TĨĨGI WERE 1
1
LE TI TĨĨGI WER JOŊGE FẼẼREN WORA
Baa joŋ fẽẽren wo ɓuy, joŋ je táabay
1Le Ti tĩĩgi wer, Baa joŋ ngel ma ciŋ wo de ma gesiŋ. 2Ngel ma gesiŋ la hay mbe wo go lugudlugud tiʼ i, day ɓil koɗ lay. Suŋgu hay go de ɓoʼge ti tuu ma kuɗum no.#1.2 Tuu ma kuɗum no : Á kaŋ nen ti maarog ma ɓaaɓaa maga hay go de ɓoʼge ne tamsir ti ɓuy ga ngel ma de heeg hay baywa ɗa mono. Se diŋ ngel maga fẽẽre mbuɗgi ma bay daɗ wer hay wo joŋge ni. Ngel se boŋn kaŋ mbe nen ti maarog ma patalan wo lay, tuu bii ma kuɗum kuɗum wo, ngel ma de suŋgu maga egre fẽẽre ma de ɓlaggen wo ni mono. Day Nenterse#1.2 Nenterse : Kolge ɓe ma tigriŋ mbe pa ga ɓodge egre mani Baa no, noga leege ma de egre gigigi. Baa hay halge ti biin caw.
3Baa day ga : Poɗag mo joŋ. Poɗag kal joŋge. 4Baa kal koge ga poɗagn hay de ele, Baa kal caa ɓil poɗagn wo go de suŋgu no. 5Baa kal ɗe poɗagn ga ngel cege, kal ɗe suŋgun ga ngel suŋ. Wur kal coŋge go, ngel raw teege go, sen diŋ naw ma taŋgu no.
6Baa day ga : Holaŋ ngel mo hay ti holaŋ bii no, ma caa ɓil biin wo go de bii no. 7Baa kal joŋ holaŋ ngel seno, ma caa ɓil bii ma wer gesiŋn go de ma ciŋ no. Sen kal joŋge go doo sen nono. 8Baa kal ɗe holaŋ ngel sen ga ngel ma ciŋ. Wur kal coŋge go, ngel raw teege go, sen diŋ naw ma de ɓog no.
9Baa day ga : Bii ma wer ngel ma ciŋn ga go gesiŋ la mo tay go ti ngel po boŋ nen maga ngel ma de heeg mo naa nene. Sen kal joŋge go doo sen nono. 10Baa kal ɗe ngel ma de hegen ga siri, kal ɗe tayge ti biin ga maaroge. Baa kal koge ga sen hay de ele. 11Blam ɓe Baa kal wããge ga : Tamsir mo tĩĩ fẽẽre : Mo tĩĩ fíi maga wo de mbèere ɓili, koore ma leɗ mbèere wo gesiŋ la ma honla de wer ɓe, day wo de mbèere ɓaaran ɓili. Sen kal joŋge go doo sen nono. 12Tamsir kal tĩĩ fẽẽre, tĩĩ fíi ma de mbèere ɓil wo ma honla de wer ɓe, de koore ma leɗge wo de mbèere ɓaara ɓil wo ma honla de wer ɓe. Baa kal koge ga sen hay de ele. 13Wur kal coŋge go, ngel raw teege go, sen diŋ naw ma de swaʼ no.
14Baa kal ga : Fẽẽre ma ler ngel go mo hay wo le nen holaŋ ngel ma ciŋ no, ma caa ɓil ngel ma de suŋ wo go de ngel ma de cege no. Á mo hay wo diŋ fẽẽre ma ngaɓ ngel po wo, de naw wo de kiŋgi wora. 15Daga á mo hay wo diŋ fẽẽre ma ler ngel wo ti holaŋ ngel ma ciŋ no, ma tee ngel go ne tamsir ti. Sen kal joŋge go doo sen nono. 16Baa joŋ fẽẽre ma ler ngel ma kluuri wo ɓoge. Ma kluun diŋ ma seege de ngel ma de cege, ma kleen diŋ ma seege de ngel ma de suŋ no. Baa joŋ gér wo ni lay. 17Baa cor ra le ti holaŋ ngel ma ciŋ, ma tee ngel go ti tamsiri, 18Ma wãã wããre ngel ma de ceg wo de ngel ma de suŋ, ma caa nen poɗagn wo go de suŋgu no. Baa kal koge ga sen hay de ele. 19Wur kal coŋge go, ngel raw teege go. Sen diŋ naw ma de naa no.
20Baa day ga : Fẽẽre ma tenen mo def wo nen biin wo go, day gesiŋ lam lay no, weere dweere mo hay wo pudgi ti holaŋ ngel ma ciŋn lay. 21Baa kal joŋ wer fẽẽre ma kluuri ma nen bii wo ma honla de wer ɓe, de fẽẽre ma ʼwẽẽle ma tenen nen bii wo ma honla de wer ɓe. Nen bii kal joŋge de ɓaara yogyog def go defge. Baa joŋ dweere ma pudgi de graŋ wo ma honla de wer ɓe lay. Baa kal koge ga sen hay de ele. 22Baa kal kaŋ bosaʼ ne hara ti ga : Dus we mbèere ti yoo ɓay, tes we, ni nday bag we nen bii maarogn go. Day weere dweere mo baa wo tamsir go lay. 23Wur kal coŋge go, ngel raw teege go, sen diŋ naw ma de dwee no.
24Baa kal ga : Tamsir mo joŋ wer fẽẽre ma tenen wo wer sar sare, horog wo, fẽẽre ma seɗge de ɓil wo, nàyre ma ti tamsir wo ma honla ti wer ɓe. Sen kal joŋge doo sen nono. 25Baa joŋ nàyre ma mbásga wo ma honla de wer ɓe, horog wo ma honla de wer ɓe, de fẽẽre ma seɗge de ɓil wo ma honla de wer ɓe. Baa kal koge ga sen hay de ele.
26Baa day ga : Naa joŋ we je táabay doo naa nono, de mbaŋ naa, maga á mo hay wãã wããre cẽẽ ma nen maarog wo, de dweere ma ciŋ wo, de horog ma gesiŋ wo la ɓuy. 27Baa joŋ je táabay de maŋge ɓe, á joŋn de maŋ Baa, ma twar wo de ma twãy, Baa joŋ ra.
28Baa raw kaŋ bosaʼ ne hara ti, day wii ra ga : Hay we tesge, jaw we, baa we tamsir go, wãã we wããre ɓe. Wãã we wããre cẽẽ ma nen bii wo, dweere ma ciŋ wo de nàyre maga seɗ wo de ɓil ɓaara gesiŋ lam ɓuy no. 29Baa kal ga : Koɗa, ndi hã fíi maga de mbèere ɓil ɓuy, de koore ma leɗge wo gesiŋ la ɓuy ne nday diŋ rege ɓay. 30Ne nàyre wo de dweere ma ciŋ wo mo ɓuy lay no, de fẽẽre ma seɗge de ɓil ɓaaran wo mo ɓuy lay no, de fẽẽre maga ɓod wo egre de tenen ɓil mo ɓuy no, ndi hã hãã depãy ne hara diŋ rege ɓaara lay. Sen kal joŋge go doo sen nono.
31Baa kal koge ga fẽẽre maga se hay joŋ ra go ɓuy, kona saara de el debaŋ. Wur kal coŋge go, ngel raw teege go, sen diŋ naw ma de hiiraʼ no.
Currently Selected:
TĨĨGI WERE 1: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.