔ gbʋ Za gba la -bha, la ɔ 'kpö-ö sa'a 'mö naa: “-Ɔ n nʋ la-a -ɔ -ga -ma na nimï, mɔ -bha. Ɔ zi'i 'wʋ, -wʋʋ yɛ-a, ɔ -bhlɩ 'bhë 'n n ji-e na-a ma'a 'pɩ 'wʋ ji.” 16Ɔ -lie -li -bebe -aa 'bhuo ghlɩ -bha, 'n -aa 'nyupalɩ ji-a -gömö bhlinɩ. 17-Wʋʋ yɛ-a, -ma Moyizɩ 'mö -Lagɔ plɩnɩ la-a 'n ʋ -jiya-a ʋ gbö 'nyɛ, -Lagɔɔ ngazɩdlɩ -yɛ 'dɛdɛ'ɛ 'sɔɔ -nɩ-ɛ, Zezwi 'Kli 'mö ɩ jinɩ -bha. 18-Bɛ 'nɩ-ɛ -bhla -Lagɔ yɩlɩ, -Lagɔɔ 'Gu -bhlabhlʋ -ɔ glɩ-ɛ -ma -Tɩbha -Lagɔ yawʋ, mɔ-ɔ -slʋnʋʋ-a nɩkpa.
Dɩ -ɩ Za -sa-a
19'Zwiföa glɩ -ma Zelwizalɛmöö 'gbë 'mö, wa tia-a -ma Zaa 'bhɛyɩ -Lagɔbʋbɔngwa -yɛ wa kwanɩngwa wa la-a Levia naa, wa 'jɩbhɔ ngli naa -mɔ ɔ glɩnɩ-a 'nɩ ? 20Ɔ'ɔ -lɛ nʋ ɔ 'na-a sa wa wɛlɩ -gömö nʋ, sa'a ɔ gba-a wa de vaa naa: “N'n Puanyɔ -ɔ -Lagɔ -sa-a -bha glɩnɩ.” 21Wa nɛ -bha ɔ de naa: “-Mɔ -n glɩnɩ-ɛ 'mö-a 'nɩ? Eli-a?” Za naa: “'Bhëbhë, n 'nɩɔ glɩnɩ.” Wa nɛ: “-Lagɔɔ 'mögbanɩnyɔ -ɔ ji la-a jie mɔ -n glɩnɩ-a?” Ɔ nɛ: “'Bhëbhë!” 22Wa nɛ -bha ɔ de naa: “-Mɔ -n glɩnɩ-ɛ 'mö-a 'nɩ? -Wa -tiaya-a -a 'yɛ mö -a 'kʋa 'dɩ -sanɩ, sa -n gba-a -najɩɛ -gömögbʋ 'nɩ?” 23Za nɛ naa:
“Nɩkpɛ -ɔ -wʋ-ɔ -ma 'mïsekpa 'klʋ
'mö 'kpö 'le naa:
A slɛmanɩ Nyininyɔɔ 'yuogblʋ 'mö,
'mɔ n glɩnɩ -bha.” -Sɩbha -Lagɔɔ 'mögbanɩnyɔ Ezayi gbɩ la -bha. 24Nɩkpa -wa wa tia-a -ma Zaa 'bhɛyɩ falizɩɛ la -bha. 25'N 'mʋa falizɩɛ ji-a Za ngli 'jɩbha 'sɔ, wa nɛ: “-N nɩ Puanyɔ -ɔ -Lagɔ -sa-a -bha glɩnɩ, -n nɩ Eli glɩnɩ, -n nɩ 'yɛ -Lagɔɔ 'mögbanɩnyɔ -ɔ ji la-a jie glɩnɩ-ɛ, 'manɩɛ yɛ -n badize 'mö-a nɩkpa 'nɩ?” 26Za -sa-a -gömö, ɔ nɛ naa: “-Amöö -nɩ-ɛ, 'nyu nya n -wʋ-ɔ la'a na-a nɩkpa badizenɩ 'le, -ma a nyɩdɩ nɩkpɛ -bhlʋ -wʋ-ɔ -ma -ɔ a'a-a -ji, 27mɔ-ɔ ji-e -ma na nimï jie, n 'yɛ ɔ -gbabʋaa 'likpë 'bhëë 'fʋ bulonʋ, n 'nɩɩ 'wʋ -ngwa.”
28'Mɩ -ɩ la'a, -ma 'nyi wa la-a Zludɛɛ pɩa -mabhaa 'bɩ, la Za -wʋ la-a nɩkpa badizenɩ 'le, -ma ɩ 'plɩnɩ-ɛ -sɩbha.
Zezwi mɔ-ɔ -yɛ-a -Lagɔɔ 'bhlangwagbɔta
29Zlɩ zɩ-a, Za yɩlɩ-a Zezwi, ɔ -wʋɔ-a 'wʋ ji 'le, ɔ nɛ: “-Lagɔɔ 'bhlangwagbɔta -a sa-a 'pɩ-ɩ bhë 'jinyloli -gömö, ma-a -la. 30-Ɔɔ gbʋ n gba la-a naa: Nɩkpɛ -ɔ ji-e -ma na nimï jie, ɔ zi'i 'wʋ, mɔ -bha. -Wʋʋ yɛ-a, ɔ -bhlɩ 'bhë 'n n ji-e na-a ma'a 'pɩ 'wʋ ji. 31Na -nɩ 'bhë n 'nɩɔ la na-a -ji. -Ma ɩ 'mö, Izlayɛlɩɛ -gwlɩ 'kɔ jɩblɩnɩɛ yɛ n ji-a 'nyu nya nɩkpa badizenɩ kwla'a. 32N jɩnɩ -Lagɔɔ Zuzu 'wʋ, ʋ 'bhö-ö -ma -Lagɔtapɛ'ɛ 'gblɩɛ swɩ'ɩ, 'n ʋ ji-e -bha ɔ -gömö sɛ glɩ-ɩ. 33N 'nɩɔ la -bhla -ji, 'n -ɔ la'a -ɔ tia'a n 'yɛ 'nyu nya nɩkpa badizenɩ ji-e -bha na de gba naa: -Ɔ la'a -ɔɔ -gömö -n ji-a -Lagɔɔ Zuzu yɩlɩɛ ʋ 'yɛ -ma ghayɩ 'bhönɩ ʋ 'kɔ -gömö sɛ glɩ-ɛ, mɔ-ɔ ji-a Zuzu 'Wlawla nya nɩkpa badizenɩɛ. 34'Mɩ n yɩlɩ-ɛ -sɩbha, wʋ yɛ n sa-a ɔ 'dɩ naa, 'mɔ nɩkpɛ -Lagɔɔ Gu -bha.”
Zezwie taka -wʋbhlinɩngwa
35Zlɩ zɩ-a, Za -yɛ ɔ 'wʋbhlinɩngwa gla'aa nɩkpa 'sɔ glɩ 'yɛ -bha 'sɔ. 36Ɔ yɩlɩ-a Zezwi ɔ -wʋ-a 'plɩ 'le, ɔ nɛ: “-Lagɔɔ 'bhlangwagbɔta ma-a -la.” 37Ɔ 'wʋbhlinɩngwa la'a 'sɔ 'nʋ-a wɛlɩ la'a, 'n wa ji-a Zezwi 'bɩ mö. 38Zezwi 'bhɩlɔ-a 'mö ɔ yɩlʋa-a naa 'bɩ wa -wʋɔ -bha-a, ɔ nɛ -bha wa de: “'Manɩ a 'nama-a 'nɩ?” Wa nɛ: “Ghlabi, la -n glɩnɩ-a 'nɩ?” Ghlabie zɔmö-ö -yɛ-a -Abhitɩbha. 39Ɔ nɛ -bha wa de: “A ji -a 'yɛ mö, a 'yɛ -bha yɩlɩ.” Wa mö-a, la ɔ glɩnɩ-a 'n wa ji-e -bha yɩlɩ. Wa -nyɔɔ 'sɔ glɩ -bha, 'n sɛ ji-a julu. -Dudoglie -mʋna 'mö -ɩ la'a 'plɩ-ɛ -sɩbha. 40Nɩkpa la'a 'sɔ -wa 'nʋ-a Zaa wɛlɩ -wa mö-a Zezwi 'bɩ, wa gla'aa -bhlʋɔ nglɩ-ɩ -yɛ la-a Adle, Simo Piɛlɩɛ -dagu -bha. 41Ɔ mö-a, ɔ -dagu Simo ɔ -nyɔɔ 'sɔ gbënɩ-a -tɩtɛ-ɛ, ɔ nɛ -bha ɔ de naa: “-A yɛ -nɩ Puanyɔ -ɔ -Lagɔ -sa-a -bha yɩlɩ 'bhë 'mɔ wa la-a 'Klisɩ.” 42'N ɔ jio-o -ma Zezwie -ma kwa. Zezwi jɩlɔ-a, ɔ nɛ: “-Nmö -yɛ-a Zonasɩɛ 'gu Simo, Sefasɩ wa -jimö-ö 'mö-a laa.” 'Mɩ 'nglɩɛ zɔmö-ö -yɛ-a kpiyi.
Zezwi yɛ Filipö -yɛ Natanayɛlɩ 'sɔ wɔzɩ
43Zlɩ zɩ-a, Zezwi -sɔ-a 'wʋ ɔ nʋ-a ɔ 'yɛ -ma Galilee dʋdʋ -gömö mö ɔ -yɛ Filipö gbënɩ-a, ɔ nɛ -bha ɔ de: “Ji'i 'bɩ.” 44-Glɔ wa la-a Bɛtɩsayida, -ma Adle -yɛ Piɛlɩ 'sɔɔ 'bhɛyɩ, -maa nɩkpɛ Filipö glɩnɩ la-a -sɩbha. 45Filipö -yɛ Natanayɛlɩ 'sɔ gbënɩ 'yɛ-a -nɩ, ɔ nɛ -bha ɔ de naa: “Nɩkpɛ -ɔɔ 'kïbhï Moyizɩ 'cɛlɩ la-a -ma -Lagɔɔ gböö 'bɔgʋ 'mö, -ɔɔ gbʋ -Lagɔɔ 'mögbanɩngwa gba la-a, -a kɔ -nɩ yɩlɩ 'bhë, -ma Nazalɛtɩɛ nɩkpɛ Zozɛföö gu -bha, ɔ nglɩ-ɩ -yɛ-a Zezwi.” 46Ɔ gba-a sa'a, Natanayɛlɩ nɛ naa: “-Ma Nazalɛtɩɛ 'gbë 'mö -ma -luo -lu ji-a -nɩ 'wlʋɔ?” Filipö nɛ -bha ɔ de: “Ji -a 'yɛ mö -n 'kɔ 'yɛ -na yɩlɩ.”
47Zezwi yɩlɩ-a Natanayɛlɩ, ɔ -wʋɔ-a 'wʋ ji 'le-e, ɔ nɛ -bha ɔ de: “A yie! -Ɔ -yɛ-a Izlayɛlɩɛ nɩkpɛ 'sɩkösɩkö -ɔ 'nɩ-a -bi dlɩ zɔmö -ka, mɔ-ɔ -la.” 48Natanayɛlɩ nɛ -bha Zezwie de: “La -n -jinɩ'ɩ-a 'nɩ?” Zezwi nɛ: “Filipö -nɩmö-ö -bhla wɔzɩ, -n glɩ -bha figösu zɔmö 'n n -jimö-a yɩlɩ.” 49Zezwi gba-a sa'a, Natanayɛlɩ nɛ: “-Abhitɩbha, -Lagɔɔ Gu -n glɩnɩ -bha, Izlayɛlɩɛ dʋdʋnyininyɔ -n glɩnɩ -bha.” 50Zezwi nɛ -bha ɔ de naa: “-Na de n nʋ-ɔ naa -n glɩ -bha figösu zɔmö 'n n -jimö-a yɩlɩɛ yɛ -n ka'a-a -la dlɩ 'wʋ. -Li -mɩmɩɛ -bebe -ɩ zi-a -ɩ la'a 'wʋ, mɩ -n ji-a yɩlɩɛ.” 51Ɔ nɛ 'yɛ -bha -gömö: “'Dɩɛ -dɩ n nyɛya-a naa: -Lagɔtapɛɛ ngowalɩlɩ a ji-a yɩlɩɛ, 'n a 'yɛ-a -bha Nɩkpɛɛ 'Gu -gömö -Lagɔzuzukuo sɛsibhëlɩ -yɛ ɩ ghayɩgblalɩ 'sɔ yɩlɩ.”
දැනට තෝරාගෙන ඇත:
ZAA 'BƆGƲ 1: BNT96
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Bete New Testament © Bible Society of Côte d'Ivoire 1996