O Isus Navin 11
11
O Isus Navin prelol e severna thana
1Kana gova šunda o Javin, o caro taro Hacor, bičhalda haberi e Jovavese, e carose taro Madon, e carose taro Šimron, e carose taro Ahšaf, 2thaj e carurenđe ano severno gorje, ani Arava južno taro Kineret, ane ravnice thaj ano Nafot-Dor ko zapad, 3e Hanaancurenđe ko istok thaj ko zapad, e Amorejcurenđe, e Hetiturenđe, e Perižanurenđe thaj e Jevusejcurenđe ano gorje thaj e Hivijcurenđe save živisade tali gora Hermon, ko than kaj si i Micpa. 4Sa kala carura iklile pe vojskencar thaj bute grastencar thaj marimase vordonencar. Sasa gova vojska savi sasa gaći bari sar i pošik ke moresi obala. 5Sa kala carura ćidije pe thaj savore katane ćerde logori paše paja e Meromese, te bi čalavena po Izrael.
6Tegani o GOSPOD phenda e Isusese e Navinese: “Ma dara lendar, golese so theara ane kava vreme ka ćerav te mudardon anglo Izrael. Lenđe grastenđe tetive čhin, a lenđe marimase vordona phabar.”
7O Isus Navin thaj sa i vojska tari jekh drom iklile pe lende paše paja e Meromese thaj napadisade len. 8O GOSPOD predija len ane vasta e Izraelcurenđe thaj von pobedisade len. Tradije len sa dži o Baro Sidon, dži o Misrefot-Majim thaj dži ki dolina i Micpa ko istok. Gija von mudarde len dži kaj nijekh ni ačhilo džuvdo. 9O Isus Navin ćerda gija sar so vaćarda lese o GOSPOD: “Lenđe grastenđe tetive čhin, a lenđe marimase vordona phabar.”
10Pale gova, o Isus Navin irisajlo thaj osvojisada o Hacor, a lese caro mudarda mačosa. O Hacor sasa glavno foro sa gole carstvurenđe. 11Sa so si džuvdo ane leste mudarda mačosa. Savoren uništisade, khanči ni ačhade so dišil, a o foro o Hacor o Isus Navin phabarda.
12O Isus Navin osvojisada sa e forura kale carurenđe thaj mačosa mudarda lenđe caruren. Vov sa uništisada len, sar so zapovedisada o Mojsije o sluga e GOSPODESO. 13Al e Izraelcura ni phabarde nijekh foro savo si ko brego, sem o foro o Hacor, savo phabarda o Isus Navin. 14E Izraelcura lije pumenđe sa o barvalipe thaj e stoka andare kala forura, a sa e manušen mudarena mačosa sa dži kaj ni uništisade len. Nijekhe ni ačhade džuvde.
15Sar so zapovedisada o GOSPOD pe slugase e Mojsijase, gija o Mojsije zapovedisada e Isusese e Navinese, a o Isus Navin gija ćerda – khanči ni ačhada te ni ćerol tare sa so o GOSPOD zapovedisada e Mojsijase.
E phuva save osvojisada o Isus Navin
16Gija o Isus Navin lija sa i phuv: o gorje, sa i pustinja ko jug, sa o gošensko krajo, e ravnice, i dolina i Arava, i gora e Izraelesi thaj e thana tale leste, 17tari gora Halak, savi vazdol pe premalo Seir, dži o Vaal-Gad ani libansko dolina tali gora Hermon. Sa lenđe caruren dolda, phanglja thaj mudarda. 18But vreme o Isus Navin ratujisada sa kale carurencar. 19Sem o Givon, kaj živisade e Hivijcura, nijekh aver foro ni sasa ano mir e Izraelcurencar – sa avera forura sesa osvojime ano maripe. 20Golese so, korkoro o GOSPOD zurada lengo ilo te bi ratujina protiv o Izrael thaj o Izrael uništisada len sa thaj mudarena len bizo milost, gija sar so o GOSPOD zapovedisada e Mojsijase.
21Ane gova vreme, o Isus Navin đelo thaj mudarda e Anakovcuren andaro gorje, Hevron, Devir thaj Anav thaj andare sa e bregura e Judaće thaj andare sa e bregura e Izraelese. O Isus Navin sa uništisada len thaj lenđe forura. 22Nijekh tare Anakovcura ni ačhilo ani Izraelsko phuv. Ačhile samo nekobor ani Gaza, ano Gat thaj ano Ašdod. 23Gija o Isus Navin lija sa i phuv, sar so o GOSPOD vaćarda e Mojsijase thaj dija e Izraelese ano nasledstvo premale lese plemenura.
Tegani i phuv odmorisajli taro maripe.
දැනට තෝරාගෙන ඇත:
O Isus Navin 11: GSP
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න