Matayo 4
4
Okwoyeerwa kwa Yesu
(Mak 1:12,13; Luk 4:1-13)
1Awo oMwoyo Akwera, nʼatwala oYesu omwirungu okwoyeerwa oSetaani, 2OYesu nʼamalayo ebiro amakumi anai nga takulya emisana nʼobwire. Nibyaweireku, enzala nʼemuluma. 3Omwoyeeri nʼaiza nʼamukoba ati, “Niwaabba Mwana wa Kanca, koba amabbaale gani gafooke emere.”#4:3 Oba migaati.
4OYesu nʼairamu nti: “Kyawandikiibwe kiti, ‘Omuntu tabba mwomi lwa mere yonkai okutoolaku lwa buli kigambo oKanca kyabaza.’#Tek 8:3”
5Awo oSetaani nʼatwala oYesu omu kibuga Yerusaalemu ekikwera, nʼamuta oku kasonga ka lukanga lwa Iramyo, 6nʼamukoba ati, “Niwaabba Mwana wa Kanca, weenage ansi, kubba kyawandikiibwe nti,
#
Zab 91:11,12 ‘OKanca aliragira abamalaika baamwe
bakukwatiire omu mikono gyabwe,
oleke okwekona okugulu okwibbaale.’#Zab 91:11-12”
7OYesu namwiramu ati, “Kyawandiikiibwe kiti, ‘Togezesyanga Mukama oKanca waamu.’#Tek 6:16”
8Era oSetaani nʼatwala oYesu oku lusozi olulai omuno, nʼamulanga obukama bwona bwona obwa mu nsi, nʼekitiinisya kyabwo. Nʼamukoba ati, 9“Ebyo byona byona nabikuweerya, niwakubba amajwi nʼondamya.”
10Awo oYesu nʼamukoba ati, “Ligawo Setaani! Kyawandiikiibwe kiti, ‘Oramyanga oMukama oKanca waamu, era nigwo oweerezenge yenkai.’#Tek 6:13 ”
11Awo oSetaani nʼaleka oYesu, abamalaika ni baiza ni bamuweereza.
OYesu akutandika okwegesya omu Galiraaya
(Mak 1:14,15; Luk 4:14,15)
12Awo oYesu niyawuliire nti oYokaana abbwerwe omu nkomyo, nʼayaba e Naazaleesi omu Galiraaya. 13Nʼaliga e Nazaaleesi nʼayaba nʼabba e Kaperenawumu, ekiri oku nyanja omu kitundu kya Zebbulooni nʼoNafutaali. 14Kini kyabbaire kityo, omulangi oIsaaya kyeyalangire leke kiikiriire, ekikoba kiti,
15“Ensi Ya Zebbulooni,
nʼensi ya Nafutaali,
eziri ampi nʼenyanja,
enseeri wa Yoludaani,
oni niye Galiraaya ensi yʼabanyamanga!
16Abantu abaabbanga omu kiiruma
baboine ekyengeezi kingi.
Abo abaabbanga omu nsi ya kiituuru kya kufa
ekyengeezi kibaakiire.”#Isa 9:1-2
17Okuzwa olwo, oYesu nʼatandika okubuulira abantu nti, “Mwenenye kubba obukama obwa mwiguru bwigereire.”
OYesu akweta abategi abanai
(Mak 1:16-20; Luk 5:1-11)
18OYesu niyaali akutambula oku lukeito lwa nyanja ya Galiraaya nʼabona abaluganda babiri, oSimooni ayetebwa Peetero, nʼomugande Andereya nibakunaga akatimba omu nyanja kubba baali bategi. 19Nʼabakoba ati, “Mwize mubbe basengeerya bange, ndibafoola abategi bʼabantu.” 20Amangu ago ni balekawo obutimba bwabwe, ni baaba naye.
21Niyatambwireku okuzwa awo, nʼabona abaluganda abandi babiri: oYakobo nʼoYokaana, abataani ba Zebbedaayo. Baali mu bwato nʼoite waabwe oZebbedaayo, ni bakucanga obutimba bwabwe. OYesu nʼabeeta. 22Amangu ago ni balekawo obutimba nʼoite waabwe, ni basengeerya oYesu.
OYesu akutamba abalwaire
(Luk 6:17-19)
23Awo oYesu nʼatambula oGaliraaya yoona nakwegesya omu makumbaaniro gaabwe, nakubuulira abantu Amawuro Agasai aga bukama bwa mwiguru, amwei nʼokutamba obulwaire bwona nʼobwongi bwona omu bantu. 24Amawuro agakumukwataku ni gararanga omu nsi ya Siriya yoona yoona. Ni bamuleetera abalwaire ba ndwaire eza buli ngeri: abaali bakulumwa omuno, abaaliku emizumu, abaagwanga ensimbu nʼabaali basaraire. Boona boona nʼabatamba. 25Abantu baingi ni baiza gyali, nibakuzwa omu Galiraaya nʼomu kitundu kya Dekapooli,#4:25 Dekapooli Omu Luyonaani kimanyisya “bibuga ikumi” era omu bibuga ebyo mwabbangamu abantu baingi abataali Bayudaaya. nʼomu Yerusaalemu nʼomu Buyudaaya, amwei nʼenseeri wa Yoludaani.
දැනට තෝරාගෙන ඇත:
Matayo 4: RUULI-NYALA
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න