Matiyu 24
24
Be echi mo ekǝn-etkyen mo zǝnchaje
(Marku 13:1-2; Luka 21:5-6)
1Abu Yeso è gwa a je mo Àtá mo Ehwya nè nya anga, be etsonchi mbwe è bwa a zǝn ye nè jan ye jan ne, ge e di abu bè mbwese àtá hon no ángá. 2Gè ká be eka jan, “Nye di gu ara be mò ena? M jan nye ebi, ba gwa be ten akan a chu efki ra. Ba kǝn a bwi egwa egwa mo be a shwa a sen.”
3Chashin a Yeso è vǝ́ chu ara a chu Hwì mo Zetu ángá, be etsonchi mbwe è bwa a zǝn ye engǝ̀tonton, nè ká ye eka jan, “Jan je, atan a be mò ena a bwe ángá. Jan je, mò a tú echi jan o twabǝ nyabwa ngge mò a tú je echi jan ekǝn-etkyen mo zǝnchaje bwa ara gaten.”
4Yeso è janfwe be jan, “Nye e bgeshi fǝzǝn a fwa ende akan ngga a de nye. 5Adia be nobǝ embo a bwa adi ti mam, n no a jan anga a chu be jan, a be ba Kristi hon, na nggade be nobǝ embo. 6Nya fo fwa a chu be kàn ngge asha mo be kàn, nye e tsen nye etsentsen ra. Be mò yishwa ena a bwe a tén ebwem, tea ekǝn-etkyen mo be chà nyabwa. 7Be nobǝ a eyasǝnsen akan a nyo kàn ngge be ya eyasǝnsen efki, be nobǝ mo zǝnotì akan a nyo kàn ngge be nobǝ mo zǝnotì efki. Mbe a fu ngge sǝnsen a chìju a tswa be zǝn efki efki. 8Binbin mo be mò ena, a etkem mo ekan engǝm hon kpwà ara. Ge no abu etkem mo edwadwa mo mba e fu ndegwa jufà no anga sangǝ́, ge chà a mbwa nwen hon.
9“Kǝnggwa ba kpu nye a no be nobǝ ya a tswa nye ekan na gu nye. Binbin mo be nobǝ a tswa zǝnchaje a ze nye a chu ti mam. 10Atan enò, be nobǝ embo a twa a gwa chaebi mo be n tsǝ́ a du so, na ze so. 11Be efojan fwafe embo, a mbwi a bwa, na ngga a de be nobǝ embo. 12Adi etubim mo be mofǝ̀, edgyan a be nobǝ no ngge nó e sojube anga, a tswa ju, 13tea ende e bon-ekǝ̀n kengga ekǝn-etkyen a ben ega. 14Ngge ba du edgon a chu Fwa Esese a chu zǝnotì mo Ehwya hon a kwa a gu zǝnchaje. Mò ena a no abu fwa ejantum a zǝn binbin mo be nobǝ a tswa zǝnchaje, kǝnggwa ekǝn-etkyen hon a bwa.
15“Enona, atan a nye di ‘mò e du nobǝ etsentsen, mò ambǝgo, ywano a zǝn echanwenwen a tswa Àtá mo Ehwya,’ abu efojan mo Ehwya Daniye è jan fwa a chu mo nó ángá, (ende e ká mò hon ena anga, e hwa e yi.) 16Kǝnggwa be ya e no a sǝnsen mo Yahudiya ángá be e tse, ne tón e vǝ́ a chu be hwì. 17Ende e no a chu àtá, ge e shwa ye a sen ken e shi ye a àtá mbwe evǝa ge e ti mò akan ra. 18Ende akan e no a kpèn ángá ge e twabǝ e ken ye a mu evǝa ge e ti adanmo mo ebwim a ju ra. 19Atan enò, a no ekpengga ekǝnkǝn nya a chu be ndegwa ya e no jufà tangge be ya e no ngge mbǝgyashan ya e mmo mme anga a bu ángá. 20Nye e bgó ebgo a zǝn Ehwya afwa fǝton etsem hon a nya tse ángá ge e no ye adi ekpengga mo viejwa eno e ra Nò nya Etkem ra. 21Adia ekan mo ekpengga hon a kǝn nya àywá. Be nobǝ è chà didi be yishwa ekan engǝm ena a tswa zǝnchaje ena ra. Ngge ba di be yishwa ekan engǝm ena efwe ra. 22Be è jan Ehwya è chà senvǝ́ ye be tsǝnò hon ra, nobǝ akan nwene àa ga ángá àa fwa ye ra. Tea adi efka mo be ya bè swavǝ ara ángá, be sen a vǝ be tsǝnò hon.
23“Adi be tsǝnò eni, ano ende akan jan nye jan, ‘Di, ena a Kristi hon’ eno e ra, ‘A ge e nokǝ̀n’ nye e cha nye dwa ra. 24Adia be nobǝ embo ya a fǝ́ chu be Kristi ngge be ya fefwa jan ba be efojan mo Ehwya ángá, a mbwi a bwa. Ba bwe be echi àywá ngge be moeditanm evǝa be e ngga e de be nobǝ. Ge è ma no ebwetim bà a ngga a de èé be ya Ehwya è swavǝ ara ángá. 25Nye bgeshi fǝzǝn, m jantu ara nye asuswana a ge chà bwe ye ra ángá.
26“Enona, ano ende akan jan nye jan, ‘Di, ge no a tswavǝ́n,’ nye e vǝ́ nye a je ra, eno e ra, ‘Ano be jan nye jan ge no a tswa àtá.’ Nye e tsǝ nye ekǝ̀n a chu mo ge jan anga ra. 27Abu embǝgezǝ e vǝ chá notà ngge be di nó anga chá nodgó ángá, eni abu etwabǝbwam mo Nwen Nobǝ a no ángá. 28Binbin mo be zǝn a kǝn mo gwemo no anga, be endo a fǝn anga a zǝn.
Abu Nwen Nobǝ hon twabǝ a bwa ángá
(Marku 13:24-27; Luka 21:25-28)
29“Kè akan, chashin mo be ekan ekǝnkǝn nya mo be tsǝnò hon eni,
“ ‘Nò hon ena a je di anga a
zǝkpe twanga a no etwafǝfǝ
ngge fka a no ye enggasansan mbwe ra,
be ngǝkpe a vǝ chá zǝkpe
n nggwashwa a sen
ngge binbin mo be mò
e dwa a kpe ángá a chìju.’
30“Kǝnggwa a me, Nwen Nobǝ hon m chà a mbwi a bwa a zǝkpe. Binbin mo be nobǝ a tswa zǝnchaje a bentsen atan a be di m, a me Nwen Nobǝ nyabwa a tswa edwe ngge echakpo ngge egǝ̀n echa ángá. 31Ma tson be maleka mam, ba to kpwi ngge dwa etànm àywá. Ba fǝ́ a fǝn m, be nobǝ mam binbin a m swa ara, a tswa mo zǝnchaje, ti chá ekǝn-etkyen akan mo be kpe ti a ken chá efki.
Mò a ja kǝ́n-ekǝnkǝ́n mo nó a ju tu engǝtsǝn ángá
(Marku 13:28-31; Luka 21:29-33)
32“Asuswana, nye e ka shwa a chu mò a je yi a ju tu engǝtsǝn, abu be bu mbwe no bgè bwa anga, be ekpezǝmo mbwe no to anga, nye yi jan jo tén ara. 33Enona, atan a nye di be mò ena binbin bwe anga, nye e yi jan ekpengga a Nwen Nobǝ hon bwa anga bwa tén ara. 34M jan nye ebi anga, ekǝn ena, twafǝ̀ a didi ye ra, kpwà tén atan a be mò ena binbin bwe ara ángá. 35Kpe ngge zǝnchaje a twa a fǝ̀, tea ge no kenm be fwa mam bwe a kǝ̀n a tén ebwekǝ̀nm.
Ende akan yi ye nò hon, eno e ra awa mo Nwen Nobǝ hon ra
(Marku 13:32-37; Luka 17:26-30,34-36)
36“Ende e yi nò hon eno e ra awa hon nwone a m twabǝ a bwa ángá fwa ye ra. Èé be maleka mo Ehwya eno e ra a me, je yi je ra, kpwà tén Àtà hon yi nó a ge. 37Abu gè no adi be ekpengga mo Nuhu ángá, enò abu ga no atan a me Nwen Nobǝ hon a bwa ángá. 38Adi be tsǝnò eni, a embobin è chà mbo ye ra ángá, be nobǝ è no de anga, nè no ngǝ anga, bè no fǝ́ ndegwa anga nè no du be ndegwa don anga. Bè no bwe enò anga, ti kengga atan a Nuhu è kwa a tswa ngga hon ángá. 39Bè yi be mò è bwe anga ra, kpwà tén atan a embobin hon è bwa mbobin gu be. Eni a abu ga no, nò ebwam mam, a me Nwen Nobǝ ángá. 40Atan enò be nobǝ fà a no a kpèn no a wa wá anga, Ehwya a ti ara akan na gwa akan. 41Be ndegwa fà no a kpwa mò anga a chu hwya, Ehwya a ti ara akan na gwa akan.
42“Enona, nye e bgeshi fǝzǝn, adia nye yi nye nò hon nwone a Yagwamo mu mo nye a bwa ángá ra. 43Tea nye e yi e seshi fwa ena, be è jan yagwamo mu akan hon yi atan a yaju nyabwa a zǝn ye etsǝ ángá, gà a chu a no ezǝngga. Gà a cha ye dwa yaju ge e kwa e shi a àtá mbwe, nè ken e kpu be atkimo mbwe ra. 44Enona, a nye gaten, nye e no e kpwà adi zǝn edim, adia a me Nwen Nobǝ hon a bwa adi awa hon a nye ka nye ra ángá.
Ya mochi ebi ngge ya mochi amme
(Luka 12:41-48)
45“Kǝnggwa ende hon a ara, e no ya mochi ebi ngge enggaton, nwene a yagwamo mu mbwe du ara ye ge e no chu mo be ya mochi mbwe, ngge ge e no be mode mo be anga, adi ekpengga edefǝfǝ? 46Esese a no ḿ mo ya mochi hon nwene a yagwamo mu mbwe twabǝ bwa ben ye ge no bwe mochi hon anga abu bè du ye ángá. 47M jan nye ebi, yagwamo mu hon a ti mobenben mbwe binbin a du ya mochi hon a bu. 48Tea ano ya mochi hon no ya mofǝ̀, n jan chu ye jan, ‘Yagwamo mu mam a dgyenfon,’ 49n kwa ara be shushwa mochi mbwe mò ebum, ngge ge no de anga n no ngǝfǝ́ anga ngge be ya mbǝ engǝfǝ́m. 50Yagwamo mu mo be ya mochi hon a bwa nò hon nwone a ge ka ye jan ga bwa ángá ra, ngge adi ekpengga nwone a ge yi ye ra ángá. 51Yagwamo mu mbwe a bu ye mofǝ. Ga ti ye twa a tan ngge be ya ayibangǝ̀, zǝn a ga kǝndwafǝ na kǝ́n san ángá.
දැනට තෝරාගෙන ඇත:
Matiyu 24: ICH
සළකුණු කරන්න
බෙදාගන්න
සසඳන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2024 Luke Initiative for Scripture Translation