Matié 4
4
Sáátan ɔ́ɔ́kɔɔ́pitɔn Yésuse
(Mál 1.12-13; Lúk 4.1-13)
1Emfúnukufúúmɛ máyɔɔ́k ne Yésus e kúúsí kú kiándɔ́l ɛ́ɛ́ okóyíkoyi píɔ́pitɛn wɔ́. 2É kélém kú kupíkoti mukuyá mɔɔ́sí etín áandɛ́ ne metúk etín áandɛ́, woond ɔ́ kuɔ́pɔn insaná. 3Okóyíkoyi weepísíítin wɔ, wɔ́ kɛ́ɛ́yɛ́ ɛ́ɛ́: «Índɛ anyɛ muɔ́nɔ́ u Támbák, ekí pukaaka ɛ́ɛ́ atányí eye ɛ́ɛ́yi pilɛ́ɛt.» 4Yésuse woondinyi ɛ́ɛ́: «Púnyɛ puɔ́ŋɔ́n ɛ́ɛ́: Kútipá na múkunya kɔ́ɔ́m mɔɔnd ɔ́ɔ́nyísɔ́tɔnɛ́ɛ, maná na nukál nuum nuámanɛ́ɛ é niít ní Támbák.» 5Okóyíkoyi waayɔɔk nɛɛyɛ́ Yelúsalɛm pálɛ́k Támbák maáyɔ́ɔ́n, waák wɔ́ kɔ́ ɔtíndiɔ ú kitamb kí Támbák, 6wɔ́ kɛ́ɛ́yɛ́ ɛ́ɛ́: «Índɛ anyɛ muɔ́nɔ́ u Támbák, kilin, á kiákí púnyɛ puɔ́ŋɔ́n ɛ́ɛ́: Támbák áányítían Peéŋele pɛ́ɛ́yɛ ɛ́ɛ́ pɛ́kúpínɛ́ɛ́kɛn kɔ́ɔ́p kí imbɔ́k ɛ́ɛ́ etipúpén á nitányi.» 7Yésus kanyi kɛ́ɛ́yɛ́ ɛ́ɛ́: «Púnyɛ puɔ́ŋɔ́n andíkɛ́k ɛ́ɛ́: Ɔtiɔ́pítɔn Ɔkɔ́n Támbákɛ́ɛ waawɔ.» 8Okóyíkoy waand ayɔɔk nɛɛyɛ́ kí indɛɛ́tɛ i ɔkɛ́l waanyáŋímát weetíínyi wɔ́ pitɔŋ pí kúúsí piim na punɛ́m púɔ́pɔ́, 9wúú kɛ́ɛ́yɛ́ ɛ́ɛ́: «Yaányíkufá mɔ́ meem índɛ esinsukin tunuu oond iŋgúmesi.» 10Yésus kanyi kɛ́ɛ́yɛ́ kɔk ɛ́ɛ́: «íŋatɔ́k ké eŋis, Sáátan! Á kiákí ɛ́ɛ́ púnyɛ puɔ́ŋɔ́n ɛ́ɛ́: Eényíkúmesi Ɔkɔ́n, Támbákɛ́ɛ waawɔ, oond ɛɛlɛn wɔ́ puólí wééŋényí.» 11Kɔ́ɔ́kɔ́ɔ, okóyíkoyi maáyáp wɔ, Peéŋele péépísíítin wɔ́, póond ɛ́ kukɛnɛkɛn nɛɛyɛ́.
Yésus máyɔɔ́k Kalilée
(Mál 1.14-15; Lúk 4.14-15)
12Yésus mɛɛlɛ́ wɔɔ́pɔn ɛ́ɛ́ Isáaŋ nyɛ á kiansi kí imbíne, waayɔɔk Kalilée. 13Waatɔk Nasalɛ́t, woonyondó Kafalnawúum, á kiŋɛndɛŋɛnd kí mááŋ, e kúúsí kú Sapulɔ́ɔŋ ne kú Nɛfɛtalí, 14ɛ́ɛ́ epú eŋémímekélíe má Támbák Isayí mɔ́ɔyɛ́t píwóónyi:
15Kúúsí kú Sapulɔ́ɔŋ, kúúsí kú Nɛfɛtalí,
iŋilí i mááŋ,
kitɔŋ kí nakúnɛ u Sulutɛ́ɛŋ,
Kalilée, kitɔŋ kí peenyí!
16Pɛɛnd pɔ́ kitɔŋ kí imbíne
mɛ́ɛ́n kiandá kí kisie;
epé pamaápa ɔ́ kitɔŋ kí pikú,
kisie kíápunyɔk.
17Kutál á kisikɛl kikáánɛ́, Yésuse woond é kukéme: «Ánupíkúŋúná, kipia kí mɛnɛ́mɛnɛ́ɛ kanyi kɔ́ɔk.»
Yésus mápílíkɛ́n popíónyí pákutúan
(Mál 1.16-20; Lúk 5.1-11)
18Aná umɛ́ɛ́ndɛ́ á kiŋidiŋindɛ kí asaá ú Kalilée, wɛɛ́n paandimán páandɛ́, Símuné pápílanɛ́ ɛ́ɛ́ Píɛlɛ ne Endelée, póómbon puolí ká asaá: pámapá polókí muɔpɔ́. 19wɔ́ kɔ́ɔ́p ɛ́ɛ́: «Ɔ́nuɔŋɔ́ káámɛ, iŋenuéyí polókí pɛɛnd.» 20Páyapan puolí puɔ́pɔ́ nɔ niɔ́kɔ́tɔ́n, pɔ́ɔŋ kɛ́ɛ́yɛ́. 21Waand epísíít, wɛɛ́n paandimán páandɛ, Sáákɛ kinɔ́k kí Sépeté, na andimán wɛɛyɛ́ Isáaŋ, kɔ́ɔ́p ó kitóóŋ ne síí wɔɔpɔ́ pɛ́ɛ́yɛn puólí púɔ́p. Waapílikɛn pɔ. 22Nɔ niɔ́kɔ́tɔ́n pááyap Síí wɔɔpɔ́ no kitóóŋ kiɔ́p, pɔ́ɔŋ é Yésus.
Yésuse nɔ pitɔɔt pí pɛɛnd
(Mál 1.39; Lúk 4.44; 6.17-18)
23Yésus pɔŋɔ Kalilée kitikit, woónyonyi kɔ́ɔ́p á piansi pí imbísókólí, ukéme insɔ́m yi indámb i Pufuŋ pú mɛnɛ́mɛnɛ́ɛ woond weéŋukesi manúma meem no mokóndi meem ɛ́ kikɛtɛ́kɛtɛ́ɛ kí pɛɛnd. 24Nuúmu núɛ́yɛ́ nuásálamand e kúúsí kú Silí kitikit, poólinon wɔ́ na pámaápítáyán á tunamá á tunamɛ́ɛ, ne epé pɛ́mɛɛ́nɛ́n iŋɛ́n: ne pepélítúputia, na pasundúsund, nɛ pinsɛ́kɛlinɛ; weéŋukesi pɔ. 25Pitɔɔt pí pɛɛnd ɔ́ɔ́ŋɔnɔŋɔn kɛ́ɛ́yɛ́, píólinon Kalilée ne Tekapóol, ne Yelúsalɛm ne Yuté, na taapukɛ u Sulutɛ́ɛŋ.
දැනට තෝරාගෙන ඇත:
Matié 4: yav
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2026, CABTAL