Sudije 10
10
O Tola
1Palo Avimeleh, sudija sasa o Tola tare Isahareso pleme, čhavo e Puaso thaj unuko e Dodoveso, te spasil o Izrael. Bešlo ano Šamir, ke Efremese bregura. 2O Tola sasa sudija ano Izrael bištetrin (23) berš. A kana mulo, prahosade le ano Šamir.
O Jair
3Palo Tola, sudija sasa o Jair o Gilađanino, savo sudisada ano Izrael bišteduj (22) berš. 4Sasa le tranda (30) čhave, save jašina tranda heren. Von ićarena tranda forura ano Gilad save dži avđive akhardon Havot-Jair#10,4 Havot-Jair Kava značil: E Jairese naseljura.. 5Kana o Jair mulo, prahosade le ano Kamon.
E Izraelcura palem ćeren greh
6E Izraelcura palem lije te ćeren kova so si bilačhe ane jakha e GOSPODESE. Služisade e Vaalenđe thaj e Astartenđe, e aramskone devlenđe, e sidonskone devlenđe, e moavskone devlenđe, e amonskone devlenđe thaj e filistejskone devlenđe. A e GOSPODE ačhade thaj ni služisade lese vadži.
7Golese o GOSPOD holajlo pe Izraelcura thaj dija len ane vasta e Filistejcurenđe thaj e Amoncurenđe, 8save gova berš zurale marde len thaj čhute len ano ropstvo. Dešohto (18) berš mučinasa sa e Izraelcuren tari istočno rig e Jordanesi, ano Gilad, ani phuv e Amorejcurenđi. 9E Amoncura nakhle prekali len o Jordan te čalaven pe Judejcura, pe Venijamincura thaj pe Efremcura. O Izrael arakhlja pe ani bari nevolja.
10Tegani e Izraelcura lije te roven premalo GOSPOD: “Grešisadam protiv tute, golese so ačhadam tut, amare Devle, thaj služisadam e Vaalenđe.”
11O GOSPOD odgovorisada e Izraelcurenđe: “Kana mučisade tumen e Egipćanura, e Amorejcura, e Amoncura, e Filistejcura, 12e Sidoncura, e Amalečanura thaj e Maoncura, a tumen lijen te roven premal mande, dal ni spasisadem tumen andare lenđe vasta? 13Al tumen ačhaden man thaj služisaden avere devlenđe. Golese, palem ni ka spasiv tumen. 14Džan thaj roven premale dolura save birisaden tumenđe. Von nek spasin tumen kana ka aven ani nevolja!”
15Al e Izraelcura phende e GOSPODESE: “Grešisadam! Ćer amencar sar de gođi kaj si šukar, al moli tut avđive te spasi amen.”
16Tegani čhudije pestar e abandžijenđe devlen, pa služisade e GOSPODESE. A o GOSPOD naštine vadži te dićhol sar o Izrael patil.
17Kana e Amoncura ćidije pe vojska thaj ćerde pese logori ano Gilad, e Izraelcura ćidije pe thaj ćerde logori ani Micpa.
18Tegani e giladska šorutne vaćarde jekh averese: “Kova savo inđarol amen ano maripe pe Amoncura, nek avol vladari pe sa e manuša taro Gilad.”
දැනට තෝරාගෙන ඇත:
Sudije 10: GSP
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න