Sudije 4
4
I Devora thaj o Varak
1Kana mulo o Ehud, e Izraelcura lije palem te ćeren kova so si bilačhe ane jakha e GOSPODESE. 2Golese o GOSPOD dija len ane vasta e Javinese, e hanaanskone carose, savo vladisada ano Hacor. O zapovedniko tari lesi vojska sasa o Sisra, savo bešlo ano Harošet-Hagoim. 3E Javine sesa enjašel (900) sastrunale marimase vordona thaj biš (20) berš but mučila e Izraelcuren. Golese von lije te roven premalo GOSPOD.
4Ane gova vreme sasa ano Izrael sudija i proročica i Devora, i romni e Lapidotesi. 5Voj sudisada tali Devoraći palma, maškari Rama thaj o Betel ke Efremese bregura. E Izraelcura avena ke late thaj voj sudisada sporura maškar lende.
6Voj bičhalda lafi e Varakose, e Avinoamese čhavese, savo sasa taro Kedeš ani Neftalimesi phuv, vaćarindoj: “O GOSPOD, o Dol e Izraeleso zapovedil tuće: ‘Dža thaj le tusa deš milje (10 000) Neftalimcuren thaj e Zavuloncuren, pa inđar len ko brego o Tavor. 7A me ka anav ko potoko o Kišon premal tute e Sisra, e zapovedniko e Javinese vojskako, lese marimase vordona, lese vojska, thaj odori ka predav le tuće ane vasta.’”
8O Varak phenda laće: “Ka džav samo ako i tu dža mancar. Al te tu ni đeljan mancar, ni ka džav ni me.”
9I Devora phenda: “Šukar, ka džav tusa. Al te džane, golese so gija mangljan, umesto tuće, i slava ka preperol jekhe džuvljaće, golese so o GOSPOD laće ka dol e Sisra ane vasta.”
Gija i Devora đeli e Varakosa ano Kedeš, 10a o Varak akharda pesa e Zavuloncuren thaj e Neftalimcuren. Đele pale leste deš milje (10 000) džene, a lesa đeli thaj i Devora.
11A o Hever o Kenejco crdija pe tare avera Kenejcura, e potomkura e Hovavese, e Mojsijase sastrese, thaj putarda šatori pašo baro kaš ano Caananim, paše o Kedeš.
12Kana javisade e Sisrase so o Varak, e Avinoameso čhavo, đelo ko brego o Tavor, 13o Sisra akharda sa pe enjašel (900) sastrunale marimase vordona thaj sa pe vojska andaro Harošet-Hagoim te aven ko potoko o Kišon.
14Tegani i Devora vaćarda e Varakose: “Spremi tut! Kava si đive kana o GOSPOD ka dol e Sisra ane ćire vasta. Golese so o GOSPOD džal angle tute!”
Gija o Varak ulilo taro brego o Tavor a pale leste deš milje (10 000) manuša. 15Kana o Varak čalada pe lesi vojska, o GOSPOD čhuta ani pometnja e Sisra katane lese marimase vordonencar thaj lese vojskasa ano logori. Golese o Sisra ulilo tare po vordon thaj našlo prastandoj. 16O Varak tradija e marimase vordona thaj e vojska sa dži o Harošet-Hagoim thaj sa e Sisrasi vojska mudardili taro mačo, nijekh vojniko ni ačhilo džuvdo.
17A o Sisra našlo phirindoj ano šatori e Jaelako, i romni e Heveresi e Kenejcosi, golese so o Javin, o caro taro Hacor, thaj i familija e Heveresi e Kenejcosi živisade ano mir.
18I Jaela iklili anglo Sisra thaj phenda lese: “Av andre, gospodarona, av ane mingro šatori. Ma dara!”
O Sisra đelo late ano šatori, a voj učharda le ćebavasa.
19O Sisra phenda: “Moliv tut, de ma zala paj, trošalo sem.”
Voj putarda i morčhi e thudesa, dija le te pijol thaj palem učharda le.
20Vov vaćarda laće: “Ačh anglo ulaz e šatoreso. Te avilo khoni thaj te pučlja: ‘Isi li khoni andre?’, tu phen: ‘Naj.’”
21Kana o Sisra zurale zasuta taro umor, i Jaela, e Heveresi romni, lija e šatoreso ćilo thaj o čekići, pa avili pozala dži leste. Voj čhuta lese o ćilo ki slepoočnica thaj čalada gaći zurale kaj o ćilo nakhlo lese maškaro šoro thaj dija ani phuv, pa vov sigate mulo.
22Tegani o Varak avilo te rodol e Sisra, i Jaela avili angle leste thaj phenda: “Av andre te sikavav tuće e manuše save rode.”
Kana đelo andre, dikhlja kaj o Sisra mulo thaj so o ćilo si ane lesi slepoočnica.
23Ane gova đive angle Izraelcura o Dol pokorisada e hanaanskone caro e Javine. 24E Izraelcura marde pe sa pozurale protiv o Javin, o hanaansko caro, sa dži kaj ni uništisade le.
දැනට තෝරාගෙන ඇත:
Sudije 4: GSP
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න