Matiyu 26
26
Abu be Atkwentì è té fuchin be e gu Yeso ángá
(Marku 14:1-2; Luka 22:1-2; Yohana 11:45-53)
1Atan a Yeso è jan gu ara be, be fwa ena ángá, gè jan be etsonchi mbwe jan, 2“Abu nye yi ángá, Esǝ mo Epenyim dan shi tsǝ fà, atan enò ba fu m, a me Nwen Nobǝ, ti a no be nobǝ evǝa be e ken e fu m a chu eswafǝ.”
3Kǝnggwa be Ekǝ́n echa ngge be Atkwentì è fǝn a tswa tem̀ mo Chu mo ekǝ́n, á bè fǝ́ anga Kayafa, 4bè té fuchin evǝa be e fu Yeso engǝ̀tonton ngge be e gu ye. 5Bè jan, “Tea ge e no ye a tswa ekpengga mo Esǝ hon ra, afwa be nobǝ a tke etkekàn.”
Ndegwa akan è nggwa Yeso byi yoben a chu a Betani
(Marku 14:3-9; Yohana 12:1-8)
6A Yeso è no a Betani a mu Sima, ya modwa-ehwyá, 7ndegwa akan è bwa a zǝn ngge byi yoben è no ngge tse àywá adi etsǝn a bè mbwe ngge ten, a be fǝ́ anga alabasǝta, nè ti nggwa Yeso a chu atan a gè de mode anga.
8Atan a be etsonchi è di enò ángá, bè fku tsuruku nè jan e sojube jan, “Mò ebwedìm ena no engǝ? 9Bà a ti byi yoben ena a jwa a de adi tse echa, abu bà a ti tse hon a be ben ángá, àa no be ya ekan.” 10Adia a Yeso è yi ara mò a bè jan ángá, gè ká be eka jan, “Bwe engǝ nye nnà ndegwa ena anga? Ge bwe ara m mò esese. 11Be ya ekan hon no a fwa ngge nye, tea a me m no a fwa m ngge nye ra. 12Byi a gé ti nggwa m a chu ángá, gé bwese m ju anga mo edim mam. 13M jan nye ebi, a egwa egwa mo zǝn a ba jan Fwa Esese ena a tswa zǝnchaje ángá, ba jan fwa a chu mò a ge bwe na, evǝa be e ka e ben ngge ge gaten.”
Yahuda è chadwa jan ge tsǝ a du Yeso
(Marku 14:10-11; Luka 22:3-6)
14Kǝnggwa akan a engga mo be etsonchi gwi chu fà mo Yeso, a bè fǝ́ anga Yahuda Eskariyoti ángá, è ken a zǝn be Ekǝ́n echa, 15nè ká be eka jan, “A mbwe a nya no m, ano m tsǝ Yeso du nye bu?” Bè ká fwentse azufa gwi ta (30) ti no ye. 16Tke atan enò, Yahuda è no nda efwa anga evǝa ge e tsǝ Yeso e du be a bu.
Yeso è de mode mo Esǝ mo Epenyim ngge be etsonchi mbwe
(Marku 14:12-21; Luka 22:7-13; Yohana 13:21-30)
17Tsǝnò ekwafya mo etú mo Esǝ mo Borodi e ben ye yisti ra ángá, be etsonchi mo Yeso è bwa a zǝn ye nè ká ye eka jan, “Zǝn a o dgyan je e te o fuchin, a wa de mode mo Esǝ mo Epenyim ángá no a che?”
18Gè janfwe be, “Nye kwashi a zǝn nobǝ akan, a tswa eten efifi, nye e jan ye jan, ‘Etumo hon jan, engga a bè panyi m ángá, tén ara. M dgyan anga me e de mode mo Esǝ mo Epenyim ngge be etsonchi mam a mbwe o.’ ” 19Enona, be etsonchi hon è ken bwe abu Yeso è jan be ángá, nè bwe mode mo Esǝ mo Epenyim hon a zǝn.
20Atan a nò è kpo ara ángá, Yeso è chu a zǝn teboro ngge be etsonchi mbwe abu be e de mode esǝ hon. 21Abu bè no de mode ángá, gè jan, “M jan nye ebi, akan mo nye tsǝ a du m.”
22Atan a bè fo enó ángá, bè bgen nya àywá, nè kwa ara ye eka ekam, akan chashin mo akan jan, “Etumo, ende hon ara? A a me?”
23Yeso è janfwe be, “Ende akan hon nwene e du fwa re bu adi ekemo akan ngge me na, a no ende nwene a tsǝ a du m ángá. 24Nwen Nobǝ hon a fǝ abu Afketa mo Ehwya è jan a chu ye ángá. Tea ebwe nobà ende e tsǝ a du Nwen Nobǝ hon ángá. Gà se a tkyan a ge, a zǝn ye be è ma mbwa be ye ra.”
25Kǝnggwa Yahuda, nwene a tsǝ a du ye ángá è jan, “Etumo, a me?”
Yeso è janfwe ye, “Ee, ge no abu o jan ángá.”
26A bè chà de mode hon anga, Yeso è ti borodi nè chwano Ehwya. Gè bwìkwa nó ti no be etsonchi mbwe, nè jan, “Nye cha, nye e de, ena a ju m.”
27Kǝnggwa, gè ti kǝnggwe akan, gè chwano Ehwya nè ti no be. Gè jan, “Binbin mo nye, nye ngǝ a tswa mo nó. 28Ena a ngǝ mam mo ebwedefǝm mo Dwavǝ Esenm Efwe hon, nwone a bè ti nggwa evǝ mo egwanom mo be ebgen mo be nobǝ embo ángá. 29M jan nye, ma ngǝ m mbǝ enabi ena efwe ra, kpwà tén nò a ma ngǝ ye adi efwe ngge nye a tswa zǝnotì mo Àtà m ángá.”
30Chashin, a Yeso ngge be etsonchi mbwe è twa ara bón akan ángá, bè vǝ́ a je nè ken vǝ́ chu a Hwì mo Zetu.
Yeso è fijan Bitru jan na tson etson mbwe
(Marku 14:27-31; Luka 22:31-34; Yohana 13:36-38)
31Kǝnggwa, Yeso è jan be etsonchi mbwe jan, “Etsǝ nòmo, binbin mo nye tse a gwa m juju m, adia ge no ebam jan,
“‘Ma bu a gu ende edgon be son hon ángá,
be son e no a tswa etso hon ángá,
a bu a shan a gu.’
32Tea chashin a bè ti m nyi ara etkyen ángá, ma kwafya mo nye a ken a sǝnsen mo Galili.”
33Bitru è jan ye jan, “Ano be è jan èé binbin mo be, tsegwa a gu o a chu mò a bwe ngge bo ángá, a me, m tse a gwa didi mbo ra.”
34Yeso è janfwe ye, “M jan o ebi, etsǝ nòmo ena, kǝndon chà a to ye dwa ra, wa tson etson kè ta a chu eyim mam.”
35Bitru è jan ye, “Ge è ma no ara jan èé efǝm ngge bo, m jan a didi m jan, m yi mbo ra ra.” Binbin mo be etsonchi hon è jan enò èé be.
Yeso è bgó ebgo a Gasamani
(Marku 14:32-42; Luka 22:39-46)
36Kǝnggwa Yeso è nya ngge be etsonchi mbwe, bè ken a zǝn a bè fǝ́ anga Gasamani zǝn a be tu zetu è no àywá ángá, ge jan be jan, “Nye chu ana, ma ken a nokǝ̀n evǝa me e bgó ebgo.” 37Gè ken ngge Bitru tangge mbǝgya ndedon fà mo Zabadi, ge kwa adi nya ebgenm ngge tsuruku ekǝnkǝn nya. 38Kǝnggwa gè jan be jan, “Nya ebgenm e no a tsuruku mam ángá, no àywá abu ge twa a fǝ̀ chu m. Nye no ana, nye e no ezǝngga ngge me.”
39Gè ken bishi chafya nè bwi shi a sǝnsen ngge dgyèn mbwe nè bgó ebgo jan, “Àtà, ano ge no ebwetim, we ti e vǝ́ m ekan ena, tea ge e no ye mò a m dgyan anga a me ra, ge e no mò a o dgyan anga a bo.”
40Kǝnggwa gè twabǝ bwa a zǝn be etsonchi ta hon nè ben be, be no adi dan. Gè ka Bitru eka jan, “Nye no a ti nye ezǝngga ngge me mo ekpengga nwofyan ra? 41Nye e no ezǝngga, nye e bgó ebgo afwa nya kpo a tswa mo embwadi. Eshwen, engǝ́ mo nye hon dgyan anga, tea ekǝnjuju mo nye no embǝmbǝ.”
42Yeso è nyagwa be adi e fà ken bgó ebgo jan, “Àtà ano ge no ye ebwetim a be e ti e vǝ́ m ekan ena ra, kpwà tén ano m ngǝ ara ye, gwa mò a o dgyan anga ge e bwe.”
43Atan a gè twabǝ bwa a zǝn be ángá, efwe ge ben be, be no adi dan adia fǝzǝn mo be è mbo ngge dan ángá. 44Enona, gè nyagwa be efwe ken bgó ebgo a adi e ta, nè no jan fwa hon ken anga abu gé jan ángá.
45Kǝnggwa gè twabǝ ken a zǝn be etsonchi hon n ka be e ka, “Nye chà dwa dan anga ngge nya etkem? Nye di, ekpengga hon bwa ara, a ba tsǝ a du Nwen Nobǝ a bu mo be ya ebgen. 46Nye nyi etkyen je e nya. Ende e tsǝ a du m nyabwa na.”
Abu bè fu Yeso ángá
(Marku 14:43-50; Luka 22:47-53; Yohana 18:3-12)
47Abu Yeso è cha jan fwa anga, Yahuda, akan mo be Gwi chu fà hon è bwangga re ngge be nobǝ embo. Bè kpwá hwen efǝ ngge be tuetsǝ́n no a kpwabu mo be. Be Ekǝ́n echa ngge be Atkwentì mo be ya a Yahuda è tson be a be. 48Yahuda nwene è tsǝ du Yeso ángá è jantu ara be jan, “Ende hon a m kanfu ángá, a a ge; nye fu ye.” 49Ebwanggam mbwe, Yahuda è ken a zǝn Yeso kè akan nè jan, “M bi o fwa, Etumo,” nè kanfu ye.
50Yeso è janfwe ye, “Shushwa, bwe mò è ti o bwa ángá.”
Kǝnggwa be ndedon hon è ken a zǝn Yeso nè fu ye. 51A gè di enò ángá, akan mo be ye è ba Yeso anga, è vǝ hwen efǝ mbwe gwa a je nè fwa ti ara tón mo akan mo be fí mo Chu mo ekǝ́n.
52Yeso è jan ye jan, “Ti hwen efǝ mbo du shi a tswa fya mo nó, adia binbin mo be ya e vǝ hwen efǝ gwa a je anga, hwen efǝ hon a gu be a ge. 53O ka ḿ mbo jan m fǝ a ti m Àtà m dwa, kè akan ga tson be maleka e twafǝ̀ etso gwi chu fà, be e bwa e butsǝ a chu m ra? 54Ano ge bwe enò, bwe engǝ fwa mo Ehwya è jan, jan mò ena a bwe a tén enò ángá, a de a fǝ?”
55Yeso è twanga n jan be ya e bwa evǝa be e fu ye ángá jan, “Ma chu mo be ya e tke etkekàn, a nye bwa ngge be hwen efǝ ngge be tuetsǝ́n evǝa nye e fu m ángá? Nogwa nogwa m no chuukwa mo Àtá mo Ehwya, m tumo anga, tea nye fu m ra. 56Tea binbin mo be mò ena a be nobǝ hon è bwe na, bwe defǝ anga mò a be efojan ekpe ekpe è bá ángá.” Abu bè fo enò anga, binbin mo be etsonchi hon è tsegwa gu ye.
Bè ti Yeso bwa chafya mo be Atkwentì
(Marku 14:53-65; Luka 22:54-55,63-71; Yohana 18:13-14; 19:24)
57Be ya è fu Yeso ángá è ti ye ken a zǝn Kayafa, Chu mo be ekǝ́n hon, zǝn a be etumo mo edon ngge be atkwen nobǝ mo be ya a Yahuda (Be Akwentì mo be ya a Yahuda) è fǝnno ángá. 58Tea Bitru è no ba ye ken anga adgya chashin, ti kengga a chuukwa mo mbwe Chu mo ekǝ́n hon. Gè kwashi a tswa, nè chu ngge be edgonzǝn evǝa ge e di abu mò hon a kǝn-etkyen ángá.
59Be Ekǝ́n echa ngge binbin mo Be Atkwentì mo be ya a Yahuda è no tkunda fwafe a be fe a twa Yeso a chu, evǝa be e bwe mochi ngge nó ne ti e gu ye. 60Bè ben be mò akan ra, bi adia be eyifwa fwafe embo è bwa jan fwa mo be a chu ye ángá.
Ekǝn-etkyen, be nobǝ fà è bwa ywa a chafya mo be ekpenkǝ́n, 61nè jan, “Nobǝ ena è jan, ‘M kǝnbwi a ti Àtá mo Ehwya hon, m twanga a mbwe ye a tswa mo tsǝnò ta.’ ”
62Ekǝnggwa, Chu mo ekǝ́n hon è nyi etkyen nè ká Yeso eka jan, “O jan a fwe mbo fwa a chu efya a be ya ena tso o anga na ra?” 63Tea Yeso è jan ye a vǝ ra.
Chu mo ekǝ́n hon è jan ye efwe jan, “M bgó o ngge efan efanm, adi ti mo Ehwya e no angǝ ángá: Jan je, ano a bo wa Kristi, Nwen mo Ehwya hon.”
64Yeso è janfwe ye “Ee, ge no abu o jan anga. Tea m jan nye anga binbin jan, ti asuswana ken chafya, nya di a me Nwen Nobǝ chuno chá budgo mo Ehwya Emwenbin. Nya di abu m nyashwa a sen a tswa edwe ángá gaten.”
65Kǝnggwa Chu mo ekǝ́n hon è vǝngga mokàn mbwe evǝa ge e tú jan nya mbwe bgen twafǝ̀ chu, nè jan, “Ge jan ara fwa esera a chu Ehwya. Fwa a chu ye efki a je nda anga, a ani? Di, asuswana nye fo ara fwa esera a ge jan a chu Ehwya ngge tón mo nye. 66Mò a nye ka anga a no?”
Bè janfwe ye, “Ge defǝ ara ge e fǝ.”
67Kǝnggwa bè tsǝ́ ye afǝtkwa a fǝzǝn embǝgya nè kǝn ye e-ǝm. Be ya ehwyà è bu ye efya, 68nè jan, “Fijan je, a bo nwene e no Kristi hon ángá. Jan je ende e bu o mò anga.”
Bitru è tson etson mo Yeso
(Marku 14:66-72; Luka 22:56-62; Yohana 18:15-18,25-27)
69A Bitru è chuno a tswa chuukwa hon ángá, nwen ndegwa akan ya mochi è bwa a zǝn ye nè jan, “A bo, ò no ngge Yeso ya a Galili hon gaten.”
70Tea gè tson etson mo nó chafya mo be binbin jan, “M yi m mò a nye jan fwa anga a chu mo nó na ra.”
71Kǝnggwa gè ken chá fǝehwen, zǝn nwone a, nwen ndegwa ya mochi efki è di ye nè jan be nobǝ ya è no a zǝn ángá jan, “Ende ena è no ngge Yeso ya a Nazarati.”
72Gè tson etson mo nó efwe ngge efan efanm jan, “M yi m nobǝ hon ra.”
73Beti bishi nwofyan enó, be ya è ywano a zǝn hon ángá, è ken a zǝn Bitru nè jan, “Ebi wa akan a engga mo be, adia ngǝ-aken mbo gwa a je abu ḿ mo ya a Galili.”
74Kǝnggwa gè no to chu ye ebwe anga ngge efan efanm a zǝn be jan, “M yi m ende hon ra.” Kè akan, kǝndon è to dwa.
75Kǝnggwa Bitru è kaben fwa a Yeso è jan, “Kǝndon chà a to ye dwa ra, wa tson etson a chu m kè ta.” Ge vǝ́ a je, nè ken kpedwa àywá.
දැනට තෝරාගෙන ඇත:
Matiyu 26: ICH
සළකුණු කරන්න
බෙදාගන්න
සසඳන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2024 Luke Initiative for Scripture Translation